އިންޑޮނީޝިއާގެ ވެރިރަށް ޖަކާޓާ ކައިރީގައި ހުންނަ ސިބިނޮންގް ޖަލުގައި ގައިދީން ބޭނުންކުރުމަށް ލަގްޒަރީ އެޕާޓްމަންޓްތަކެއް ހަދާފައިވާ މައްސަލައެއް ފަޅާއަރައި، އެ ޖަލުގެ އިސް ފަސް އޮފިޝަލަކު ސަސްޕެންޑްކޮށްފިއެވެ.
އިންޑޮނީޝިއާގެ މިނިސްޓްރީ އޮފް އިމިގްރޭޝަން އެންޑް ކަރެކްޝަންސްގެ އިންސްޕެކްޓާ ޖެނެރަލް ރޫޑީ ސެޓިއަވާން އިއްޔެ ވިދާޅުވި ގޮތުގައި، ސަސްޕެންޑްކުރި މީހުންގެ ތެރޭގައި ސިބިނޮންގް ޖަލުގެ ވެރިޔާ ވެސް ހިމެނެއެވެ. އަދި މި މައްސަލައާ ގުޅިގެން ގިނަ އަދަދެއްގެ ގައިދީންނާއި ޖަލުގެ މުވައްޒަފުންނާ ސުވާލުކޮށްފައިވާ ކަމަށް އޭނާ ވިދާޅުވިއެވެ.
މި ތަންތަން ފެނިފައިވަނީ ސަރުކާރުގެ އިދާރާތައް ޖަވާބުދާރީކުރުވާ އޮމްބަޑްސްމަން އިން މި މަހުގެ 23 ވަނަ ދުވަހު ކުއްލި ގޮތަކަށް ޖަލު ފާސްކުރުމުގެ ތެރޭގައެވެ. އާންމު ގޮޅިތަކާ ވަކިން ހަދާފައިވާ 10 އަށް ވުރެ ގިނަ ޔުނިޓު އެ ސަރަހައްދުގައި ހުރި ކަމަށް ތަހުގީގުކުރާ ފަރާތްތަކުން ބުނެއެވެ.
އިންޑޮނޭޝިއާގެ ޖަލެއްގައި ހަދާފައިވާ ލަގްޒަރީ އެޕާޓްމަންޓެއް-- ތަހުގީގުކުރާ ފަރާތްތަކުން ބުނާ ގޮތުގައި، މި އެޕާޓްމަންޓްތަކުގައި އޭސީ، ބޮޑެތި ސްކްރީންތަކުގެ ޓީވީ، އައިސްއަލަމާރި، ސޯފާ އަދި ކާބައި ހުރެއެވެ. މީގެ އިތުރުން ޖިމަކާއި، ހަދަމުންދާ ގޮލްފް ސިމިއުލޭޓަރެއްގެ އިތުރުން ލަގްޒަރީ އުޅަނދުތައް ވެސް އެ ސަރަހައްދުން ފެނިފައިވާ ކަމަށް ރިޕޯޓުކޮށްފައިވެއެވެ.
އޮމްބަޑްސްމަންގެ މެންބަރެއް ކަމަށްވާ ސިޔާފްރިދާ ރަހްމާވަތީ ރަސާހަން ނޫސްވެރިންނަށް މައުލޫމާތު ދެއްވަމުން ވިދާޅުވީ، އާންމު ގައިދީންނަށް ނުލިބޭ ޚާއްސަ ހިދުމަތްތަކެއް ބައެއް ގައިދީންނަށް ލިބެމުންދިޔަ ކަމުގެ ވަރުގަދަ ހެކިތަކެއް ފެނިފައިވާ ކަމަށެވެ. އަދި އެތަނުން ފެނުނީ ޖަލެއްގެ ގޮޅިތަކަކާ ވައްތަރު ތަންތަނުގެ ބަދަލުގައި ވިލާ ނުވަތަ ހޯމްސްޓޭ ފަދަ ތަންތަން ކަމަށް އޭނާ ވިދާޅުވިއެވެ. މި އިމާރާތްތަކަކީ ފުރަތަމަ ޖަލުގެ މުވައްޒަފުން ދިރިއުޅުމަށް ހެދި ތަންތަން ކަމަށް ވިޔަސް، އެތަންތަން ގައިދީންނަށް ދޫކޮށްފައިވަނީ ކިހިނެއްތޯ ތަހުގީގުކުރަމުންދާ ކަމަށް އޮފިޝަލުން ބުނެއެވެ.
ހަތަރު ހެކްޓަރުގެ ބޮޑުމިނުގައި ހަދާފައިވާ ސިބިނޮންގް ޖަލަކީ ކޮރަޕްޝަންގެ ކުށް ސާބިތުވެފައިވާ މީހުންނާއި ފާހަގަކޮށްލެވޭ ބޮޑެތި ކުށްވެރިން ބައިތިއްބާ ޖަލެކެވެ. ނަމަވެސް މި ލަގްޒަރީ އެޕާޓްމަންޓްތަކުގައި ދިރިއުޅުނީ ކޮން ބައެއް ކަމެއް ރަސްމީކޮށް އަދި ހާމަކޮށްފައެއް ނުވެއެވެ.
އިންޑޮނީޝިއާގެ ޖަލުތަކުގައި ފައިސާ ދީގެން ޚާއްސަ ހިދުމަތްތައް ހޯދާ ކަމުގެ ތުހުމަތުތައް އަބަދުވެސް ކުރެވެމުންދާއިރު، 2010 ވަނަ އަހަރު ހެދި ތަހުގީގަކުން ވެސް ބައެއް ގައިދީން ޖަލުގައި ލަގްޒަރީ ދިރިއުޅުމެއް އުޅެމުންދާކަން ވަނީ ހާމަވެފައެވެ.