އިންޑިއާގެ މަޝްހޫރު ފިލްމު ޕްރޮޑިއުސަރު/ޑައިރެކްޓަރު ކަރަން ޖޯހަރުގެ ސެލެބްރިޓީ ޗެޓް ޝޯ "ކޮފީ ވިތު ކަރަން" 22 އަހަރު ފަހުން ނިންމާލަން ނިންމައިފިއެވެ.
އިންޑިއާގެ ފިލްމީ ދާއިރާގެ އެންމެ މަގުބޫލު އަދި އެހާމެ ގިނަ ބައެއްގެ ސަމާލުކަން ހޯދާފައިވާ މި ޗެޓް ޝޯ ފާހަގަވެފައިވަނީ ބޮލީވުޑްގެ ފިލްމީ ތަރިންނާއި މަޝްހޫރު ފަރާތްތަކުގެ އެންމެ ސިއްރުވެރި ވާހަކަތަކާއި ބޮޑެތި ހަގީގަތްތައް ހާމަކުރާ ޝޯގެ ގޮތުގައެވެ. ބާވީސް އަހަރުގެ ދިގު ތާރީޚަކަށްފަހު މި ޝޯގެ ފަހު ސީޒަން ދައްކަން ފެށުމަށް ހަމަޖެހިފައިވަނީ މި މަހުގެ 14 ވަނަ ދުވަހުން ފެށިގެން ޖިއޯހޮޓްސްޓާ މެދުވެރިކޮށެވެ.
އިންޑިއާގެ ޕޮޕް ކަލްޗާއަށް ބޮޑު ބަދަލެއް ގެނެސްދިން މި ޝޯއަކީ 2004 ވަނަ އަހަރު ފެށި ޝޯއެކެވެ. މުޅިއެކު 8 ސީޒަނަކަށް ބަހާލައިގެން މިހާތަނަށް 161 އެޕިސޯޑު ގެނެސްދީފައިވާ މި ޝޯއަކީ ގިނަ ބަހުސްތަކަކާއި، ޚިޔާލުތަފާތުވުންތަކެއްގެ އިތުރުން ބޮލީވުޑްގެ އެންމެ ބޮޑެތި ޚަބަރުތައް ސުރުޚީތަކަށް އަރައިގެން ދިޔަ މައިގަނޑު އެއް ވަސީލަތެވެ.
"ކޮފީ ވިތު ކަރަން"ގެ 8 ވަނަ ސީޒަންއިން ފެނުނު ފިލްމީ ތަރިން ކަމަށްވާ އާލިއާ ބަޓް، ކަރީނާ ކަޕޫރު ޚާން، ދީޕިކާ ޕަދުކޯން އަދި ރަންވީރް ސިންގް--ފޮޓޯ/މިޑްޑޭޝޯ ނިންމާލުމާ ގުޅޭގޮތުން ވާހަކަދައްކަމުން ކަރަން ބުނީ، ބައެއް ދަތުރުތަކަކީ ނިންމާލަން ރޭވުމެއް ނެތި، ނަމަވެސް އެ ދަތުރެއް ނިންމާލަންވީ ވަގުތު ޖެހިއްޖެކަން ހިތުގެ އަޑިން އިހުސާސްވާ ދަތުރުތައް ކަމަށެވެ. "ކޮފީ ވިތު ކަރަން" އަކީ އޭނާގެ ހަޔާތުގެ ވަރަށް ޚާއްޞަ ބައެއްކަން ފާހަގަކުރަމުން ކަރަން ބުނީ، މި ޝޯގެ ސަބަބުން ގާތް އެކުވެރިކަމާއި، ހަނދާންތަކާއި، މަޖާ ވަގުތުތަކުގެ އިތުރުން ބެލުންތެރިންގެ ފަރާތުން އިންތިހާއަށް ލޯބި ލިބުނު ކަމަށެވެ.
ކަރަން އިތުރަށް ބުނިގޮތުގައި، މި ހުރިހާ ކަމެއްގެ ތެރެއިންވެސް އެންމެ ބޮޑު ސާބިތުކަމެއް ފެނުނީ ބެލުންތެރިންގެ ފަރާތުންނެވެ. ބެލުންތެރިން ވަނީ ޝޯއާއެކު ހީ، ސަމާސާކޮށް، ޚިޔާލު ފާޅުކޮށް، ފާޑުކިޔައި، އަދި ޝޯ ބަލައިގަނެފައެވެ. އެހެންކަމުން، މި ޝޯއަށް އަލްވަދާޢު ކިއުމަކީ އަސަރުގަދަ ކަމަކަށް ވީނަމަވެސް، މިއީ އެންމެ ރަނގަޅު ވަގުތު ކަމަށް ޤަބޫލުކުރާ ކަމަށް އޭނާ ބުންޏެވެ. މި ފަހު ސީޒަނަކީ ވޭތުވެދިޔަ ތަނުގައި ޝޯއަށް ސަޕޯޓުކުރި އެންމެހައި ބެލުންތެރިންނަށް ޝުކުރު އަދާކުރުމުގެ ގޮތުން ގެނެސްދޭ ޚާއްޞަ ސީޒަނެކެވެ.
ޖިއޯސްޓާގެ ހިންދީ އަދި އިންގްލިޝް އެންޓަޓެއިންމަންޓް ބިޒްނަސްގެ ހެޑް އަލޯކް ޖައިން ބުނީ، މި ޝޯއަކީ ވޭތުވެދިޔަ ވިއްސަކަށް އަހަރު ތެރޭގައި ބޮލީވުޑްގެ އެންމެ މަޤުބޫލު ތަރިން ބެލުންތެރިންގެ ސިޓިންރޫމްތަކާ ހަމައަށް ގެނެސްދީ، އެހެން އެއްވެސް ޝޯއަކުން ހޯދިފައިނުވާފަދަ ބޮޑު މަޤުބޫލުކަމެއް ހޯދާފައިވާ ޝޯއެއް ކަމަށެވެ.
ސެލެބްރިޓީންގެ ދިރިއުޅުމުގެ އަމިއްލަ އަދި ނުވިސްނޭފަދަ ގިނަ ކަންތައްތަކެއް ބެލުންތެރިންނަށް ތިލަކޮށްދިން މި ޝޯގެ ފަހު ބައި ޖިއޯހޮޓްސްޓާ މެދުވެރިކޮށް ބެލުންތެރިންނާ ހަމައަށް ގެނެސްދެވޭތީ އުފާކުރާކަމަށްވެސް އޭނާ ބުންޏެވެ.
މި ފަހަރުގެ ސީޒަންގައި މެހުމާނުންގެ ގޮތުގައި ބައިވެރިވާނީ ކޮންކޮން ތަރިންނެއްކަން އަދި އިޢުލާނުކޮށްފައި ނެތް ނަމަވެސް ބައެއް މީޑިއާތަކުން ރިޕޯޓްކޮށްފައިވާ ގޮތުގައި އާ ސީޒަންގެ ފުރަތަމަ އެޕިިސޯޑްގައި މެހުމާނުންގެ ގޮތުގައި ބައިވެރި ވާނީ އާލިއާ ބަޓާއި އޭނަގެ ދައްތަ ޝާހީން ބަޓެވެ.