އޭޕަލްއިން މި މަހު ކުރީކޮޅު ނެރުނު އައިއޯއެސް 27 އޮޕަރޭޓިން ސިސްޓަމަށް ދިމާވި ބައެއް ބޮޑެތި މައްސަލަތައް ހައްލުކުރުމަށްފަހު، އައިއޯއެސް 27.0.1 އަޕްޑޭޓް އާންމުންނަށް ދޫކޮށްލައިފިއެވެ.
މި އަޕްޑޭޓަކީ ޚާއްސަކޮށް އެންމެ ފަހުން ނެރުނު އައިފޯން 18 ޕްރޯ އަދި އައިފޯން 18 ޕްރޯ މެކްސް ބޭނުންކުރާ ފަރާތްތަކަށް ދިމާވަމުންދިޔަ މައްސަލަތަކަށް ހައްލު ހޯދައިދިނުމަށް ނެރުނު އަޕްޑޭޓެކެވެ.
މި އަޕްޑޭޓާއެކު ހައްލުކޮށްދީފައިވާ އެންމެ އާންމު އެއް މައްސަލައަކީ، އައިފޯން 18 ޕްރޯ ސީރީޒްގެ ފޭސް އައިޑީއިން މޫނު ދެނެގަންނަން ނުކުޅެދޭ ހާލަތްތަކުގައި ފޯނު އަމިއްލައަށް ރީސްޓާޓްވާ މައްސަލައެވެ. މި މައްސަލަ މައިގަނޑު ގޮތެއްގައި ދިމާވަނީ ޕާސްވޯޑްސް އެޕް ނުވަތަ ސަފާރީގެ ޕްރައިވެޓް ޓެބްތައް ފަދަ ބަޔޯމެޓްރިކް ރައްކާތެރިކަން ދީފައިވާ އެޕްލިކޭޝަންތަކަށް ވަންނަން އުޅުމުގެ ތެރޭގައެވެ.
އައިފޯން 18 ޕްރޯ މޮޑެލްތަކުގައި ސްކްރީންގެ އަޑީގައި އިންފްރާރެޑް ކެމެރާ ހިމަނައިގެން ފޭސް އައިޑީ ސިސްޓަމް އަލުން ޑިޒައިންކޮށްފައިވާއިރު، ފޭސް އައިޑީ މަސައްކަތް ނުކުރުމުން ފޯނު ރީސްޓާޓްވުމުގެ ކުރިން ޓަޗްސްކްރީން ވެސް ހުއްޓޭ ކަމަށް ބޭނުންކުރާ ފަރާތްތަކުން ވަނީ ރިޕޯޓްކޮށްފައެވެ. މީގެ އިތުރުން 2x މޯޑުގައި f/1.48 އެޕަޗާގައި ވަކި ކަހަލަ އަލިކަމެއްގެ ތެރޭގައި ނަގާ ފޮޓޯތަކުގެ ކުލައަށް ބަދަލު އަންނަ ކެމެރާ މައްސަލައެއް ވެސް މި އަޕްޑޭޓުން ވަނީ ހައްލުކޮށްދީފައެވެ.
އެޕަލްއިން ބުނި ގޮތުގައި ނޯޓިފިކޭޝަން ސެންޓަރާއި ކޮންޓްރޯލް ސެންޓަރު އެއްފަހަރާ ހުޅުވާލަން އުޅުމުގެ ތެރޭގައި ޓަޗްސްކްރީން މަސައްކަތްނުކުރާ މައްސަލައަށް ވެސް އައިއޯއެސް 27.0.1 ގައި ވަނީ ހައްލެއް ހޯދައިދީފައެވެ.
ސޮފްޓްވެއާ ރިލީޒް ނޯޓްސްގައި ބަޔާންކޮށްފައިވާ ކަންކަމުގެ އިތުރުން، ބައެއް ބާވަތުގެ ދުވަސްވީ އައިފޯން މޮޑެލްތަކަށްވެސް ކުދިކުދި ބަގް ފިކްސްތަކާއި ސިސްޓަމް އިމްޕްރޫވްމަންޓްތައް މި އަޕްޑޭޓާއެކު ލިބިގެންދާނެއެވެ.
އައިފޯން ބޭނުންކުރާ ފަރާތްތަކަށް މި އަޕްޑޭޓް މިހާރު ފޯނުގެ ސެޓިންގްސްގެ ތެރެއިން 'ޖެނެރަލް' އަށް ގޮސް 'ސޮފްޓްވެއާ އަޕްޑޭޓް' އިން އިންސްޓޯލް ކުރެވޭނެއެވެ.
އަޕްޑޭޓް ކުރިއަށް ގެންދިއުމުގެ ކުރިން ފޯނު ވައިފައިއަށް ގުޅާލުމަށާއި ޗާޖަރަށް ގުޅާފައި ބެހެއްޓުމަށް އެޕަލްއިން އިރުޝާދުދެއެވެ.