އުޒްބެކިސްތާނުގެ ސަމަރްގަންދުގައި ކުރިއަށްދިޔަ 46 ވަނަ ޗެސް އޮލިމްޕިއާޑުގައި، ތާރީހުގައި ވެސް އެންމެ ޒުވާން އަންހެން ގްރޭންޑްމާސްޓާ (ޑަބްލިއުޖީއެމް) ގެ މަގާމު އިނގިރޭސިވިލާތުގެ އުމުރުން 11 އަހަރުގެ ބޯދާނާ ސިވާނަންދަން ހޯދައިފިއެވެ.
ބައިނަލްއަގުވާމީ ޗެސް ފެޑެރޭޝަން (ފިޑޭ) އިން ކަށަވަރުކޮށްދީފައިވާ ގޮތުގައި، އިނގިރޭސިވިލާތުގެ ހެރޯއަށް ނިސްބަތްވާ ބޯދާނާ މި މަގާމު ހާސިލުކުރީ މުބާރާތުގައި އޭނާގެ ތިންވަނަ އަދި އެންމެ ފަހުގެ ޑަބްލިއުޖީއެމް ނޯމް ފުރިހަމަ ކުރުމަށްފަހުއެވެ.
އިނގިރޭސި ޓީމުގެ އެންމެ މޮޅު ކުޅުންތެރިޔާއަށް ޚާއްސަކޮށްފައިވާ އެއްވަނަ ބޯޑުގައި ކުޅެ، ބޯދާނާ ވަނީ މުބާރާތުގެ 11 ރައުންޑު ފުރިހަމަކޮށް އަށް ޕޮއިންޓު ހޯދާފައެވެ. މި ނޯމް ހާސިލުކުރުމުގެ ކުރިން ވެސް އޭނާ ވަނީ ޑަބްލިއުޖީއެމް މަގާމަށް ބޭނުންވާ 2300 ރޭޓިންގް ހުރަސްކޮށްފައެވެ. މި ކާމިޔާބީއާ ގުޅޭގޮތުން ފިޑޭއަށް ދިން އިންޓަވިއުއެއްގައި ބޯދާނާ ބުނީ، "މިކަމާ އުފާކުރަން. އެކަމަކު މި ހިސާބުން ހުއްޓާލުމުގެ ބަދަލުގައި ކުރިއަށްގޮސް އިތުރު ތާރީހުތައް ލިޔަން ބޭނުން،" ކަމަށެވެ.
ބޯދާނާ މި މަގާމު ހާސިލުކުރުމާއެކު، މީގެ ކުރިން މި ރެކޯޑު އޮތް ކެޓެރީނާ ލަގްނޯ އަދި ޗައިނާގެ ހޫ ޔިފާންގެ ރެކޯޑު ވަނީ މުގުރާލެވިފައެވެ. އެ ދެ ކުޅުންތެރިން ވެސް ޑަބްލިއުޖީއެމް މަގާމު ހޯދީ އުމުރުން 12 އަހަރުގައެވެ. ވުމަން ގްރޭންޑްމާސްޓަރަކީ އަންހެން ކުޅުންތެރިންނަށް ހާސިލުކުރެވޭނެ އެންމެ މަތީ ޚާއްސަ މަގާމެވެ. އަދި މިއީ އުމުރުދުވަހަށް ދެމިއޮންނަ މަގާމެކެވެ.
ސަމަރްގަންދުގައި ހޯދި ކާމިޔާބީއާއެކު ބޯދާނާއަށް ވަނީ އޭނާގެ ދެވަނަ އިންޓަނޭޝަނަލް މާސްޓާ (އައިއެމް) ނޯމް ވެސް ލިބިފައެވެ. އައިއެމް މަގާމު ހޯދުމަށް ކުޅުންތެރިންނަށް ތިން ނޯމް އަދި މަދުވެގެން 2400 ގެ ރޭޓިންގްއެއް ބޭނުންވާއިރު، ބޯދާނާއަށް މިހާރު ވަނީ ދެ ނޯމް ލިބިފައެވެ. ފުލްޓައިމްކޮށް ސްކޫލަށް ދަމުން ޗެސް ކުޅުމާ ގުޅޭގޮތުން އޭނާ ބުނީ، "ދަތުރުކުރުމަކީ ގަޔާވާ ކަމެއް. އަދި ފުލްޓައިމްކޮށް ސްކޫލަށް ދާތީ، ޗެސް ކުޅުމުގެ ސަބަބުން ސްކޫލުގެ ގިނަ މާއްދާތަކާ ގުޅުވާލެވޭތީ އެއީ ވަރަށް ބޭނުންތެރި ކަމެއް،" ކަމަށެވެ.
ކޮވިޑް-19 ގެ ލޮކްޑައުންގެ ތެރޭގައި އަމިއްލައަށް ޗެސް ކުޅެން ދަސްކުރި ބޯދާނާގެ ކުރިއެރުން ވަރަށް ހަލުއްވިއެވެ. އޭނާގެ ބައްޕަ ސިވާ މީގެ ކުރިން ބީބީސީއަށް ބުނި ގޮތުގައި، އޭނާއާއި އޭނާގެ އަންހެނުންނަކީ އިންޖިނިއަރިންގް ކިޔަވައިގެން ތިބި މީހުން ކަމަށްވިޔަސް، ދެމަފިރިންނަށް ވެސް ޗެސް ކުޅެން ނޭނގޭތީ ދަރިފުޅަށް މި ހުނަރު ލިބުނީ ކިހިނެއް ކަމެއް ނޭނގެއެވެ. ބޯދާނާ ވަނީ އުމުރުން ހަތް އަހަރުގައި ޔޫރަޕިއަން ސްކޫލްސް ޗެމްޕިއަންޝިޕްގައި ކުޅުނު 24 ގޭމުން ވެސް މޮޅުވެފައެވެ. އަދި އުމުރުން ނުވަ އަހަރުގައި އޭނާ ވެފައިވަނީ އިނގިރޭސިވިލާތް ތަމްސީލުކުރި އެންމެ ޒުވާން އެތުލީޓަށެވެ.
މިދިޔަ އަހަރު އުމުރުން 10 އަހަރުގައި ބޯދާނާ ވަނީ ބްރިޓިޝް ޗެސް ޗެމްޕިއަންޝިޕްގައި ގްރޭންޑްމާސްޓާ ޕީޓާ ވެލްސް ބަލިކޮށް، ގްރޭންޑްމާސްޓަރަކު ބަލިކުރި އެންމެ ޒުވާން އަންހެން ކުޅުންތެރިޔާގެ މަގާމު ހޯދާފައެވެ. އަދި މި އަހަރުގެ ޖުލައި މަހު ފަރަންސޭސިވިލާތުގެ ޑޯލް އޯޕަންގައި އޭނާގެ ފުރަތަމަ އައިއެމް ނޯމް ހާސިލުކޮށް، އެކަން ކުރި އެންމެ ޒުވާން އަންހެން ކުއްޖާއަށް ވެސް ވިއެވެ. މީގެ އިތުރުން، 2600 އަށް ވުރެ މަތީ ރޭޓިންގްއެއް އޮތް ގްރޭންޑްމާސްޓަރ މާކް އަންޑްރިއާ މައުރިޒީ ބަލިކޮށް، އެ ފެންވަރުގެ ކުޅުންތެރިޔަކު ބަލިކުރި އެންމެ ޒުވާން އަންހެން ކުއްޖާގެ ރެކޯޑު ވެސް އޭނާ ވަނީ މުގުރާލާފައެވެ.