ޓެކްނޮލޮޖީއާއި އާޓިފިޝަލް އިންޓެލިޖެންސް (އޭއައި) ފަދަ ވަސީލަތްތައް ކުރިއަރައިގެން ދިޔަ ނަމަވެސް، ފަނޑިޔާރުން ކުރައްވާ މަސައްކަތްޕުޅު ނުވަތަ ކޯޓަށް ހުށަހަޅާ މައްސަލަތަކަށް ގޮތް ނިންމުމުގައި ފަނޑިޔާރުގެ ދައުރު އަލްގޯރިދަމްއަކަށް ދޫކޮށްލުމަކީ ކުރެވޭނެ ކަމެއް ނޫން ކަމަށް ދިވެހިރާއްޖޭގެ އުއްތަމަފަނޑިޔާރު އަލްއުސްތާޒު ޢަބްދުލްޣަނީ މުޙައްމަދު ވިދާޅުވެއްޖެއެވެ.
އުއްތަމަފަނޑިޔާރު މިހެން ވިދާޅުވީ އުޒްބެކިސްތާންގެ ސަމަރުގަންދުގައި މި މަހުގެ އެއް ވަނަ ދުވަހުން ފެށިގެން މިއަދުގެ ނިޔަލަށް ކުރިއަށްދިޔަ އެސޯސިއޭޝަން އޮފް އޭޝިއަން ކޮންސްޓިޓިއުޝަނަލް ކޯޓްސް އެންޑް އިކުއިވަލަންޓް އިންސްޓިޓިއުޝަންސް (އޭއޭސީސީ) ގެ ހަތް ވަނަ ކޮންގްރެސްގެ ދެވަނަ ދުވަހުގެ ޕްލެނަރީ ސެޝަންގައި ތަގްރީރު ކުރައްވަމުންނެވެ.
އެމަނިކުފާނު ތަގްރީރު ކުރައްވާފައިވަނީ "މައްސަލަތައް ލަސްނުވެ އަވަސް އިންސާފަށް، ޢަދުލު އިންސާފު ގާއިމު ކުރުމުގެ ފެންވަރު ރަނގަޅުކޮށް އިތުބާރު އުފެއްދުމުގައި ޑިޖިޓަލް ޓެކްނޮލޮޖީގެ ދައުރު" މި މަޢުލޫއަށެވެ.
މި މަޢުލޫއަށް އަލިއަޅުއްވާލައްވަމުން އުއްތަމަފަނޑިޔާރު ވިދާޅުވީ، ޖުޑީޝަރީތަކުން އަމާޒު ހިފަންވާނީ އޭއައި ފަދަ ޓެކްނޮލޮޖީތަކަކީ ޢަދުލު އިންސާފުގެ ދާއިރާއަށް އެހީތެރިވެދޭ ވަސީލަތްތަކެއް ކަމުގައި ހެދުމަށް ކަމަށެވެ. އަދި ރާއްޖޭގެ ކޯޓުތަކުގައި ނުނިމިހުރި މައްސަލަތައް ނިންމުމުގެ ޚާއްސަ މަސައްކަތްތައް ކުރިއަށްދާ ގޮތާއި، މައްސަލަތައް ލަސްވާ ސަބަބުތައް ދެނެގަނެ ޝަރީޢަތުގެ މަސައްކަތްތައް އަވަސްކުރުމަށް ޓެކްނޮލޮޖީ ބޭނުންކުރެވިދާނެ ގޮތްތަކުގެ މައްޗަށް އެމަނިކުފާނު އަލިއަޅުއްވާލެއްވިއެވެ.
ސުޕްރީމް ކޯޓުގެ އުއްތަމަ ފަނޑިޔާރު އަބްދުލްޣަނީ މުޙައްމަދު ރިޔާސަތުގައި އިންނަވައިގެން މައްސަލަ ބެއްލެވި ބެންޗު -- މީގެއިތުރުން ރާއްޖޭގެ ޖުޑީޝަރީގައި މި އުސޫލުން ބައެއް މަސައްކަތްތައް ކުރެވެމުންދާ ކަމަށާއި، ރާއްޖޭގައި ވަށާޖެހޭ ކޭސް މެނޭޖްމަންޓް ސިސްޓަމެއް ބޭނުންކުރުމާ ގުޅޭ ތަސައްވުރުވެސް އެމަނިކުފާނު ހިއްސާކުރެއްވިއެވެ.
އޭއޭސީސީގެ މެންބަރު 18 ގައުމެއްގެ އެންމެ މަތީ ކޯޓުތަކުގެ އިސްވެރިން ބައިވެރިވެވަޑައިގެންނެވި މި ކޮންގްރެސްގެ ހަވާސާގައި، އެހެން ގައުމުތަކުގެ އުއްތަމަ ފަނޑިޔާރުންނާއި ދުސްތޫރީ ކޯޓުތަކުގެ ފަނޑިޔާރުންނާ އެކު ބޭއްވުނު މުހިންމު މަޝްވަރާތަކެއްގައި ވެސް ދިވެހިރާއްޖޭގެ އުއްތަމަފަނޑިޔާރު ބައިވެރިވެވަޑައިގެންނެވިއެވެ.
މި ކޮންގްރެސްގައި ދުސްތޫރީ ކޯޓުތަކުގައި އޭއައި ބޭނުންކުރުމާ ބެހޭ ގޮތުން ބައިވެރިން އެއްބަސްވި ހަމަތަކުގެ މައްޗަށް ބިނާކޮށް "ސަމަރުގަންދު ޑިކްލަރޭޝަން" ގެ ނަމުގައި ގަރާރެއް އެކުލަވާލައި ވަނީ ފާސްކޮށްފައެވެ.
އޭޝިއާ ސަރަޙައްދުގެ ދުސްތޫރީ ކޯޓުތަކާއި އެއާ އެއް ފެންވަރުގެ އިދާރާތަކުގެ އެންމެ ބޮޑު އިއްތިހާދު ކަމަށްވާ "އެސޯސިއޭޝަން އޮފް އޭޝިއަން ކޮންސްޓިޓިއުޝަނަލް ކޯޓްސް އެންޑް އިކުއިވަލަންޓް އިންސްޓިޓިއުޝަންސް" (އޭއޭސީސީ) ގެ ހަތް ވަނަ ބައިނަލްއަގްވާމީ ކޮންގްރެސްގެ މައިގަނޑު މަގްސަދުތަކުގެ ތެރޭގައި ޒަމާނީ ޓެކްނޮލޮޖީއާއި އާޓިފިޝަލް އިންޓެލިޖެންސް (އޭއައި) އާއެކު އިންސާފު ގާއިމުކުރުމަށްޓަކައި ފަނޑިޔާރު ގޭގެ މިނިވަންކަމާއި އިންސާނީ ޙައްގުތައް ދެމެހެއްޓޭނެ ގާނޫނީ އުސޫލުތައް އެކުލަވާލުން ހިމެނެއެވެ.
މީގެ އިތުރުން މި ކޮންގްރެސްގެ ބޭނުމަކީ ގާނޫނުގެ ވެރިކަން ކަށަވަރުކުރުމުގައި އޭޝިއާގެ ގައުމުތަކަށް ދިމާވާ ގޮންޖެހުންތަކާއި ހޯދާފައިވާ ކުރިއެރުންތަކުގެ ތަޖުރިބާ ހިއްސާކުރުމާއި، ދުސްތޫރީ ޙައްގުތައް ރައްކާތެރިކުރުމުގައި އޭޝިއާގެ ކޯޓުތަކުގެ މެދުގައި އޮންނަ ސަރަޙައްދީ ގުޅުމާއި އެއްބާރުލުން އިތުރުކުރުމެވެ.
މި ކޮންގްރެސްގައި އޭޝިއާ ގައުމު ކަމަށްވާ އުޒްބެކިސްތާން އަދި ދިވެހިރާއްޖޭގެ ސުޕްރީމް ކޯޓު ހިމެނޭހެން އޭޝިއާ ސަރަޙައްދުގެ 20 އަށްވުރެ ގިނަ ގައުމުގެ ދުސްތޫރީ ކޯޓުތަކާއި އިދާރާތަކުން ބައިވެރިވިއެވެ. އަދި ބައިނަލްއަގްވާމީ ޖަމްޢިއްޔާތަކުގެ މަންދޫބުންނާއި ގާނޫނީ މާހިރުން އޮބްޒާވަރުންގެ ގޮތުގައިވެސް ބައިވެރިވެވަޑައިގެންނެވިއެވެ.