"ނޫނޭ... އެސްޕްރެސޯއެއް. މިއަދު ވެސް އަހަރެން ޕޭކުރާކަށް ނުޖެހޭނެ ދޯ އެހެންވީމަ." ޒަރޫން ބުނެލިއެވެ.
"ނުޖެހޭނެ." ލެޕްޓޮޕުން ނަޒަރު ވަކިކޮށްލި ޒަރޫންއަށް ބަލައިލަމުން ނަހާ ޖަވާބުދިނެވެ.
"އެހެންވިއްޔާ ގިނަ ގިނައިން މީޓިންތަކަށް ކިޔާތި! ފްރީ ކޮފީ އޭރުން." ޒަރޫން އެއްބުމަ އަރުވައިލިއެވެ.
"މީތި ބަލާބަލަ." ލެޕްޓޮޕް ޒަރޫންއާ ދިމާލަށް އަނބިރައިލަމުން ނަހާ އޭގެ ސްކްރީނުގައިވާ އެއްޗަކަށް ބެލުމަށް ޒަރޫން ގާތު އެދުނެވެ. ޒަރޫން ވެސް ހަށިގަނޑު ސީދާކޮށްލަމުން ފަރުވާތެރިކަމާ އެކު ނަހާ ދެއްކި އެއްޗަށް ބަލައިލިއެވެ.
"ސޯ... ޕޯސްޓަރސްތައް ހަދަން ބޭނުންވަނީ މި ކަހަލަ ގޮތަކަށް؟" އޭގައި ދައްކާފައިވާ ފޮޓޯތަކަށް އިޝާރާތްކޮށްލާފައި ޒަރޫން ސުވާލުކޮށްލީ ޔަޤީންކަން ބޭނުންވެފައިވާ ފަދައަކުންނެވެ. ނަހާ ބޯ ޖަހައިލިއެވެ. އެއަށް ފަހު އަނެއްކާ ވެސް ވާހަކަދެއްކިއެވެ.
"ހޫމް. އެކަމަކު މީގެ ކުލަތައް ތަންކޮޅެއް ޑަލް ދޯ. މީހުންގެ ލޮލުގަ އަޅައިގަންނަ ގޮތެއް ހުންނަން ޖެހޭނެ." ނަހާ ބުނެލިއެވެ. އޭނާ ލެޕްޓޮޕުން ހުޅުވައިފައިވާ ޕޯސްޓަރުތަކުގެ ސާމްޕަލް ދައްކަމުން ބޭނުންވާ ބަދަލުތައް ޒަރޫންއަށް ކިޔައިދެމުން ދިޔައެވެ.
"ތި ގޮތަށް ހެދިދާނެ. އަނެއްހެން މާ އުނދަގުލެއް ވެސް ނުވާނެ. ދެން އަލަށް އިންޓްރޯ ކުރާ މެނޫގެ އެއްޗެހި ފޮޓޯ ނަގާފަ އެޑިޓްކޮށްލީމަ ސަޅިވާނެ ހަމަ. " ޒަރޫން ބުނެލިއެވެ.
"އަހަރެން ބޭނުންވަނީ ކޮންމެ ޑިޝްއެއް ވެސް ހަމަ ހަދާފަ ޕްލޭޓްކޮށްފަ އަސްލަށް ފޮޓޯ ނަގާފަ އެޑިޓްކޮށްފަ ޕޯސްޓަރސްއަށް ލާން." ނަހާ އިތުރަށް ބުނެލިއެވެ. "މިހާރު އެންމެން ވެސް ބޭނުންކުރަނީ އޭއައި. އެކަމަކު އަހަންނަކަށް އެހާ ކަމަކު ނުދޭ."
ދެން ނަހާ ހުޅުވައިލި ޝީޓުގައި ހުރީ އޭނާ އަލަށް ތަޢާރަފްކުރާ މެންދުރުގެ ކެއުންތަކުގެ ޕެކޭޖުތަކަށް ދީފައިވާ ނަންތަކެވެ. ޒަރޫން ނަންތަކަށް ބަލަން ފެށުމުން އޭގެ ފަހަތުގައި ފޮރުވިފައިވާ ސިއްރު ވެސް ނަހާ ހާމަކޮށްލިއެވެ. ގިނައީ ރާއްޖޭން ނުލިބޭ ޒާތުގެ އެހެން ގައުމުތަކުގެ މަޤްބޫލު ކެއުންތަކެވެ. އެންމެ ގިނައީ ޕާކިސްތާނުގެ ކެއުންތަކެވެ. އޭގެ އިތުރުން ބައެއް އަރަބި ގައުމުތަކުގެ ކެއުންތައް ވެސް ހިމެނުނެވެ. ނަހާ ވާހަކަ ދައްކަމުން ދިޔައިރު ޒަރޫންއަށް ޝައުޤުވެރިކަމާ އެކު އެ ދައްކަމުންދިޔަ ވާހަކަ ކަނުލާ އަޑު އަހަން އިނދެވުނެވެ. ނަހާގެ ސިކުނޑި ތަނަވަސް މިންވަރާއި، ކެފޭއާ މެދު ދެކޭ އުންމީދުތައް، ވާހަކަ ދައްކަމުން ދިޔަ އިރު، އެ ދެލޮލަށް ވެރިވާ ވިދުމުން އެކަނި ވެސް އޭނާއަށް ފާހަގަކުރެވުނެވެ. މި ޒަމާނުގެ ގިނަ އަންހެން ކުދިންނާ ޚިލާފު ކަމެއް ވެސް އޭނާއަށް ނަހާގެ ކިބައިން ފާހަގަކުރެވުނެވެ. ކުރާ ކޮންމެ ކަމެއްގައި ފަރުވާތެރިވެފައި އެ ކުރާ ކަމެއް އެންމެ ފުރިހަމައަށް ކުރަން ނަހާ ބޭނުންވެއެވެ. ތަފާތު ގޮތަކަށް ހުރިހާކަމެއް ކުރަން ބޭނުންވާކަން ނަހާގެ ވާހަކަތަކުން އޭނާއަށް ނަގައިގަނެވުނެވެ. ނަހާ އެ ކެފޭ ހުޅުވުމަށް ޝައުޤުވެރިވި ގޮތް އެނގެން ޒަރޫން ބޭނުންވާން ފެށިއެވެ. ހަމައެއާ އެކު އެ ތަން ތަފާތުކުރުމަށް ލިބެން ހުންނަ އެއްޗެހީގެ މެނޫ ތައްޔާރުކުރި ގޮތް ވެސް މެއެވެ.
"އަހަރެން ވާހަކައެއް އަހާލަންތަ؟" ޒަރޫން ނަހާއަށް ބަލައިލަމުން ސުވާލުކޮށްލިއެވެ. އެއާއެކު ނަހާ ބޯ ޖަހައިލިއެވެ.
"އައިޑިއާ ވަރަށް ޔުނިކް. އަހަންނަށް އަހައިލެވިދާނެތަ އަސްލު މެނޫ ނަގާފަ މިހުރީ ކިހިނެއްކަން... އެކި ގައުމުތަކުގެ ޑިޝްތައްވީމަ..." ޒަރޫންއަށް އަހައިލެވުނެވެ. ނަހާގެ މޫނުމަތިން ކުޑަ ހައިރާންކަމެއް ފެނިލިއެވެ. އެއްޗެއް ނުބުނެ ނަހާ އިނީ ދޭނެ ޖަވާބަކާ މެދު ވިސްނަން ކަންނޭނގެއެވެ. ކުރެވުނު ސުވާލުގެ މޮޔަކަމާ ހުރެ ޒަރޫން މާފަށް އެދުނެވެ. ހީވީ ކުރަންނުޖެހޭ ސުވާލެއް ކުރެވުނު ހެންނެވެ.
"ތަން ތަފާތުވެފަ މި ހުރިހާ ކަމެއް ވެސް ތަފާތު ވީމަ އަހައިލެވުނީ... އިޓްސް އޯކޭ އިފް ޔޫ ޑޯންޓް ވޯންޓު އާންސްވަރ." ޒަރޫން ބުނެލުމުން ނަހާ ބޯ ޖަހައިލިއެވެ. ޒަރޫންއަށް ވިސްނައިލެވުނެވެ. އެ ސުވާލަށް ޖަވާބުދޭން ނަހާ ފަސްޖެހުނީ ކީއްވެގެން ހެއްޔެވެ؟ އެއީ ޖަވާބު ނުދެވޭ ވަރުގެ ސުވާލެއް ވެސް ނޫނެވެ. ނަހާގެ ވިސްނުން ހުރި ގޮތް އެނގުމުން ޝައުޤުވެރިކަމުގައި އެ ސުވާލުކޮށްލެވުނީއެވެ.
"ތި އެއްޗެހި އަހަންނަށް މެއިލްކޮށްލަ ދެއްޗޭ! އަހަރެން މެސެޖުކޮށްލާނަން އެޑްރެސް." ޒަރޫން ބުނެލިއެވެ. އެއާއެކު ނަހާ ބޯ ޖަހައިލިއެވެ.
އިތުރުކަމެއް ނެތުމުން ޒަރޫން ގޮސް ކެފޭއިން ނުކުތެވެ. އެ މަންޒަރު ބަލަން އިން ނަހާއަށް ފުންނޭވާއެއް ދޫކޮށްލެވުނެވެ. ހަޤީޤަތުގައި ޒަރޫން އެ ކުރީ އޭނާއަށް ޖަވާބުދޭން އުނދަގޫ ސުވާލެކޭ އެއްވެސް މީހަކު ނުބުނާނެއެވެ. ޚުދު އޭނާއަށް ވެސް ޤަބޫލުކުރެވެނީ އެހެންނެވެ. އެހެންނަމަވެސް، އެ ސުވާލަށް ޖަވާބު ދޭން އޭނާގެ ސިކުނޑި ހުޅުވައިލަން ޖެހެނީ އޭނާގެ މާޒީގެ ތެރެއަށެވެ. ހުރިހާކަމެއް ވެސް ގުޅިފައިވަނީ އެ މާޒީއާކަމަށްވާތީއެވެ. ކެފޭއިން ލިބެން ހުންނަ ބުއިންތަކުގެ އިތުރުން، ކާތަކެއްޗާއި، އަދި މިހާރު އަލަށް ތަޢާރަފްކުރަން އުޅޭ ކެއުންތަކުގެ އަސްލު ގުޅިފައިވަނީ މާޒީއާއެވެ. ޖަވާބު ދޭން އުނދަގޫވީ ސަބަބަކީ އެއީއެވެ. ސުވާލަކީ އޭގެ ޒާތުގައި ކިތަންމެ ޖަވާބުދޭން ފަސޭހަ ސުވާލަކަށްވީ ނަމަވެސް، އެއީ ނަހާއަށް ކުރަން އެންމެ އުނދަގޫ ކަންތަކެވެ. އެ ސުވާލުތަކުގެ ޖަވާބު ވަނީ އޭނާގެ ހިތުތެރޭގައެވެ. އެކަކަށް ވެސް ނޭނގޭނެހެން ފޮރުވި ވަންހަނާ ވެފައެވެ. މީހަކާ ހިއްސާކުރަން އޭނަ ތައްޔާރެއް ނޫނެވެ. ދުވަހަކު އެކަމަށް ހިތް އެއްބަސްވާނެހެންނެއް ވެސް ހިޔެއް ނުވެއެވެ.
*****
ހުޅުމާލޭގެ ފޭސް އެކެއްގައި ހުންނަ ލަގްރަޒީ އެޕަރޓްމެންޓް ކޮންޕްލެކްސްގެ ޕޯޓިކޯއަށް ކާރު މަޑުކޮށްލުމަށް ފަހު ޑްރައިވަރު ފޭބިއެވެ. އޭނާ ކާރުގެ ދޮރުފަތް ހުޅުވައިލަ ދިނުމުން، ކަމްރާން ފޭބިއެވެ. އޭނާ ހުރީ ކޯޓު ފަޓްލޫނުގައެވެ. ވަރަށް ރަސްމީކޮށެވެ. ބުރަ ދުވަހަކަށް ފަހު ވެސް ކަމްރާން ފެންނަނީ، ތާޒާކޮށެވެ. މީހުންގެ ތެރެއަށް ނުކުންނަ އިރު އޭނާގެ ސަޚްސިއްޔަތަށް އުނިކަމެއް ލިބޭ ފަދަ ގޮތަކަށް އޭނާ ފެންނާކަށް ކަމްރާން ބޭނުމެއް ނޫނެވެ. އަބަދު ވެސް މީހުންގެ ތެރެއަށް ނުކުންނަ އިރު، މީހުންނަށް އޭނަ ފެންނަން ޖެހޭނީ ވަރަށް ހައިބަވަންތަކޮށެވެ. ރަސްމީކޮށެވެ. ވަރުބަލިކަމާއި، ނުތަނަވަސްކަން އެ މޫނުމަތިން ފެނިގެން ނުވާނެއެވެ. ޑްރައިވަރަށް އިޝާރާތްކޮށްލާފައި، ދަބަސް ހިފައިގެން ގޮސް ކަމްރާން ލިފްޓް ލޮބީއަށް ވަނެވެ. ކަމްރާނަށް ސެކިއުރިޓީއަކަށް ހުރި މީހާ ސަލާމް ގޮވައިލިއެވެ. ސަލާމަށް ޖަވާބުދެމުން އޭނާ ގޮސް ލިފްޓުގެ ބަޓަނަށް ފިތާލާފައި މަޑުކޮށްލިއެވެ. ލިފްޓު އައުމުން، ލިފްޓަށް އެރުމަށް ފަހު އެންމެ ފުރަތަމަ ޖައްސައިލީ އެކްސެސް ކާޑެވެ. އެއަށްފަހު އޭނާ ފިތައިލީ ދިހަވަނަ ފްލޯގެ ބަޓަނަށެވެ. އެއީ އެންމެ މަތީ ފްލޯ ވެސް މެއެވެ.
ލިފްޓު ދިހަވަނަ ފަންގިފިލާއަށް ހުއްޓުމާ އެކު ކަމްރާން ފޭބިއެވެ. އެ ފަންގިފިލާފައި ހުރީ އެ އެޕަރޓްމެންޓް އެކަންޏެވެ. އޭނާ ގޮސް ފިންގަޕްރިންޓް ޖަހައިލުމަށް ފަހު ދޮރު ހުޅުވައިލިއެވެ. ގޭތެރެއަށް ވަތްއިރު ގޭތެރެ އޮތީ ދިއްލާފައެވެ. ތަނަވަސް ހިތްގައިމު ބޮޑު އެޕަރޓްމެންޓެކެވެ. އެންމެ ޒަމާނީ ފެންވަރުގެ ލަގްޒަރީ ޕެންޓް ހައުސްއެކެވެ. ގޭތެރެއިން މައްޗަށް އެރޭ ގޮތަށް ސިޑިއެއް ހުރި އިރު، ސިޑީގެ އަތްގަނޑު ވެސް ވަނީ ހިތްގައިމު ގޮތަކަށް ފަރުމާކުރެވިފައެވެ. ގޭތެރޭގައި ހުރީ ހުސް އަގުބޮޑެތި އެއްޗެއްސެސެވެ. ސޯފާސެޓާކައި، ފަރުނީޗަރުތަކުގެ އިތުރުން މަތީގައި އެލުވާފައިވާ ޗާނދަލިޔާތަކުން ވެސް ތަނުގެ ހައިބަވަންތަކަން ފެންނަމުން ދިޔައެވެ. ހުދުކުލައިގެ ފާރުތަކުން ތަނުގެ ސާފުތާހިރުކަން ރަމްޒުކޮށްދެމުން ދިޔަ އިރު، ގޭތެރެއިން ފެންނަނީ ތަރުތީބުކަމެވެ. ގޭތެރެ ވެސް ވަނީ ފޮޅާ ސާފުކޮށް މޮޕް ލާފައެވެ. ހިތްގައިމުކަމާއި ތަނަވަސްކަމުގެ އިންތިހާ މުޅި ތަނުން ފެންނަމުން ދިޔަ ނަމަވެސް، ކަމްރާނަށް މަރްޙަބާ ކީ ފަޅުކަމެވެ. ހުސްކަމާއި އެކަނިވެރިކަމެވެ. ދިރޭ ފުރާނައެއްގެ ހިލަމެއް ގޭތެރެއަކު ނެތެވެ. ވާނީ ވެސް އެހެން ނޫންހެއްޔެވެ؟ ނަހާ ގެއިން ނުކުމެގެން ދިޔައީ އެގޭގެ ދިރުން ވެސް ހިފައިގެން ފަދައެވެ މިހާރު، އެ ގެ ހީވަނީ މަރުވެފައިވާ ތަނެއް ހެންނެވެ.
ގޭތެރެ ސާފުކޮށް، ކަންތައް ކުރުމަށް، އެ ގޭގައި ކަމްރާން ފިލިޕީންސް އަންހެނަކު ގެންގުޅެއެވެ. މިރޭ އޭނާ ނުކާނެކަމަށާއި، ކާން އެއްޗެއް ތައްޔާރުނުކުރުމަށް ބުނުމުން، އޭނަ ވެސް ނިދަންވަނީކަން ކަމްރާންއަށް އެނގެއެވެ. ކަމްރާން ގޮސް އޭނާގެ ކޮޓަރިއަށް ވަދެ ދޮރު ޖެހިއެވެ.
ފެންވަރައިލައިގެން އައިސް ކިންގު ސައިޒުގެ ބޮޑު އެނދުގައި އޮށޯވެލި ކަމްރާނައަށް އޭނާގެ ނިތްމަތީގައި އަތް ޖައްސައިލެވުނެވެ. އެ ގެ ކިތަންމެ ހިތްގައިމު ވި ނަމަވެސް، އަދި އެ ކޮޓަރި ކިތަންމެ ތަނަވަސްވި ނަމަވެސް، އަދި އޭނަ ނިދާ އެނދު ކިތަންމެ އަރާމު ވިޔަސް، މިއަދަކު އޭނާއަށް އެއިން އެއްވެސް ހިތްހަމަޖެހުމެއް ގޭތެރެއަކުން ނުލިބެއެވެ. ފަޅުކަން ނޫނީ އޭނާއަށް ގޭތެރެއަކުން މަރްޙަބާއެއް ނުކިޔައެވެ. އޭނާ އޮތް ފަޅި ނޫން އަނެއް ފަރާތަށް ކަމްރާނަށް ބަލައިލެވުނެވެ. ބަޔާންކުރަން ދަތި ޝުޢޫރުތަކެއް އެހިނދު އޭނާގެ ހިތަށް ވެރިވެގެން ދިޔައެވެ. މާޒީގެ ހަނދާންތަކެއް އައިސް ގޯނާކުރަން ފެށީއެވެ. ނަފްސުގައި އުދާސްކަމެއް އުފައްދައިފިއެވެ. ނުތަނަވަސްކުރުވައިފިއެވެ. ހިތުގައި ރިހުމެއް އުފަންކުރުވިއެވެ. ތަދެއްގެ އިޙްސާސް މެއަށް ވެގެން ދިޔައެވެ. ސިކުނޑީގެ ނާރުތަކަށް ވާންވެގެން ދިޔަ ހިނދު، އެ އަސަރުތައް ފިލުވައިލުމަށް، ފުންނޭވާއެއް ދޫކޮށްލެވުނެވެ. އެހެންނަމަވެސް، ވީ ފައިދާއެއް ނެތެވެ. ހުރިހާ ހިތި ހަނދާންތަކެއް އައިސް އޭނާއަށް ގޯނާކުރަނީއެވެ. އާނއެކެވެ. ލޯބިވާ އަނބިމީހާ ނާޒްލީގެ ހަނދާންތައް އޭނާގެ ނަފްސުގެ ހަމަޖެހުން ގެއްލުވައިލައިފިއެވެ. ނަހާ ގެއިން ނުކުމެގެން ދިޔަ ދުވަހުގެ ހަނދާންތަކުން ހިތަށް ނުހަނު ތަދުވާން ފެށިއެވެ.
"ނާޒްލީ ތި ދިޔައީ އަހަރެންގެ ދަރިފުޅު ވެސް ގޮވައިގެން. މިއަދު އެ ދަރިފުޅު އަހަންނަށް ނަފްރަތުކުރޭ...،" ކަމްރާންގެ އެ ޖުމްލަތައް އެތުރުނީ އޭނާގެ ހިތުތެރޭގައެވެ. ހިކިފައިވާ ދެ ތުންފަތުގައި ދޫ ހާކައިލާ ތެންމައިލިއެވެ. "ހުރިހާކަމެއް ވެސް ބަދަލުކުރެވޭނެ ނަމަ...."
*****
އެޕާރޓްމެންޓުގެ ދޮރުގައި ކީކާޑު ޖަހައިލާފައި އެތެރެއަށް ވަން ނަހާއަށް ފުންނޭވާއެއް ދޫކޮށްލެވުނެވެ. ބުރަ ދުވަހަކަށް ފަހު އޭނާ ހުރީ އަރާމުކޮށްލަން ބޭނުންވެފައެވެ. އެންމެ ފުރަތަމަ ވެސް އަނދިރިކޮށް އޮތް ގޭތެރެ ދިއްލައިލަމުން، އަރައިގެން ހުރި ބޫޓު ނަގާ ފައިވާން ލާ ހަރުގަނޑަށް ލިޔެވެ. އެއީ އާދައިގެ ވަރެއްގެ އެޕަރޓްމެންޓެކެވެ. އެއްކޮޓަރީގެ އެ އެޕަރޓްމެންޓު މާ ބޮޑު ނޫނަސް، ކުޑަ ސިޓިންރޫމަކާ އެކު، ކައްކާތަންކޮޅެއް ވަކިން ހުރުމުން ދެމީހަކަށް ނުވަތަ އެކަކަށް އުޅޭކަށް އުނދަގުލެއް ނުވާނެއެވެ. ތަނުން ފެންނަނީ ސާފުތާހިރުކަމާއި ތަރުތީބުކަމެވެ. ދެމީހަކަށް އިށީނދެލެވޭ ވަރުގެ އަޅިކުލައިގެ ސޯފާސެޓެއް ބަހައްޓާފައި ހުރިއިރު ސޯފާތަކުގެ ކުރިމަތީގައި ހުރި ކުޑަ މޭޒުމަތީގައި ޓިޝޫ ފޮއްޓަކާއި، ޓީވީ ރިމޯޓު އޮތެވެ. ކުރިމަތީގައި ހުރި ރެކުމަތީގައި ފަތި ޓީވީއެއް ހުރިއިރު، އޭގެ އެއްފަރާތުގައި ޕްލާސްޓިކު ގަހެއް ބަހައްޓާފައި ހުއްޓެވެ. ނަހާ ގޮސް ވަނީ ރެކުގެ ކަނާއަތް ފަރާތުގައި ހުރި އޭނާގެ ކޮޓަރިއަށެވެ.
ކޮޓަރި ވެސް މާ ބޮޑެއް ނޫނެވެ. ޑަބަލް އެނދަކާއި، އަލަމާރިއެއްގެ އިތުރުން، ޑްރެސިންޓޭބަލާއި ސްޓަޑީ ޓޭބަލެއް ހުއްޓެވެ. އޭގެ އިތުރުން ކޮޓަރިން ނުކުމެގެން ކުޑަވަރެއްގެ ބެލްކަންޏެއް ހުއްޓެވެ. ނަހާ އެންމެ ފުރަތަމަ ވެސް ގޮސް ދޮރުފޮތިތައް ކަހައިލުމަށް ފަހު، އަޅުވައިގެން ހުރި ދަބަސް އެއްފަރާތުގައި ހުރި ސްޓޭންޑުގައި އަޅުވައިލިއެވެ. އެއަށްފަހު ތުވާލި ހިފައިގެން ގޮސްވަނީ ފާޚާނާއަށެވެ. ހޫނުވެފައި ހުރުމުން ފިނިފެނުން ފެންވަރާ ތާޒާވެލައިގެން ނުކުތެވެ. ހަށިގަނޑަށް ތާޒާކަން ލިބުނު ނަމަވެސް، ވަރުބަލިކަމަށް ބަދަލެއް ނާދެއެވެ. އެނދުގެ ސައިޑްކަބަޑު ކައިރިއަށް މަޑުކޮށްލުމަށް ފަހު ފޯނު އޭގެ މަތީގައި ބާއްވައިލި ނަހާގެ ލޮލުގައި އޭގެ މަތީގައި ހުރި ފޮޓޯ ފްރޭމް އަޅައިގަތެވެ. ލަސްލަހުން އަތް ހަރަކާތްކޮށްލާފައި އޭނާ އެ ފްރޭމް ނެގުމާ އެކު އެނދުމަތީގައި އިށީނދެލިއެވެ. ފްރޭމްގައި އެ ވަނީ ލޯބިލޯބި ކުޑަކުޑަ ޢާއިލާއެކެވެ. އާނއެކެވެ. އެއީ އޭނާގެ އާއިލާއެވެ. ކަމްރާންއާއި އޭނާގެ އިތުރުން ދެން އެ ފޮޓޯގަނޑުގައި އެ ހުރީ އޭނާގެ މަންމަ ނާޒްލީއެވެ. ނާޒްލީ އާއި ކަމްރާންއާ ދެމީހުންގެ ދެމެދުގައި ހުއްޓިލައިގެން ހުރި ނަހާގެ އުމުރު އޭރު ވާނީ ހަތް އަހަރެވެ. ތިން މީހުންވެސް ތިބީ ފުޅާ ހިނިތުންވުމެއްގައެވެ. އުފާވެރި ޢާއިލާއެއްގެ ފުށުން ފެންނާނެ ހުރިހާ މަންޒަރެއް އެ ފޮޓޯގަނޑުން އެކަނި ވެސް ފެންނަމުން ދިޔައެވެ. ނަހާއަށް ލަސްލަހުން ފޮޓޯގަނޑުގައިވާ އޭނާގެ މަންމަ ނާޒްލީގެ މޫނުގައި ފިރުމައިލެވުނެވެ. އޭނާގެ ދެލޯ ހިނދުކޮޅަކަށް ކަރުނައިގެ ސަބަބުން ވިދައިލި ނަމަވެސް، އަވަސްއަވަހަށް ކަރުނަތައް ހިންދައިލަމުން އަމިއްލަ ނަފްސު ހަމައަކަށް އަޅުވައިލިއެވެ. އެހެންނަމަވެސް، މާޒީގެ ބައެއް ހަނދާންތަކުން މިންޖުވުމަކީ ކުރެވުނު ކަމަކަށް ނުވިއެވެ.
*****
"މަންމާ ކޯންޗެއްތަ ތި ހަދަނީ؟" ދުވަމުން އައި ނަހާ ބަދިގެއަށް ވަނުމާ އެކު ހަށިގަނޑުގައި ހުރި ބާރެއްލާފައި ނޭފަތް އެތެރެއަށް ދަމައިލީ ދުވަމުން ދިޔަ މީރުވަހުންނެވެ.
"މަގްލޫބާ..." އޭރު ވެސް އަތްމަތި އަވަސްއަރުވާލާފައި މަސައްކަތުގައި އަވަދި ނެތި އުޅެމުން ދިޔަ، ނާޒްލީ ޖަވާބު ދިނެވެ. އޭނާ އުނދުނުގެ ގިނި މަޑުކޮށްލަމުން އުމުރުން ދިހަ އަހަރަށްދާ ނަހާއަށް ބަލައިލިއެވެ.
"އެއީ ކޯންޗެއްތަ؟" ނަހާއަށް ސުވާލުކޮށްލެވުނެވެ. ޝައުޤުވެރިކަމާއެކީގައެވެ. އޭނާގެ މޫނުމައްޗަކުން ހައިރާންކަމެއް ފާޅެއް ނުވެއެވެ، ވާނީ ވެސް އެހެން ނޫން ހެއްޔެވެ؟ ނާޒްލީ އަބަދު ވެސް ތައްޔާރުކޮށް އުޅެނީ، އޭނާއަށް ނަން ކިޔަން ވެސް ނޭނގޭ ޒާތްޒާތުގެ ކެއުންތަކެވެ.
"އެއީ ބަތެއް. ފަލަސްތީނުގެ ޑިޝްއެއް. ސީރިއާ، ލިބުނާން ފަދަ އަރަބި ޤައުމުތަކަށް ވެސް ޚާއްޞަ..." ނާޒްލީ ބުނެލިއެވެ. އޭނާ ނަހާއަށް ގޮވައިލާ އޭނާއާ ގާތަށް ގެނައެވެ. އެއަށް ފަހު ނަހާއަށް އެ ކެއުމާ ބެހޭގޮތުން ބައެއް މައުލޫމާތު ހިއްސާކުރިއެވެ.
"މީ މަންމަގެ ހޮބީތަ؟" ނަހާއަށް އަހައިލެވުނެވެ. ވާނީ ވެސް އެހެން ނޫންހެއްޔެވެ؟ ނާޒްލީ އަބަދު ވެސް އުޅޭނީ ބަދުގެތެރޭގައެވެ. ކޮންމެވެސް އެއްޗެއް ކެއްކުމުގައެވެ. ބަދިގޭގައި ނޫޅެންޏާ ދެން ފެންނާނީ އަބަދު ވެސް ކޮންމެ ވެސް ވާހަކަފޮތެއް ހިފައިގެން ކިޔަން އިންނަތަނެވެ.
*****
ޚިޔާލުތަކުން ނުކުމެވުނު ނަހާއަށް ފޮޓޯ ފްރޭމް ގެނެސް އޭނާގެ މޭގައި ޖައްސައިލެވުނެވެ.
"މަންމާ.... އައި މިސް ޔޫ..." ދެ ތުންފަތް ފޫ އަޅުވައިލާފައި ނުކުތީ ވޭނީ އާހެކެވެ. މަންމަ ނެތުމުގެ ފަޅުކަން ނަހާއަށް އިޙްސާސްވަމުން ދިޔައީ އިންތިހާއަށެވެ. ފޮޓޯގަނޑު މޭގައި ޖައްސައިލައިގެން އިރުގަނޑަކު ނަހާއަށް އިނދެވުނެވެ.
"އަހަރެން ކިހިނެއް ހަދާނީ މަންމާ؟ ބައްޕަ އަހަންނާ ވާހަކަ ދައްކަން ބޭނުންވާކަން އެނގޭ. އެކަމަކު ވެސް ކިހިނެއް ހުރިހާކަމެއް ހަނދާން ނައްތައިލާނީ... ހާދަ އުނދަގުލޭ އެ ހަނދާންވީމަ. އަދި ވެސް ދެރަވޭ... އެ ދުވަހު.... ބައްޕަ އެ ދުވަހު ކަންތައްކުރި ގޮތް...." ނަހާއަށް ފޮޓޯގަނޑު މެއާ ދުރުކޮށްލަމުން ބަލައިލެވުނެވެ. މީހާ ހަމަޖެހިލިއެވެ.
އަނބުރާ ފޮޓޯގަނޑު ސައިޑް ޓާބަލްލޭމްޕު ކައިރީގައި ބަހައްޓަމުން އޭނާ އެނދުގައި އޮށޯވެލިއެވެ. އެނދުގެ އެއްފަރާތުން ސްވިޗު ބޯޑުގައި އަތް ޖައްސައިލާފައި، ލައިޓު ނިއްވައިލަމުން ސައިޑް ޓޭބަލްލޭމްޕު ދިއްލައިލިއެވެ. ގައިމަތީގައި ކުއިލްޓް އަޅާލަމުން ނަހާ ލޯ މަރައިލިއެވެ. މާދަމާ އަކީ ބުރަ ދުވަހަކަށް ވާނެތީ ރަނގަޅަށް އަރާމުކޮށްލަން އޭނާ ހުރީ ބޭނުންވެފައެވެ. ދުވަހުގެ ބަރުބަލިކަމާއެކު ނިދާލާކަށް ވެސް އުނދަގުލެއްނުވިއެވެ.
*****
ހަވީރުގެ ވަގުތެވެ. ފެންވަރާ ރީތިވެލައިގެން ކެމެރާއާއި ބޭނުންވާ ސާމާނުތައް ދަބަހަށް އަޅައިގެން ޒަރޫން ތިރިއަށް ފޭބި އިރު، ގޭތެރެ އޮތީ ފަޅުކޮށެވެ. މީހަކު ފެންނާކަށް ނެތެވެ. އޭނާ ތިރިއަށް ފޭބި އިރު، މަންމައާއި ބައްޕައާ ދެ މީހުން ޖޯލިފަތީގައި ވާހަކަދައްކަން ތިއްބެވެ. ދަނީކަމުގައި ބުނެ ޒަރޫން ގޮސް ނުކުމެ ސައިކަލަށް އަރާ ދުއްވައިލިއެވެ.
ކެފޭއާ ހިސާބަށް އާދެވުނު އިރު ނަހާ ވެސް ކާރެއްގައި އައިސް ފައިބަނީއެވެ. ޒަރޫން ސައިކަލު ޕާކުކޮށްލާފައި ދުވެލާފައި ކަހަލަ ގޮތަކަށް ގޮސް ނަހާއާ އަރާ ހަމަކުރިއެވެ.
ނަހާއަށް ވެސް ޒަރޫން ފެނުމުން ހީނލެވުނެވެ.
"އަހަރެން ބުނީ ފުރަތަމަ ހިނގާ ކެފޭގެ ފޮޓޯތައް ނަގަން." ޒަރޫން ބުނެލިއެވެ. ނަހާ ވެސް ދެކޮޅެއް ނުހަދައެވެ. އޭނާ ޒަރޫންއާ އެކީ ބޭރުގައި މަޑުކޮށްލިއެވެ. ޒަރޫން އޭނާގެ ކެމެރާ ނަގާފައި، ކެފޭގެ އެކި ދިމަދިމާލުން ފޮޓޯ ނަގަން ފެށިއެވެ. ހިތްހަމަޖެހޭ ވަރުވުމުން، ބޮޑުވާ އިނގިލި ދައްކައިލަމުން، ގޮސް ނަހާގެ ކައިރީގައި މަޑުކޮށްލިއެވެ.
"ދައްކަބަލަ ބަލައިލަން." ނަހާ ބުނެލިއެވެ.
"އެތެރެއަށް ހިނގާބަލަ އެހަށް. އޭރުން ހަމަޖެހިލައިގެން ބަލައިލެވޭނީ." ޒަރޫން ބުނެލިއެވެ. ނަހާ ވެސް ބޯ ޖަހައިލިއެވެ. އޭނާ ޒަރޫންއާ އެކީ ގޮސް އެތެރެއަށް ވަނެވެ. މޭޒެއްގެ ދޮށުގައި އިށީންނަމުން، ޒަރޫން ކެމެރާއިން އޭނާ ނެގި ފޮޓޯތައް ނަގާއަށް ދައްކަން ފެށިއެވެ.
"މީ ކިހިނެއްވެފަ؟ އަނދިރި އެއްޗެހި ވެސް އެބަ ހުރި..." ބައެއް ފޮޓޯތައް ނަގާއަކަށް ކަމަކު ނުދިޔައެވެ. "އެއްގޮތަކަށް ވެސް މި ކަމަކު ނުދޭ..."
"މަންޖޭ... މީ އަދި އެޑިޓްނުކޮށޭ..." ޒަރޫންއަށް ބުނެވުނެވެ. ނަހާ ވަގުތުން ޒަރޫންއަށް ބަލައިލީ ދެބުމަ ގާތްކޮށްލާފައެވެ.
"އަޅެ. އަސްލުވެސް އޭ. އަހަރެންގެ ޕޭޖުގަ ހުރި ފޮޓޯތައް ހަޑިތަ؟" ޒަރޫން އަހައިލިއެވެ.
"އެހެންވެގެނެއް ނޫން. ތި ކޮން މަންޖެއެއްތަ؟ ނަހާ ކިޔާށޭ ބުނެފިން ދޯ!" ނަހާއަށް ބުނެވުނެވެ.
"ހަނދާނެއް ނުވޭ ދޯ!..." ޒަރޫންއަށް ބުނެވުނެވެ.
"އޭނ.. ކީކޭ؟" ނަހާއަށް ޒަރޫން އެ ބުނި އެއްޗެއް ނޭނގުނެވެ.
(ނުނިމޭ)