ޏ. ފުވައްމުލަކުގައި މީގެ 16 އަހަރު ކުރިން ހިންގި މާރާމާރީއެއްގައި ޢަބްދުﷲ ޝުހާދު މަރާލި މައްސަލައިގައި މަރަން ހުކުމްކޮށްފައިވާ ހަސަން ފަރީދު ހުށަހެޅި އިސްތިއުނާފީ މައްސަލައިގެ އަޑުއެހުންތައް ސުޕްރީމް ކޯޓުން މިއަދު ނިންމާލައިފިއެވެ.
ދެހާސް ދިހަ ވަނަ އަހަރުގެ ޖެނުއަރީ މަހު ފުވައްމުލަކުގައި ޝުހާދަށް ހަމަލާދީ މަރާލި މައްސަލައިގައި އެ ރަށު ކަރަންކާއާގެ، ހަސަން ފަރީދު މެރުމަށް ކްރިމިނަލް ކޯޓުން ކުރި ހުކުމަށް ހައި ކޯޓުން ވަނީ ތާއީދުކޮށްފައެވެ.
އެ ހުކުމް ސުޕްރީމް ކޯޓުގައި އިސްތިއުނާފު ކުރުމުން މިއަދު ބޭއްވި އަޑުއެހުމުގައި، ތަޙުޤީޤީ މަރުޙަލާގައި ފަރީދަށް ފުލުހުން އަނިޔާކުރި ކަމަށް ކުރެވޭ ތުހުމަތުތަކާ ގުޅޭގޮތުން ފަނޑިޔާރުންގެ ބެންޗުން ވަނީ ދައުލަތާ ގިނަ ސުވާލުތަކެއް ކުރައްވާފައެވެ. އެގޮތުން ތަޙުޤީޤު މަރުޙަލާގައި ބަންދުކުރެވޭ މީހާއަށް ލިބޭ ޙައްޤުތައް އަންގައިދޭ ލިޔުމުގައި ފަރީދުގެ ބަދަލުގައި ފުލުހުން ސޮއިކޮށްފައި ވަނީ ކީއްވެގެންތޯ ފަނޑިޔާރުން ސުވާލު ކުރެއްވުމުން ދައުލަތުން ބުނީ، އެ ލިޔުމުގައި ފުލުހުން ސޮއިކުރީ ފަރީދަށް ލިބިފައިވާ އަނިޔާތަކުގެ ސަބަބުން ސޮއިނުކުރެވޭނެ ކަމަށް އޭނާ ބުނުމުން ކަމަށެވެ. އަދި އޭރު އަމަލުކުރަމުންދިޔަ ޤަވާއިދުގައި އެފަދަ ހާލަތްތަކުގައި ޢަމަލުކުރާނެ ވަކި އުޞޫލެއް ނެތުމުން، އެއީ އޭރު އަމަލުކުރަމުން އައި ގޮތް ކަމަށް ދައުލަތުން ފާހަގަކުރިއެވެ.
ވަކީލަކާ ނުލައި ކޯޓުގައި އަމިއްލައަށް ދިފާޢުވި ފަރީދު ފާހަގަކުރި ކަންތައްތަކުގެ ތެރޭގައި ފުލުހުންގެ ބެލުމުގެ ދަށުގައި ހުއްޓައި އައްޑޫއިން ދިޔަ ފުލުހުންގެ ޓީމަކާ އޭނާ ހަވާލުކޮށް، ކަނުބަނދެގެން ލޯންޗަކަށް އެއްލައިލިއެވެ. އަދި ސ. ހިތަދޫ ރީޖަނަލް ހޮސްޕިޓަލަށް ގެންދިއުމުން ލިބިފައިވާ އަނިޔާގެ ބޮޑުކަމުން ފަރުވާދެވެން ނެތް ކަމަށް ބުނުމުން، ފަހުން ގަމު ޕޮލިސް ސްޓޭޝަނަށް ގެންގޮސް ފަރުވާ ދިން ކަމަށް އޭނާ ބުންޏެވެ.
ހަމައެއާއެކު ފުވައްމުލަކުގައި ހުރިއިރު ހިއުމަން ރައިޓްސް ކޮމިޝަން (އެޗްއާރްސީއެމް) ގެ ޓީމެއް އެ ރަށަށް އެރުމަށް އާންމުންގެ ބަޔަކު ހުރަސްއެޅީ، ފުލުހުން ދިން މަޢުލޫމާތުތަކަކާ ގުޅިގެން ކަމަށް ޤަބޫލުކުރެވޭ ކަމަށް ފަރީދު ބުންޏެވެ. އަދި އޭނާ ހައްޔަރުކުރަން ގެއަށް ވަނީވެސް ކޯޓު އަމުރެއް ނެތި ކަމަށް އޭނާ ބުންޏެވެ.
ފަރީދަށް ފުލުހުން އަނިޔާކުރި ކަމަށް ބުނާ މައްސަލަ އޭރު ތަޙުޤީޤު ކުރިތޯ ފަނޑިޔާރުން ސުވާލު ކުރެއްވުމުން ދައުލަތުން ބުނީ، އެފަދަ ތަޙުޤީޤެއް ހިންގިކަން އެނގެން ނެތް ކަމަށެވެ. ނަމަވެސް ތަޙުޤީޤުގައި ކަންކަން ހިންގުމުގައި އިދާރީ މައްސަލަތަކެއް ހުރި ނަމަވެސް، ފަރީދުގެ މައްޗަށް ކުށް ސާބިތުވެފައިވަނީ މަންޒަރު ދުށް ހެކިންގެ ހެކިބަހުން ކަމަށްވާތީ، މައްސަލައިގެ އަޞްލަށް ބަދަލެއް ނުއަންނާނެ ކަމަށް ދައުލަތުން ބުންޏެވެ. އެހެންކަމުން މަރުގެ ހުކުމް ދެމެހެއްޓުމަށް ދައުލަތުން އެދެއެވެ.
މި މައްސަލައިގެ އިތުރު ކަމެއް ސާފުކުރަން ނެތްނަމަ ދެން އޮންނާނީ ހުކުމް އިއްވުން ކަމަށް ސުޕްރީމް ކޯޓުގެ ބެންޗުން ވަނީ އިޢުލާން ކުރައްވާފައެވެ.
ޝުހާދުގެ މަރުގެ މައްސަލާގައި ދަށު ކޯޓުން ކުށް ސާބިތުވެފައިވާ ހަސަން ފަރީދުގެ މައްޗަށް މަރަށް މަރު ހިފަން ބޭނުންވާ ކަމަށް ޝުހާދުގެ މަންމަ އާއި ބައްޕަ ކުރިން ވަނީ ސުޕްރީމް ކޯޓުގައި ބުނެފައެވެ. ފުވައްމުލައް ކޯޓު މެދުވެރިކޮށް ވީޑިއޯ ކޮންފަރެންސްކޮށް ޝަރީއަތުގައި ވާހަކަ ދައްކަމުން ޝުހާދުގެ މަންމަ އަދި ބައްޕަ ބުނީ ދަށު ކޯޓުގައި ވެސް ބުނެފައިވާ ފަދައިން އެމީހުން ބޭނުން ވަނީ ފަރީދުގެ ކިބައިން މަރަށްމަރު ހިފަން ކަމަށެވެ.
ޝުހާދުގެ މަންމަ އާއި ބައްޕައަށް ވާހަކަ ދައްކަން ފުރުސަތު ދިނުމުގެ ކުރިން އެމީހުންނާ އެއްވެސް ވާހަކައެއް ދައްކަން ފަރީދު ބޭނުންތޯ ޝަރީއަތުން އެހި އެވެ. އެކަމަކު، ފަރީދު ބުނީ އެމީހުންނާ އެއްވެސް ވާހަކައެއް ދައްކަން އޭނާ ބޭނުން ނުވާ ކަމަށެވެ.
ސުޕްރީމް ކޯޓުން އެ މައްސަލަ ބައްލަވަނީ އުއްތަމަ ފަނޑިޔާރު އަބްދުލްޣަނީ މުހައްމަދާއި ފަނޑިޔާރު ފަނޑިޔާރު ހުސައިން ޝަހީދާއި ފަނޑިޔާރު އައިޝާ ޝުޖޫން މުހައްމަދުގެ އިތުރުން ފަނޑިޔާރު އަލީ ރަޝީދު ހުސައިނާއި ފަނޑިޔާރު މުހައްމަދު ސަލީމެވެ. އަދި އެ ބެންޗުގެ ރިޔާސަތަކީ އުއްތަމަ ފަނޑިޔާރެވެ. މި މައްސަލަ ކުރިން ބެލީ އެހެން ބެންޗަކުންނެވެ.