"އަހަންނަކީ ދާ ކޮންމެ ތަނަކަށް ބާލީސް ހިފައިގެންދާ މީހުންގެ ތެރެއިން މީހެއް. ދަތުރުމަތީގައިވެސް ބާލީސް އަބަދުވެސް އޮންނާނީ އަތުގައި" މިއީ އިނގިރޭސިވިލާތުގެ މަޝްހޫރު ފިޒިއޯތެރަޕިސްޓް އަދި މެންޗެސްޓާ ސުކޫލް އޮފް ފިޒިއޯތެރަޕީގެ އެސޯސިއޭޓް ޕްރޮފެސަރު ޑރ. ކްރިސް މެކާ ވިސްނަވާ ގޮތެވެ.
ފްލައިޓަށް އަރަންދާއިރު ނުވަތަ ދަބަސްތައް ޗެކިން ކުރަންދާއިރު ބާލީހެއް އަތަށް ނަގައިގެން އުޅޭ މީހުން އެއާޕޯޓްތަކުން ފެނުމަކީ އާންމު ކަމެކެވެ. ޑރ. މެކާ ވިސްނަވާ ގޮތުގައި މިއީ ހަމައެކަނި ބޭކާރު ގޮތްދެއްކުމެއް ނޫނެވެ. ނުބައި ބާލީހެއް ބޭނުންކުރުމަކީ ކަނދުރާއަށާއި ކުދިކުދި ނާރުތަކަށް ނުހަނު ބޮޑެތި ތަދުތަކެއް ކުރިމަތިކުރުވާ ކަމެކެވެ.
އޭނާ އަމިއްލަ ޤައުމުން ބޭރަށްދާއިރު ބާލީސް ނުގެންގުޅުނު ނަމަވެސް، ހޮޓަލަށް ވަންނަ ގޮތަށް އެންމެ ފުރަތަމަވެސް ކުރާ ކަމަކީ އެތަނުގައި ހުންނަ ބާލީސްތައް ސެޓްކުރުމެވެ. ކޮންމެފަދަ ބާލީހެއްވެސް އަރާމު ނިދީގެ ވަސީލަތަކަށް ބަދަލުކޮށްލުމަށް އޭނާ ބޭނުންކުރާ މަޝްހޫރު އުކުޅުތަކެއްވެސް އެބަހުއްޓެވެ.
ޑރ. މެކާ ވިދާޅުވާ ގޮތުގައި އެކަށީގެންވާ ބާލީހެއް އިޚްތިޔާރުކުރުން އެންމެ ބޮޑަށް ބިނާވެގެންވަނީ މީހާ ނިދަން އޮންނަ ގޮތެއްގެ މައްޗަށެވެ. އާންމުކޮށް މީހުން ނިދަނީ ތިން ގޮތަކަށެވެ. އެއީ އަރިއަކަށް، އުއްޑުން ނުވަތަ ބަނޑުވަތަށެވެ.
ނަމަވެސް ބަނޑުވަތަށް ނިދުމަކީ ސިއްހީގޮތުން އެއްގޮތަކަށްވެސް ރަނގަޅު ކަމެއް ނޫންކަމަށް އޭނާ އިރުޝާދު ދެއްވައެވެ. ބަނޑުވަތަށް ނިދުމުން ކަނދުރާއަށް އެއްފަރާތަކަށް އެނބުރިފައި އޮންނަންޖެހޭ ވަގުތު ދިގުވެ، ކަނދުރާ އާއި ބުރަކަށީގެ މަސްތަކަށް ނުހަނު ބޮޑަށް ލޯޑުބޮޑުވެއެވެ. ފިޒިއޯތެރަޕީގެ ދާއިރާގައި ބުރަކަށީގެ ތަދަށް ފަރުވާކުރުމުގައި އެންމެންވެސް އެއްބަސްވާ އެއްކަމަކީ ބަނޑުވަތަށް ނިދުން ހުއްޓާލުމެވެ.
އިނގިރޭސިވިލާތުގެ މަޝްހޫރު ފިޒިއޯތެރަޕިސްޓް އަދި މެންޗެސްޓާ ސުކޫލް އޮފް ފިޒިއޯތެރަޕީގެ އެސޯސިއޭޓް ޕްރޮފެސަރު ޑރ. ކްރިސް މެކާ--ފޮޓޯ/ބީބީސީއުއްޑުން ނިދާ މީހުން ބާލީހެއް ނަގާއިރު، ޢުމުރުން ދުވަސްވަމުންދާ ވަރަކަށް ކަށިގަނޑަށް އަންނަ ބަދަލުތަކާއި ކަނދުރާ އާއި ބުރަކަށީގެ ގުޅުމަށް ސަމާލުވާންޖެހެއެވެ. އެގޮތުން އަރިއަކަށް ނިދާ މީހުންނަށް އެންމެ މުހިންމު މިނަކީ ކޮނޑުގެ ފުޅާމިނެވެ. އާންމުގޮތެއްގައި ކޮނޑު ފުޅާ މީހުންނަށް ބޭނުންވާނީ ބޯ ބާލީހެކެވެ. ނަމަވެސް މީގެ އިތުރުން ނިދަން ބޭނުންކުރާ ތަންމަތީގެ މަޑުމިނަށްވެސް ވިސްނަންޖެހެއެވެ.
ތަންމައްޗަށް މީހާ ތިރިވާ މިންވަރަކީ ބާލީހުގެ އުސްމިން ކަނޑައެޅުމުގައި ނުހަނު މުހިންމު ދައުރެއް އަދާކުރާ ކަމެކެވެ. ހަރު ތަންމައްޗެއްގައި ނިދާ ކޮނޑު ފުޅާ މީހަކަށް ބޯ ބާލީހެއް ބޭނުންވާއިރު، މަޑު ތަންމައްޗެއްގައި ނިދާނަމަ، ކޮނޑު ތަންމަތީގެ ތެރެއަށް ގަނބައިގަންނާތީ ބޭނުންވާނީ ކުޑަކޮށް ތުނި ބާލީހެކެވެ. އުއްޑުން ނިދާ މީހުން ތަންމައްޗަށް ގަނބައިގަންނަ މިންވަރު ކުޑަވުމުން މިއީ އެމީހުންނަށް އެހާ ބޮޑު މައްސަލައެއް ނޫނެވެ.
އަތުގައި އޮތް ބާލީސް މާ ތުނިހެން ހީވާނަމަ، ޑރ. މެކާ އިރުޝާދު ދެއްވަނީ ބާލީހުގެ ދަށަށް ފޮތިގަނޑެއް ނުވަތަ ތުވާލިކޮޅެއް ފައްޖަހާފައި ލެއްވުމަށެވެ. އެއަށްފަހު އެންމެ އަރާމު އުސްމިން ބަލައި، އައު ބާލީހެއް ގަންނައިރު އެ މިނަށް ބަލައިގެން ގަތުމަކީ ބުއްދިވެރި ގޮތެކެވެ.
ވެލްނެސް ސައިޓްތަކުގައި 'އަގޮނޮމިކް' ނުވަތަ 'އޯތޯޕީޑިކް' ބާލީސްތަކުގެ އިޝްތިހާރުތައް ގިނައިން ފެނުނުކަމުގައި ވީނަމަވެސް، މީގެ ތެރެއިން ގިނަ ބާލީސްތަކުގެ އެދެވޭ ނަތީޖާ ސައިންސުން ސާބިތުވެފައެއް ނުވެއެވެ. ނަމަވެސް އަރިއަކަށް ނިދާ މީހުންނަށް ކުޑަކޮށް އުސްކޮށް ހުންނަ ބާލީސްތަކުން ކަދުރާއަށް އެހީތެރިކަން ލިބޭކަން ބައެއް ދިރާސާތަކުން ދައްކައެވެ.
އުއްޑުން ނިދާ މީހުންނަށް ޚާއްޞަކޮށްގެން މެދު ގަނބައިގަންނަ ގޮތަށް ހަދާފައިވާ ބާލީސްތަކަކީ ނިދާ މީހާ ރަނގަޅު ޕޮޒިޝަނެއްގައި ބަހައްޓައިދޭ އެއްޗެކެވެ. ނަމަވެސް ބައެއް މީހުންނަށް މިއީ ނޭވާހިއްލާ ގޮތްވާ، އަދި ހިތްހަމަނުޖެހޭ ފަދަ ބައްޓަމަކަށް ވެދެއެވެ. މީގެއިތުރުން ބޮލުގެ ބަރުދަން ބޮޑު މީހުންނަށް އަބަދުވެސް ބޭނުންވާނީ ތަންކޮޅެއް ހަރު، އަދި ބޯ ބާލީހެކެވެ.
ދޫނިފަތުގެ ބާލީހަކީ ހޫނު ގަދަ ރޭތަކުގައި ސިކުނޑިއާއި ބޮލުން އުފެދޭ ހޫނުކަން ބޭރުކޮށްދީ، ފިނިކަން މަތިކޮށްދޭ އެއްޗެކެވެ. ނަމަވެސް ނިދާއިރު ގިނައިން ގުޑޭ މީހުންގެ ބާލީހުގެ ފަތްތައް އެއްފަރާތަކަށް ޖަމާވެ، ރޭގަނޑު މެދުތެރެއިން ބާލީހުގެ ބައްޓަން ގެއްލި، ކަނދުރާއަށް ތަދުވާ ގޮތްވެއެވެ.
މައިކްރޯފައިބަރު އަދި ހޯލޯފައިބަރު ބާލީސްތަކަކީ ބައްޓަން ނުކެނޑި ހުންނަ ބާވަތްތަކެކެވެ. ނަމަވެސް މިއީ ފަތް ބާލީހާ އަޅާބަލާއިރު ހޫނު ބޭރުކުރުމުގެ ޤާބިލުކަން ކުޑަ އެއްޗެކެވެ. ބައެއް ބާލީސްތަކުގެ ތިރީބައި ހަރުކޮށް ހެދުމުން މުޅި ރޭގަނޑުވެސް ބާލީހުގެ ބައްޓަން އެއްވަރެއްގައި ހިފެހެއްޓެއެވެ.
ޑރ. މެކާ ބޭނުންކުރައްވަނީ ވައި ދައުރުވުމަށް ލޯވަޅުތަކެއް ހަދާފައިވާ ފޯމް ބާލީހެކެވެ. އޭނާ ވިދާޅުވާ ގޮތުގައި އެންމެންނަށް އެއް ބާލީހެއް ކަމުދާނެ އެކަކުވެސް ނުހުންނާނެއެވެ. އެހެންކަމުން ބާލީހެއް ގަންނައިރު، ޓްރަޔަލް މުއްދަތު ނުވަތަ ޓެސްޓުކޮށްލަން ފުރުސަތުދޭ ކުންފުނިތަކުން ބާލީސް ގަތުމަކީ އެންމެ ރަނގަޅު ގޮތެވެ. އަމިއްލަ ހަށިގަނޑާއި ނިދާ އާދަތަކަށް ބަލައިގެން މެނުވީ އެންމެ ފުރިހަމަ ބާލީހެއް ނުހޯދޭނެއެވެ.