ރާއްޖޭގެ ވިޔަފާރިތަކާއި ބޭރުގެ އިންވެސްޓްމަންޓްތައް ހިމާޔަތްކުރުމަށް ޓަކައި، ބައިނަލްއަގްވާމީ ފެންވަރުގެ ފަނޑިޔާރުން ހިމެނޭ ގޮތަށް 'މާކެންޓައިލް ކޯޓު' (ވިޔަފާރި ޚާއްސަ ކޯޓު) ތަކެއް ގާއިމުކުރަންޖެހޭ ކަމަށް ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް މިރޭ ވިދާޅުވެއްޖެއެވެ.
އައްޑޫ ސިޓީ ފޭދޫގައި މިރޭ ބޭއްވި ޖަލްސާއެއްގައި ވާހަކަދައްކަވަމުން ޔާމީން ވިދާޅުވީ، ރާއްޖޭގެ މިހާރުގެ ޝަރުއީ ނިޒާމަށް އޮތް އިތުބާރު ކުޑަވެފައިވާ ކަމަށާއި، ބޮޑެތި ވިޔަފާރިތަކުގައި ދިމާވާ މައްސަލަތަކާއި ދެބަސްވުންތައް ހައްލުކުރުމަށް ސިންގަޕޫރު ފަދަ ގައުމުތަކުގައި ޕްރެކްޓިސްކޮށްފައި ތިބި ގާބިލު ފަނޑިޔާރުން ގެނެސްގެން ޚާއްސަ ކޯޓުތަކެއް ހިންގުމަކީ މުހިންމު ކަމެއް ކަމަށެވެ.
ޔާމީން ފާހަގަކުރެއްވި ގޮތުގައި، މިފަދަ ނިޒާމެއްގެ ތެރެއިން ވިޔަފާރި މައްސަލަތަކަށް ގާތްގަނޑަކަށް ވިއްސަކަށް ދުވަހުގެ ތެރޭގައި އަވަސް ނިޔާއެއް ލިބިގެންދާނެއެވެ. އަދި ބޭރުން ގެންނަ މިފަދަ ފަނޑިޔާރުންނަކީ ދައުލަތަށް ވިޔަސް އަދި މައްސަލައިގެ އެއްވެސް ޚަސްމަކަށް ނުފޫޒު ފޯރުވޭނެ ބައެއް ނޫންކަމަށް އެމަނިކުފާނު ވިދާޅުވިއެވެ.
"އަޅުގަނޑުގެ ވިސްނުމަކީ މިކަހަލަ ބޮޑެތި އިންވެސްޓްމަންޓްތައް، ދިވެހިންގެ އަދި ރާއްޖޭގެ ފޮރިން އިންވެސްޓްމަންޓްތައް ހިމާޔަތްކުރުމަށް ވަރުގަދަ ޤާނޫނުތަކުގެ އިތުރުން ނުފޫޒު ނުފޯރުވޭ، ބޭނުން ގޮތަކަށް ނުގަނެވޭ ފަދަ ވަރުގަދަ ފަނޑިޔާރުންތަކެއް ތިބެންޖެހޭނެ،" ރައީސް ޔާމީން ވިދާޅުވިއެވެ.
ރާއްޖޭގެ ޓޫރިޒަމް އިންޑަސްޓްރީއަކީ އެތައް ބިލިއަން ޑޮލަރެއްގެ އިންވެސްޓްމަންޓެއް އެކުލެވޭ ދާއިރާއެއްކަން ފާހަގަކުރައްވަމުން އެމަނިކުފާނު ވިދާޅުވީ، މިފަދަ ބޮޑު ސިނާޢަތެއްގެ ހައްގުގައި އެކަށީގެންވާ ފިޔަވަޅުތަކެއް އަޅަންޖެހޭ ކަމަށެވެ. އަދި މިފަދަ ކޯޓުތަކަށް ބޭރުން ގެންނަ ފަނޑިޔާރުންނަށް މަހަކު 500،000 ޑޮލަރު މުސާރައިގެ ގޮތުގައި ދޭން ޖެހުނު ނަމަވެސް، އެއީ ރާއްޖެއަށް ތަޙައްމަލު ކުރެވިދާނެ އަދި ކުރަންޖެހޭ ޚަރަދެއް ކަމަށް އެމަނިކުފާނު ވިދާޅުވިއެވެ.
ޔާމީން މިފަދައިން ވިދާޅުވިއިރު، ވަރަށްފަހުން ވެސް ބޭރުގެ ޓުއާ އޮޕަރޭޓަރުންނާއި ރާއްޖޭގެ ފަތުރުވެރިކަމުގެ ސިނާއަތުގެ ވިޔަފާރިވެރިން ވަނީ ސަރުކާރުން ގާނޫނަށް ގެނައި އިސްލާހުތަކަކާ ދޭތެރޭ ކަންބޮޑުވުން ފާޅުކޮށްފައެވެ.