"އޭނ.. ކީކޭ؟" ނަހާއަށް ޒަރޫން އެ ބުނި އެއްޗެއް ނޭނގުނެވެ.
ބުމަ އަރުވައިލަމުން އިތުރު ތަފްސީލަކަށް ނަހާ އެދުނެވެ.
"އެއްޗެކޭ ނޫން. ދެން ބުނެބަލަ! ޕޭޖުގަ ހުރި ފޮޓޯތައް އޯކޭއެއްނު!." ޒަރޫން ސުވާލުކޮށްލިއެވެ.
"އާނ. ރީތި!" ނަހާ ބުނެލިއެވެ.
"އެހެން ވިއްޔާ ނަހާ ވެސް އަހަރެންގެ ފައިނަލް ޕްރޮޑަކްޓަށް ވެއިޓްކުރަން ވާނެ! އެއަށްފަހު ހަޑި ވިއްޔާ ހަޑިކަމަށް ނިންމާނީ. އޯކޭ؟" ޒަރޫން ބުނެލިއެވެ. އޭނާގެ އަޑުގައިވަނީ އޭނާގެ މަސައްކަތާ މެދު ޔަޤީންކަމެކެވެ. ހަމަ އެއާއެކު ލުއި ހިނިތުންވުމެއް ވެސް އޭނާގެ ތުންފަތް މަތީގައި ވެއެވެ.
"ފައިން." ނަހާ ވެސް އެންމެ ފަހުން އެއްބަސްވިއެވެ. މަޝްވަރާކޮށް ނިންމައިލުމުން ޒަރޫން ކެމެރާ ހިފައިގެން ތެދުވުމުން ނަހާ ވެސް ތެދުވިއެވެ. އޭނާ ޒަރޫންއާ އެކު ކެފޭގެ ދޮރާ ހިސާބަށް ދިޔައެވެ.
"ސީ ޔޫ އިނގޭ." އެހެން ބުނެލާފައި ޒަރޫން ސައިކަލާ ދިމާލަށް ދާންވެގެން އެނބުރިލި ވަގުތަކީ ޔޫލިއާ އައިސް ކެފޭއަށް ވަންނަން ދިމާކުރި ވަގުތެވެ. ޒަރޫން ދިޔަ ދިމާލަށް ބަލަހައްޓައިގެން ހިނިތުންވެލައިގެން ހުރި ނަހާ ފެނުމާ އެކު ޔޫލިއާއަށް އޭނާއާ ދިމާކޮށްނުލާ ހުރެވޭ ގޮތެއް ނުވިއެވެ. އޭނާ ކަރު ކެހިލަމުން ވާހަކަ ދެއްކީ ނަހާއާ ދިމާކުރާ ޒާތަކަށެވެ. އޭރު އެމޫނުމަތިން ވެސް ފެންނަނީ ލާނެތް އަސަރުތަކެކެވެ.
"ކޮން ބިޓެއް ގޮވައިގެންތަ ތި އުޅެނީ؟" ޔޫލިއާ ބުނެލިއެވެ.
"ހޫން. ސާބަސް..." ނަހާ ބުނެލިއެވެ.
"ކިހިނެއްވީ؟ ބިޓެއް ނޫންތަ އެއީ؟" ޔޫލިއާ ހުރީ ސަމާސާ މޫޑެއްގައެވެ.
"ކޮން ބިޓެއް. އަހަރެން ބުނީމެއްނު ފޮޓޯ ނަގަން މީހަކު ލިބުނު ވާހަކަ. އޭނަ އެއީ." ނަހާ އޮޅުން ފިލުވައިދިނެވެ.
"އެހެންތަ؟ ދެން ކީއްވެޔޯ ޒާތަކަށް ހީނގަނެގެން ތިހުރީ؟ އަނެއްކާ އޭނައަށް ހިތް ކީތަ؟" ޔޫލިއާ ބުމަ އަރުވައިލިއެވެ.
"މޮޔަވީތަ؟" ނަހާ އެހެން ބުނެލާފައި ކެފޭ ތެރެއަށް ވަނުމުން އޭނާގެ ފަހަތުން ޔޫލިއާ ވެސް ވަނެވެ.
"އޭ. އަސްލު ވެސް އޭނަ ވަރަށް ހޭންޑްސަމް އިނގޭ. ހިތަށް އަސަރުކުރާ ކަހަލަ ގޮތެއް އެބަ ހުރި." ޔޫލިއާ އަދިވެސް ދައްކަނީ ޒަރޫންގެ ވާހަކައެވެ. "ކޮން ނަމެއްތަ ކިޔަނީ އޭނައަށް؟"
"ޒަރޫން." ނަހާ ބުނެލިއެވެ.
"އޯހް. ޔުނިކް ނޭމްއެކޭ ދޯ...." ޔޫލިއާ ބުނެލިއެވެ.
"ދެން ތި ވާހަކަ ބާއްވަބަލަ!. ކީއްކުރަންނޭ ތިއައީ؟" ނަހާ ބޭނުންވީ މައުޞޫއު އޮޅުވައިލަން ނަމަވެސް، ދެންމެ ޔޫލިއާ ދެއްކި ވާހަކަތަކާ މެދު އޭނާއަށް ފުރަތަމަ ފަހަރަށް ވިސްނައިލެވުނެވެ. ޔޫލިއާ އެދެއްކީ މުޅި އަކުން ދޮގު ވާހަކައެއް ނޫނެވެ. ޒަރޫންއަކީ ފިރިހެންވަންތަ ޒުވާނެކެވެ. ދިގު އިސްކޮޅަކާ އެކު ލިބިފައިވާ އޮޅަލި ކުލައިގެ ހަންގަނޑު ޒަރޫންގެ އެ ފިރިހެންވަންތަ ހަށިގަނޑާ ނުހަނު ގުޅެއެވެ. އަންހެން ކުދިން ގަޔާވާ ފަދަ ސިފަތަކެއް ޒަރޫންއަށް ލިބިފައިވެއެވެ. ސަކަ މިޒާޖެއް ހުރި ނަމަވެސް، މަސައްކަތަށް ފަރުވާ ބަހައްޓާކަން އޭނާގެ ވާހަކަތަކުންނާ އަމަލުތަކުން ދޭހަވެއެވެ. ހަމަ އެއާއެކު ޒަރޫންއަކީ ދާދި ފަސޭހައިން މީހުންނާ ރައްޓެހިވާ އަދި ބީރައްޓެހިކަން ފިލުވައިލަން ކުޅަދާނަ ޒުވާނެއްކަން ނަހާއަށް ދެނެގަނެވުނެވެ. ޒަރޫންއާ މެދު ޝައުޤުވެރިކަން އުފެދުނު ނަހާއަށް ވިސްނަން ހުރެވުނުކަން ރޭކާލީ ވެސް އޭނާގެ މޫނުމަތީގައި އަތް ހޫރައިލަމުން ޔޫލިއާ ވާހަކަ ދެއްކުމުންނެވެ.
"ކޮން ޚިޔާލަކަށް ގެއްލިފަ؟" އޭނަ ސުވާލުކޮށްލިއެވެ.
"މީ.. މީ ކެފޭގެ ކަންތަކާ... އަދި ވެސް ކުރަން ޖެހޭ ލައްކަ ކަންތައް އެބަ ހުރި." ނަހާ ބުނެލިއެވެ. އޭނާ އެ މޫނުމައްޗަށް ވެރިވަމުން ދިޔަ ޝުޢޫރުތައް ވަންހަނާކުރަން މަސައްކަތްކުރިއެވެ.
"ކޯންޗެއް ބޭނުމީ؟ ކޮފީ؟" ނަހާ ސުވާލުކޮށްލިއެވެ.
"ޔެސް. ބްލެކެއް." ޔޫލިއާ ބުނެލިއެވެ.
"މަގޭ ހިތަށް އަރާ ހަމަ މީރުވެގެންބާއޭ ޔޫލީ ބްލެކް ކޮފީ ބޮނީ. ހާދަ ނުބައި އެއްޗެކޭ އެއީ. ބްލެކް އެކަންޏެއް ނޫން. އެއް ވައްތަރެއްގެ ވެސް ކޮފީއެއް އަހަންނަކަށް ކަމަކު ނުދޭ!" ނަހާ ބުނެލިއެވެ. އެއަށް ފަހު އޭނާ ދެން އެނބުރުނީ ޖެނީއާ ދިމާލަށެވެ. "ޖެނީ. ވަން ބްލެކް ގެނެސްދީ އިނގޭ..."
އެހެން ބުނެލާފައި ޔޫލިއާ ގޮވައިގެން ގޮސް މޭޒުގެ ދޮށުގައި އިށީނުމަށް ފަހު އޭނާގެ ކުރިއަށް ހުރި ކަންތައްތަކުގެ ވާހަކަތައް ޔޫލިއާއަށް ކިޔައިދޭން ފެށިއެވެ.
*****
އަޔާދު ގެއަށް އައިސް ކޮޓަރިއަށް ވަން އިރު، ތަސާމާ އިނީ އެނދުގައި އިށީނދެލައިގެންނެވެ. އޭނާ އިނީ ފުން ވިސްނުމަކަށް ގެއްލިފައެވެ. މޫނުމަތިން ފެންނަނީ ނުތަނަވަސްކަމެވެ. ހަމައެއާއެކު ހިތާމައިގެ އަސަރުތައް ވެސް އޭނާގެ މޫނުމަތީގައި ވެއެވެ. ފިކުރުތަކުގެ ކަނޑެއްގެ ތެރޭގައި ފީނަމުން ތަސާމާ ދިޔަ ނަމަވެސް، އޭނާ ތުންފަތަށް މަސްނޫއީ ހިނިތުންވުމެއް ވެރިކޮށްލަމުން، އެނދުން ތެދުވެ ލޯބިވާ ފިރިމީހާ އަޔާދާ ދިމާލަށް ހިނގައިގަތެވެ. އަޔާދުގެ އަތުގައި އޮތް އޮފީސް ދަބަސް އަތުލަމުން އޭނާ، އެނބުރިލި ވަގުތު، އަޔާދު ހުޝިއާރުކަމާ އެކު ތަސާމާގެ އަތުގައި ހިފަހައްޓައިލަމުން އޭނާއާ ގާތަށް ދަމައިލިއެވެ. ނުވިސްނާ ހުރި ތަސާމާ އައިސް ތަތްވީ އަޔާދުގެ މޭމަތީގައެވެ. އޭނާގެ އަތް އަޔާދުގެ މޭގައި ވިއްދައިލެވުމާ އެކު ތަސާމާ އަޔާދުއަށް ބަލައިލާފައި ހިނިތުންވެލަން މަސައްކަތްކުރިއެވެ. ބޭނުންވީ ނުތަނަވަސްކަން އަޔާދަށް ފޮރުވަން ނަމަވެސް، އެކަމެއް ވެސް ތަސާމާއަކަށް ނުކުރެވުނެވެ. އެ ހިނިތުންވުމުގެ ފަހަތުގައި ފޮރުވިފައިވާ އިޙްސާސްތައް އަޔާދު ނިކަން ފަރުވާތެރިކަމާ އެކު ދެނެގަތްފިއެވެ.
"ކިހިނެއްވީތަ ލޯބީ؟" އޭނާ ލޯތްބާ އެކު ތަސާމާގެ ކޯތާފަތުގައި އަތްތިލަ ޖައްސައިލާފައި ސުވާލުކޮށްލިއެވެ.
"ނުވޭކަމެއް." ތަސާމާއަށް ބުނެވުނެވެ. ދެން ވެސް އޭނާ މަސައްކަތްކުރީ އިޙްސާސްތައް ފޮރުވާށެވެ. އެހެންނަމަވެސް އަޔާދު މާ ހުޝިއާރެވެ. އޭނާ ތަސާމާގެ ކޯތާފަތުގައި އަތް ޖައްސައިލައިގެން ހުރި ގޮތެއް ހުއްޓެވެ. ވީގޮތް ނުބުނެ ނުދެވޭނެޔޭ އޭނާގެ ދެލޮލުން އެކަނި ވެސް ބުނަމުން ދިޔަ ފަދައެވެ.
"ކޮންމެވެސް ކަމެއް ވެއްޖެ؟ އަނެއްކާ މަންމަ އެއްޗެކޭ ކީތަ؟ ނޫނީ ގޭ މީހަކު އެއްޗެއް ބުނީތަ؟" އަޔާދުގެ ވާހަކައާ އެކު ތަސާމާ އަވަސްއަވަހަށް ދެ ފަރާތަށް ބޯ ހޫރައިލިއެވެ.
"ދެން؟ ދެން ކިހިނެއްވީ؟" އަޔާދު ސުވާލުކޮށްލިއެވެ.
ތަސާމާ ތުންފަތުގައި ދަތް އަޅައިލިއެވެ. އެއަށް ފަހު އަޔާދުގެ އަތުތެރެއިން ވީއްލިގަނެގެން އޭނާ ދިޔައީ ޑްރެސިންގ ޓޭބަލްއާ ދިމާލަށެވެ. ޓެސްޓުކޮށްފައިވާ ޕްރެގްނެންސީ ކިޓު ހިފައިގެން އައިސް އެ އަޔާދުއަށް ދައްކައިލިއެވެ. އަޔާދު އޭގައި ހިފަމުން ބަލައިލިއެވެ.
"ލޭޓް ވީމަ ޓެސްޓް ކުރީ... އެކަމަކު.... " ތަސާމާ ތުންފަތުގައި ދަތް އަޅައިލައިގެން ހުރެ ބުނެލިއެވެ. ވެގެން އުޅޭ ގޮތް އަޔާދުއަށް ރޭކާލީ ދެނެވެ.
"މި ފަހަރު ވެސް ނެގެޓިވް." އުންމީދެއް ނެތް ފަދައަކުން ތަސާމާއަށް ބުނެވުނެވެ. މާޔޫސްކަމާއި އެއްވަރަށް ހިތާމައިގެ ސާލެއް އޭނާ ވަށާލާފައިވާ ފަދައެވެ. ހިތުގައި ވެސް ތަދެއް އުފަންވެލިއެވެ. އިނދެގެން ދެ އަހަރުވެފައިވާ އިރު ދަރިއަކު ހޯދުމަށް ޓަކައި، އެ ދެމަފިރިން ވަރަށް މަސައްކަތްކޮށްފިއެވެ. އެހެންނަމަވެސް، އަދި އެ ނަސީބެއް ނުލިބެއެވެ. ކައިވެންޏަށް ފަހު އަވަހަށް ދަރިއަކު ހޯދުމަކީ ހަމައެކަނި ތަސާމާގެ ހުވަފެނެއް ނޫނެވެ. އެއީ އަޔާދު ވެސް ބޭނުންވާ ގޮތެވެ. އަޔާދުގެ އުމުރުން މިހާރު 33 އަހަރެވެ. އެހެންނަމަވެސް، ކޮންމެ ފަހަރަކު ވެސް މާޔޫސްވަނީ ޓެސްޓްގެ ނަތީޖާ ބޭނުންވާ ގޮތަށް ނުނިކުންނާތީއެވެ. ކުރާ އުންމީދުތައް ފެނަށް ވެގެން ދާތީއެވެ. ޚުދު ތަސާމާއަށް ވެސް އަޔާދު ކުއްޖަކު ބޭނުންވާ މިންވަރު އިޙްސާސްކުރެވެއެވެ. އެންމެ ދެރަވަނީ އޭނާގެ ހުރި މައްސަލަތަކެއްގެ ސަބަބުން އެ ހުވަފެނުގައި ކުލަ ނުޖެހޭތީއެވެ. އޭނާއަކީ ސިއްޚީ މައްސަލަތަކެއްގެ ސަބަބުން މައްސަރުކަންތަކުގައި މައްސަލަ ޖެހޭ އަންހެނެކެވެ. ގަވައިދުން މައްސަރު ކަންތައް ނުޖެހުމާއި، ބައެއް ފަހަރު މައްސަރު ކަންތައް ދިގުލައިގެން ދިޔުން ފަދަ ކަންތައް ކުރިމަތިވެއެވެ. އެންމެ ފަހުން ފަހަރު ޑޮކްޓަރަށް ދެއްކުމުން ވެސް، ދިނީ އެއް ޖަވާބެކެވެ. ދަރިއަކު ހޯދަން އުނދަގޫ ވެގެން އުޅެނީ އެ ސަބަބުތަކާ ހެދިގެންކަމެވެ.
"ވަގުތު ޖެހުނީމަ އަދި އަހަރެމެންނަށް ވެސް ކުދިން ލިބޭނެ. އެކަމާ ކީއްވެ އެހާ ކަންބޮޑުވަނީ؟ އަހަރެން މި ހުރީނު. އަބަދު ވެސް އަހަރެން ތަސޫއާ އެކީ ހުންނާނަމޭ." އަޔާދު ބުނެލިއެވެ. އޭނާ ބެލީ ތަސާމާގެ ހިތްހަމަ ޖައްސައިލެވޭތޯ ނަމަވެސް، ޚުދު އޭނާ ވެސް، ހުރީ ދެރަވެފައެވެ. އެހެންނަމަވެސް، އެ އަސަރުތައް ފާޅުނުކޮށް ވޭތޯ މަސައްކަތްކުރީ އޭނާ ދެރަވެއްޖެކަން ތަސާމާއަށް އިޙްސާސްކުރެވޭ ނަމަ މާ ބޮޑަށް ދެރަވާނެކަން އިޙްސާސްވާތީއެވެ.
"އެކަމަކު...." ތަސާމާއަށް ބުނެވުނެވެ.
"ދެން އެކަމާ ނުވިސްނަބަލަ!. އަހަރެން ތަސޫ ދޫކޮށެއް ނުލާނަމޭ... ކީއްވެތަ އެހާ ކަންބޮޑުވަނީ؟" ތަސާމާއަށް ބަލައިލަމުން، އަޔާދު ބުނެލިއެވެ.
"ސޮރީ..." ތަސާމާއަށް ބުނެވުނެވެ.
"އަޅެ ކޮންކަމަކާތަ މާފަށް ތި އެދެނީ. މީ އަހަރެމެން އަމިއްލައަށް ކުރާކަމެއް ނޫނެއްނު. ނޫނީ ތަސޫ އަމިއްލައަށް ކުރާކަމެއް ވެސް ނޫނެއްނު. ދަރިން ދެއްވާ ފަރާތުން އިރާދުކުރެއްވިއްޔާ ވަގުތު ޖެހުނީމަ އަހަރެމެންނަށް ވެސް ލޯބިލޯބި ކުދިން ދެއްވާނެ." އަޔާދު ތަސާމާގެ ގައިގައި ބައްދައިލިއެވެ.
"ތެންކިއު..." ތަސާމާއަށް ބުނެވުނެވެ. އެފަދަ ހުރިހައި ދަނޑިވަޅެއްގައި ވެސް އޭނާއަށް ލިބޭ ހަމަ އެކަނި ހިތްވަރަކީ އަޔާދެވެ. އަޔާދުގެ ލޯބިލޯބި ފިރުމުންތަކާއި ހިތްވަރުގެ ބަސްތަކެވެ. އެފަދަ ވިސްނޭ، އޭނާ ދެކެ ލޯބިވާ ފިރިއަކު ލިބުނުކަމީ މިއަދު ތަސާމާ އިންތިހާއަށް އުފާކުރާކަމެކެވެ. އެ ދިރިއުޅުން އެގޮތުގައި އުޅެވޭ ސަބަބަކީ ވެސް އެއީއެވެ. އަޔާދު އޭނާއަށް ދޭ ޤަދަރާއި ކުރާ އިޙްތިރާމަކީ އެ ދެމީހުންގެ ކައިވެނީގެ ގުޅުމުގައި ވި އެންމެ ވަރުގަދަ ތަނބެވެ.
"އަހަރެން މިހުރީ ވަރަށް ބަނޑުހައިވެފަ. ނެތްތަ ކާއެއްޗެއް؟" އަޔާދު ތަސާމާ ދުރުކޮށްލަމުން ބަނޑުގައި އަތް ހާކާލަމުން ބުނެލިއެވެ. އެއާއެކު ތަސާމާ، އަޔާދުގެ ދަބަސް ގެންގޮސް ބަހައްޓަމުން ވާހަކަ ދެއްކިއެވެ.
"ހުންނާނެ ޕާސްތާ ހަދާފަ. ދޭބަ ފެންވަރައިލައިގެން އަންނަން. ދާހިތްލާފައެއްނު ތި ހުރީ." އަޔާދުއަށް ބަލައިލާފައި ތަސާމާ ބުނެލިއެވެ.
"އޯކޭ، އަންހެނުން ހަމަ ވިދާޅުވި ގޮތެއް." އަޔާދު ސަމާސާއެއް ކޮށްލިއެވެ. ދެންމެގެ ނުވަނަވަސްކަމުން ދުރުވެލުމަށް އޭނާ ހުރީ ބޭނުންވެފައެވެ. ހަމަ އެއާއެކު އެކަމުން ތަސާމާގެ ސިކުނޑި އެހެން ދިމާލަކަށް އަނބުރައިލަން ވެސް މެއެވެ. ތަސާމާ ތުވާލި ގެނެސް އަޔާދުއަށް ދިއްކޮށްލުމުން އޭގައި ހިފަމުން އަޔާދު ވެސް ގޮސް ފާޚާނާއަށް ވަނެވެ.
*****
ނަހާގެ ކެފޭގެ މަސައްކަތުގައި، އެ ހަފްތާގައި ޒަރޫން އުޅެން ޖެހުނީ ފުދޭވަރަކަށް ބުރަކޮށެވެ. ބައްޕައާ އެކު ގަރާޖުގެ މަސައްކަތްތައް ކޮށްފައި ކޮންމެ ދުވަހެއްގެ ވެސް ހަވީރު އޭނާ ކެފޭއަށް ދެއެވެ. އޭރު ނަހާ ހުންނަނީ އެ ދުވަހަކަށް ފޮޓޯ ނަގަންޖެހޭ ޑިޝްތައް ތައްޔާރުކޮށްފައެވެ. ހަވީރު ފޮޓޯނެގުމުގެ ކަންތައްތައް ކޮށްފައި ރޭގަނޑު ޕޯސްޓަރސް ހެދުމުގެ މަސައްކަތްތަކުގައި ފުދޭވަރަކަށް ދަންވަންދެން ވެސް އޭނާ އިންނަން ޖެހުނެވެ. އެ މަސައްކަތް ކޮށް ނިންމާލާފައި ނިދޭއިރު ހުންނަނީ އެކެއް ދޭއް ޖަހާފައެވެ. ޒަރޫން ވެސް ބޭނުންވަނީ ނަހާގެ އެ މަސައްކަތްތައް ވީ ހާ ވެސް އަވަހަކަށް ނިންމަން ކަމުން އޭނާ ވެސް ގިނަ އިރު މަސައްކަތްކުރަނީއެވެ.
ރޭގަނޑެކެވެ. މަސައްކަތް ނިންމާލާފައި ހިންދެމިލި ޒަރޫން އޭނާގެ ހަށިގަނޑުގައިވާ ވާންކަން ފިލުވާލުމަށް މީހާގެ ހަށިގަނޑު އެކި ދިމަ ދިމާލަށް ދަމައިލިއެވެ. ހިތްހަމަޖެހޭ ވަރުގެ މަސައްކަތެއް ކުރެވިއްޖެއެވެ. ދެން އޮތީ ނަހާގެ "އެޕްރޫވަލް" ހޯދުމެވެ. އެހެންކަމުން، އޭނާ ޑްރައިވްއަށް ހުރިހައި އެއްޗެއް އަޅައިލުމަށް ފަހު، ނަހާއަށް ހުރިހައި އެއްޗެއް މެއިލްކޮށްލިއެވެ. ތެދުވެ ގަޑި ބަލައިލި އިރު، ދޭއް ޖަހަނީއެވެ. އާފުރެމުން ޒަރޫން ގޮސް ފާޚާނާއަށް ވަނެވެ. ނިދުމުގެ ކުރިން ފެންވަރައިލުމަކީ އާދައަކަށް ވާތީ، ތާޒާވެލައިގެން ނުކުމެ ނިދަން ލާ ސޯޓު ލައިގެން އެނދުގައި ޖައްސައިލިއެވެ.
*****
ޖެހިގެން އައި ދުވަހު ޒަރޫން ކެފޭއަށް ދިޔައިރު، އާއްމުގޮތެއްގައި، ކަރުންޓަރު ދޮށުގައި ހުންނަ ނަހާ ފެންނާކަށް ނެތެވެ. އެތަނުގައި ހުރީ ވެއިޓަރެއް ކަމުގައިވާ ޖެނީއެވެ. އޭނާ ޖެނީއަށް ގޮވައިލާފައި، އެއްޗެހި ކައުންޓަރުމަތީގައި ބެހެއްޓިއެވެ.
"ކޮބާ ބޮސް؟" ޒަރޫން ސުވާލުކޮށްލިއެވެ. އެއާއެކު ޖެނީ އިޝާރާތްކުރީ ކެފޭގެ މޭޒެއްގެ ދޮށުގައި ލެޕްޓޮޕް ހުޅުވައިލައިގެން އިން ނަހާއަށެވެ. ޒަރޫން ފަސް އެނބުރުނެވެ. ޖެނީއަށް ބަލައިލާފައި، ކައުންޓަރު މަތީގައި ބެހެއްޓި ކޮތަޅުތައް ހިފައިގެން ޒަރޫން ހިނގައިގަތީ ނަހާއާ ދިމާލަށެވެ. އޭނާ ގޮސް ނަހާގެ ކުރިމައްޗަށް ވާ ގޮތަށް ހުއްޓުމަށް ފަހު، ކޮތަޅުތައް ބެހެއްޓީ މޭޒުމަތީގައެވެ. ލެޕްޓޮޕަށް ގޮސް ގެއްލިފައި އިން ނަހާއަށް ސިހުން ލިބިގެން ދިޔައެވެ. އޭނާ ބަލައިލި އިރު ހުރީ ޒަރޫންއެވެ. ދެވަނަ ސިކުންތުގައި ނަޒަރު ހުއްޓުނީ، ކޮތަޅުތަކަށެވެ. އަނެއްކާ ވެސް ޒަރޫންއަށް ބަލައިލެވުނެވެ.
"ގުނަން ޖެހޭނެއެއްނު؟ ނަހާ ނުގުނަނީސް އަހަންނަކަށް ނުވެއް ދެވޭނެއެއްނު!." ޒަރޫން ހުރީ ނިކަން ހަމަޖެހިލާފައެވެ. އޭނާ ބުނެލީ ސަމާސާ ރާގަކަށެވެ. ނަހާއަށް އެކަން އެނގުނު ނަމަވެސް، އޭނާ ގޮތް ދައްކައިލުމުގެ ގޮތުން ދެބުމަ ގޮށް ޖަހައިލިއެވެ.
"ކިހިނެއްވީ؟ ކައުންޓަރު މަތީގަ ބަހައްޓާފަ އަހަރެން ދާންވީތަ؟" ޒަރޫން ބުނެލިއެވެ.
"ނޫނޭ. ހިނގާ...." ނަހާ ލެޕްޓޮޕް ލައްޕައިލިއެވެ.
"ހުރިހާ އެއްޗެއް އޯކޭތަ؟ ކަމުނުދާ އެއްޗެއް ވިއްޔާ ލެޓް މީ ނޯ އިނގޭ. އޭރުން ރަނގަޅު ކޮށްލާނަން." ޒަރޫން ބުނެލީ ނަހާ ގޮނޑިން ތެދުވުމުންނެވެ.
"އަދި ބެލި ހުރިހާއެއްޗެއް ވެސް އޯކޭ. އަހަންނަށް ހީވަނީ ބާކީ އެއްޗެހީގަ ވެސް ނުހުންނާނެހެން މައްސަލައެއް." ލެޕްޓޮޕް ދަބަހަށް ލަމުން ދިޔަ ނަހާ ބުނެލިއެވެ.
"އެހާވަރަށް އިތުބާރުކުރެވިއްޖެ ދޯ." ޒަރޫން އަނެއްކާ ވެސް ބުނެލިއެވެ.
"ހާދަ ފޮންޏެކޭ ދޯ ތިވަނީ! އެނީ ވޭސް ލެޓްސް ގޯ." އެހެން ބުނެލާފައި ލެޕްޓޮފް ދަބަސް އެއްއަތުން ހިފައްޓައިގެން ހުރެ އަނެއް އަތުން ކޮތަޅުތައް ނަގަންވެގެން ނަހާ އަވަސްވެގަތެވެ. އެވަގުތު އެކަން މަނާކުރަމުން ޒަރޫން ކޮތަޅުތައް ނެގިއެވެ. ނަހާ އޭނާ އަށް ބަލައިލާފައި ހިނިތުންވެލިއެވެ. ޒަރޫން ވެސް ނަހާގެ ފަހަތުން ގޮސް ކައުންޓަރު ކައިރީގައި މަޑުކޮށްލިއެވެ.
ލެޕްޓޮޕް ދަބަސް ބާއްވާފައި، ނަހާ ކައުންޓަރާ ކައިރިވެލާ ތަށިތައް ކޮތަޅުން ނަގާ ގުނަން ފެށިއެވެ. ފައިސާ ދިނުމުން ޒަރޫން މިއަދު ވެސް އެސްޕްރެސޯއަކަށް އޯޑަރު ދިނެވެ. އެއީ މިހާރު އާދައެވެ. ކޮންމެ ދުވަހަކު ވެސް ކެފޭއަށް އައިސްފައި ޒަރޫން ދާނީ ކޮފީއެއް ބޯލައިގެންނެވެ. އާދައިގެ މަތިން އޭނާ ގޮސް އިށީނީ ވެސް އާއްމުކޮށް އިންނަ ގޮނޑީގައެވެ. އެ ތަނުގައި އިންނަ އިރު ކައުންޓަރުގައި މަސައްކަތްކުރަން ހުންނަ ނަހާ ރީއްޗަށް އޭނާއަށް ފެނެއެވެ.
*****
ފުދޭވަރަކަށް އަވި ގަދަ ދުވަހެކެވެ. ކެފޭއިން ނުކުމެގެން ގެއަށް ދާންވެގެން ނުކުތް ނަހާ ސައިކަލަށް އަރަން އުޅެފައި ވެސް މަޑުޖެހިލިއެވެ. ވާރޭ ވެސް ނުވެހި ދުވަސްކޮޅެއް ވެފައިވާތީއާ އެކު ސައިކަލު ވަނީ ވަރަށް ބޮޑަށް ހިރަފުސްވެފައެވެ. އަނެއްކޮޅުން ކުރީ ފުރޮޅުގައި ވަޔެއް ވެސް ނެތެވެ. މާދަމާއަކީ އޭނާގެ ޗުއްޓީ ދުވަހެއްކަމުން މިއަދު ދާ މަގުމަތީގައި ސައިކަލު ދޮވެލަން ގަރާޖަކަށް ލާން އޭނާ ނިންމިއެވެ. ޗުއްޓީ ނެގި ނަމަވެސް، ކޮންމެ ވެސް އެއްވަގުތެއްގައި ކެފޭއަށް ވަދެލެވެންޏާ ވަދެލާތީ، މިއަދު ލާފައި މާދަން ހަވީރު ކެފޭއަށް އަންނަ ވަގުތުގަ ނަގާނީ އޭ ނަހާގެ ހިތަށް އެރިއެވެ.
ކުރިން ފަހަރު ސައިކަލު ސަރވިސް ކުރަން ލީ ގަރާޖު ހުންނަނީ މާ ދުރަކު ނޫނެވެ. އެހެންކަމުން، އެ ދިމާލަށް ނަހާ ސައިކަލުގެ މިސްރާބު ބަދަލުކޮށްލިއެވެ.
ގަރާޖާ ހިސާބަށް އާދެވުމުން ސައިކަލު ޕާކުކޮށްލާފައި ފައިބައިގެން ގޮސް ގަރާޖުގެ ދޮރުމަތީގައި އޭނާ ހުއްޓުނެވެ. އެވަގުތު އެތަނުގައި ހުރީ ޒުވާނެކެވެ. އޭނާ ހުރީ ފުރަގަސް ދީގެންނެވެ. ބޮއިލަރު ސޫޓެއްލައިގެން ހުރި އިރު، އޭނާ ހުރީ މޭޒެއްގެ ކައިރީގައި ކުޑަކޮށް ގުދުވެލައިގެންނެވެ. މޭޒުމަތީގައި އޮތް ފޮތުގައި ކޮންމެ ވެސް އެއްޗެއް ލިޔަނީއެވެ. އިތުރު މީހަކު ފެންނާކަށް ނެތެވެ.
"އެކްސްކިއުޒް މީ." ޒަރޫންގެ ކަންފަތުގައި ޖެހުނު އަޑާ އެކު ހަރަކާތް މަޑުޖައްސައިލެވުނެވެ. އެއީ ހަމަ އެ އަޑެވެ. އެ އަޑަށް އޭނާ ވަނީ އާދަވެފައެވެ. ކޮންމެ ދުވަހަކު އިވޭ އަޑެއްކަމަށް ވާތީއެވެ. އެހެންކަމުން އެ އަޑެއް އޭނާއަކަށް ނޯޅޭނެއެވެ. އާނއެކެވެ. އެއީ ނަހާ ނޫން އެހެން ދެވަނަ މީހެއްގެ އަޑެއް ނޫނެވެ.
(ނުނިމޭ)