ދުނިޔޭގެ ފުޓްބޯޅައިގެ މައި އިދާރާ (ފީފާ) ގެ މެންބަރު އެސޯސިއޭޝަންތަކަށް ދޭ މާލީ އެހީތެރިކަން އިތުރުކުރުމަށްޓަކައި، އެ އިދާރާގެ ހަ ބިލިއަން ޑޮލަރުގެ ރިޒާވުން ބޮޑު ހޭދައެއް ކުރުމަށް ފީފާގެ ރައީސް ޖިއާނީ އިންފަންޓީނޯ ތާއީދުކޮށްފިކަމަށް ރިޕޯޓުތައް ބުނެފިއެވެ.
ގޯލް އިން ރިޕޯޓުކޮށްފައިވާ ގޮތުގައި އިންފަންޓީނޯ މިކަމަށް ތާއީދުކުރިއިރު، އޭނާ ވަނީ މިކަމާ ގުޅޭގޮތުން ހަ ކޮންފެޑެރޭޝަންގެ ރައީސުންނާއި ފީފާ ކައުންސިލަށް ސިޓީއެއް ފޮނުއްވާފައެވެ.
ފީފާގެ ރިޒާވުން މެންބަރު ގައުމުތަކަށް ބޮޑު އަދަދެއް ދޫކުރުމަށް އެންމެ ބޮޑަށް ބާރުއަޅަމުންދަނީ ޔޫއެފާގެ ރައީސް އަލެކްސެންޑަ ސެފެރިން، ކޮންކާކަފްގެ ވެރިޔާ ވިކްޓަ މޮންޓަގްލިއާނީ އަދި އޭއެފްސީގެ ރައީސް ޝައިޚް ސަލްމާނެވެ.
މީޑިއާ ރިޕޯޓްތައް ބުނާ ގޮތުގައި ޔޫއެފާ އަދި ކޮންކާކަފް ގުޅިގެން ހުށަހަޅާފައިވަނީ ފީފާގެ 211 މެންބަރު އެސޯސިއޭޝަނަށް ބެހުމަށް 2.1 ބިލިއަން ޑޮލަރު ދޫކުރުމަށެވެ. އަދި އަންނަ އަހަރުން ފެށިގެން 2030 އަށް ހިނގާ ދައުރުގެ ތެރޭގައި އިންފްރާސްޓްރަކްޗަ އަދި ގްރާސްރޫޓް ތަރައްގީއަށް ކޮންމެ އެސޯސިއޭޝަނަކަށް މަދުވެގެން 10 މިލިއަން ޑޮލަރު ދިނުމަށް ވެސް ވަނީ ހުށަހަޅާފައެވެ.
އިންފަންޓީނޯ ފެޑެރޭޝަން ތަކަށް ފޮނުއްވި ސިޓީގައި ބުނެފައިވަނީ ވަކި އަދަދެއް އަދި ކަނޑަނޭޅި ނަމަވެސް، ފީފާގެ ހިންގުމުގެ އުސޫލުތަކުގެ ތެރެއިން ދެފުށް ފެންނަ ގޮތެއްގައި ޒިންމާދާރުކަމާއެކު ދެވޭނެ އެންމެ ބޮޑު މިންވަރަކަށް ފައިސާގެ އެހީ އިތުރުކުރުމަށް ތާއީދުކުރާ ކަމަށެވެ.
މީގެއިތުރުން، އެކި ފަރާތްތަކުން ހުށަހަޅާފައިވާ ހުށަހެޅުންތައް އެއްކޮށް، ދިރާސާކުރުމަށްފަހު އަންނަ މަހުގެ 15 ގައި ބާއްވާ ފީފާ ކައުންސިލްގެ ބައްދަލުވުމަށް ހުށަހެޅުމަށް ސެކްރެޓަރީ ޖެނެރަލް މަޓިއަސް ގްރާފްސްޓްރޯމްއަށް ވަނީ އަންގަވާފައެވެ.
މި ނިންމުމަކީ ޕްރައިވެޓް އީކުއިޓީ ބައިވެރިކޮށްގެން ކުރިއަށްގެންދަން އުޅުނު "ފީފާ ފޯވާޑް އެންޓަޕްރައިޒް" (އެފްއެފްއީ) ޕްރޮޖެކްޓް ހުއްޓާލުމާ ގުޅިގެން އުފެދުނު ނުތަނަވަސްކަމަށްފަހު އައި ކުރިއެރުމެކެވެ.
އިންފަންޓީނޯ ވަނީ މިހާރު ދޫކޮށްލާފައިވާ ވިޔަފާރި ޕްރޮޕޯސަލަކީ ފީފާގެ މިހާރުގެ ވަސީލަތްތަކުން ދޭ އެހީގެ ބަދަލުގައި ކުރަން އުޅުނު ކަމެއް ނޫން ކަމަށާއި، އެއީ ފުޓްބޯޅައަށް އިތުރަށް އިންވެސްޓްކުރުމަށް ހުށަހެޅި ކަމެއް ކަމަށް ވިދާޅުވެފައެވެ.