އިންޑިއާގެ މުމްބާއީގައި ބޭއްވި 'ބޮލީވުޑް މިއުޒިކް ޕްރޮޖެކްޓް'ގެ 10 ވަނަ އަހަރީ އެޑިޝަންގެ ސްޓޭޖްމަތީގައި ލަވަކިޔަމުން ދަނިކޮށް، ޤައުމީ އެވޯޑް ހާސިލުކޮށްފައިވާ މަޝްހޫރު ލަވަކިޔުންތެރިޔާ ޝިލްޕާ ރާއޯގެ މައިކާއި އަލިތައް ކުއްލިއަކަށް ކަނޑާލި މައްސަލަ އޯލް އިންޑިއާ ސައިން ވޯކާސް އެސޯސިއޭޝަން (އޭއައިސީޑަބްލިއުއޭ)އިން ހަރުކަށި ޢިބާރާތުން ކުށްވެރިކޮށްފިއެވެ.
އެ ޖަމިއްޔާއިން އިއްޔެ ނެރުނު ރަސްމީ ބަޔާނެއްގައި، އިންތިޒާމުކުރި ފަރާތްތަކުގެ މި އަމަލަކީ އެއްގޮތަކަށްވެސް ބަލައިގަނެވޭނެ ފަދަ ކަމެއް ނޫން ކަމަށް ބުނެ ވަނީ ވަރަށް ބޮޑަށް ނުރުހުން ފާޅުކޮށްފައެވެ.
ހޮނިހިރު ދުވަހުގެ ރޭ ހިނގައިދިޔަ މި ހާދިސާ ސިފަކުރަމުން އޭއައިސީޑަބްލިއުއޭ އިން ބުނީ، ޝިލްޕާގެ ހުށަހެޅުން ކުރިއަށް ދަނިކޮށް ގަދަކަމުން ސައުންޑާއި ލައިޓް ނިއްވާލުމަށްފަހު، އޭނާ ބެލުންތެރިންނާ މުޚާތަބުކުރަން ހުއްޓައި އެހެން ލަވަކިޔުންތެރިއެއް ކަމަށްވާ ކުތުލޭ ޚާން ސްޓޭޖަށް އަރުވައި ލަވަކިޔަން ފުރުސަތު ދީފައިވާ ކަމަށެވެ.
މިއީ ޝިލްޕާ ފަދަ ޤައުމީ ފެންވަރުގެ މަޤުބޫލު ފަންނާނެއްގެ ކަރާމާތާއި ޤަދަރަށް ސީދާ ގޮތެއްގައި އަރައިގަތުން ކަމަށް ބަޔާނުގައި ވެއެވެ. މިފަދަ ބޭއިންސާފު ގޮތަކަށް އޭނާގެ ހުށަހެޅުން ހުއްޓުވާލި ވަގުތުވެސް، ޝޯ ބަލަން ހާޒިރުވެ ތިބި އެތައް ހާސް ބެލުންތެރިންނެއް ވަނީ ޝިލްޕާގެ ނަމުން އަޑުއުފުލައި، އޭނާއަށް އޮތް ލޯތްބާއި ސަޕޯޓް ސާބިތުކޮށްދީފައެވެ. މި ހާދިސާއާ ގުޅިގެން ޝިލްޕާ އިންސްޓަގްރާމްގައި ހިއްސާކުރި މެސެޖެއްގައި ވަނީ، މިކަމުގެ ސަބަބުން ހިތުގައި ވަރަށް ބޮޑަށް ޖެހުނު ކަމަށާއި ނަމަވެސް ބެލުންތެރިން ދިން ހިތްވަރަށް ފަށްފަށުން ޝުކުރުއަދާކުރާ ކަމަށް ބުނެފައެވެ.
ޝިލްޕާ މިއުޒިކް ކޮންސެޓެއްގައި ލަވަ ހުށަހަޅައިދެނީ--ފޮޓޯ/އެންޑީޓީވީ ފަންނާނުންގެ ޙައްޤުތަކަށް ވަކާލާތުކުރަމުން ސިނަމާ މަސައްކަތްތެރިންގެ ޖަމިއްޔާއިން ބުނީ، ޝޯ އިންތިޒާމުކުރި ފަރާތްތަކާ ދެކޮޅަށް ޤާނޫނީ ފިޔަވަޅެއް އަޅަން ޝިލްޕާ ބޭނުންވެއްޖެ ކޮންމެ ހިނދެއްގައިވެސް އޭނާއަށް ފުރިހަމަ ޙިމާޔަތާއި އެއްބާރުލުން ދޭނެ ކަމަށެވެ. އަދި ފައިސާ ދީގެން ސްޓޭޖަށް ގެންނަ ކޮންމެ ފަހަރަކު ފަންނާނުންނަކީ އެމީހުންގެ މިލްކެއްގެ ގޮތުގައި ނުދެކުމަށާއި، ފަންނާނުން ބޭނުންވަނީ އިޙުތިރާމް ކަމަށް ބަޔާނުގައި ހަނދާންކޮށްދީފައިވެއެވެ. މީގެއިތުރުން، ފަންނާނުންނާ މެދު މިފަދައިން އިހާނެތިކޮށް އަމަލުކުރާނަމަ ކުރިމަގުގައި އެމީހުންގެ އިވެންޓްތަކުގައި ބައިވެރިވުމަށް ފަންނާނުން ދެކޮޅުހަދާނެ ކަމުގެ އިންޒާރުވެސް އެ ޖަމިއްޔާއިން ވަނީ ދީފައެވެ.
މައްސަލަ އިންތިހާއަށް ހޫނުވެގެން ދިއުމާ ގުޅިގެން، ބޮލީވުޑް މިއުޒިކް ޕްރޮޖެކްޓް އިންތިޒާމުކުރާ ފަރާތުން ވަނީ ރަސްމީކޮށް މާފަށް އެދި ބަޔާނެއް ނެރެފައެވެ. އެ ބަޔާނުގައި ޝިލްޕާ އަކީ އެމީހުން އިންތިހާއަށް އިޙުތިރާމްކުރާ ފަންނާނެއްކަން ފާހަގަކޮށް، މިފަދަ ބޮޑެތި ފެސްޓިވަލްތަކުގައި ކުރީގެ ޕާފޯމަންސްތައް ދިގުލައިގެން ދިއުމުން މުޅި ޝެޑިއުލަށް ބުރޫއަރާ ކަމަށް ބުނެފައިވެއެވެ. އަދި ކަމާބެހޭ އިދާރާތަކުން ކަނޑައަޅާފައިވާ ސަރަހައްދީ ވަގުތު ހަމަވެ ކާފިއު ވަގުތު ޖެހުމުގެ ސަބަބުން، ހިތާމައާއެކުވެސް ޝިލްޕާގެ ޕާފޯމަންސް ކުރުކޮށްލަން މަޖުބޫރުވީ ކަމަށް އެ ފަރާތުން ބަޔާންކުރިއެވެ.
މި ހާދިސާއަކީ އެމީހުންގެ ކޮންޓްރޯލުން ބޭރުން ދިމާވި ހިތާމަވެރި ކަމެއް ނަމަވެސް، ޝިލްޕާގެ ހުށަހެޅުން ފުރިހަމައަށް ކުރިއަށް ނުގެންދެވުމުން ނުހަނު މާފަށް އެދޭ ކަމަށްވެސް އެ ބަޔާނުގައި ފާހަގަކޮށްފައިވެއެވެ.