މެންޗެސްޓާ ސިޓީއާ ދެކޮޅަށް އުފުލާފައިވާ ދައުވާތައް ސާބިތުވާކަމަށް ގިނަ ރިޕޯޓުތަކުން ބުނަން ފެށުމާއެކު، އެ ދައުވާތައް ރަސްމީކޮށް ސާބިތުވާނަމަ އެ ކުލަބަށް ދެވެން އޮތް އެންމެ ހަރުކަށި އަދަބު ދިނުމަށް ކަމަށް ސްޕެއިންގެ އެއްވަނަ ޑިވިޝަން، ލަލީގާގެ ރައީސް ހަވިއޭ ޓޭބަސް ގޮވާލައިފިއެވެ.
ޓޭބަސް މިކަމަށް ގޮވާލާފައި ވަނީ ސިޓީއާ ދެކޮޅަށް ކޮށްފައިވާ ހުރިހާ ދައުވާއެއް ސާބިތުވާކަމަށް ޕްރެމިއާ ލީގުގެ އިންޑިޕެންޑެންޓް ކޮމިޝަނަކުން ނިންމާފައިވަނިކޮށެވެ.
ފީފްޕްރޯ އާއި ކްލީވްލެންޑް ކްލިނިކް ގުޅިގެން ލަންޑަންގައި މިހާރު ކުރިއަށްގެންދާ ޕީކް ޕަފޯމަންސް އެންޑް ހެލްތު ސަމިޓްގެ ހަވާސާގައި ނޫސްވެރިންނާ ވާހަދައްކަމުން ޓޭބަސް ވަނީ މީގެ ކުރިންވެސް މެންޗެސްޓާ ސިޓީގެ ޓްރާންސްފާތަކާ ގުޅޭގޮތުން އޭނާ ކަންބޮޑުވުން ފާޅުކޮށްފައިވާނެކަން ފާހަގަކޮށް، ޓޭބަސް ވަނީ މިއީ ހަމައެކަނި އިނގިރޭސި ފުޓުބޯޅައިގެ މައްސަލައެއް ނޫންކަން ފާހަގަކޮށްފައެވެ.
އެގޮތުން މި މައްސަލައަކީ މުޅި ޔޫރަޕަށް ވެސް އޭގެ އަސަރު ކުރާނެ މައްސަލައެއް ކަމުން، އަދި ވަކިން ޚާއްސަކޮށް ސިޓީން ލީގުގެ މާލީ އުސޫލުތަކާ ހިލާފުވެފައިވާ މުއްދަތުގެ ދިގުކަމުން، އެހެން ކުލަބުތަކަށް މިސާލަކަށް ވާނެވަރުގެ ބޮޑު އަދަބެއް މިކަމުގައި ސިޓީއަށް ދޭން ޖެހޭކަމަށް ޓޭބަސް ބުންޏެވެ.
ސިޓީއާ ދެކޮޅަށް އުފުލާފައިވާ ދައުވާތައް ސާބިތުވެއްޖެކަމަށް ގިނަ ރިޕޯޓުތަކެއް ބުނަމުންދާ މި ދަނޑިވަޅުގައި ފާހަގަކުރެވޭ އަނެއް ކަމަކީ، އެކުލަބަށް 2012 ވަނަ އަހަރާއި 2016 ވަނަ އަހަރާ ދެމެދު ސްޕޮންސަޝިޕްތަކުން ލިބުނު ފައިދާ އޮޅުވާލި މައްސަލައިގައި 2020 ވަނަ އަހަރު، ޔުއެފާއިން ދެ އަހަރުގެ މުއްދަތަކަށް ޗެމްޕިއަންސް ލީގުން އެކުލަބު ސަސްޕެންޑުކުރި ކަމެވެ.