އެޕަލް ކުންފުނިން ސިރީ އޭއައި އާއި ހޯމްކިޓް ވަސީލަތްތައް ކޮންޓްރޯލްކޮށް، ވީޑިއޯ ބެލުމާއި ކަލަންޑަރާއި މޫސުމީ މައުލޫމާތު ބަލައިލެވޭ ގޮތަށް ނެރޭ އާ ސުމާޓް ހޯމް އެކްސެސަރީ ނެރުމަށް ތައްޔާރުވެފައިވަނިކޮށް އެ އުފެއްދުމުގެ ގިނަ މައުލޫމާތުތަކެއް ހާމަވެއްޖެއެވެ.
މި އުފެއްދުން ފަރުމާކޮށްފައިވަނީ އައިޕެޑަކާ ވައްތަރު ގޮތަކަށް، ހަތަރެސްކަނަށް ވާގޮތަށް އިންނަ ހަ އިންޗީގެ ސްކްރީނަކާއެކުގައެވެ. މި ވަސީލަތުގެ ދެ މޮޑެލެއް ނެރުމަށް ހަމަޖެހިފައިވާއިރު، އޭގެ ތެރެއިން އެއް މޮޑެލް އަކީ ފާރުގައި ހަރުކުރެވޭ ގޮތަށް ތައްޔާރުކުރެވޭ މޮޑެލެކެވެ. ދެވަނަ މޮޑެލްގައި ކުރީގެ އައިމެކް ޖީ4 މޮޑެލްއާ ވައްތަރު ބޯޅަ ބައްޓަމުގެ ސްޕީކަރު ބޭސެއް ހިމެނޭނެއެވެ.
މި ހަބްގައި 1080ޕީ ގެ ފްރަންޓް ކެމެރާއެއް ހިމެނޭނެއެވެ. މި ކެމެރާގެ އެހީގައި ފޭސްޓައިމް ކޯލްތައް ކުރުމުގެ އިތުރުން، ގޭގައި އުޅޭ ތަފާތު މީހުން ދެނެގަތުމާއި، މޫނު ބަލައިގެން ޔޫޒާ ޕްރޮފައިލް ބަދަލުކުރުމުގެ ޤާބިލުކަން ލިބިގެންވެއެވެ. މީގެއިތުރުން، އެކަކު އަނެކަކާ ދުރުމިން ވަޒަންކޮށް، ކައިރިވާވަރަކުން ސްކްރީނުން ފެންނަ މައުލޫމާތު ބަދަލުކޮށްދޭ ސެންސަރުތައްވެސް ހިމެނެއެވެ.
ސަފާރީ، އެޕަލް ނިއުސް، އެޕަލް މިއުޒިކް، ނޯޓްސް، ކަލަންޑަރު، ފޮޓޯސް، މެސެޖެސް އަދި ފޭސްޓައިމް ފަދަ އެޕްތައް މި ޑިވައިސްގައި ހުންނާނެ ---މި ވަސީލަތް ހިނގުމަށް ބޭނުންކުރާނީ އެޕަލްގެ އޭ18 ޗިޕް ނުވަތަ އެއަށްވުރެ މަތީ ޗިޕެކެވެ. އަދި އެޕަލް އިންޓެލިޖެންސްގެޚިދުމަތްތަކަށް ސަޕޯޓްކުރުމަށްޓަކައި މަދުވެގެން 8 ޖީބީގެ ރޭމް ހިމެނޭނެއެވެ. މީގެ އޮޕަރޭޓިންގ ސިސްޓަމަށް އެތެރޭގައި "ޗަރިސްމެޓިކް" ގެ ނަމުން ނަންދެވިފައިވީ ނަމަވެސް، ބާޒާރަށް ނެރޭއިރު "ހޯމް އޯއެސް" ގެ ނަމުގައި ނެރުން އެކަށީގެންވެއެވެ.
މި ހަބަށް ހާއްސަ އެޕް ސްޓޯރެއް ނުހުންނާނެއެވެ. ނަމަވެސް ސަފާރީ، އެޕަލް ނިއުސް، އެޕަލް މިއުޒިކް، ނޯޓްސް، ކަލަންޑަރު، ފޮޓޯސް، މެސެޖެސް އަދި ފޭސްޓައިމް ފަދަ އެޕްލިކޭޝަންތައް ޕްރީ-އިންސްޓޯލްކޮށްފައި ހުންނާނެއެވެ. މީގެއިތުރުން ގޭގެ ތަފާތު ކޮޓަރިތަކުގައި މިފަދަ ގިނަ ހަބްތައް ބަހައްޓައިގެން އިންޓަކޮމްގެ ގޮތުގައިވެސް ބޭނުންކުރެވޭނެއެވެ.
މި ސްމާޓް ހޯމް ހަބް ބާޒާރަށް ނެރޭނީ އޮކްޓޯބަރު 13 ގައި ކަމަށް ރިޕޯޓްތައް ބުނެއެވެ. މިއާއެކު އާ އެޕަލް ޓީވީ 4ކޭ އާއި އާ ހޯމްޕޮޑް މިނީވެސް ތަޢާރަފުކުރުމަށް ވަނީ ހަމަޖެހިފައެވެ. މި ހަބުގެ އަގު އުޅޭނެ ކަމަށް ލަފާކުރެވެނީ 350 އެމެރިކާ ޑޮލަރުގައެވެ. އަދި 2027 ވަނަ އަހަރު މި ސިސްޓަމާ ގުޅުވައިގެން ބޭނުންކުރެވޭނެ އިންޑޯ ސެކިއުރިޓީ ކެމެރާއެއް ނެރުމަށްވެސް އެޕަލްއިން ރާވަމުންދެއެވެ.