އިރުވައި މޫސުމާ ދިމާކޮށް ރާއްޖެއަށް ހިޖުރަކުރާ ހިމާޔަތްކޮށްފައިވާ ދޫނިތައް ހިފައި، ގެންގުޅެ އަދި ވިޔަފާރިކުރާ ފަރާތްތައް ޖޫރިމަނާކުރާނެ ކަމުގެ އިންޒާރު، އެންވަޔަރަމަންޓަލް ރެގިއުލޭޓަރީ އޮތޯރިޓީ (އީއާރުއޭ) އިން އަނެއްކާ ވެސް ދީފިއެވެ.
އެ އޮތޯރިޓީން ނެރުނު ބަޔާނެއްގައި ބުނި ގޮތުގައި، ކޮންމެ އަހަރެއްގެ ވެސް މި ދުވަސްވަރާ ދިމާކޮށް ގިނަ ބާވަތްތަކެއްގެ ދޫނި މަޅިފަތި ޖަހައިގެން ހިފުމާއި، ފިޔަކޮށައި ކޮށިތަކުގައި ބަންދުކޮށްގެން ގެންގުޅޭކަން ވަނީ ފާހަގަކުރެވިފައެވެ. އަދި އޮޅުދޫނީގެ ގޮތުގައި ގެންގުޅުމުގެ އިތުރުން، މިފަދަ ދޫނީގެ ވިޔަފާރިކުރާކަން ވެސް ފާހަގަކުރެވިފައިވާ ކަމަށް އީއާރުއޭއިން ބުންޏެވެ.
ރާއްޖެއަށް ހިޖުރަކުރާ ދޫނިތަކަކީ ތިމާވެށި ރައްކާތެރިކޮށް ދެމެހެއްޓުމާބެހޭ ގާނޫނުގެ ދަށުން ހަދާފައިވާ، ގުދުރަތީ ގޮތުގައި ނުވަތަ ތަބީއީ ގޮތުގައި ހިމާޔަތްކޮށް ރައްކާތެރިކުރާ ދިރޭ ތަކެއްޗާބެހޭ ގަވާއިދުގެ ދަށުން ހިމާޔަތްކޮށްފައިވާ ދިރުންތަކެކެވެ. އެހެންކަމުން، މިފަދަ ދޫނި ހިފައި ގެންގުޅުމަކީ އެ ގަވާއިދުގެ 17 ވަނަ މާއްދާގެ ދަށުން މަނާކަމެއް ކަމަށް އެ އޮތޯރިޓީން ފާހަގަކުރިއެވެ.
އީއާރުއޭއިން މިދިޔަ އަހަރު ކޮށްފައިވާ ދިރާސާއަކާ ހަވާލާދީ އެ އޮތޯރިޓީން ބުނީ، ރާއްޖެއަށް ހިޖުރަކުރާ ދޫނީގެ އަދަދު މިހާރު މަދުވަމުންދާ ކަމަށެވެ. މިއީ ރާއްޖޭގެ ވެއްޓަށް ކުރާ ފައިދާތަކާއި މުއްސަނދިކަމަށް އެޅޭ ހުރަހެއް ކަމަށް ވެސް އެ ބަޔާނުގައި ބުނެފައިވެއެވެ.
މީގެ އިތުރުން، ހިޖުރަކުރާ ދޫނި ހިފުމަކީ ރާއްޖެއިން ބައިވެރިވެފައިވާ ބައިނަލްއަގުވާމީ މުއާހަދާއެއް ކަމަށްވާ "ކޮންވެންޝަން އޮން މައިގްރޭޓަރީ ސްޕީޝީޒް" އާ ވެސް ހިލާފު އަމަލެއް ކަމަށް އީއާރުއޭއިން ބުންޏެވެ. މި މުއާހަދާގެ ދަށުން، ހިޖުރަކުރާ ދޫނިތަކަށް ރައްކާތެރިކަން ފޯރުކޮށްދިނުމަކީ ދިވެހިރާއްޖޭގެ ޒިންމާއެއް ކަމަށް އެ އޮތޯރިޓީން ފާހަގަކުރިއެވެ.
ގަވާއިދާ ހިލާފަށް ދޫނި ހިފައި، ގެންގުޅެ އަދި ވިޔަފާރިކުރާ ފަރާތްތަކަށް އީއާރުއޭއިން ވަނީ އެ އަމަލުތަކުން ދުރުހެލިވުމަށް އަންގައިފައެވެ. އަދި މިހާރު ހިފާފައިވާ ދޫނިތައް ދޫކޮށްލުމަށް ވެސް އެ އޮތޯރިޓީން އެންގިއެވެ. މިފަދަ އަމަލުތައް ހިންގާ ފަރާތްތަކާމެދު ހިމާޔަތްކޮށް ރައްކާތެރިކުރާ ދިރޭ ތަކެއްޗާބެހޭ ގަވާއިދުގެ ދަށުން ޖޫރިމަނާކުރާނެ ކަމަށް ވެސް ބަޔާނުގައި ބުނެފައިވެއެވެ.
ދޫނި ހިފައި ގެންގުޅޭ ފަރާތްތަކުގެ މައުލޫމާތު އެނގޭނަމަ، އެކަން އީއާރުއޭއަށް ރިޕޯޓުކުރުމަށް އެ އޮތޯރިޓީން ވަނީ އާންމުންގެ ކިބައިން އެދިފައެވެ. ޝަކުވާ ހުށަހަޅާއިރު، ދޫނި ގެންގުޅޭ ފަރާތުގެ މައުލޫމާތާއި، އެތަކެތި ގެންގުޅޭ ތަނުގެ ތަފުސީލާއި، ހިފާފައިވާ ދޫނީގެ ބާވަތުގެ އިތުރުން މައްސަލައާ ގުޅުންހުރި ފޮޓޯ ނުވަތަ ވީޑިއޯ ހުށަހެޅުމަށް އީއާރުއޭއިން އެދެއެވެ. މި މައުލޫމާތުތައް އެ އޮތޯރިޓީގެ ނަންބަރު 3335949 އަށް ގުޅައިގެން ނުވަތަ އީމެއިލް މެދުވެރިކޮށް ހިއްސާކުރެވޭނެއެވެ.
މި މައްސަލައާ ގުޅޭގޮތުން އީއާރުއޭއިން ވަނީ ދެ ރިޕޯޓެއް ވެސް އާންމުކޮށްފައެވެ. އެއީ ރާއްޖޭގައި ހިމާޔަތްކުރެވިފައިވާ ދޫނީގެ ބާވަތްތައް ބަލަހައްޓައި ރައްކާތެރިކަން ދިނުމަށް ބޭނުންކުރާ އަސާސީ އުސޫލުތަކާއި މިންގަނޑުތައް ބަޔާންކުރާ ރިޕޯޓަކާއި، ރާއްޖޭގައި އާލާވާ ދޫންޏާއި ހިޖުރަކުރާ ދޫނީގެ މިދިޔަ އަހަރުގެ ހާލަތު ބަޔާންކުރާ ރިޕޯޓެކެވެ.