"ނޭނގޭތަ؟... އޭގެ ފަހުން އެއްވެސް މީހަކު އެ ރޫމްގަ ނުހުރެޔޯ... އެ ތަން ހުންނަނީ ތަޅުލާފަ... ރިސެޕްޝަންގަ ތިބޭ ކުދިންނަށްވެސް އެތަނަށް ވަންނާކަށް އަމުރެއް ނޯންނާނެ..." ދިވެހި މީހާ އޭނާގެ ޖުމުލަ ފުރިހަމަކުރީ، އަހަންނަށް ބަލައިލަމުންނެވެ.
"ކީއްވެ؟..." ފަތުރުވެރިޔާ ސުވާލު ކުރިއެވެ.
********
"އެތާ ގޯސްޓެއް އުޅޭތީނު..." ދިވެހި މީހާގެ ނަޒަރު ހުއްޓުނީ އަހަރެންގެ މޫނަށެވެ.
އެންމެން އެއްފަހަރާ ހީގަތް ނަމަވެސް އަހަންނަކަށް މަޖަލެއް ނުވިއެވެ. ގަދަކަމުން ހިނިތުންވެލައިގެން ހުއްޓަސް، އަހަރެންގެ ނުތަނަވަސްކަން މޫނުން ސިއްރު ނުވާނެކަން ގައިމެވެ.
"އަސްލު ވާހަކައެކޭ... ތިރީގަ ހުންނަ ކޮޓަރިތަކަށް ރޭގަނޑު މަތިން ހިނގާ އަޑުވެސް އިވޭކަމަށް ވަނީ..." އަހަރެންގެ މޫނުން ނަޒަރު ވަކިކޮށްލަމުން އޭނާ ބުންޏެވެ.
"ކާކު އެތާ މަރުވީ؟..." އަހަންނަށް އަހައިލެވުނެވެ.
ދިވެހި މީހާ އަހަންނަށް ބަލައިލާފައި، ވަށައިގެން ނަޒަރު ހިންގައިލިއެވެ. ވަކި މީހަކަށް އެ ވާހަކަ އަޑު އިވިދާނެތީ ބިރުން އިނދެ، ބަލައިލާފަދަ ގޮތަކަށެވެ.
"އެ މަރުގެ ހަގީގަތެއް އެކަކަށްވެސް ނޭނގޭ... އެއީ..." ދިވެހި މީހާ އެއްޗެއް ބުނަން އުޅެފައި ހުއްޓައިލިއެވެ.
އަހަންނަށް ފެނުނުއިރު، އިބްރާހީމް އައިސް، އަހަރެމެންގެ ކައިރިއަށް ހުއްޓިއްޖެއެވެ. އޭނާގެ ނަޒަރު ހުއްޓިފައި ހުރީ، ދިވެހި މީހާއަށެވެ.
"އަހަނ ނާސިރު!... ހާދަ އޮލަ ވާހަކައެއްގަ... އެންމެން ކައިރިކޮށްގެން ކޮން ވާހަކައެއް ތި ދައްކަނީ؟..." ރީތިކޮށް ވާހަކަ ދައްކަން އުޅުނަސް، އިބްރާހީމް ހިތްހަމަނުޖެހިފައި ހުރިކަން އަހަންނަށް އެނގުނެވެ. އެންމެން ތިބި ތަނެއްގައި މާދަރީ ބަހުން ވާހަކަ ދެއްކުމުގެ ބަދަލުގައި ދިވެއްސަކާއި، އިނގިރޭސިން ވާހަކަ ދެއްކީ ކީއްވެ ކަމެއް އަހަންނަކަށް ނޭނގުނެވެ.
"ނަތިންގް....." ނާސިރު ވެސް ޖަވާބު ދިނީ އިނގިރޭސިންނެވެ.
"ގުޑް..." އިބްރާހީމް ބުންޏެވެ.
އިބްރާހީމްގެ ހިނިތުންވުމުން އަހަރެންގެ ހިތް އިތުރަށް ނުތަނަވަސް ކުރުވިއެވެ. އެ ނުތަނަވަސްކަން އިތުރުވީ އިބްރާހީމްގެ ނަޒަރު އަހަންނަށް ހުއްޓުމުންނެވެ. އިބްރާހީމް ލޮލުގެ އިޝާރާތުން އޭނާ އާއިއެކު ދިޔުމަށް އެދުނެވެ.
"މީހަކު ދައްކާހާ ވާހަކައެއް ގަބޫލު ނުކުރާތި!...." ރިސެޕްޝަންގެ ކައިރިއަށް ގޮސްފައި އިބްރާހީމް ބުންޏެވެ. އޭނާ ވާހަކަ ދެއްކީ ކުރިންވެސް ވާހަކަ ދައްކާހާ ގާތްކޮށް، ހިނިތުންވެގެން ހުރެއެވެ. އެހެނަސް، އެ އަޑުގައި އަމުރުވެރި ގޮތެއް ހުރިހެން އަހަންނަށް ހީވިއެވެ.
"ރޫމް ސެވަންގަ މީހަކު މަރުވީތަ؟..." ހިތުގެ އިހުސާސްތައް އެއްފަރާތް ކުރަމުން، އަހަރެން އަހައިލީމެވެ. އަހަރެން ބޭނުންވީ ހަގީގަތް ހޯދާށެވެ.
ޝައްކުވާ ކަމެއް އުޅޭނަމަ، އެކަމެއް ހޯދުމަކީ އަހަރެންގެ ކަށީގައި ހަރުލާފައި ހުންނަ އާދައެކެވެ. ވަކީން ހާއްސަކޮށް، މީހަކު ކަމެއް ސިއްރުކުރާހެން ހީވާނަމަ، އެކަމެއްގެ އެންމެ ފުނާއި ހަމައަށް ވާސިލުވާން ކޮންމެފަދަ ދަރަޖައަކަށް ދާކަށްވެސް އަހަރެން ފަހެއް ނުޖެހެމެވެ.
އަހަރެންގެ ސުވާލުން، އިބްރާހީމްގެ ތުންފަތުގައިވި ހިނިތުންވުން ފަނޑުވިއެވެ.
"އެއީ ވަރަށް ކުރިން..." އިބްރާހީމް ބުނެލިއެވެ.
"ކިހާ ދުވަހެއް ކުރިން؟.." އަހަރެން އަހައިލީމެވެ.
"ތިން އަހަރު ކުރި..." އިބްރާހީމް ހުރީ އެ ސުވާލަށް ތައްޔާރުވެގެން ހުރި ކަހަލަ ގޮތަކަށެވެ. ނިތްކުރިމަތީގައި އަތް ހިންގައިލަމުން އޭނާ ގޮސް ގޮނޑީގައި އިށީނެވެ. އަހަރެން ހުރީ ކޮޅަށެވެ.
"ކިހިނެއް އަސްލު ވީ؟..."
"އޭނަ އަމިއްލައަށް މަރުވީ..." އިތުރަށް ކަމެއް ފޮރުވާކަށް އިބްރާހީމް މަސައްކަތެއް ނުކުރެއެވެ.
އަހަރެންގެ ހިތަށް އުނދަގޫ ގޮތެއް ވިއެވެ. މީހެއްގެ މަރުގެ ވާހަކަ އެހާ ފަސޭހައިން އިބްރާހީމްގެ ދުލުން ބޭރުވީ ކީއްވެ ހެއްޔެވެ؟
"ކާކު އެއީ؟..." އަހަރެން އަހައިލީމެވެ.
"މަރްޔަމް..." އިރުކޮޅަކު އެއްޗެއް ނުބުނެ އިނދެފައި އިބްރާހީމް ބުންޏެވެ.
އަހަރެންގެ ހިތުގައި ރިއްސައިލިއެވެ. ނޭވާ ކުރުވިއެވެ. ދެލޮލަށް ޖަމާވި ކަރުނަތައް އޭގެ މަގާމުން ބޭރުވުމުގެ ކުރިން ހިންދައިލީމެވެ. އަހަރެން އިތުރު އެއްޗެއް ބުނުމުގެ ކުރިން އިބްރާހީމް ތެދުވެގެން އެތަނުން ދިޔައެވެ. އަހަރެން ހުރީ ހުރި ފިޔަވަޅު މަތީގައި ހުއްޓުން އަރާފައެވެ.
********
މެންދަމުން އަލިވެ އެކެއް ޖެހިއިރު، ދިރޭ ފުރާނައެއްވެސް އެ އިމާރާތުގެ ތެރޭގައި ނުވާ ކަހަލައެވެ. އެންމެން ނިދައި، ފައިހިލަވަޅު އޮބުނުތާ އިރުގަނޑެއް ފާއިތުވިއެވެ. އަހަރެންގެ ދެލޮލުގައި ނިދީގެ ކަންފުޅެއްވެސް ނެތެވެ. ހިތުތެރޭގައި ރޭވި އެޖެންޑާގެ ނަންބަރުތައް ފުރިހަމަކުރަން ތައްޔާރުވީމެވެ. އަހަރެން މަޑުމަޑުން ތެދުވެ، ލެޕްޓޮޕް ނެގީމެވެ. މަރިޔަމްގެ ނަމާއި، ގެސްޓްހައުސްގެ ނަމާއި، ކޮޓަރީގެ ނަންބަރު ޖަހައި މައުލޫމާތު އެއްކުރަން ފެށީމެވެ.
މަރްޔަމް އާއި ގުޅޭ އެތައް ހަބަރެއް އެކި ގޮތްގޮތަށް ލިޔެފައި ހުއްޓެވެ. މަރްޔަމްއަކީ ތުރުކީ އަންހެނެއްކަމާއި، ރާއްޖެ އައިސް ހުރީ އިބްރާހީމްގެ ގެސްޓްހައުސްގައި ކަމެވެ. ފުލުހުން މައްސަލަ ތަހުގީގު ކުރުމަށްފަހު، މަރްޔަމް އަމިއްލައަށް މަރުވީކަމަށް ނިންމައި، މައްސަލަ ފައިލުކުރީ ކަމަށް ހަބަރުތަކުގައި ލިޔެފައި ހުއްޓެވެ.
އެ ހުރިހާ ހަބަރެއްގެ ތެރެއިން މަރްޔަމްގެ ތަސްވީރެއް އަހަންނަށް ފެނުނީ އެންމެ ހަބަރަކުންނެވެ. އެ ތަސްވީރަށް ބަލަން އެތައް އިރަކު އިނީމެވެ. މަރްޔަމް އަކީ ސާޅީހަކަށް އަހަރުގެ ތުރުކީ އަންހެނެކެވެ. ރީތި މީހެކެވެ. ކަޅުކަން ގަދަ ފަން އިސްތަށިގަނޑު ހާމައަށް ދޫކޮށްލައިގެން ހުރިއިރު، މަރްޔަމްގެ މޫނުން ފެނުނީ ޒިންމާދާރު ކަމެވެ. ތުންފަތުގައިވި ލުއި ހިނިތުންވުން ރަމްޒުކޮށްދިނީ އޭނާއަކީ އޯގާތެރި ހިތެއްގެ ވެރިއެއް ކަމެވެ. ދެލޮލުން ފެނުނީ އުއްމީދެވެ. އެފަދަ މީހަކު އަމިއްލައަށް މަރުވެދާނޭ ހެއްޔެވެ؟ ލޯބިވާ އެންމެން ދޫކޮށް، މާދުރަށް އައިސް އެކަން ކުރީ ކީއްވެ ހެއްޔެވެ؟
"ކީއްވެ؟..."
ލެޕްޓޮޕް ލައްޕައިލީމެވެ. އެކި ވިސްނުންތަކުން އަހަރެންގެ ސިކުނޑި ފުރި ބާރުވަމުން ދިޔައެވެ. އިބްރާހީމްގެ އުޅުމުގައި ޝައްކު ކުރެވޭ ކަންތައްތަކެއް ހުރިކަން އަހަންނަށް އެނގެއެވެ. މަރްޔަމްގެ ނަން ކިޔަން އުނދަގޫވުން އެކަމުގެ ހެއްކަކަށް ފުދެއެވެ. ކަމެއް ނުވާނަމަ، މަރްޔަމްގެ ނަން ކިޔައން އިބްރާހީމަށް އުނދަގޫވާންވީ ކީއްވެ ހެއްޔެވެ؟ ރޫމް ހަތަކަށް ވަނުން އެންމެންނަށް މަނާވެފައި އޮންނަނީ ކީއްވެ ހެއްޔެވެ؟ ވިސްނާ ވިސްނާ އަހަރެންގެ ސިކުނޑި ސުމަކަށް ދިޔުން ނޫންކަމެއް ނުވިއެވެ. ހިތުގައި ފުނިޖެހެމުންދިޔަ ސުވާލުތައް މަދެއް ނުވިއެވެ.
ކުއްލިއަކަށް އިވެނ ފެށީ ފިޔަވަޅުތަކެއްގެ އަޑެވެ. އެނދުގައި އޮށޯވެލި ވަގުތު އެ އަޑު އައީ މަތިން ހެން އަހަންނަށް ހީވިއެވެ. އަހަރެންގެ ތެދުވީމެވެ. ދޮރުގައި ކަންފަތް ޖައްސާލައިގެން އަޑު އަހަން ހުރީމެވެ. ޔަގީނުންވެސް އަޑު އައީ މަތިންނެވެ. މަޑުމަޑުން ދޮރު ހުޅުވައިލީމެވެ. އެއިން ހިސާބަކުންވެސް މީހަކު ފެންނާކަށް ނެތެވެ.
ފިޔަވަޅުތަކުގެ އަޑު ކެނޑުނެވެ. ދެން އިވުނީ ދޮރެއް ހުޅުވައިލުމުން، ގޮވާ ޒާތުގެ ކުރަކި އަޑެކެވެ. އެ އަޑު އައީ ދެވަނަ ފަންގިފިލާއިންނެވެ.
"ރޫމް ސެވަން"
އަހަރެން މަޑުމަޑުން ސިޑިން މައްޗަށް އަރަން ފެށީމެވެ. ކޮރިޑޯ އޮތީ ފުދޭ ވަރަކަށް އަނދިރިކޮށެވެ. ހަތްވަނަ ކޮޓަރިން އަންހެނެއްގެ އަޑު އިވުނުހެން އަހަންނަށް ހީވިއެވެ. އަހަރެން އުޅުނީ ތަޅުގައި ހިފާލާށެވެ.
"އައިލިޝް..."
ތަޅުގައި ހިފާލި ވަގުތު ފަހަތުން މީހެއްގެ އަޑު އިވުމުން، އަހަރެން ދިޔައީ ސިއްސައިގެންނެވެ. އިބްރާހީމް ހުރީ އަހަންނާއި ދާދި ގާތުގައެވެ. ވައްކަމެއް ކުރަނިކޮށް ފަޅާއެރުމުން ތެޅިގަންނަހެން އަހަރެން އަވަހަށް އެ ކޮޓަރި އާއި ދުރަށް ޖެހިލީމެވެ. ދެއަތް ފުރަގަހަށް ލައިގެން އިބްރާހީމް ހުއްޓެވެ. އެ އަނދިރީގައިވެސް އިބްރާހީމްގެ ނިތްކުރިމަތިން ހިއްލާފައިވާ ދާތިކިތައް އަހަންނަށް ފެނުނެވެ.
"މިގަޑީ މިތާ ކީއްތިކުރަނީ؟..." ފުން ނޭވާތަކެއް ލަމުން އިބްރާހީމް އަހައިލިއެވެ.
"މި މި، އަޑެއް އިވުނީމަ.." އަހަރެން ބުނީމެވެ.
"އަހަރެންގެ ހުއްދަ ނުހޯދާ މި ފްލޯއަށް ނާންނާށޭ ބުނީމެއްނު..." އިބްރާހީމްގެ އަޑުގައި ހަރުކަށި ގޮތެއް ހުއްޓެވެ. އެއީ އޭގެ ކުރިން އޭނާ އަހަންނަށް ވާހަކަ ދެއްކި ގޮތެއް ނޫނެވެ.
"އަންހެނެއްގެ އަޑު އިވުނުހެން ހީ..." އަހަރެންގެ ޖުމުލަ ފުރިހަމަކުރާނެ ފުރުސަތެއް އިބްރާހީމް ނުދިނެވެ.
"މިތާ އެކަކުވެސް ނޫޅޭ..." އިބްރާހީމްގެ އަވަސް އަވަހަށް ބުނެލިއެވެ. އެ އަޑުގައި ޔަގީންކަމެއް ނެތްކަން އަހަންނަށް އެނގުނެވެ.
"އެކަމަކު އިވުނޭ... އެ ދޮރު ހުޅުވާފަ ބަލާލަން ހިނގާބަލަ..." އަހަރެން ބޭނުންވީ އިބްރާހީމް ލައްވާ އެ ކޮޓަރީގެ ދޮރު ހުޅުވައި، ޔަގީންކުރުވާށެވެ.
އިބްރާހީމް ކުއްލިއަކަށް އަހަރެންގެ އަތުގެ މުލައްދަނޑީގައި ހިފެހެއްޓިއެވެ. އަހަންނަށް ތަދުވާހާ ބާރަކަށް ނޫނެވެ. އެހެނަސް، އަހަރެންގެ ހިތް ބިރުގަންނަ ވަރަށެވެ.
"ތިރިއަށް ދޭ..." އިބްރާހީމް އަމުރުކުރިއެވެ.
އިބްރާހީމް އެފަދަ ގޮތަކަށް އަހަރެންގެ ގައިގައި އަތްލާނެކަމަށް އަހަރެން ކުޑަވެސް އުއްމީދެއް ނުކުރަމެވެ. އަހަރެން ބަލައިލުމުން، އިބްރާހީމް އަހަރެންގެ އަތުން ދޫކޮށްލިއެވެ.
"ސޮރީ..." އިބްރާހީމް މާފަށް އެދުނެވެ.
އެތަނުން ދިޔުމަށް ހިނގައިގަތް ނަމަވެސް އަހަރެން ސިއްރުން އިބްރާހީމްގެ މޫނަށް ބަލައިލީމެވެ. އެ ނަޒަރު ހުއްޓިފައިވީ ހަތްވަނަ ކޮޓަރިއަށެވެ. އަހަރެން ތިރިއަށް ފޭބިއިރުވެސް އިބްރާހީމް ހުރި ފިޔަވަޅު މަތީގައި ހުއްޓެވެ. އެ ދޮރުގެ ފަހަތުގައި ފޮރުވިފައިވާ ސިއްރުތައް ހާމަވެދާނެތީ އޭނާ ބިރުން ހުރި ކަހަލައެވެ.
(ނުނިމޭ)