އެމެރިކާގެ އެންމެ ބޮޑު އެއް ޓެލެކޮމް ކުންފުނި ކަމަށްވާ އޭޓީ އެންޑް ޓީގެ ނެޓްވޯކް ބޭނުންކުރާ އައިފޯން 18 ޕްރޯ މެކްސް ބޭނުންކުރާ ބައެއް ފަރާތްތަކަށް ސެލިއުލާ ހިދުމަތް މުޅިން ކެނޑެމުންދާތީ، އެ މައްސަލަ ހައްލުކުރުމަށް އެޕަލް ކުންފުނިން އެފަދަ ފަރާތްތަކަށް އާ ފޯނު ދޭން ފަށައިފިއެވެ.
ސެލިއުލާ ނެޓްވޯކް ކެނޑުމުގެ ސަބަބުން މި ފޯނުތަކުން ކޯލް ކުރުމާއި، މެސެޖު ފޮނުވުމާއި އަދި މޯބައިލް ޑޭޓާ ބޭނުންކުރުން މުޅިން ހުއްޓި، އިންޓަނެޓާ ގުޅުވައިދޭ ހަމައެކަނި ވަސީލަތަކަށް ވައިފައި ވަނީ ވެފައެވެ.
މި މައްސަލައާ ގުޅިގެން އެޕަލްއިން ބްލޫމްބާގަށް ދީފައިވާ ބަޔާނެއްގައި ބުނެފައިވަނީ، އޭޓީ އެންޑް ޓީ ނެޓްވޯކުގައި އައިފޯން 18 ޕްރޯ މެކްސް ބޭނުންކުރާ މަދު އަދަދެއްގެ ކަސްޓަމަރުންނަށް ނެޓްވޯކް ކެނޑި، ކޯލް ނުކުރެވޭ މައްސަލައެއް ފާހަގަކުރެވިފައިވާ ކަމަށެވެ.
އެޕަލްއިން ވަނީ އިތުރު ފޯނުތަކަށް މި މައްސަލަ ދިމާވުން ހުއްޓުވުމަށްޓަކައި ކެރިއާ ސެޓިންގްސް އަޕްޑޭޓަކާއި އައިއޯއެސް 27.0.1ގެ އަޕްޑޭޓް ނެރެފައެވެ. ނަމަވެސް، މިހާރުވެސް ސިގްނަލް މުޅިން ކެނޑިފައިވާ ފޯނުތަކަށް އޮތް ހަމައެކަނި ހައްލަކީ އެޕަލް ނުވަތަ އޭޓީ އެންޑް ޓީ މެދުވެރިކޮށް މުޅިން އާ ފޯނެއް ހޯދުން ކަމަށް އެ ކުންފުނިން ބުނެއެވެ.
އަގު 1,299 އެމެރިކާ ޑޮލަރުން ފެށޭ އައިފޯން 18 ޕްރޯ މެކްސްއަކީ ވިއްކަން ފެށިތާ އަދި ދެ ހަފުތާ ވެފައިވާ، އެޕަލްގެ އެންމެ ފަހުގެ އެންމެ މަތީ ފެންވަރުގެ އުފެއްދުން ----މި މައްސަލަ ކުރިމަތިވި ކަސްޓަމަރުން ބުނާ ގޮތުގައި ފޯނުގެ ސިގްނަލް ކެނޑި، އިމަޖެންސީ "އެސްއޯއެސް" މޯޑަށް ފޯނު ބަދަލުވެއެވެ. އީ-ސިމް އަލުން ކޮންފިގާ ކުރުމާއި، އައިއެމްއީއައި އަދި އީއައިޑީ ކަށަވަރުކުރުމާއި، ވައިފައި ކޯލިން އެކްޓިވޭޓް ކުރުމާއި އަދި ނެޓްވޯކް ސެޓިންގްސް ރީސެޓް ކުރުން ފަދަ އާންމު ހުރިހާ ހައްލުތަކެއް މެދުވެރިކޮށްވެސް މި މައްސަލައަށް އެއްވެސް ކުރިއެރުމެއް ލިބިފައެއް ނުވެއެވެ. ބައެއް ފަރާތްތަކުން ބުނެފައިވަނީ އައިއޯއެސް 27.0.1 އަށް އަޕްޑޭޓް ކުރުމުންވެސް މައްސަލަ ހައްލުނުވެ، ފޯނު މުޅިން "އެސްއޯއެސް" މޯޑުގައި ތާށިވެ، ހާލަތު އިތުރަށް ގޯސްވި ކަމަށެވެ.
އޭޓީ އެންޑް ޓީއިން ވަނީ މިއީ އެޕަލްއާ ގުޅިގެން ތަހުގީގު ކުރަމުންދާ މައްސަލައެއްކަން ކަސްޓަމަރުންނަށް ކަށަވަރުކޮށްދީފައެވެ. އެ ކުންފުނިން ބުނެފައިވަނީ މައްސަލަ ދިމާވާ ސަބަބު ދެނެގަތުމުގެ މަސައްކަތް ހާއްސަ ޓީމަކުން ކުރަމުންދާ ކަމަށާއި، މިއީ ހާޑްވެއާ މައްސަލައެއްތޯ ނުވަތަ ސޮފްޓްވެއާ މައްސަލައެއްތޯ ބަލަމުންދާ ކަމަށެވެ. އަދި މައްސަލަ ދިމާވެފައިވާ ކަސްޓަމަރުންގެ މައުލޫމާތު ނެގުމަށްފަހު، ފޯނު ބަދަލުކުރަންޖެހޭ ހާލަތެއްގައި ސީދާ ކަސްޓަމަރަށް ގުޅައިގެން ކުރިއަށްދާނެ ގޮތް އަންގާނެ ކަމަށްވެސް އެ ކުންފުނިން ބުނެއެވެ. ނަމަވެސް މައްސަލަ މުޅިން ހައްލުވާނެ ވަކި ތާރީހެއް އަދި ހާމަކޮށްފައެއް ނުވެއެވެ.
ކެރިއާ ސެޓިންގްސް އަޕްޑޭޓަކީ މުޅި އޮޕަރޭޓިން ސިސްޓަމް އަޕްޑޭޓް ނުކޮށް، ނެޓްވޯކާ ގުޅޭ ސެޓިންގްސްތައް ބަދަލުކުރުމަށް އެޕަލްއާއި ކެރިއާ ކުންފުނިތަކަށް ލިބޭ ވަސީލަތެކެވެ. އޭޓީ އެންޑް ޓީ ބޭނުންކުރާ ފަރާތްތަކަށް ކުރިއަށްއޮތް 14 ދުވަހުގެ ތެރޭގައި މި އަޕްޑޭޓް އޮޓޮމެޓިކުން ލިބޭނެ ކަމަށް ބެލެވޭއިރު، ފޯނުގެ ސެޓިންގްސްއަށް ގޮސް ޖެނެރަލް އަދި އެބައުޓްއަށް ވަދެގެންވެސް އަޕްޑޭޓް ލިބިފައިވޭތޯ ބެލޭނެއެވެ. ނަމަވެސް، މައްސަލަ ދިމާވެފައިވާ ފޯނުތަކުގެ ސަރީހަ އަދަދާއި، ސިގްނަލް ކެނޑިފައިވާ ފޯނުތައް ބަދަލުކުރަންޖެހޭ ސަބަބެއް އެޕަލްއިން އަދި ހާމަކޮށްފައެއް ނުވެއެވެ.
މި މައްސަލައަށް ހާއްސަ ސަމާލުކަމެއް ލިބިފައިވަނީ އައިފޯން 18 ސީރީޒްގެ ތެރެއިން އައިފޯން 18 ޕްރޯ މެކްސްގައި ބޭނުންކޮށްފައިވަނީ ތަފާތު ސެލިއުލާ ހާޑްވެއާއަކަށް ވާތީއެވެ. އެމެރިކާގައި ނެރެފައިވާ އައިފޯން 18 ޕްރޯ މެކްސްގައި ބޭނުންކޮށްފައިވަނީ ކުއާލްކޮމްގެ މޮޑެމެކެވެ. ނަމަވެސް، ކުޑަ އައިފޯން 18 ޕްރޯ ހިމެނޭ ގޮތަށް އެ ސީރީޒްގެ އާ އެހެން މޮޑެލްތަކުގައި ބޭނުންކޮށްފައިވަނީ އެޕަލްގެ އަމިއްލަ ސީ2 މޮޑެމެވެ. އެހެންނަމަވެސް، މައްސަލަ ދިމާވަނީ ކުއާލްކޮމް މޮޑެމްގެ ސަބަބުންކަން އަދި ސާބިތުވެފައެއް ނުވެއެވެ.
އަގު 1,299 އެމެރިކާ ޑޮލަރުން ފެށޭ އައިފޯން 18 ޕްރޯ މެކްސްއަކީ ވިއްކަން ފެށިތާ ދެ ހަފުތާ ވެފައިވާ، އެޕަލްގެ އެންމެ ފަހުގެ އެންމެ މަތީ ފެންވަރުގެ ފޯނެވެ. މިއީ އޮކްޓޯބަރު 23 ގައި ނެރުމަށް ހަމަޖެހިފައިވާ ފޯލްޑަބަލް "އައިފޯން ޑުއޯ" ނެރުމުގެ ކުރިން އެޕަލްއިން ބާޒާރަށް ނެރުނު އެންމެ މުހިންމު އެއް އުފެއްދުމެވެ.
ފޯނެއްގެ ސެލިއުލާ ހިދުމަތް ބިނާވެގެންވަނީ ހަމައެކަނި މޮޑެމަށް ނޫން ކަމަށާއި، ފޯނުގެ އޮޕަރޭޓިން ސިސްޓަމާއި، ކެރިއާ ކޮންފިގްރޭޝަން އަދި ނެޓްވޯކް ގުޅުމުގެ މައްޗަށް ކަމަށްވާތީ، މިއިން ކޮންމެ ބައެއްގައި މައްސަލައެއް އުޅުނުކަމުގައި ވިޔަސް ސިގްނަލް ކެނޑުމުގެ ފުރުސަތު އޮންނާނެއެވެ.