އާޓިފިޝަލް އިންޓެލިޖެންސް (އޭއައި) އުފައްދާ މަޝްހޫރު ކުންފުނި އެންތުރޯޕިކްއިން ކުރީގެ މޮޑެލްތަކަށްވުރެ ހަލުވި އަދި އަގުހެޔޮ އާ އޭއައި މޮޑެލް "ސޮނެޓް 5.5" ހޯމަ ދުވަހު ނެރެފިއެވެ.
މިއީ އެ ކުންފުނީގެ ސީއީއޯ ދާރިއޯ އަމޮޑޭއީ، އެންމެ ކުރިއަރާފައިވާ އޭއައި މޮޑެލްތައް ތަރައްޤީކުރުމުގެ ރޭސް މަޑުޖައްސާލުމަށް ގޮވާލެއްވި ފަހުން އެ ކުންފުނިން ނެރުނު ދެވަނަ މޮޑެލްއެވެ.
މި އާ މޮޑެލްއަކީ ކުރީގެ މޮޑެލްތަކާ އަޅާބަލާއިރު ކޯޑިންގް ކުރުމާއި، ކަނޑައެޅިފައިވާ ވަކި މަސައްކަތްތައް ނިންމުމުގެ އިތުރުން ފެންވަރު ރަނގަޅު ޑޮކިއުމަންޓްތަކާއި، ސްލައިޑްތައް އަދި ސްޕްރެޑްޝީޓްތައް އުފެއްދުމުގައި މާ ކުޅަދާނަ މޮޑެލްއެކެވެ.
ސޮނެޓް 5.5 ނެރެފައިވަނީ އެ ކުންފުނީގެ އަގުބޮޑު މޮޑެލް ކަމަށްވާ "އޯޕަސް 5.5" ނެރުނުތާ ހަފުތާއެއްވެސް ނުވަނީހެއެވެ. އަދި މި ސީރީޒްގެ އެންމެ އަގުހެޔޮ މޮޑެލް ކަމަށްވާ "ހައިކޫ 5.5" ވެސް މާ ލަސްތަކެއް ނުވެ ނެރޭނެކަމަށް އެންތުރޯޕިކްއިން ބުނެއެވެ.
ސީއެންބީސީއަށް ދެއްވި އިންޓަވިއުއެއްގައި އެންތުރޯޕިކްގެ ރިސާޗް ޕްރޮޑަކްޓް މެނޭޖަރު ތިއޯ ޗޫ ވިދާޅުވީ، ސޮނެޓް މޮޑެލްއަކީ ޚަރަދު ކުޑަކުރަން ބޭނުންވާ، ނަމަވެސް މާ އިތުރު އިންޓެލިޖެންސެއް ބޭނުންނުވާ ކަސްޓަމަރުންނަށް ޚާއްޞަކޮށްގެން ނެރުނު މޮޑެލްއެއް ކަމަށެވެ. އަދި މިއީ އޯޕަސް މޮޑެލްއިން ލިބޭފަދަ ފުން ނިންމުންތައް ނިންމަން ނުޖެހޭ، އާދައިގެ އާންމު މަސައްކަތްތައް އަވަހަށް ނިންމާލުމަށް އެންމެ އެކަށީގެންވާ މޮޑެލްއެއް ކަމަށްވެސް އޭނާ ފާހަގަކުރެއްވިއެވެ.
އޭއައިގެ ސަބަބުން ކުރިމަތިވެދާނެ ނުރައްކާތަކާ މެދު ރިސާޗަރުން ކަންބޮޑުވުން ފާޅުކުރަމުންދާ ދަނޑިވަޅެއްގައި، އެންތުރޯޕިކްއާއި އެހެން ކުންފުނިތަކުގެ ރައްކާތެރިކަމުގެ ފިޔަވަޅުތަކަށް ދަނީ ވަރަށް ބޮޑަށް ފާރަވެރިވަމުންނެވެ. މިކަމާ ގުޅިގެން، އެންމެ ކުރިއަރާފައިވާ އޭއައި މޮޑެލްތައް ތަރައްޤީކުރާ މިންވަރު މަޑުޖައްސާލުމަށް ސީއީއޯ އަމޮޑޭއީ މި މަހު ކުރީކޮޅު ގޮވާލެއްވުމުން، ޓެކްނޮލޮޖީ ދާއިރާގެ ކުންފުނިތަކަށާއި ސަރުކާރުގެ މަސްއޫލުވެރިންނަށް ބޮޑު ހައިރާންކަމެއް ލިބިގެންދިޔައެވެ.
އެންތުރޯޕިކްއިން ބުނި ގޮތުގައި ސޮނެޓް 5.5 އަކީ އޭއައިގެ ގާބިލުކަމުގެ އެންމެ ކުރީގެ ސަފަށް އިތުރު ކުރިއެރުމެއް ގެނެސްދޭ މޮޑެލްއަކަށް ނުވާތީ، މީގެ ރައްކާތެރިކަން ޓެސްޓުކުރުމުގައި މައިގަނޑު ގޮތެއްގައި ބަލާފައިވަނީ ކޮންމެ ފެންވަރެއްގެ މޮޑެލްއަކުންވެސް ކުރިމަތިވެދާނެ ޚާއްޞަ ނުރައްކާތަކަށެވެ. ނަމަވެސް، މި މޮޑެލްގެ ސައިބާ ސެކިއުރިޓީ ގާބިލުކަމަކީ ކުރީގެ މޮޑެލްއަށްވުރެ "ވަރަށް ބޮޑު ކުރިއެރުމެއް" ކަމަށާއި، މިއީ އެންމެ ކުރިއަރާފައިވާ މޮޑެލްތަކަށް އެންތުރޯޕިކްއިން އެކުލަވާލާފައިވާ ފަދަ ސައިބާ ރައްކާތެރިކަމުގެ ފިޔަވަޅުތަކާއެކު ނެރުނު ފުރަތަމަ ސޮނެޓް މޮޑެލް ކަމަށް އެ ކުންފުނިން ބުންޏެވެ. އަދި ރައްކާތެރިކަމަށް އިސްކަންދިނުމަކީ ފެށުނީއްސުރެ އެ ކުންފުނީގެ މައިގަނޑު އަމާޒު ކަމަށް ތިއޯ ޗޫ ވިދާޅުވިއެވެ.
އަގުތަކަށް ބަލާއިރު ސޮނެޓް 5.5 ލިބެން ހުންނާނީ އިންޕުޓް ޓޯކަން މިލިއަނަކަށް 2 ޑޮލަރަށާއި، އައުޓްޕުޓް ޓޯކަން މިލިއަނަކަށް 10 ޑޮލަރަށެވެ. މިއީ އޯޕަސް 5.5 ގެ އަގުގެ މިންވަރެވެ. މީގެއިތުރުން، ކުރީގެ ވާޝަނަށްވުރެ ކޮންމެ މަސައްކަތަކަށް ބޭނުންވާ ޓޯކަންގެ އަދަދު މަދުވުމުގެ ސަބަބުން މިއީ ހިންގަން މާ އަގުހެޔޮ މޮޑެލްއެކެވެ.
މި މޮޑެލް ހޯމަ ދުވަހުން ފެށިގެން އެމަޒޯން ވެބް ސާވިސަސް (އޭޑަބްލިޔޫއެސް)، ގޫގްލް ކްލައުޑް އަދި މައިކްރޯސޮފްޓް އެޝުއާ ހިމެނޭހެން ހުރިހާ ޕްލެޓްފޯމްތަކަކުން ލިބެން ހުންނާނެއެވެ.