މާލޭގެ މަގުތައް މަތީގައި، ގަދަ އަވީގައި ބިދޭސީ މަސައްކަތްތެރީން ހަރަކާތްތެރިވާ މަންޒަރު ފެނުމަކީ އައު ކަމެއް ނޫނެވެ. އާންމުކޮށް ކޮންމެ މީހަކު ވެސް، އިތުރު ސަމާލުކަމެއް ނުދީ ދަނީއެވެ. ނަމަވެސް، މި ހަލަބޮލި މާހައުލުގައި ކުޑަކުދީންތަކެއް މި ވަނީ ތަފާތު ނަމޫނާއެއް ދައްކައިފައެވެ.
ފޭސްބުކް ހުޅުވާލިއިރު ފެންނަނީ، މާލޭ ސިޓީ ކައުންސިލްގެ މަސައްކަތްތެރީންތަކެއް ދުވާލުގެ ވަގުތެއްގައި، ބާ އިންޖީނުގޭގެ ފުރަގަހަށް އޮންނަ މަގުގެ މާރާމާތުގެ މަސައްކަތްތައް ކުރަމުންދާ މަންޒަރެވެ.
މުޙައްމަދު އައުޒަމް ނަމަކަށް ކިޔާ މީހަކު ޕޯސްޓުކުރި އެ ވީޑިއޯއިން، ކުޑަކުދީންތަކެއް ފަހަރަކު ތަށްޓެއް ހިފައިގެން ގޮސް، މަސައްކަތް ކުރަމުން ދިޔަ މީހުންގެ އަތަށް ދޭ މަންޒަރު ފެނެއެވެ. އެ ކުދިންނަށް ޖަގަކުން ތަށިތަށްޓަށް ޖޫސް އަޅައި ދެނީ، ގޯޅި ތެރޭގައި ތިބި ދެ އަންހެނުންނެވެ.
ކޮންމެ ކުއްޖަކު ދިއްކޮށްލާ ތަށްޓާއެކު ވެސް، ބުރަ މަސައްކަތުގައި ތިބި މީހުންގެ މޫނުމަތިން ފެނުނީ ހިނިތުންވުމެވެ. ޝުކުރު ފާޅުކުރަމުން، މަޑުމަޑުން ޖޫސް ތަށި ހޯދާ މަންޒަރެވެ.
އެ ވީޑިއީތައް ޕޯސްޓުކުރުމަށްފަހު އެއީ އާއިލާއެއްގެ ފަރާތުން ފެނުނު ހިތްގައިމު މަންޒަރެއްގެ ގޮތުގައި އައުޒަމް ވަނީ ސިފަކޮށްފައެވެ. އޭނާ ވަނީ އެ ކުދީން ފޯރުކޮށްދިނީ ހަމައެކަނި ފެނާއި ޖޫސް ނޫން ކަމަށާއި އެ ކުދީން އެ މީހުންނަށް އިޙުތިރާމާއި ގަދަރު ދިންކަން ފާހަގަކޮށްފައެވެ.
މީގެ އިތުރުން، އެއީ މަގުތަައް ހެދުމާއި މާލޭގެ މުހިންމު އެތައް މަސައްކަތެއް ކުރުމުގައި އާންމުކޮށް ހަރަކާތްތެރިވި ނަމަވެސް، އެކަމުގެ އަގު ވަޒަންނުކޮށް ދޫކޮށްލެވޭ ބަޔެއްގެ އަގު ވަޒަންކުރުންކަން އެ ޕޯސްޓުގައި ފާހަގަކޮށްފައިވެއެވެ.
މަގުހެދުމުގެ މަސައްކަތުގައި އުޅުނު ބިދޭސީންނަށް "އެއާ ކޫލް" އާއިލާއިން ފެނާއި ޖޫސް ފޯރުކޮށްދެނީ --- މާލޭގެ މޭޔަރު އާދަމް އާޒިމް ވެސް ވަނީ އެ ކުދިން ވީޑިއޯ ސޯޝަލް މީޑިއާގައި ހިއްސާކުރައްވައި، ޝުކުރު ފާޅުކުރައްވައިފައެވެ.
މޭޔަރު ވިދާޅުވީ، މާލެއަކީ މިހާރަށްވުރެ ރަނގަޅު ތަނަކަށް ހެދުމަށް ޓަކައި ފުރަތަމަ އިސްކުރަން ޖެހެނީ އަޅާލުމާއި އެހީތެރިކަމާއި ހެޔޮލަފާކަން ކަމަށް، އެ ކުދިން ދައްކުވައިދީފައިވާ ކަމަށެވެ. އަދި ކުޑަކުދިންނާއި ޒުވާނުން ދައްކާ ކުލުނާއި އޯގާތެރިކަން މިސާލަކަށް ބަލައިގަތުމުގެ މުހިންމުކަން ފާހަގަކުރައްވައި، އާޒިމް ވަނީ ވީޑިއޯއިން ފެންނަ ކުދިން ދެއްކި ނަމޫނާއަށް ޝުކުރު އަދާކުރައްވައިފައެވެ.
އެ ވީޑިއޯއާއެކު ގިނަ ބަޔަކު ވަނީ، ބޮޑުވަމުން އަންނަ ޖީލާ މެދު އުފާ ފާޅުކޮށް، ރާއްޖޭގެ މުސްތަގުބަލަށް އުއްމީދު އައުވެފައިވާކަން ފާހަގަކޮށްފައެވެ.