އެތަނުން ދިޔުމަށް ހިނގައިގަތް ނަމަވެސް އަހަރެން ސިއްރުން އިބްރާހީމްގެ މޫނަށް ބަލައިލީމެވެ. އެ ނަޒަރު ހުއްޓިފައިވީ ހަތްވަނަ ކޮޓަރިއަށެވެ. އަހަރެން ތިރިއަށް ފޭބިއިރުވެސް އިބްރާހީމް ހުރި ފިޔަވަޅު މަތީގައި ހުއްޓެވެ. އެ ދޮރުގެ ފަހަތުގައި ފޮރުވިފައިވާ ސިއްރުތައް ހާމަވެދާނެތީ އޭނާ ބިރުން ހުރި ކަހަލައެވެ.
********
އެހެން ދުވަސް ދުވަހު އަހަންނަށް ހޭލެވެނީ ފޯނުން އިވޭ ފަތިސް ނަމާދު ބަންގީގެ އަޑަށެވެ. އެދުވަސް ތަފާތެވެ. ފަތިސް ނަމާދު ބަންގި ގޮވީ އަހަރެން ސީލިންގަށް ބަލަން އޮއްވައެވެ. ކަންނެތް ގޮތަކަށް ތެދުވީމެވެ. ލޯގަނޑުގެ ކުރިމަތީގައި ހުއްޓި، އަމިއްލަ ސޫރައަށް ބަލައިލީމެވެ. ރޭގެ ނިދި ގެއްލިފައިވާކަން ދެލޯ ހެކިދެއެވެ. އަހަރެން ތައްޔާރުވެލައިގެން ނުކުތްއިރު، މާހައުލު އޮތީ ހިމޭންވެފައެވެ.
ކޮފީ ތައްޓެއް ހެދުމަށް ބަދިގެ އާއި ދިމާއަށް ހިނގައިގަތް ވަގުތު އަހަރެންގެ ލޮލުގައި އަޅައިގަތީ ކައުންޓަރުގެ މަތީގައި އޮތް ތަޅުދަނޑިއެކެވެ. އަހަރެން ހީކުރީ ފަތުރުވެރިއަކަށް އޮޅިގެން ތަޅުދަނޑި ބޭއްވިފައި އޮތީ ކަމަށެވެ.
"ހަތެއް..."
ތަޅުދަނޑީގެ ފުލުގައި ޖަހާފައި އޮތް އަކުރު ކިޔައިލުމާއިއެކު އަހަރެންގެ ދެލޯ ބޮޑުވިއެވެ. ނުވާންވީ ސަބަބެއްވެސް ނެތެވެ. އަހަރެންގެ ހުރިހާ ޝައުގުވެރިކަމެއް ގުޅިފައިވާ ކޮޓަރީގެ ތަޅުދަނޑި، އެފަދަ ގޮތަކަށް އަހަރެންގެ އަތް މައްޗަށް އަތުވެދާނެކަމަށް ގަބޫލު ކުރެވޭނީ ކިހިނެއް ހެއްޔެވެ؟ އަނެއްކާ އެއީ އިބްރާހީމްގެ ރޭވުމެއް ހެއްޔެވެ؟
ވަށައިގެން ނަޒަރު ހިންގައިލީމެވެ. އެކަކުވެސް ފެންނާކަށް ނެތެވެ. އެ ތަޅުދަނޑި އަހަންނާއި ހަމައަށް އަންނާނީ އަހަރެންގެ މަގުސަދު އެމީހަކަށް ރަނގަޅަށް އެނގޭތީއެވެ. އެކަމަކު، އެ މީހަކަށް އެކަން އެނގުނީ ކިހިނެއް ހެއްޔެވެ؟ އެމީހަކު އަހަންނަށް އެހީވުމުގެ ފަހަތުގައި ފޮރުވިފައިވަނީ ކޮން ކަމެއް ހެއްޔެވެ؟ އަހަރެންގެ ހިތުގައި އުފެދުނު ޝައުގުވެރިކަން އިތުރުވިއެވެ. ފުރުސަތުގެ ބޭނުންހިފައި އެ ތަޅުދަނޑި ޖީބަށް ލީމެވެ. އެވަގުތަށް އަހަންނަށް މުހިއްމުވީ އެ ކޮޓަރިއަށް ވަނުމެއް ނޫނެވެ. އިބްރާހީމަށް ފާރަލުމެވެ.
ޝައްކުގެ ނަޒަރުން ބަލަމުންދިޔަ ވަރަކަށް، އިބްރާހީމްގެ ފުށުން ޝައްކުވާ އެތައް މަންޒަރެއް ފެންނަމުން ދިޔައެވެ. ބައެއް ރޭރޭ ދަންވަރުގެ ވަގުތު ދެވަނަ ފްލޯއަށް އިބްރާހީމް ދާ މަންޒަރު އަހަންނަށް ފެނެއެވެ. އެއްވެސް ފަތުރުވެރިއަކު ޕްރައިވެސީ އާއި ގުޅޭ ޝަކުވާއެއް ކޮށްފިނަމަ، އިބްރާހީމްގެ މޫނުން އާދަޔާ ހިލާފު ހާސްކަމެއް ފެންނަކަން އަހަންނަށް ފާހަގަވިއެވެ. ލިބޭ އެންމެ ފޯނުކޯލަކުން ބައެއް ފަތުރުވެރިން ކުއްލިއަކަށް ތަން ދޫކޮށް ދާކަންވެސް ފާހަގަވިއެވެ. އެންމެ މުހިއްމު ކަމަކަށް އަހަންނަށް ފާހަގަވީ، ދޭތެރެ ދޭތެރެއިން އިބްރާހީމްގެ އެކި އެކައުންޓުތަކަށް ބޮޑެތި އަދަދުތަކުން ފައިސާ ޖަމާވާ ކަމެވެ. އެ ހުރިހާ ތަފްސީލެއް އަހަރެން ދިޔައީ ލިޔެ ބަލަހައްޓަމުންނެވެ.
ހަވީރުގެ ވަގުތެވެ. އަހަރެން ބޭނުންވި ފުރުސަތު ފަހިވީ އެތައް ދުވަހަކު އިންތިޒާރުކުރި ފަހުންނެވެ. އިބްރާހީމް ބޭރަށް ނުކުތުމުން، އަހަރެން އޭނާގެ އޮފީހަށް ވަނީމެވެ. ތަން ސާފުކުރުމަކީ އަހަރެންގެ ބަހަނާއެވެ. އޮފީހުގެ ޖާގަ މާ ތަނަވަސް ނޫނަސް، ތަނުގެ ހުރިހާ އެއްޗެއް ހުރީ ނުހަނު ތަރުތީބުން އަތުރާފައެވެ. އިބްރާހީމްގެ މޭޒުމަތި ފޮހެން ހުރި ނަމަވެސް އަހަރެންގެ ނަޒަރު ހުއްޓެމުން ދިޔައީ އެ މޭޒު މަތީގައި ހުރި އެއްޗެއްސަށެވެ. ކޮންޕިއުޓަރު ހުރީ ނިވާލާފައެވެ. މޭޒުމަތީގައި ބޮޑު ސިޓީއުރައެއް އޮތެވެ. އޭގެ މަތީގައި ބާއްވާފައި އޮތީ ކުޑަ ނޯޓު ފޮތެކެވެ. ފަހަރަކު އެއްޗެއް ބަލަމުން ގޮސް، އަހަރެން ހުއްޓުނީ، މޭޒުގެ އެއް އަރިމަތީގައި ބަރިބަރިއަށް އަތުރާފައި ހުރި ފައިލުތަކުގެ ކައިރީގައެވެ. އެތަނުން ފައިލެއް ނެގުމަށް ގުދުވެލީމެވެ.
ދޮރު ހުޅުވައިލި އަޑު އިވުނެވެ. ކުއްލިއަކަށް ފެނުނީ އިބްރާހީމް އެތެރެއަށް ވަންތަނެވެ. އަހަރެންގެ ހިތް ނެގިނެގިފައި ޖެހެން ފެށިއެވެ. އަވަސް އަވަހަށް މޭޒު ފޮހުނުކަމަށް ހަދައި، މޭޒު ކައިރިން ދުރަށް ދިޔައީމެވެ.
"އެއްޗެއް ބޭނުންވީތޯ؟..." ގަދަކަމުން ހިނިތުންވެލަން މަސައްކަތް ކުރަމުން އަހައިލީމެވެ.
އިބްރާހީމް ވަކި ޖަވާބެއް ނުދީ، އަހަންނަށް ބަލަހައްޓައިގެން ހުރީއެވެ. އަހަރެންގެ މޫނުން އޭނާ ކަމެއް ސާފުކުރަން ބޭނުންވާ ކަހަލައެވެ.
"ކީއް ތި ކުރަނީ؟..." އިބްރާހީމް ދެލޯ ހަނިކޮށްލި ތަން ފެނުމުން، އަހަންނަށް އުނދަގޫ ގޮތަކަށް ހިންދިރުވައިލެވުނެވެ.
"ސާފުކުރަނީ..." އަހަރެން ވަގުތުން ޖަވާބު ދިނީމެވެ.
"ބުނީމެއްނު އެއްވެސް މީހަކަށް މިތަން ސާފު ކުރާކަށް ނުޖެހޭނެޔޭ..." އިބްރާހީމް ހުރީ ހިތްހަމަނުޖެހިފައިކަން ދެނެގަންނަން އަހަންނަށް އިތުރު ކަމެއް ކުރާކަށް ނުޖެހުނެވެ،
"ސޮރީ...." އަހަރެން މާފަށް އެދުނީމެވެ.
އިބްރާހީމް އޭނާގެ މޭޒާއި ދިމާއަށް ހިނގައިގަތެވެ. ތަންކޮޅަކަށް ގޮސްފައި ހުއްޓުނެވެ.
"އަހަރެންގެ މޭޒުގަ ހުރި އެއްޗެހި ބަލަނީތަ؟..." އިބްރާހީމްގެ ސުވާލުން އަހަރެންގެ ދެ އަތް ތުރުތުރު އަޅައިގަތެވެ. އެހާ ފާޅުކަން ބޮޑު ގޮތަކަށް އެ ސުވާލު ކޮށްފާނެކަމަށް އަހަރެން ހީވެސް ނުކުރަމެވެ.
"ނޫން..." އަހަރެން އަވަސް އަވަހަށް ބުނީމެވެ.
އަހަންނަށް ބަލަން އިބްރާހީމް އިރުކޮޅަކު ހުއްޓެވެ. އެއަށްފަހު ހިނިތުންވެލިއެވެ. މާނަވީ އެ ހިނިތުންވުމުގެ ފަހަތުގައި ފޮރުވިފައިވާ ސިއްރެއް އެބަ އޮތޭ ބުނާ ކަހަލައެވެ.
"ގުޑް..." އިބްރާހީމް ބުނެލިއެވެ.
މޭޒުމަތިން އިބްރާހީމ ނެގީ ފައިލެކެވެ.
"އައިލިޝް ދަސްކުރަންވީ، އައިލިޝްގެ ވަޒީފާއާ ގުޅޭ ކަންކަން ކުރަން... އެކަމާ ނުގުޅޭ ކަންކަން ކުރަން ދަސްކުރާނެކަމެއް ނެތް...." އިބްރާހީމް ދެލޯ ހަނިކޮށްލަމުން އަހަންނަށް ބަލައިލިއެވެ.
"އޭނ؟...." އަހަރެން ސިހުނެވެ.
"ގެސްޓުން ބޭނުމެއް ނުވާނެ އެމީހުންގެ ޕްރައިވެޓް ކަންކަން އެހެން ބަޔަކަށް އެނގޭކަށް..." އިބްރާހީމް ދެންވެސް ބުނީ އަހަރެން އުއްމީދުކޮށްގެން ހުރިފަދަ ވާހަކައެއް ނޫނެވެ.
އަހަންނަށް އެކައްޗެއްވެސް ނުބުނެވުނެވެ. އިބްރާހީމަށް ކޮންމެވެސް ކަމެއް އެނގިއްޖެއެވެ. އަހަރެންގެ މަގުސަދާއިމެދު އެ ހިތުގައި ޝައްކު އުފެދިއްޖެކަން ގައިމެވެ.
"ޕްރައިވެސީ އިޒް އިމްޕޯޓެންޓް..."
ފައިލު ހިފައިގެން އިބްރާހީމް ދޮރާއި ދިމާއަށް ދިޔައެވެ. ދޮރާއި ހިސާބުން ހުއްޓުނެވެ.
"ކަންކަމާ މާ ބޮޑަށް ކިއުރިއަސް ވަންޏާ، އޭގެ ގެއްލުން ފަހުން ވެދާނެ..."
އިބްރާހީމް ނުކުމެގެން ދިޔައީއެވެ. ގަބުވެފައި އެތައް އިރަކު ހުރެވުނެވެ. އަހަރެންގެ ހިތުގެ ތެޅުމުގެ އަޑު އަހަރެންގެ ކަންފަތާއި ހަމައަށް ފޯރައެވެ. އިބްރާހީމް އެންމެ ފަހުން ބުނި ޖުމުލައިގެ މާނައަކީ ކޮބައި ހެއްޔެވެ؟ އެއީ އޭނާ ދިން އިންޒާރެއް ހެއްޔެވެ؟ އެ ހުރިހާ ކަމަކުން އަހަންނަށް އެއް ކަމެއް ޔަގީންވިއެވެ. އިބްރާހީމް ކޮންމެވެސް ކަމެއް ސިއްރު ކުރެއެވެ. އެ ސިއްރު ހިފަހައްޓަން ކޮންމެފަދަ ދަރަޖައަކަށް ދާކަށްވެސް އޭނާ ފަހެއް ނުޖެހޭނެއެވެ. އެހެނެއްކަމަކު، އަހަރެންވެސް މީ ގޮތް ދޫކުރާނެ މީހެއް ނޫނެވެ. އިބްރާހީމްގެ އެންމެ އިންޒާރަކުން އަހަރެންގެ އަޒުމަކަށް ގުޑުމެއް ނާރާނެއެވެ.
އެ ރޭ އަހަރެން ކޮޓަރިން ނުކުތީ، އެންމެން ނިދާހާއިރު ކޮށްފައެވެ. މުށުތެރޭގައި އޮތް ތަޅުދަނޑިއަށް ފަހު ފަހަރަށް ބަލައިލީމެވެ. ފިޔަވަޅުތަކުގެ އަޑު ނީއްވާ އަހަރެން މަޑުމަޑުން ސިޑިން މައްޗަށް އަރަން ފެށީމެވެ. އަހަރެން ހުއްޓުނީ، "ރޫމް 7" ގެ ކުރިމަތީގައެވެ. ތަޅުވަޅަށް ތަޅުދަނޑި ޖަހައި، އަނބުރައިލީމެވެ. ވަރަށް ފަސޭހައިން ތަޅު ހުޅުވުނެވެ. މަޑުމަޑުން އެތެރެއަށް ވަދެ، ދޮރު ލައްޕައިލީމެވެ.
ބޮކި ދިއްލައިލުމުން، މުޅި ތަން އަލިވިއެވެ. ކޮޓަރީގެ އެއް ކަނުގައި ޑަބަލް އެނދެއް ހުއްޓެވެ. އެ އެނދު ހުރީ، ގޮދަޑި އާއި ބާލީސްތައް ނިވާވާނޭހެން ހުދު ފޮތި އަޅާފައެވެ. ކޮޓަރީގެ ފަރުނީޗަރުތަކުގައި ހިރަފުހުގެ އަސަރު ހުއްޓެވެ. އަހަރެން ގޮސް ހުއްޓުނީ ކުޑަދޮރުގެ ކައިރީގައެވެ. ވަރަން ފުން ނަޒަރަކުން މުޅި ކޮޓަރިއަށް ބަލައިލީމެވެ. މަރްޔަމްގެ އެއްވެސް އެއްޗެއް އެ ކޮޓަރީގައި ވާނަމަ، އެ އެއްޗެއް އޮތީ ކޮންތާކު ހެއްޔެވެ؟
ފަހަރަކު ތަނެއް ބަލަމުން ގޮސް އަލަމާރި ހުޅުވައިލީމެވެ. އެކައްޗެއްވެސް ނެތެވެ. ޑްރެސިންގް ޓޭބަލުގެ ވަތްގަނޑުތައް ބެލީމެވެ. އެކައްޗެއްވެސް ނުފެނުނެވެ. އެނދުގެ ދަށް ބެލީމެވެ. ޝައްކުވާ އެއްޗެއް ނެތެވެ. މުޅި ކޮޓަރި ބެލިއިރުވެސް އެކައްޗެއްވެސް ނުފެނުނެވެ. އަހަރެން މާޔޫސްވިއެވެ. ހެކި ހޯދުމުގެ ހިޔާލު ދޫކޮށްލަން ނިންމައި، ކޮޓަރިން ނުކުންނަން އެނބުރިލީމެވެ. އެވަގުތު އެނދުގެ ދާރައިގައި އެއްޗެއް ލިޔެފައި އިން ތަން ފެނުނެވެ.
"އެމް އެޗް...." ލިޔެފައި އޮތް އިނގިރޭސި ދެ އަކުރު ކިޔައިލީމެވެ.
އަހަރެން އެ އަކުރުތަކުގައި އިނގިލި ހިންގައިލީމެވެ. އޭރު އަހަރެންގެ އިނގިލިތަކުގައި މަޑު ތުރުތުރުލުމެއްގެ އަސަރު ވިއެވެ. ތަންކޮޅެއް އުނދަގުލުން، އެނދު ފާރާއި ދުރަށް ޖައްސައިލީމެވެ. ކޮންމެވެސް އެއްޗެއް ތިރިއަށް ވެއްޓުނު އަޑު އިވުނެވެ. އެއީ ކުޑަކުޑަ ތަޅުދަނޑިއެކެވެ. އަހަރެން އަވަސް އަވަހަށް އެ ތަޅުދަނޑި ނެގީމެވެ.
"ވަން ނައިން...." އެ ތަޅުދަނޑީގައި ކަނޑާ ނަގާފައި އަކުރުތައް ކިޔައިލީމެވެ.
ވިސްނާ ވިސްނާވެސް އެއީ ކޮން ތަނެއްގެ ތަޅުދަނޑިއެއް ކަމެއް ނޭނގުނެވެ. ނަވާރަ ޖަހާފައިވާ އެއްޗެއްވެސް އަހަންނަށް އެ ގެސްޓް ހައުސްއިން ފެނިފައެއް ނުވެއެވެ. ކުއްލިއަކަށް ބޭރުން ފިޔަވަޅުތަކެއްގެ އަޑު އިވުނެވެ. އަހަރެން ދުވެފައި ގޮސް ބޮކި ނިއްވައިލީމެވެ. ކޮންމެވެސް މީހަކު ކޮޓަރީގެ ތަޅުގައި ހިފައިލި އެވެ. އަހަރެން ހުރީ ނޭވާވެސް ނުލައެވެ. ދޮރު ހުޅުވުނެވެ. ބޭރުން އެޅުނު އަލީގައި ކޮޓަރިއަށް ވަނީ ކާކު ކަން ދެނެގަންނަން އަހަންނަކަށް އުނދަގުލެއް ނުވިއެވެ. ކޮޓަރިއަށް ވަނީ އިބްރާހީމެވެ. އޭނާ މުޅި ކޮޓަރީގެ ވަށައިގެން ނަޒަރު ހިންގައިލިއެވެ. އެއަށްފަހު، މަޑުމަޑުން ކޮޓަރީގެ ދޮރު ލައްޕައިލިއެވެ. ބޮކި ދިއްލުނެވެ. އަހަންނަށް ސާފުކޮށް އިބްރާހީމްގެ މޫނު ފެނުނެވެ.
އަހަރެން އިނީ އަލަމާރިތެރޭގައެވެ. ދެ ދޮރު ދޭތެރޭގައިވާ ކުޑަކުޑަ ހުސް ޖާގައިން އަހަންނަށް އިބްރާހީމް ފެނެއެވެ. އިބްރާހީމް ގޮސް ހުއްޓުނީ އެނދުގެ ކައިރީގައި ހުރި ކުޑަ މޭޒު ކައިރީގައެވެ. އޭނާ ތިރިވިއެވެ. ކަބަޑުގެ ވަތްގަނޑެއްގެ ތެރެއިން އިތުރު ވަތްގަނޑެއް ހުޅުވިއެވެ. އެއީ އަހަންނަށް ފެނިފައިނުވާ ވަތްގަނޑެކެވެ. ކަބަޑު ތެރެއިން އިބްރާހީމް ނެގީ ކުޑަކުޑަ ކަޅު ކުލައިގެ ޑިވައިސްއެކެވެ. އެ ހަމަ ފެނުމާއިއެކު އެއީ ކޯއްޗެއް ކަން އަހަންނަށް އެނގުނެވެ.
"ކެމެރާ...."
އިބްރާހީމް އެއިން ކޮންމެވެސް އެއްޗެއް ބެލިއެވެ. އޭނާގެ ތުންފަތަށް ވެރިވި ހިނިތުންވުން ފެނި އަހަރެންގެ ހިތުގެ ތެޅުން އިތުރުވިއެވެ.
"ސްޓިލް ވޯކިންގް..."
އަހަރެންގެ ހިތް ނުހުއްޓުނީ ކިރިޔާއެވެ.
(ނުނިމޭ)