ފިރިމީހާ ގެއިން ބޭރަށް ގޮސް އުޅުމަށާއި ދަތުރުކުރުމަށް ބޭނުންނުވާތީ، އެކަމާ ހިތްހަމަނުޖެހިގެން ޝާރްޖާގެ އަންހެނަކު ވަރިވާން ހުށަހަޅައިފިއެވެ.
ޝާރްޖާ ކޯޓުތަކުގެ ފެމިލީ ގައިޑެންސް ޑިޕާޓްމަންޓުގެ ޑިރެކްޓަރު ޑރ. ރާދިއާ ހަސަން އަލް ރައިސީއާ ހަވާލާދީ މީޑިއާތަކުން ރިޕޯޓުކޮށްފައިވާ ގޮތުގައި، މި މައްސަލަ ފެންމަތިވީ އަންހެންމީހާ އެ އިދާރާގެ އެހީތެރިކަމަށް އެދުމުންނެވެ. ޝާރްޖާ ޓީވީން ގެނެސްދިން "ގަދިއްޔާ ލިލް ހިވާރު" (މަޝްވަރާކުރަންޖެހޭ މައްސަލައެއް) ޕްރޮގްރާމުގައި ވާހަކަދައްކަވަމުން ޑރ. ރާދިއާ ވިދާޅުވީ، އަންހެންމީހާގެ މައިގަނޑު ޝަކުވާއަކީ ފިރިމީހާ އަބަދުވެސް ގޭގައި މަޑުކުރަން ބޭނުންވުމާއި، މުނިފޫހިފިލުވުމަށް ނުވަތަ ދަތުރުކުރުމަށް އޭނާއާއެކު ބޭރަށް ދާން ބޭނުން ނުވުން ކަމަށެވެ.
އަންހެން މީހާ މިފަދަ ޝަކުވާތަކެއް ކުރި ނަމަވެސް، ފިރިމީހާގެ ކިބައިގައި ވަރަށް ރަނގަޅު ސިފަތަކެއް ހުރިކަން ޑރ. ރާދިއާ ފާހަގަކުރެއްވިއެވެ. އެގޮތުން، އެ ފިރިހެންމީހާއަކީ އޯގާތެރި، ދީލަތި، ކެތްތެރި އަދި މަޑުމައިތިރި މިޒާޖެއްގެ މީހެއްކަމަށް އޭނާ ވިދާޅުވިއެވެ. އަދި އޭނާއަކީ އަނބިމީހާއަށް އަނިޔާކޮށް، އިހާނެތިކޮށް ހިތާ މީހެއް ނޫންކަން ވެސް އެ ޕްރޮގްރާމުގައި ފާހަގަކޮށްފައިވެއެވެ.
ޑރ. ރާދިއާ ވިދާޅުވި ގޮތުގައި، ދެމަފިރިންގެ ދެމެދުގައި އޮތް ހަމައެކަނި ތަފާތަކީ ފިރިމީހާ ބޭރަށް ދިއުމުގެ ބަދަލުގައި ގޭގައި ވަގުތު ހޭދަކުރަން ބޭނުންވުމެވެ.
މި މައްސަލައިގައި ފެމިލީ ގައިޑެންސް ޑިޕާޓްމަންޓުން އަންހެންމީހާއަށް ދިން ލަފަޔަކީ، ކައިވެނީގައި ހުރި ރަނގަޅު ކަންކަމުގެ މައްޗަށް މި ކުޑަ ތަފާތު އިސްނުކުރުމަށެވެ. ފިރިމީހާ ބޭރަށް ދާން ބޭނުން ނުވާނަމަ، ދަރިންނާއެކު ނުވަތަ އަމިއްލަ މައިންބަފައިންނާއި އާއިލާގެ އެހެން މީހުންނާއެކު ބޭރަށް ގޮސް މުނިފޫހިފިލުވުމުގެ ހަރަކާތްތަކުގައި ބައިވެރިވުމަށް ޑރ. ރާދިއާ ވަނީ އަންހެންމީހާއަށް ލަފާދެއްވާފައެވެ.
ދިރިއުޅުމުގެ ވައްޓަފާޅިއާއި މުނިފޫހިފިލުވުމަށް ގެންގުޅޭ ވިސްނުމުގެ ތަފާތުތަކުގެ ސަބަބުން ދެމަފިރިންގެ ދެމެދުގައި ހިތްހަމަނުޖެހުން އުފެދިދާނެކަން ގަބޫލުކުރައްވަމުން، ޑރ. ރާދިއާ ވިދާޅުވީ އެފަދަ ކޮންމެ ތަފާތަކީ ކައިވެނި ރޫޅެންޖެހޭ ސަބަބެއް ނޫން ކަމަށެވެ. އަދި ގުޅުމަށް އަސަރުކުރާ ފަދަ ބޮޑެތި މައްސަލަތަކެއް ނެތް ހާލަތްތަކުގައި، ކޮންމެ ކުޑަ ހިޔާލުތަފާތުވުމެއް ގާނޫނީ ނުވަތަ އާއިލީ ބޮޑު މައްސަލައަކަށް ނުހެދުމަށް އޭނާ އިލްތިމާސްކުރެއްވިއެވެ.
ޑރ. ރާދިއާ ވިދާޅުވި ގޮތުގައި، މި ހާދިސާގައި ފާހަގަކުރެވުނު ކައިވެންޏަކީ އެހެން ގޮތްގޮތުން ބަލާއިރު ހަމަޖެހޭ، ރައްކާތެރި އަދި އެއްވެސް ސީރިއަސް މައްސަލައެއް ނެތް ކައިވެންޏެކެވެ. އެހެންކަމުން، ފިރިމީހާގެ ކިބައިގައި ނެތް ސިފަތަކަށް ވިސްނުމުގެ ބަދަލުގައި، އާއިލީ ގުޅުން ބަދަހިކޮށްދޭ ރަނގަޅު ސިފަތައް ބަލައިގަތުމުގެ މުހިންމުކަން އޭނާ ފާހަގަކުރެއްވިއެވެ.