އެއްކޮށް ހޭދަކުރެއްވި ހަތް ދިހަ އަހަރުގެ ދިގު، ޙަޔާތްޕުޅަށްފަހު، މެލޭޝިއާގެ ކުރީގެ ބޮޑުވަޒީރު ޑރ. މަހާތީރު މުޙައްމަދު އެމަނިކުފާނުގެ ޙަޔާތްޕުޅުގެ އެންމެ ހިތްދަތި އެއް ވަގުތުކޮޅާ ކުރިމަތިލެއްވީ މިއަދެވެ.
އެއީ އެމަނިކުފާނުގެ އަނބިކަނބަލުން ޓުން ޑރ. ސިއްތީ ހަސްމާ މުޙައްމަދު ޢަލީ އަވަހާރަވެ އެ ދެކަނބަލުންގެ އެކީ ވޭތުކުރެއްވި ދިގު ދަތުރު ނިމުމަކަށް އައުމެވެ.
އުމުރުފުޅުން ދުވަސްވެ، ޞިއްޙީ ހާލަތު ހުރިގޮތުން އޮކްސިޖަން ހޮޅި އަޅުއްވައިގެން، އޮޓޮމެޓިކް ފުރޮޅުލީ ގޮނޑިއެއްގައި އިންނަވައިގެން ވެސް މަހާތީރު ވަނީ ޖަނާޒާގެ ހުރިހާ ކަމެއްގައި ފުރިހަމައަށް ބައިވެރިވެވަޑައިގެންފައެވެ. އަދި ޢާއިލާގެ ބޭފުޅުންނާއެކު އެންމެ ފަހުގެ އިޙްތިރާމް އަދާކުރެއްވުމުގައި ދެމިހުންނެވިއެވެ.
މުޅި ޖަނާޒާގެ ތެރެއިންވެސް ފެނިގެންދިޔައީ އިންތިހާއަށް ހިތާމަވެރި މާހައުލެކެވެ. ޢާއިލީ ގޭތެރެއިން ފެށިގެން، ތަމަން ސުންގާއި ބެސީ އިންދާހްގެ މަސްޖިދު އަލް-ޝަރީފްގައި އޮތް އެންމެ ފަހުގެ އިޙްތިރާމް އަދާކުރުމާއި ކަށުނަމާދުން ފެށިގެން، ޕުތުރާޖާޔާގެ ޕްރެސިންކްޓް 20 ގައި ހުންނަ ޤަބުރުސްތާނާ ހަމައަށްވެސް މުޅި ސަރަޙައްދުގައި އޮތީ ހިތާމައިގެ ސާލެއް ލެވިފައެވެ.
މިސްކިތުގައި އަނބިކަނބަލުންގެ ޖަނާޒާގައި އިންތިހާއަށް ދެރަފުޅުވެފައި އިންނަވައި، މަހާތީރު އެކަމަނާގެ ހަށިކޮޅަށް ހިމޭންކަމާއެކު ބައްލަވަން އިންނެވި މަންޒަރުން އެތައް ބައެއްގެ ލޮލުން ކަރުނަ ހިލުވައިލިއެވެ. އެއަށްފަހު އެމަނިކުފާނު ވަނީ ކަށުނަމާދުގައި ބައިވެރިވެވަޑައިގެންފައެވެ. މިސްކިތް ފުރިބާރުވެ، ބޭރު ސަރަޙައްދަށް ވެސް މީހުން އަރާފައި އޮތެވެ.
ޤައުމީ ޤަބުރުސްތާނު (ޕުސާރާ ނެގާރާ) އަށް ވަޑައިގެން، ލޯބިވާ އަނބިކަނބަލުންގެ ހަށިކޮޅު ކަށްވަޅަށް ތިރިކޮށް، ފަސްދާނުލެވެމުން ދިޔަ ވަގުތު މަހާތީރު އިންނެވީ ފުން ހިތާމައެއްގެ ތެރޭގައި އެ މަންޒަރު ބައްލަވާށެވެ. މި ވަކިވުމަކީ މުޅި މެލޭޝިއާއަށްވެސް ލިބުނު ފުން ހިތާމައެކެވެ.