ރާއްޖޭގައި ނަފްސާނީ އެހީތެރިކަން ފޯރުކޮށްދިނުމަށް ގާއިމުކޮށްފައިވާ 24 ގަޑިއިރުގެ ގައުމީ ހެލްޕްލައިން "1677" މެދުވެރިކޮށް، 2024 ވަނަ އަހަރުން ފެށިގެން މިހާތަނަށް ޖުމްލަ 23,679 ކޯލް ލިބިފައިވާ ކަމަށް ހެލްތު މިނިސްޓްރީން ހާމަކޮށްފިއެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ހެލްތު މިނިސްޓަރު ގީލާ އަލީ ހިއްސާކުރެއްވި ތަފާސްހިސާބުތަކަށް ބަލާއިރު، 2024 ވަނަ އަހަރު ހެލްޕްލައިނަށް 2,576 ކޯލް ލިބިފައިވެއެވެ. އަދި 2025 ވަނަ އަހަރު 10,821 ކޯލް އަދި 2026 ވަނަ އަހަރު މިހާތަނަށް 10,282 ކޯލް ލިބިފައިވާކަން ފާހަގަކުރެއްވިއެވެ.
ނަފްސާނީ ބަލިތަކަށް ފަރުވާދިނުމުގެ ދާއިރާއިން ކުރެވެމުންދާ މަސައްކަތްތަކަށް އަލިއަޅުއްވާލައްވަމުން ގީލާ ވިދާޅުވީ، މަރުކަޒީ ފަރުވާގެ ނިޒާމުގެ ތެރެއިން މިހާތަނަށް 201 މީހަކު ފަރުވާ ފުރިހަމަކޮށް އާއިލާތަކާ ހަވާލުކުރެވިފައިވާ ކަމަށެވެ. އަދި އިތުރު 64 މީހަކަށް ފަރުވާދީ، އަނބުރާ މުޖުތަމައަށް ނެރެ މަސައްކަތްތަކުގައި ބައިވެރިކުރުމުގެ މަސައްކަތް ދަނީ ކުރެވެމުންނެވެ. މީގެއިތުރުން، ޖަމްއިއްޔާތަކާ ގުޅިގެން ބަލިމީހުންގެ ގޭގެއަށް ގޮސް ފަރުވާދިނުމުގެ ޚިދުމަތް ވެސް މިހާރު ވަނީ ތައާރަފުކޮށްފައެވެ.
މި ދާއިރާ އިތުރަށް ހަރުދަނާކުރުމަށް ސަރުކާރުން ގިނަ ފިޔަވަޅުތަކެއް އަޅަމުންދާކަން ފާހަގަކުރައްވައި ގީލާ ވިދާޅުވީ، ކުޑަކުދިންނަށް ޚާއްސަ ނަފްސާނީ ފަރުވާގެ ނިޒާމެއް ގާއިމުކުރުމުގެ މަސައްކަތާއި، ބޭސް ލިބުމުގެ ދަތިކަން ހައްލުކުރުމަށް ޖުމްލަ ނުވަ ރަށެއްގައި އެ ޚިދުމަތް ފެށުމުގެ މަސައްކަތް ކުރެވެމުންދާ ކަމަށެވެ.
އަދި 80 އެނދާއެކު ސައިކިއެޓްރިކް އިމަޖެންސީ ޚިދުމަތް ފެށުމަށާއި، އެއް ޖިންސަށް ޚާއްސަކޮށްގެން ރީހެބިލިޓޭޝަން ޚިދުމަތް ފުޅާކުރުމުގެ އިތުރުން، އަންހެނުންނަށް ޚާއްސަ ނަފްސާނީ ބަލިމީހުން ބަލަހައްޓާ މަރުކަޒެއް ގާއިމުކުރުމަށް ވެސް ވަނީ ނިންމާފައެވެ.
ހަމައެއާއެކު، ނަފްސާނީ ސިއްހަތާ ގުޅޭގޮތުން މީހުން ބިނާކުރުމާއި ހޭލުންތެރިކުރުމުގެ ދާއިރާއިން ވެސް މުހިންމު ކާމިޔާބީތަކެއް ވަނީ ޙާސިލުކުރެވިފައިވާ ކަމަށް ވިދާޅުވިއެވެ. އެގޮތުން އެމްއެޗްޖީއޭޕީ ޕްރޮގްރާމްގެ ދަށުން 193 މީހުން އަދި ސައިކޮލޮޖިކަލް ފަސްޓްއެއިޑް (ޕީއެފްއޭ) ޕްރޮގްރާމްގެ ދަށުން 164 މީހުން ވަނީ ތަމްރީނުކޮށްފައެވެ. އަދި މެންޓަލް ހެލްތު ލިޓްރަސީ ޕްރޮގްރާމް މެދުވެރިކޮށް 512 މީހަކު ވަނީ ހޭލުންތެރިކުރެވިފައެވެ.