ސޯޅަ އަހަރުގެ ކުއްޖަކު އިސްކޮށް ހުރެ ހިންގި ކަމަށް ތުހުމަތުކުރެވޭ ބައިނަލްއަގުވާމީ ރެންސަމްވެއާ ގްރޫޕެއްގެ މައިގަނޑު ނެޓްވޯކް ޔޫރަޕޯލުން ހުއްޓުވައިފިއެވެ.
ރެންސަމްވެއާއަކީ ކޮމްޕިއުޓަރު ސިސްޓަމްތަކަށް ނުވަތަ ޑޭޓާއަށް ނުވަދެވޭ ގޮތް ހަދައި، އެ މައުލޫމާތު ސަލާމަތްކުރުމަށް ފައިސާއަށް ޑިމާންޑުކުރާ ނުރައްކާތެރި ސޮފްޓްވެއާއެކެވެ. މި މައްސަލަ ތަހުގީގުކުރަމުންދާ ޔޫރަޕޯލް (ޔޫރަޕިއަން ޔޫނިއަން އޭޖެންސީ ފޯ ލޯ އެންފޯސްމަންޓް ކޯޕަރޭޝަން) އަކީ، ބައިނަލްއަގުވާމީ ބޮޑެތި ކުށްތަކާ ދެކޮޅަށް މަސައްކަތްކުރުމުގައި ޔޫރަޕްގެ ގައުމުތަކުގެ ފުލުހުންނަށް އެހީތެރިކަން ފޯރުކޮށްދޭ މައި އިދާރާއެވެ.
"ކިލްސެކް" ގެ ނަމުން ނަންދީފައިވާ މި ގްރޫޕާ ދެކޮޅަށް ހިންގި އޮޕަރޭޝަނުގައި ސްޕެއިން، ގްރީސް، ރޫމޭނިއާ އަދި އިނގިރޭސިވިލާތުގެ އަށް ތަނެއް ބަލައި ފާސްކޮށް، ތިން މީހަކު ވަނީ ހައްޔަރުކޮށްފައެވެ. ޔޫރަޕޯލުން ބުނި ގޮތުގައި، ފުލުހުން ވަނީ އެ ގްރޫޕުގެ މައި ފަސް ސާވަރަކާއި ޑާކް ވެބްގައި ހިންގަމުންދިޔަ ސައިޓް އެ މީހުންގެ ބާރުގެ ދަށަށް ގެންގޮސްފައެވެ. މީގެ ސަބަބުން، ވަގަށް ނަގާފައިވާ 110 ޓެރަބައިޓްގެ ޑޭޓާ އިތުރު ބަޔަކަށް ނުލިބޭނެހެން ވަނީ ސަލާމަތްކޮށްފައެވެ.
މި ގްރޫޕް ހިންގުމުގައި އެންމެ އިސްކޮށް ހަރަކާތްތެރިވި ކަމަށް ތަހުގީގަށް ފާހަގަކުރެވިފައިވަނީ އުމުރުން 16 އަހަރުގެ ރޫމޭނިއާގެ ކުއްޖެކެވެ. ސްޕެއިންގެ ފުލުހުންނާ ހަވާލާދީ ރޮއިޓާސްއިން ރިޕޯޓުކޮށްފައިވާ ގޮތުގައި، އެ ކުއްޖާ ހައްޔަރުކޮށްފައިވަނީ ސްޕެއިންގެ އަލިކާންޓޭއިންނެވެ. މީގެ އިތުރުން، މި ގްރޫޕުގެ ސޮފްޓްވެއާ އުފެއްދުމުގައި އުޅުނު ކަމަށް ތުހުމަތުކުރެވޭ އެހެން މީހަކު މިދިޔަ އޮގަސްޓު މަހު 18 އަހަރު ފުރިފައިވާއިރު، ބައެއް ކުށްތައް ކޮށްފައިވަނީ އޭނާ ކުޑަކުއްޖެއްގެ ގޮތުގައި ހުރެ ކަމަށް ތަހުގީގުކުރާ ފަރާތްތަކުން ބުނެއެވެ.
"އޮޕަރޭޝަން ކިލްސްވިޗް" ގެ ނަމުގައި ކުރިއަށްގެންދާ މި ތަހުގީގުގައި، ކިލްސެކް ގްރޫޕާ ގުޅުންހުރި ކަމަށް ބެލެވޭ ހާހެއްހާ ސައިބާ ހަމަލާ ދުނިޔޭގެ އެކި ކަންކޮޅުތަކުން ދީފައިވާ ކަމަށް ވަނީ ފާހަގަކުރެވިފައެވެ. މީގެ ތެރެއިން 500 ހަމަލާ ކާމިޔާބުކޮށްފައިވާ ކަމަށް މިހާތަނަށް ކަށަވަރުކުރެވިފައިވީ ނަމަވެސް، ހެކިތައް ދިރާސާކުރަމުންދާ ވަރަކަށް މި އަދަދު ބަދަލުވުމަކީ އެކަށީގެންވާ ކަމެއް ކަމަށް ޔޫރަޕޯލުން ބުނެއެވެ.
ކިލްސެކް ގްރޫޕުން 2024 ވަނަ އަހަރުން ފެށިގެން ހަރަކާތްތެރިވަމުން އައީ ސޮފްޓްވެއާތަކުގެ ބަލިކަށިކަމާއި ކްލައުޑް ސްޓޯރޭޖްތަކުގެ ސެކިއުރިޓީ ދަށްވުމުގެ ފައިދާ ނަގައިގެންނެވެ. ޔޫރަޕޯލުން ބުނި ގޮތުގައި، އެ ގްރޫޕުން ވަނީ އާޓިފިޝަލް އިންޓެލިޖެންސް (އޭއައި) ބޭނުންކޮށްގެން ހަމަލާދޭނެ ފަރާތްތައް ހޯދައި، އެ މީހުންގެ ނެޓްވޯކް ފުޅާކޮށްފައެވެ. އަދި ވަގަށް ނަގާ މައުލޫމާތު ޑާކް ވެބްގައި އާންމުކުރާނެ ކަމުގެ އިންޒާރުދީ، ބައެއް ފަރާތްތަކުގެ އަތުން ބޮޑެތި އަދަދުތަކުން ފައިސާ އަތުލާފައިވާ ކަމަށްވެސް ތަހުގީގަށް ވަނީ އެނގިފައެވެ.
ޔޫރަޕޯލް އަދި ޔޫރޯޖަސްޓްގެ އެހީތެރިކަމާއެކު ޔޫރަޕްގެ ގިނަ ގައުމުތަކަކާއި އެމެރިކާ ގުޅިގެން ކުރިއަށްގެންދާ މި ތަހުގީގުގައި، މިހާރު ދަނީ އަތުލައިގަނެވުނު އާލާތްތަކާއި ޑޭޓާ ދިރާސާކުރަމުންނެވެ. އަދި ކްރިޕްޓޯކަރަންސީ ހިމެނޭ ގޮތަށް، ކުށްކޮށްގެން ހޯދާފައިވާ ފައިސާ ދައުރުކޮށްފައިވާ ގޮތް ހޯދުމުގެ މަސައްކަތް ކުރިއަށްދާ ކަމަށް ކަމާބެހޭ ފަރާތްތަކުން ބުނެއެވެ.