އެއް އަހަރުގެ ތުއްތު ކުއްޖަކަށް ޓެކްސީއެއްގެ ތެރެއަށް ހޮޑު ލެވުމުން، ޓެކްސީ ދުއްވަން އިން ޑްރައިވަރު އެ ސާފުކުރުމަށް 1،500 ރުފިޔާއަށް ޑިމާންޑުކޮށްފިއެވެ.
މިއީ މާފުށީގައި ދިރިއުޅޭ ހައްވާ އަހްމަދު ހަފުތާ ބަންދަށް ހުޅުމާލެ އައުމަށްފަހު އެނބުރި ރަށަށްދާ ފެރީއަށް ދިއުމަށް ޓެކްސީގައި ކުރި ދަތުރެވެ.
'ސަން' އަށް މައުލޫމާތު ދެމުން ހައްވަ ބުނީ އޭނާ ހުޅުމާލެއިން ޓެކްސީއަށް އެރީ މާފުއްޓަށް ދިއުމަށް އިއްޔެ ހަވީރު 5:15 ގައި ފުރި ލޯންޗަށް ދިއުމަށް ކަމަށެވެ. 'ނަލަ ޓެކްސީ' އިން ނެގި އެ ޓެކްސީ ފުރަތަމަ މަޑުކުރުމުން ވެސް 5:15 އަށް ދެވޭނެތޯ ސުވާލުކުރުމުން ދެވޭނެ ކަމަށް ޑްރައިވަރު ބުނިކަމަށް އޭނާ ބުންޏެވެ.
ހައްވަ ބުނީ އޭނާ ޓެކްސީއަށް އެރީ އޭނާގެ ތިން ކުދިން ގޮވައިގެން ކަމަށާއި އެއް އަހަރުގެ ދަރިފުޅު އިނީ 13 އަހަރުގެ ދަރިފުޅު އަތުގައި ކަމަށެވެ. އެއް އަހަރުގެ ކުޑަ ދަރިފުޅަކީ މީގެ ކުރީން ދަތުރު ކުރިއިރު ހޮޑުލާ ކުއްޖެއް ނޫންކަން ފާހަގަކޮށް ހައްވަ ބުނީ އެކަމަށް އޭނާ އިނީ ތައްޔާރުވެގެން ނޫންކަމަށެވެ.
ކާރު ބުރިޖުން ފައިބާން ދަނިކޮށް ކުޑަ ކުއްޖާއަށް ހޮޑުލެވުމުން، އެވާހަކަ ޑްރައިވަރު ގާތުގައި ބުނުމުން ފުރަތަމަ ވެސް ޑިމާންޑުކުރީ ފައިސާއަށް ކަމަށް ހައްވަ ބުންޏެވެ.
"ބުރިޖުމް ފައިބަނިކޮށް ހޮޑު ލެވުނީ. ހޮޑުލެވުނު ވާހަކަ ބުނީމަ ފުރަތަމަ ވެސް ބުނީ ތިކުރީ ވަރަށް ގޯސް ކަމެކޭ. 1،500 ރުފިޔާ އަރާނޭ ތިކަމަށް. މަށަށް ބުނެވުނީ ފުރަތަމަ ވެސް 1،500 ހާދަ ބޮޑު އެއްޗެކޭ. ބުނީމަ ބުނީ އަރާނެއޭ އެހާވަރު. އެކަމު ވަރަށް ކުޑަކުޑަ ތަންކޮޅަކަށް ދެ ސީޓު ދޭތެރެއަށް ހޮޑުކޮޅެއް ލެވިފަ ހުރީ،" ހައްވަ ކިޔައިދިނެވެ.
ހައްވަ ދަތުރުކުރި 'ނަލަ ޓެކްސީ'ގެ ކާރު --- ފޮޓޯ: މިސީ ޔަލީނާ، ފޭސްބުކް ހައްވަ ބުނީ ހޮޑު ލެވުނު ތަންކޮޅު ސާފުކޮށްލުމަށް ޓިޝޫއަކަށް ޑްރައިވަރު ގާތުގައި ބުނުމުން ފަހަތަށް ބަލާލުމެއް ވެސް ނެތި ދެވަނަ ފަހަރަށް ވެސް އޭނާ ޑިމާންޑުކުރީ ފައިސާއަށް ކަމަށެވެ. ދަރިފުޅަށް ހޮޑުލެވުނީ އޭނާގެ ގަޔަށް ކަމަށާއި ކާރުގެ ސީޓަށް އެޅުނީ ވަރަށް ކުޑަ އެތިކޮޅެއްކަން ހައްވަ ފާހަގަކުރިއެވެ.
ދެވަނަ ފަހަރަށް އޭނާ ޓިޝޫއެއް ދިނުމަށް އެދުމުން، ޓެކްސީގެ ފަހަތުގައި ހޮޑުލުމަށް ބޭނުންކުރާނެ ކޮތަޅު ހުންނާނެ ކަމަށާއި ދަރިފުޅު ޓެކްސީއަށް ހޮޑު ލެއްވީ ކީއްކުރަންތޯ ޑްރައިވަރު ވަރަށް ރުންކުރުކޮށް ސުވާލުކުރި ކަމަށް ހައްވަ ބުންޏެވެ.
"އަހަރެން ބުނިން ޑްރައިވަރު އެހެން ބުނީމަ ބޭބީ މިއޮއްވަރަށް ދަތުރުކުރާއިރުވެސް ހޮޑު ނުލައޭ. އެހެންވީމަ ނޭނގޭނެ ނޫންހޭ ކޮތަޅު ނަގާކަށް. ވަރަށް ރޫޑްކޮށް ވާހަކަދެއްކީ. ޑްރައިވަރު ކާރީގަ ޓިޝޫވެސް ހުރި. އެކަމް ދެފަހަރު މަތިން ޓިޝޫއަށް އެދުމުން ޓިޝޫއެއް ވެސް ނުދިން،" ހައްވަ ކިޔައިދިނެވެ.
ހައްވަ ބުނީ އެކަމާ އޭނާ ވާހަކަ ދައްކަންފެށުމުން "ތިގޮތަށް ވާހަކަ ދައްކަންޏާ ތިމަންނަ ކުރާ ކަންކަމަށް ވެސް ފައިސާ ނަގާނެ" ކަމަށް ޑްރައިވަރު ބުނިކަމަށެވެ. އަދި އެހާހިސާބުން އޭނާ ފިރިމީހާއަށް ގުޅި ކަމަށާއި، ފިރިމީހާ ސުވާލުކުރުމުން އޭނާ އެެހެން ނުބުނާ ކަމަށް ބުނި ކަމަށެވެ.
"ފިރިމީހާ ބުނީ ހާދަ ބޮޑު އަދަދެކޭ. ބުނީމަ ބުނީ އެތަން ސާފުކުރަން އަރާނެއޭ އެހާވަރު. ދެން ފިރިމީހާ އެހީ ޑްރައިވަރު ކުރާ ކޮން ކަމަކަށް ތޯ އިތުރަށް ލާރި ނަގަނީ. ބުނީމަ ބުނީ އޭނާ ނުބުނަމޯ އެހެންނެއް. ދެން ފިރިމީހާ ބުނި އެހާ ވަރެއް ނާރާނެއޭ. ކާރު ގަރާޖަށް ގެންގޮސްފަ ސްލިޕް ފޮނުވާށޭ. އެގޮތަކަށްވެސް ގަބޫލެއް ނުވި. އެންމެފަހުން ފިރިމީހާގެ ފޯނު ނަމްބަރާ ވައިބާ ނަމްބަރު ދިނީމަ ލޯންޗު ފުރަން އެއް މިނެޓަށް ވެފަ އޮއްވާ އަހަރުމެން ލޯންޗަށް ގެންގޮސްދިނީ." ހައްވަ ކިޔައިދިނެވެ.
ހައްވަ ބުނީ އެމީހުންނަށް ރަށަށް ދެވެންދެން ޑްރައިވަރު ފިރިމީހާއަށް ގުޅި ކަމަށެވެ. އަދި އެއަށްފަހު ޑިމާންޑުކުރިވަރު ބޮޑު ކަމަށް ބުނުމުން ފަހުން 1،000 ރުފިޔާ ދޭން ބުނިކަމަށެވެ. އަދި ދޭނަމޭ ބުނެވިފައި އޮތުމުން ފިރިމީހާ އެ ޑްރައިވަރަށް 1،000 ރުފިޔާ ދިނުމަށްފަހު އެ މައްސަލަ ނިންމާލި ކަމަށް ހައްވަ ކިޔައިދިނެވެ.
ހައްވަ ވަނީ އެ ކަން ހިނގާ ދިޔަ ގޮތާ ގުޅޭ ގޮތުން ފޭސް ބުކްގައި ޕޯސްޓެއް ވެސް ޖަހާފައެވެ. އަދި ޕޯސްޓު ޖެހުމުން ޑްރައިވަރު ފިރިމީހާއަށް ގުޅި ކަމަށް ވެސް ހައްވަ ކިޔައިދިނެވެ.
މާލެތެރޭގައި ދަތުރުކުރާ ޓެކްސީތަކުން މިފަދަ ކަންކަން ހިނގުމުން ފަސިންޖަރުންނަށް އެހީތެރިކަމެއް ނުދީ، ގިނައިން ފައިސާ ނަގާ ވާހަކައަކީ ވަރަށް އާންމު ކަންބޮޑުވުމެކެވެ. ހައްވަ ވަނީ މީގެ ކުރިން އޭނާ އެއާޕޯޓުން މާލެއަށް ކުރި ދަތުރަކުން ވެސް އޭނާ އަތުން ޑްރައިވަރަކު 200 ރުފިޔާ ނެގި ކަމަށް ވެސް ބުނެފައެވެ.