އެމެރިކާގެ ޓެނެސީ ސްޓޭޓުގައި މަރުގެ އަދަބު ދިނުމަށް ދެ ފަހަރެއްގެ މަތިން ވިހަ އިންޖެކްޝަން ދިން އަންހެނަކު މަރުނުވެ ސަލާމަތްވެއްޖެއެވެ.
އުމުރުން 50 އަހަރުގެ ކްރިސްޓާ ޕައިކްއަށް މަރުގެ އަދަބު ދިނުން ހުއްޓުވުމަށް އޭނާގެ ވަކީލުން ވަނީ ކުއްލި މައްސަލައެއް ކޯޓަށް ހުށަހަޅާފައެވެ. ވަކީލުން ބުނި ގޮތުގައި، ވިހަ ކެމިކަލް ހިމެނޭ ދެ ސިރިންޖު އޭނާގެ ގަޔަށް ޖެހުމަށްފަހު ވެސް އޭނާގެ ހޭނުނެތޭ ކަމަށާއި، ހިތް ތެޅެމުންދިޔަ ކަމަށެވެ.
ޓެނެސީ ޑިޕާޓްމަންޓް އޮފް ކަރެކްޝަންއިން ބުނީ، ރިވާބެންޑް މެކްސިމަމް ސެކިއުރިޓީ އިންސްޓިޓިއުޝަންއިން އޭނާ މިހާރު އެހެން ސިއްހީ މަރުކަޒަކަށް ބަދަލުކޮށްފައިވާ ކަމަށެވެ. ނަމަވެސް، މަރުގެ އަދަބު ދިނުމުގެ ހުރިހާ އިޖުރާއަތެއް ފުރިހަމަކުރި ކަމަށް އޮފިޝަލުން ބުންޏެވެ.
މި މަންޒަރު ދުށް ނޫސްވެރިންނާ ހަވާލާދީ އެންބީސީ ނިއުސްއިން ރިޕޯޓުކޮށްފައިވާ ގޮތުގައި، ޕައިކްއަށް ތަދުވެގެން އުޅުނު އަޑު އިވުނެވެ. އަދި އޭނާގެ ފައި ތަޅުވަމުންދިޔަ ވަރުން، ގައިގައި އަޅާފައި އޮތް ފޮތިގަނޑު ވެސް ވެއްޓުނު ކަމަށް ނޫސްވެރިން ބުންޏެވެ. ރޭގަނޑު 7:27 ގައި ފުރަތަމަ އިންޖެކްޝަން ދިނުމުގެ ކުރިން އޭނާ ހުރީ ހަމަޖެހިގެން ކަމަށް ބުންޏެވެ. ނަމަވެސް އޭނާ ހޭލާ އޮތުމުން، 8:26 ގައި ޕެންޓޯބާބިޓޯލްގެ ދެވަނަ ޑޯޒެއް ދިނެވެ. އޭގެ ފަހުން ވެސް ފަރުދާގެ ފުރަގަށުން އޭނާ ގުގުރިދަމާ އަޑު އިވުނު ކަމަށާއި، 8:53 ގައި މައިކްރޯފޯން ނިއްވާލުމަށްފަހު މަންޒަރު ބަލަން ތިބި މީހުން ނުކުތުމަށް އެންގި ކަމަށް މަންޒަރު ދުށް މީހުން ބުންޏެވެ.
މި ހާދިސާއާ ގުޅިގެން ޑެތު ޕެނަލްޓީ އިންފޮމޭޝަން ސެންޓަރު (ޑީޕީއައި) އިން ނެރުނު ބަޔާނެއްގައި ބުނީ، މިއީ ޒަމާނީ ތާރީހުގައި މަރުގެ އަދަބު ދިނުމުގައި ހިނގި އެންމެ ގޯސް އެއް ހާދިސާ ކަމަށެވެ. އަދި މިއީ ހުއްޓުވިދާނެ ކަމެއް ކަމަށް ވެސް އެ ޖަމިއްޔާއިން ބުންޏެވެ.
ޓެނެސީގެ ގަވަރުނަރު ބިލް ލީ ވިދާޅުވި ގޮތުގައި، މިކަން ހިނގާދިޔަ ގޮތް ބެލުމަށް މިނިވަން ތަހުގީގެއް ހިންގުމަށް ވަނީ އަންގަވާފައެވެ. އަދި މި އަހަރު ދިނުމަށް ހަމަޖެހިފައިވާ މަރުގެ ހުރިހާ އަދަބެއް ވަނީ ކެންސަލްކުރައްވާފައެވެ.
ޕައިކްއަށް މަރުގެ އަދަބު އިއްވާފައިވަނީ 1995 ވަނަ އަހަރު އުމުރުން 19 އަހަރުގެ ކޮލީން ސްލެމާ މަރާލި މައްސަލައިގައެވެ. ޕައިކްއާއި އޭނާގެ ލޯބިވެރިޔާ ޓަޑަރީލް ޝިޕް ގުޅިގެން ސްލެމާ މަރާލުމަށްފަހު، އޭނާގެ ހަށިގަނޑުގައި ޝައިތާނަށް އަޅުކަންކުރާ މީހުން ބޭނުންކުރާ ނިޝާނެއް ކުރަހާފައިވެއެވެ. މި މައްސަލައިގައި ޝިޕްއަށް އުމުރުދުވަހުގެ ޖަލު ހުކުމެއް އިއްވިއެވެ. ޕައިކްގެ ވަކީލުން ވަނީ އޭނާގެ ނަފްސާނީ ބަލިމަޑުކަމާއި ކުޑައިރު ލިބިފައިވާ ޖިންސީ ގޯނާގެ މައްސަލަތަކަށް ރިއާޔަތްކުރުމަށް އެދިފައެވެ. ނަމަވެސް އެމެރިކާގެ ސުޕްރީމް ކޯޓުން ވަނީ މަރުގެ އަދަބު ހުއްޓުވުމަށް ހުށަހެޅި މައްސަލަ ބޭރުކޮށްލާފައެވެ.
ސްލެމާގެ މަންމަ މޭ މާޓިނޭޒް ބުނި ގޮތުގައި، މަރުގެ އަދަބު ދިނުމަށް ކުރި މަސައްކަތް ދިޔައީ ވަރަށް ގޯސްކޮށެވެ.
ޕައިކްއަކީ ފާއިތުވި 200 އަހަރުގެ ތެރޭގައި ޓެނެސީގައި މަރުގެ އަދަބު ދޭ ފުރަތަމަ އަންހެނާއެވެ. އެ ސްޓޭޓުގައި އެންމެ ފަހުން އަންހެނަކަށް މަރުގެ އަދަބު ދީފައިވަނީ 1820 ވަނަ އަހަރުއެވެ.
ޑީޕީއައިގެ އެގްޒެކެޓިވް ޑިރެކްޓަރު ރޮބިން މާހާ ވިދާޅުވި ގޮތުގައި، މީގެ ކުރިން އިންޖެކްޝަން ޖަހާނެ ނާރެއް ނުފެނިގެން ހަތް މީހަކު ސަލާމަތްވެފައިވީ ނަމަވެސް، ވިހަ ކެމިކަލް ހަށިގަނޑަށް ފޮނުވާލުމަށްފަހު މީހަކު ދިރިހުރި މިއީ ފުރަތަމަ ފަހަރެވެ.