އާޓިފިޝަލް އިންޓެލިޖެންސް (އޭއައި) ބޭނުންކޮށްގެން ހަދާފައިވާ ކިނބުލެއްގެ ފޭކު ފޮޓޯއެއް ފޮނުވުމުގެ ސަބަބުން، ސިންގަޕޫރުގެ ފެންގަނޑެއްގައި ހިންގާ ހަރަކާތްތައް ހުއްޓާލަން ޖެހުނު މައްސަލައެއްގައި މިޔަންމާގެ ރައްޔިތެއްގެ މައްޗަށް ދައުވާކޮށްފިއެވެ.
މިދިޔަ އަންގާރަ ދުވަހު ކޯޓަށް ހާޒިރުކޮށް ދައުވާ އުފުލާފައިވަނީ އުމުރުން 30 އަހަރުގެ ޔޭ ލިންގެ މައްޗަށެވެ.
އޭނާގެ މައްޗަށް އުފުލާފައިވަނީ ދޮގު މައުލޫމާތު ފެތުރުމުގެ ދައުވާއާއި، އަދުލު އިންސާފު ގާއިމުކުރުމަށް ހުރަސްއެޅުމުގެ ދައުވާއެވެ. މި ދެ ދައުވާ ސާބިތުވެއްޖެ ނަމަ، އޭނާ 10 އަހަރަށް ޖަލަށްލުމުގެ ފުރުސަތު އެބައޮތެވެ. ތަރުޖަމާނެއް މެދުވެރިކޮށް ކޯޓުގައި އޭނާ ބުނި ގޮތުގައި، އޭނާ ގަސްތުކުރަނީ ކުށަށް އިއުތިރާފުވުމަށެވެ. އަދި ވަކީލަކު އައްޔަންކުރަން ބޭނުންނުވާ ކަމަށް ވެސް ބުނެފައިވެއެވެ.
ކޯޓަށް ހުށަހަޅާފައިވާ ލިޔެކިޔުންތަކާ ހަވާލާދީ މީޑިއާތަކުން ރިޕޯޓުކޮށްފައިވާ ގޮތުގައި، އޮގަސްޓު 20 ވަނަ ދުވަހު ޔޭ ލިން ވަނީ ސިންގަޕޫރުގެ ޕަންޑާން ރިޒަވޯގައި ކިނބުލެއް އޮތް ކަމަށް ދައްކުވައިދޭ އޭއައި ފޮޓޯއެއް އޭނާއާއެކު މަސައްކަތްކުރާ މިން މިން އޫ ނަމަކަށް ކިޔާ މީހަކަށް ފޮނުވާފައެވެ. އެ ދުވަހުގެ މެންދުރުފަހު، ސިންގަޕޫރުގެ ގައުމީ ފެނާ ބެހޭ އިދާރާ (ޕީޔޫބީ) އަށް ވަނީ އެ ފެންގަނޑުން ކިނބުލެއް ފެނުނު ކަމުގެ ރިޕޯޓަކާއެކު އެ ފޮޓޯ ލިބިފައެވެ. ފޮޓޯއަށް ބިނާކޮށް އެ އިދާރާއިން ލަފާކުރީ އެއީ ސިންގަޕޫރުގެ ކަނޑުގެ ސަރަހައްދުގައި އުޅޭ ބާވަތެއްގެ ކިނބުލެއް ކަމަށެވެ.
މި ރިޕޯޓާ ގުޅިގެން، ޕީޔޫބީއާއި ނޭޝަނަލް ޕާކްސް ބޯޑުން ވަނީ ކިނބޫ ހޯދުމުގެ މަސައްކަތް ފަށައި، އެ ސަރަހައްދުގައި އިންޒާރުގެ ބޯޑުތައް ހަރުކޮށްފައެވެ. އަދި އެ ފެންގަނޑުގައި ކުރިއަށްގެންދާ ކެނޯ ދުއްވުމާއި ފަލިޖެހުން ފަދަ ހުރިހާ ހަރަކާތްތަކެއް ދެ ދުވަހުގެ މުއްދަތަށް މެދުކަނޑާލަން އެންގިއެވެ. ނަމަވެސް، ޔޭ ލިން ހަމައެކަނި އޭނާގެ އެކުވެރިޔާއަށް ފޮނުވި ފޮޓޯ ޕީޔޫބީއާ ހަމައަށް ދިޔަ ގޮތެއް އަދި ސާފެއް ނުވެއެވެ.
އޮގަސްޓު 21 ވަނަ ދުވަހު ޕީޔޫބީން ވަނީ އެއީ ފޭކު ފޮޓޯއެއްކަން ކަށަވަރުކޮށް، ފުލުހުންނަށް މައްސަލަ ހުށަހަޅާފައެވެ. އެއާއެކު ކިނބޫ ހޯދުމުގެ މަސައްކަތް ހުއްޓާލައި، އޮގަސްޓު 22 ގައި ފެންގަނޑުގެ ހަރަކާތްތައް އަލުން ފެށިއެވެ.
ސިންގަޕޫރު ފުލުހުން ނެރުނު ބަޔާނެއްގައި ބުނި ގޮތުގައި، ޔޭ ލިން ވަނީ އޭނާ ކުރި ކަންތައް ސިއްރުކުރުމުގެ ގޮތުން އޮގަސްޓު 21 ވަނަ ދުވަހު އޭނާގެ ފޯނުން އެ ފޮޓޯއާއި، ފޮޓޯ ހަދަން ބޭނުންކުރި އޭއައި އެޕްލިކޭޝަންގެ ހިސްޓަރީ ފޮހެލާފައެވެ. އަދުލު އިންސާފަށް ހުރަސްއެޅުމުގެ ދައުވާ އޭނާގެ މައްޗަށް އުފުލީ މި ސަބަބާ ގުޅިގެންނެވެ.
ސިންގަޕޫރުގެ ގާނޫނުތައް އޮންނަ ގޮތުން، ދޮގު މައުލޫމާތު ފެތުރުމުގެ ކުށަށް ތިން އަހަރުގެ ޖަލު ހުކުމެއް ނުވަތަ 10،000 ސިންގަޕޫރު ޑޮލަރުގެ ޖޫރިމަނާއެއް އާދެއެވެ. އަދި އަދުލު އިންސާފަށް ހުރަސްއެޅުމުގެ ކުށަށް ހަތް އަހަރުގެ ޖަލު ހުކުމެއް އާދެއެވެ. ޔޭ ލިން މިހާރު ހުރީ 5،000 ސިންގަޕޫރު ޑޮލަރުގެ ކަފާލާތެއްގެ ދަށުން ދޫކޮށްލާފައެވެ. އޭނާ ދެން ކޯޓަށް ހާޒިރުކުރަން ހަމަޖެހިފައިވަނީ ނޮވެމްބަރު 10 ވަނަ ދުވަހުއެވެ.
މިއަހަރުގެ މެއި މަހު ސިންގަޕޫރުގެ ސެންޓޯސާ ކޯވް ސަރަހައްދުން ދެ މީޓަރުގެ އަސްލު ކިނބުލެއް ފެނިގެން ހިފައި، މަރާލާފައިވާކަން ފާހަގަކުރެވެއެވެ.