ގދ. ތިނަދޫގައި ހުންނަ ޑރ. ޢަބްދުއްޞަމަދު މެމޯރިއަލް ހޮސްޕިޓަލުގައި ކުރިއަށްގެންދިޔަ ކެޓަރެކްޓް ސާޖަރީ އައި ކޭމްޕް ކާމިޔާބުކަމާއެކު ނިންމާލައިފިއެވެ.
މިދިޔަ ހޮނިހިރު ދުވަހުން ހޯމަ ދުވަހަށް ކުރިއަށްގެންދިޔަ މި އައި ކޭމްޕަކީ އުމުރުން ދުވަސްވީ ފަރާތްތަކަށް ޚާއްޞަކޮށްގެން، ލޮލުގެ ފަރުވާއާއި ކެޓަރެކްޓް ސާޖަރީގެ ޚިދުމަތް ރަށުގައި ތިބެގެން ފަސޭހަކަމާއެކު ލިބޭނެ މަގު ފަހިކޮށްދިނުމުގެ މަގުސަދުގައި ބޭއްވި ކޭމްޕެއްކަމަށް އައިކެއަރއިން ބުނެއެވެ.
މި ހަރަކާތަކީ އޭޖްޑް ކެއާ މޯލްޑިވްސް އިސްނަގައިގެން، އެޓްމޮސްފިއަ ފައުންޑޭޝަންގެ މާލީ އެހީތެރިކަމާއެކު ކުރިއަށްގެންދިޔަ ހަރަކާތެކެވެ.
މި މަސައްކަތުގައި އައިކެއަރ ހޮސްޕިޓަލާއި ޑރ. ޢަބްދުއްޞަމަދު މެމޯރިއަލް ހޮސްޕިޓަލުން ވަނީ އަމަލީ ގޮތުން ބައިވެރިވެފައެވެ. މި ކޭމްޕުގައި އޮޕަރޭޝަންތައް ކުރިއަށް ގެންގޮސްދެއްވީ އައިކެއަރ ހޮސްޕިޓަލުގެ ޕީޑިއަޓްރިކް އޮފްތަލްމޮލޮޖީ އާއި ކެޓަރެކްޓް ސާޖަރީގެ ޚާއްޞަ ޑޮކްޓަރު، ޑރ. އަރްޖުން މައްލާއެވެ.
މި މަސައްކަތުގައި ޑރ. ޢަބްދުއްޞަމަދު މެމޯރިއަލް ހޮސްޕިޓަލުގެ ކްލިނިކަލް ޓީމުން ބައިވެރިވެ، ފެސިލިޓީތަކާއި އެހެނިހެން އެހީތެރިކަން ފޯރުކޮށްދީފައިވާކަމަށް އައިކެއަރއިން ބުނެއެވެ.
މި ކޭމްޕުގެ ތެރެއިން އުމުރުން ދުވަސްވީ ނުވަ މީހެއްގެ ކެޓަރެކްޓް ސާޖަރީ ވަނީ ކާމިޔާބުކަމާއެކު ފުރިހަމަކޮށްފައެވެ. މީގެ އިތުރުން، ކުރިން ރަޖިސްޓްރީވި ފަރާތްތަކާއި އާންމުން ހިމެނޭހެން ޑޮކްޓަރުގެ ކޮންސަލްޓޭޝަން އަދި ލޮލުގެ ނަންބަރު ޗެކްކުރުމުގެ ޚިދުމަތް ވަނީ ފޯރުކޮށްދީފައެވެ.
ހަމައެއާއެކު، އޮޕަރޭޝަން ކުރެވުނު ފަރާތްތަކަށް އޮޕަރޭޝަނަށްފަހު ބޭނުންވާ އިރުޝާދުތަކާއި ބޭސް ވަނީ ހިލޭ ފޯރުކޮށްދީފައެވެ.
މި ކޭމްޕުގެ ސަބަބުން ސާޖަރީ ހެދި އުމުރުން ދުވަސްވީ ފަރާތްތަކަށް ފަރުވާ ހޯދުމަށް ރަށުން ބޭރަށް ކުރަންޖެހޭ ދަތުރުތައް ހުއްޓުމަކަށް އައިސް، އާއިލާގެ ގާތުގައި ތިބެގެން ލުއިފަސޭހަކަމާއެކު ފަރުވާ ލިބުނު ކަމަށް އައިކެއަރއިން މައުލޫމާތުދެއެވެ.
އައިކެއަރ ހޮސްޕިޓަލުން ހާމަކުރި ގޮތުގައި، ރާއްޖޭގެ އެކި ކަންކޮޅުތަކަށް ފެންވަރު ރަނގަޅު ލޮލުގެ ފަރުވާ ފޯރުކޮށްދިނުމަށް އެހެން ފަރާތްތަކާ ގުޅިގެން މަސައްކަތް ކުރުމުގައި އެ ހޮސްޕިޓަލުން އަބަދުވެސް ދެމިއޮންނާނެއެވެ.
މީގެ އިތުރުން ތިނަދޫގައި މި ކޭމްޕް ކާމިޔާބުކަމާއެކު ކުރިއަށް ގެންދިއުމަށް މަގުފަހި ކޮށްދެއްވި އޭޖްޑް ކެއާ މޯލްޑިވްސް، އެޓްމޮސްފިއާ ފައުންޑޭޝަން އަދި ޑރ. ޢަބްދުއްޞަމަދު މެމޯރިއަލް ހޮސްޕިޓަލުގެ ޓީމަށް އައިކެއަރއިން ވަނީ ޝުކުރު އަދާކޮށްފައެވެ.
އައިކެއަރ ހޮސްޕިޓަލަކީ ރާއްޖެއާއި ދެކުނު އޭޝިއާ ސަރަޙައްދުގައިވެސް ލޮލުގެ ބަލިތަކަށް ޚާއްޞަ ފަރުވާދޭ އެންމެ ބޮޑު އެއް ހޮސްޕިޓަލެވެ. މާލޭގައި މި ހޮސްޕިޓަލް ހިންގަމުންދާއިރު، ހުޅުމާލޭގައި ވެސް އެނެކްސްއެއް ގާއިމުކުރެވިފައިވެއެވެ.
މި ހޮސްޕިޓަލުން ފޯރުކޮށްދޭ މައިގަނޑު ޚިދުމަތްތަކުގެ ތެރޭގައި އާންމުކޮށް ލޯ ޓެސްޓުކުރުމާއި، ކުޑަކުދިންގެ ލޮލުގެ ޓެސްޓުތައް ހެދުމާއި، ޒަމާނީ ފެކޯ ޓެކްނޮލޮޖީ ބޭނުންކޮށްގެން ކުރާ ކެޓަރެކްޓް ސާޖަރީތައް ހިމެނެއެވެ.