ބައިނަލްއަޤްވާމީ ގޮތުން ފާހަގަކުރާ ޓީޗަރުންގެ ދުވަސް ގައުމީ ފެންވަރުގައި ފާހަގަކުރުމަށް އެޑިއުކޭޝަން މިނިސްޓްރީން އެއްވެސް އިސްނެގުމެއް ނެތި ހިމޭންކަން އިޚްތިޔާރުކޮށްފައިވާކަމަށް ބުނެ ޓީޗަރުންގެ ޖަމިއްޔާއިން ކަންބޮޑުވުން ފާޅުކޮށްފިއެވެ.
މިކަމާ ގުޅިގެން ޓީޗާޒް އެސޯސިއޭޝަން އޮފް މޯލްޑިވްސް އިން ފޭސްބުކްގައި ކުރި ޕޯސްޓެއްގައި ބުނެފައިވަނީ، "ސްކޫލްތަކުގެ ފުރާޅުތަކުގެ ދަށުގައި ލޯބިވާ އެދުރާރުންގެ އަގުވަޒަންކުރުމުގެ މަލާފާތްތައް ކުލަގަދަކޮށް އަތުރާލެވުނު ކަމުގައި ވިޔަސް، މުޅި ގައުމުގެ ނަމުގައި މިނިސްޓްރީގެ ފަރާތުން މި ފަޚުރުވެރި ދުވަސް ފާހަގަކުރުމަށް އެއްވެސް އިސްނެގުމެއް ނެތި، ހިމޭންކަން އިޚްތިޔާރުކޮށްފައިވާކަމަށެވެ. އެއީ ފުން އަސަރާއެކު ފާހަގަކުރަންޖެހޭ ހަގީގަތެއް ކަމަށް ބުންޏެވެ.
އަދި ގައުމުގެ މުސްތަގްބަލް ބައްޓަންކުރުމުގައި އެންމެ ބުރަ މަސައްކަތެއް ކުރައްވާ މުރާލި އެދުރުންގެ އަގު، ގައުމީ ފެންވަރުގައި ވަޒަންކޮށްލުމަށް މިނިސްޓްރީގެ ސަފުހާތަކުން ޖާގައެއް ނުލިބި ދިޔުމަކީ އެ ޚިދުމަތްތެރިންގެ ހިތްތަކަށް ލިބިގެންދިޔަ ނުހަނު ބޮޑު މާޔޫސްކަމެއް ކަމަށްވެސް އެ އެސޯސިއޭޝަނުން ފާހަގަކޮށްފައިވެއެވެ.
ސްކޫލް ފެންވަރުގައި މިފަދަ ދުވަސްތައް ފާހަގަކުރުމުގައި ދިމާވެފައިވާ ދަތިތަކާ ގުޅޭގޮތުން ބައެއް ސްކޫލްތަކުގެ ވެރިން މައުލޫމާތު ދެއްވާ ގޮތުގައި، ކުރިން ސްކޫލްތަކުގައި މިފަދަ ޚާއްސަ ދުވަސްތައް ފާހަގަކުރަނީ ޕީޓީއޭ މެދުވެރިކޮށް ތަފާތު ހަރަކާތްތައް ހިންގައިގެން އިތުރު ފައިސާ ހޯދައިގެންނެވެ. ނަމަވެސް، މިހާރު މިނިސްޓްރީން ވަނީ އެފަދަ ހަރަކާތްތައް ހިންގައިގެން އިތުރު ފައިސާ ނުހޯދުމަށް އަންގާފައެވެ.
މި އެންގުމާ ގުޅިގެން، ސްކޫލްތަކަށް މިހާރު ޖެހިފައިވަނީ މިނިސްޓްރީން އަހަރީ ގޮތުން ދޭ ކުޑަ ބަޖެޓުގެ ތެރެއިން މިފަދަ މުހިންމު ކަންކަން ހަމަޖައްސާން ކަމަށް މައުލޫމާތު ދެއެވެ. ސްކޫލްތަކުގެ އިސްވެރިން ފާހަގަކުރާ ގޮތުގައި، ލިބޭ ބަޖެޓަކީ ސްކޫލުގެ އެހެނިހެން ޒަރޫރީ ޚަރަދުތައް ބެލެހެއްޓުމަށްވެސް އެކަށީގެންވާ ވަރަށްވުރެ މާ ކުޑަ ބަޖެޓެކެވެ. މީގެ ސަބަބުން ޓީޗަރުންގެ ދުވަސް ފަދަ ދުވަސްތައް އެކަށީގެންވާ ގޮތެއްގައި ފާހަގަކުރުމަށް ސްކޫލްތަކަށް ވަނީ ބޮޑެތި ގޮންޖެހުންތަކަކާ ކުރިމަތިލާން ޖެހިފައެވެ.