"ވެރިކަމަކީވެސް އިންސާނާ ދަހިވެތިކުރުވާ ފިތުނަވެރި އެއްޗެކެވެ. އެކަމާއިހެދި އެތައް ބަޔެއްގެ ހައްގުތައް ގެއްލި ފުރާނަތައް ވަކިވެގެން ދެއެވެ. ނަމަވެސް އިންސާނުންގެ ހިތް ފުރޭނެ ދުވަހެއް ނާންނާނެއެވެ. ދުނިޔެއަށްވުރެ އާޚިރަތް އިސްކުރާނީ ނަސީބުވެރިންނެވެ."
***
އެރޭ މުސްލިމުންގެ ލަޝްކަރުގެ ތެރެއިން ގާސިދަކު އޮލީވިއާއާއި ބައްދަލުކުރަން އައެވެ. އެމީހާ ހުރީ މޫނު ނިވާކޮށްގެންނެވެ.
"ތިއީ ކާކު؟" އޮލީވިއާ ސުވާލުކުރެއްވިއެވެ.
"ޢަޅުގަނޑުމެންގެ އަމީރު އާލަމް ފޮނުއްވީމަ މިއައީ...."އެމީހާއާއި އޮލީވިއާއާއި ދެމެދުގައި ދެކެވުނު ވާހަކަތަކުން އޮލީވިއާގެ މޫނުފުޅުގެ ކުލަ އަލިވެގެން ދިޔައެވެ. ކާމިޔާބުގެ ކޮޅުމަތި ފެނިވަޑައިގަތެވެ.
***
ރޭގަނޑުގެ ފިނިކަން މުޅި ފަރުބަދަތަކަށް ވެރިވެ މުސްލިމުންގެ ކޭމްޕު ހިމޭންވަމުން ދިޔައެވެ. ޒާއިމްގެ ފޭލިގެކޮޅު ތެރޭގައި ވަނީ ކުޑަ ބައްތިއެއްގެ މަޑު އަލިކަމެވެ. ދޫލަމަތީގައި ފަތުރާލާފައިވަނީ ސަރަޙައްދުގެ ނަންތަކާއި ހަނގުރާމައިގެ މައިދާން ކުރަހާފައިވާ ތަންތަނެވެ. ހާލާވެސް ބާލީސްކޮޅަށް ލެނގިލައިގެން އިންނެވިއިރު ޒާއިމްގެ މޫނުފުޅަށް ބަލަހައްޓައިވެގެން އިންނެވިއެވެ. އާލާސްކަންފުޅާއި އުޅުއްވާތީ ތެދުވެ އުޅޭވަރެއްވެސް ނޫނެވެ. ވަރުބަލިކަމާއެކު ތެދުވެ ވަޑައިގެން އުޅުއްވާވަރެއްވެސް ނޫނެވެ.
އެވަގުތު ޓެންޓުގެ ފޮތިގަނޑު ދުރުކޮށްލައްވާފައި އެތެރެއަށް ވަދެވަޑައިގަތީ ޒައިމްގެ ކޮއްކޯފުޅު އާލަމްއެވެ. އެމަނިކުފާނުގެ މޫނުފުޅުމަތިން ފެންނަން ހުރީ އިންތިހާއަށް އޯގާތެރި އަދި އިޙްތިރާމުން ފުރިގެންވާ ކުލަވަރެކެވެ. މުސްލިމް އުއްމަތަށްޓަކައި ކަންބޮޑުވެގެން އުޅޭ ވަފާތެރި އަޚެއްގެ ހުންނަ ސިފަތަކެވެ.
"އަމީރު ޒާއިމް..." އާލަމް މަޑުމައިތިރި އަޑުފުޅަކުން ގޮވައިލެއްވިއެވެ. "އަޅުގަނޑު މިއައީ މަނިކުފާނުގެ ވަރުބަލިކަމަށް ކުޑަވެސް ލުޔެއް ދިނުމަށް މަންމަ ފޮނުއްވީމަ.... އަދި މާދަމާގެ ނުރައްކާތެރި ހަނގުރާމައަށްޓަކައި އަޅުގަނޑުމެންގެ ހިތްތައް އެއްކޮށްލުމަށް......."
ޒާއިމް އިސްއުފުލާ ބައްލައިލެއްވިއެވެ. އާލަމްގެ ހިތްޕުޅުގައިވާ ނުބައިކަމާއި ޚިޔާނާތުގެ ކަންފުޅެއްވެސް ޒާއިމްގެ ސާފު އިޚްލާސްތެރި ހިތްޕުޅަށް އެނގިވަޑައިގެންނެވިހެން ހިޔެއްނުވެއެވެ. ޒާއިމް ހިނިފުޅުވަޑުވައިލައްވަމުން އާލަ އިށީދެވަޑައިެންނެވުމަށް އިޝާރާތްކުރެއްވިއެވެ.
"އާލަމް... އާދޭ އިށީންނަން......ތިޔަ އައީ ވަރަށް ބޭނުންތެރި ވަގުތެއްގައި......" ޒާއިމް ވިދާޅުވިއެވެ. ހާލާވެސް ބޭބޭފުޅަށް އައި ބަދަލާއިމެދު ހައިރާންވެ ވަޑައިގެންނެވުމާއެކު އުފާފުޅުވިއެވެ.
ތިން ބޭފުޅުން އެކުގައި ކޭމްޕުގެ ރޭގަނޑު ފަރިއްކޮޅަށް އިންސާފުކުރައްވަން ފެށްޓެވިއެވެ. އާދައިގެ ރޮއްޓާއި ކަންބަޅި މަހާއި ޒައިތޫނި އަދި މޭވާވެސް ހުއްޓެވެ. އާލަމް ވާހަކަފުޅު ދެއްކެއްވީ އިންތިހާއަށް ޖަޒުބާތީ އަދި ދީނަށް ލޯބިކުރާ ވެރިއެއްފަދައިންނެވެ.
"ޒާއިމް... އަޅުގަނޑު ހައިރާންވޭ މަނިކުފާނުގެ ތިޔަ ހުރި އިސްލާމީ އަޚުލާގާއި ސާބިތުކަމާމެދު....." އާލަމް ވިދާޅުވިއެވެ. "އަޅުގަނޑުމެންގެ ކާބަފައިން ތާރިގު ބިން ޒިޔާދު ފަދަ މުޖާހިދުން މި ބިމަށް އިސްލާމްދީން ގެނައީ ކިހާ ބޮޑު ޤުރުބާނީއެއް ވެގެން.... މިއަދު އަޅުގަނޑުމެންގެ ލޭ އޮހޮރުވައިގެންވެސް މި މާތް ދީނާއި މި ބިން ދިފާޢުކުރަންޖެހޭ. ﷲ އަކުބަރު.... ޒާއިމްގެ ފަހަތުގައި ހުރެގެން ހަނގުރާމަކުރުމަކީ އަޅުގަނޑަށް ލިބޭ ފަޚުރެއް......"
ހާލާގެ ދެލޯފުޅު ތެމިގެން ދިޔައެވެ. އާލަމްގެ ދުލުން އެ ނުކުތް ދީނީ ބަސްތަކުން ޒާއިމްގެ ހިތްޕުޅަށްވެސް ބަޔާންކުރަންދަތި އުފަލެއް ލިބިވަޑައިގަތެވެ.
"ޙަމްދުހުރީ ﷲ އަށް.....އާލަމް... އަހަރެމެންގެ ބާރަކީ އަހަރެމެންގެ ހަތިޔާރެއް ނޫން. އަހަރެމެންގެ ބާރަކީ ﷲ އަށް އޮތް ތަވައްކުލު. ދުޝްމަނުންގެ ލަޝްކަރު ކިތަންމެ ބޮޑަސް، ޙައްގުގެ ނޫރު ނައްތާލުމުގެ ބާރެއް އެމީހުންނަކަށް ނުލިބޭނެ. މުސްލިމުންގެ އެއްބައިވަންތަކަން އޮތިއްޔާ އެއްވެސް ކިއްލާއެއް، އެއްވެސް ބާރެއް އަހަރެމެންގެ ކުރިމަތީގައި ސާބިކަންމަތީގައި ކޮޅަކަށް ނުހުރެވޭނެ..."
"ތިއީ ހަމަ މުޅިން ތެދެއް..." އާލަމް ޒާއިމްގެ ކޮނޑުފުޅުގައި އަތްޕުޅުޖައްސާލަމުން ވިދާޅުވިއެވެ."ބުނެބަލަ....... ރޮޑްރިގޯގެ އެ ވަރުގަދަ އުސް ކިއްލާ ހަގުރާމަކޮށްގެން ފަތަަހަވަނީ ކިހިނެއް؟ އެއީ އާދައިގެ ހަމަލާއަކުން ގުޑުވާލެވޭނެ ތަނެއް ނޫން......އެހެން ޕްލޭނެއް ނެތްތޯ؟"
ޒާއިމް ފަރިއްކުޅުއްވުން ހުއްޓަވާލައްވާފައި ތަށިކޮޅު އެއްފަރާތްކޮށްލުމަށްފަހު ދޫލަމަތީގައިވާ ކުރެހުންތަކަށ އިޝާރާތްކޮށްލެއްވިއެވެ. އޭނާގެ ދެލޯފުޅުން ފެނުނީ އުއްމީދާއި ވިސްނުންތެރިކަމުގެ އަލިކަމެކެވެ.
"އާލަމް... އިސްލާމީ ތާރީޚުގައި ހަލަބުގެ ކިއްލާ މުސްލިމުން ފަތަޙަކުރި ގޮތް ހަނދާން އެބަހުރިތަ؟" ޒާއިމް އެއްސެވިއެވެ. "އަމީރުލް މުއުމިނޫން އަބޫ އުބައިދާ އަދި ޟިރާރުމެންފަދަ މުޖާހިދުންގެ ރަން ޒަމާނުގައި، އެ ނުގުޑާފަދަ ކިއްލާގެ ތެރެއަށް މުސްލިމުން ވަނީ މުޅި ލަޝްކަރުން ސީދާ ހަމަލާދީގެންނެއް ނޫން. އެމީހުން ބޭނުންކުރީ ސިއްރު އަދި ހިތްވަރުގަދަ އުކުޅެއް."
އާލަމް ވަރަށް ފަރުވާތެރިކަމާއެކު އަޑުއައްސަވަން އިންނެވިވެ. އެމަނިކުފާނުގެ މޫނުފުޅުމަތިން ޝައުޤުވެރިކަން ދެއްކެވި ނަމަވެސް ސިކުނޑީގައި ވަނީ އެއިން ކޮންމެ ތަފްޞީލެއް ރޮޑްރިގޯއަށް ފޯރުކޮށްދޭނެ ގޮތުގެ ރޭވުމެވެ.
"އަހަރެންވެސް ބޭނުންކުރާނީ އެ އުކުޅު....." ޒާއިމް ތަފްޞީލުކޮށްދިނެވެ. "ރޮޑްރިގޯގެ ލަޝްކަރު ހީކުރާނީ އަހަރެމެން މާދަމާ ކުރިމަތިން ބޮޑު ހަމަލާއެއް ދޭނެކަމަށް. އަހަރެމެންގެ މައި ލަޝްކަރު ފޯޓުގެ ކުރިމަތީގައި ހަނގުރާމައިގެ ތައްޔާރީތައް ދައްކައި ދުޝްމަނުންގެ ސަމާލުކަން އެކަމަށް ދަމައިގަންނާނެ. ނަމަވެސް ކިއްލާގެ ފަހަތުގައިވާ އުސް ފަރުބަދަމަތިން އުވައިސް އެންމެ ހިތްވަރުގަދަ ކެރޭ ފަނަރަ މުޖާހިދުންގެ ކުޑަ ޖަމާޢަތެއް ގޮވައިގެންގޮސް ކިއްލާގެ އުސް ފާރަށް އަރާނެ....."
"ފާރަށް އަރައިގެން ދެން ހަދާނީ ކިހިނެއް؟" އާލަމް ސުވާލުކުރިއެވެ.
"އެ މުޖާހިދުން ސިއްރުން ފޯޓުގެ ތެރެއަށް ފައިބައި ކިއްލާގެ ބޮޑު ދޮރާށި އެތެރެއިން ހުޅުވާލާނެ......" ޒާއިމްގެ އަޑުފުޅުގައިވަނީ ޔަޤީންކަމެވެ. "ދޮރާށި ހުޅުވާއިރަށް ބޭރުގައި ތިބި އަހަރެމެންގެ މުޅި ލަޝްކަރު އެތެރެއަށް ވަދެގަންނާނެ. އެއާއެކު ދުޝްމަނުން ސިހި ސަފުތައް ރޫޅައިލެވި ކިއްލާ އަހަރެމެންގެ އަތްދަށަށް އަންނާނެ އިންޝާﷲ......"
އާލަމް ހިތްޕުޅަށް އަރާ ވަޑައިގަތެވެ. 'ޒާއިމް... ކަލޭ ތިޔަ ރޭވީ ކަލޭގެ އަމިއްލަ މަރުގެ ރޭވުން...."
"ޒާއިމް..... ހަމަ ބުނާނެ އެއްޗެއް ނޭގިފައި މިއިނީ......" އާލަމް ތާރީފުކުރައްވާ ކަމަށް ހައްދަވައި ޒާއިމްގެ އަތްތިލައިގެ މަތީގައި އަތް ބޭއްވެވިއެވެ. "ތިއީ ހަމަ އަޖައިބެއްފަދަ މޮޅު ރޭވުމެއް... އުވައިސްއަކީ އެކަމަށް އެންމެ އެކަށީގެންވާ ހިތްވަރުގަދަ ޒުވާނާ. އަޅުގަނޑު ﷲ އަށް ދުޢާކުރަން މާދަމާ އަޅުގަނޑުމެންނަށް ނަޞްރުދެއްވުން އެދި. އަޅުގަނޑުގެ މުޅި ފައުޖު އޮންނާނީ ކުރައްވާ ކޮންމެ އަމުރަކަށް ތަބާވާން...."
"ޝުކުރިއްޔާ އާލަމް," ޒާއިމް އިޚްލާޞްތެރިކަމާއެކު ވިދާޅުވިއެވެ. "އާލަމް އައިސް މިފަދައިން ހިތްވަރު ދިނުމުން އަހަރެމެންގެ ހިތަށް ބޮޑު ހަމަޖެހުމެއް ލިބިއްޖެ....."
"އެ ފަނަރަ މުޖާހިދުންގެ ތެރޭގައި އެއްވެސް ޖާސޫސެއް އުޅޭނެތަ؟"ހާލާ ސުވާލުކުރެއްވިއެވެ.
"ނޫން އެއީ އެންމެ އިތުބާރުކުރެވޭ ހަގުރާމަވެރިން.......ކިއްލާގެ ތެރެއަށް ވަނުމަކީ ނުރައްކާތެރިކަމުން ފުރިފައިވާ އުދަގޫ ކަމެއްކަން ދެނެ ހަމަ ޝަހީދުވާން ތައްޔާރަށް ތިބި މުޖާހިދުން..........."ޒާއިމް ވިދާޅުވިއެވެ.
"އަޅުގަނޑުވެސް ހަގުރާމައިގާ ބައިވެރިވާން ބޭނުން.."
"ހާލާ އަރާމުކުރަން އެބަޖެހޭ..އަދިވެސް ހުން މުޅިން ނުފިލާ.."
ފަރިއްކޮޅު ނިންމަވާލެއްވުމަށްފަހު އާލަމް ތެދުވެވަޑައިގެން ޒާއިމްއާއި ހާލާއާއި ސަލާމްކޮށް ލައްވާފައި ސަލާމަތްކަމަށް ދުޢާކުރައްވަމުން ފޭލިގެ ކޮޅުން ނުކުމެވަޑައިގަތެވެ.
އަނދިރިކަމުގެ ތެރެއަށް ވަދެވަޑައިގަތުމާއެކު އާލަމްގެ މޫނުފުޅުމަތިން އެ ހުރިހާ ދީނީ އަދި އޯގާތެރި ކުލަވަރެއް މުޅިން ފިލައިގެން ދިޔައެވެ. އެ ލޯފުޅުން ފެންނަންފެށީ ނުލަފާކަމާއި ޚިޔާނާތުގެ އަލިފާނެވެ.ބުމަ ކައިރިކޮށްލެއްވުމާއެކު އަތްޕުޅު މުށްކަވައިލެއްވިއެވެ.
"އުވައިސްއާއި އެ ބުނާ ފަނަރަ މީހުން ކިއްލާގެ ފާރަށް އަރާނެ ވަގުތާއި ކިއްލާގެ ދޮރާށި ހުޅުވާނެ ގޮތް މިހާރު މިއޮތީ ފުރިހަމައަށް އެނގިފައި......" އާލަމް މަޑުމަޑުން އަމިއްލަ ނަފުސަށް ވިދާޅުވިއެވެ. "ޒާއިމް... އެނގޭތަ؟ ތި ހަގުރާމަވެރިން ފާރަށް އަރާއިރު ކިއްލާގެ މަތީގައި ތިބޭނީ އެ ހަގުރާމަވެރިންގެ އިންތިޒާރުގައި ތިބި ރޮޑްރިގޯގެ ތީރުވެރިން.... އަދި ކަލޭމެން ކައިރިއަށް އަންނައިރު އަހަރެންގެ ފައުޖުން ކަލޭގެ ފަހަތުން ވެސް ހަމަލާދޭނެ......."
އާލަމް އަވަސް ފިޔަވަޅުތަކެއްގައި ފޭލިގެކޮޅަށް ވެދެވަޑައިގަންނަވާ ޤާޞިދު ގެންނެވިއެވެ. ޒާއިމްގެ މުޅި ހަނގުރާމައިގެ ރޭވުން ލިޔެފައިވާ ސިޓީއެއް ރޮޑްރިގޯއަށް ފޮނުވާލައްވާފައި ނިދަން އޮށޯވެވަޑައިގެންނެވިއެވެ.
***
ޖެހިގެން އައި ދުވަހުގެ ފަތިހުގެ އަލިވިލުމާއެކު ހަނގުރާމައިގެ މައިދާން ގުގުމައިގެން ދިޔައެވެ. ޒާއިމްގެ ރޭވުމާ އެއްގޮތަށް މުސްލިމުންގެ މައި ލަޝްކަރު އެ ކިއްލާ ގެ ކުރިމަތީގައި ހަނގުރާމައިގެ ސަފުތައް އަތުރާލިއެވެ. އަދި އަނެއްކޮޅުން އުވައިސް އިސްވެ ހުރެ ހިތްވަރުގަދަ މުޖާހިދުން ސިއްރުން ކިއްލާގެ ފަހަތުގައިވާ އުސް ފާރަށް އަރައި އެތެރެއަށް ވަދެގަތެވެ.
ނަމަވެސް، އެމީހުންނަށް ނޭނގުނު ކަމަކީ އާލަމްގެ ޚިޔާނާތުގެ ސަބަބުން ރޮޑްރިގޯގެ ސިފައިން ތިބީ އެމީހުންގެ އިންތިޒާރުގައި ކަމެވެ.
އުވައިސްއާއި އޭނާގެ ބައިވެރިން ކިއްލާގެ ބޮޑު ދޮރާށި ހުޅުވައިލި ވަގުތު ހަތަރު ފަރާތުން ދަނގަޑު ދަހަނާ އެޅި ސަތޭކައިން ސިފައިން ނުކުމެ މުޖާހިދުން ވަށައިލިއެވެ. އެއާއެކު ކިއްލާގެ މަތިން ތީރުވެރިން ތީރުތައް ފޮނުވާލިއެވެ.
"ޒާއިމް..... މިއީ މަޅިއެއް........އަހަރެމެންގެ ތެރެއިން ޖާސޫސަކު އެބަހުރި..އަހަރެމެންގެ ރޭވުން މި މީހުންނަށް އެނގޭ.........."ކިއްލާގެ ދޮރާށި ކައިރީގައި ހުރެ އުވައިސް އަޑުގެ ކޮޅަށް ގޮވާލިއެވެ.
އެ އަޑާއެކު ޒާއިމް ކަނޑިކޮޅު އުރައިން ދަމައިގަނެ ދޮރާއްޓާއި ދިމާލަށް އަސް ދުއްވަވާލެއްވިއެވެ. އަދި އެމަނިކުފާނުގެ ލަޝްކަރަށްވެސް އެންގެވީ ފަހަތުން އައިސް ކިއްލާއަށް ވަނުމަށެވެ. ޒާއިމްއާއިއެކު ކިއްލާގެ ތެރެއަށް ވަދެވުނު މުސްލިމް ސިފައިން އުވައިސްމެން ސަލާމަތްކުރަން މަސައްކަތް ކުރިއެވެ. ނަމަވެސް ރޮޑްރިގޯގެ ބިޔަ ލަޝްކަރު މުޅި ތަން ވަށާލިއެވެ.
ޒާއިމް ހިތްވަރާއެކު ހަނގުރާމަކުރައްވަމުން ދިޔައިރު ކަނޑިކޮޅުގެ ކޮންމެ އެތިފަހަރަކާއެކު އެތައް ބޮލެއް އުދުއްސަވާލެއްވިއެވެ. ދުޝްމަނުންގެ އަދަދު ގިނަކަމުން އެންމެ މީހަކު މަދުވާހެނެއްވެސް ހިޔެއްނުވެއެވެ. ދަގަނޑު ތަކާއި އަސްތަކުގެ މޮށްގަނޑު ބިންމަތީގައި ޖެހޭ އަޑާއި ޒަޚަމްވެގެން މައިދާނަށް ވެއްޓޭ މީހުންގެ ރުއިމުން އަޑުން ކިއްލާގެ ތެރެ ގުގުމާލާފައިވިއެވެ. އެތައް އިރެއްވީފަހުން މުސްލިމުންގެ ހަގުރާމަވެރިންގެ ތެރެއިން ބަޔަކު ޝަހީދުވެ ޒާއިމްއާއި އުވައިސް އެކަނިވިއެވެ. އެތައް އިރެއްވާންދެން ހަގުރާމަކުރުމުގެ ސަބަބުން ވަރުބަލިވިޔަސް ޒާއިމް މަސައްކަތްކުރެއްވީ ޒަޚަމްވެފައިވާ އުވައިސްއަށް ހިމާޔަތް ދިނުމަށެވެ. އުވައިސް ފާރަށް ލެނގިގެން ހުރިއިރު ލޯ މެރެމުން ދިޔައެވެ.
"ތި ދެމީހުން ހައްޔަރުކުރޭ....."ކޮމާންޑަރު އަޑުކޮޅަށް ގޮވައިލިއެވެ.
އޮލިވިއާވެސް ސިފައިންނަށް އަމަުރުކުރައްވާފައިވަނީ ޒާއިމްއަށް އަނިޔާއެއްނުދީ ހައްޔަރުކޮށްގެން ގަނޑުވަރަށް ގެނައުމަށެވެ. ކޮމާންޑަރު ޒާއިމްގެ ގާތަށް އައިސް މޫނުމަތީގައި ރުމާކޮޅެއް ޖައްސައިލުމާއެކު ވީގޮތެއް އެނގިވަޑައެއް ނުގެންނެވިއެވެ.
ރޭގަނޑުގެ ވަގުތެވެ. ޒާއިމް ހޭފުޅު އެރިއިރު އެމަނިކުފާނު ހުންނެވީ ޖަލެއްގައެއްނޫނެވެ. އިންތިހާއަށް ފުރިހަމަ އަގު ބޮޑު ކޮޓަރިއެއްގައެވެ. އަދި އަގުބޮޑު ކޮޓަރިއެކެވެ. އެނދުމަތީގައި މަޑު ބާލީސްތައް ޖަހާފައިވާއިރު އުއްބައްތިތަކުގެ އަލިން ކޮޓަރި އުޖާލާވެފައިވިއެވެ. މޭޒުމަތީގައި ތާޒާ މޭވާއާއި ކާނާ ހުއްޓެވެ.
ޒާއިމް ހައިރާންވެފައި ތެދުވެ ވަަޑައިގެންނެވުމާއެކު ހަނގުރާމައިގެ ތެރޭގައި ހިނގި ކަންތައްތައް ލޯފުޅުގެ ކުރިމަތިން ފެނިވަޑައިގެން ހިތާމަފުޅު ކުރެއްވިއެވެ.
"ހާލާ ކޮބާ......އުވައިސްއަށް ވީ ކިހިނެއްތަ؟ އުވައިސް ކޮބާ؟ އޭނައަށް ކަމެއްވެއްޖެއްޔާ.....ޔާ ﷲ ހާލާއާއި އުވައިސް އަށް ރައްކާތެރިކަން ދެއްވާދޭވެ.އަދި ލަޝްކަރުގެ އެންމެނަށްވެސް.......އަނެއްކާ އާލަމްގެ ޚިޔާނާތެއްބާ....."
އެވަގުތު ކޮޓަރީގެ ބޮޑު ދޮރު ހުޅުވާލުމަށްފަހު އެތެރެއަށް ވަދެ ވަޑައިގަތީ އޮލީވިއާއެވެ. އެކަމަނާ ހުންނެވީ ރާނީއެއްގެ ފުރިހަމަ ޝާހީ ހެދުންކޮޅުގައެވެ. އެކަމަނާގެ ލޯފުޅުން ފެނިވަޑައިގަތީ އިންތިހާއަށް މަޑުމައިތިރި އަދި ޖަޒުބާތީ ކުލަވަރެކެވެ.
"މަނިކުފާނު ހޭފުޅު އަރައިފި.....މާތް ރަސްކަލާނގެއަށް ޝުކުރުހުރި...." އޮލިވިއާ މަޑުމަޑުން ވިދާޅުވިއެވެ.
"ކޮބާ އުވައިސް؟" ޒާއިމް ތެދުވެވަޑައިގަތެވެ.
"ކޮން އުވައިސްއެއް؟"
"އަހަންނާއެކު ހައްޔަރުކުރި މުޖާހިދު...."
"އޭނަ ވަރަށް ބޮޑަށް ޒަޚަމްވެފައި އޮތީ....ކަންބޮޑުވެވަޑައިގަންވާނެކަމެއްނެތް...މަނިކުފާނުގެ އެކުވެރއެއްކަން އެނގޭތީ އޭނައަށް ބޭސްފަރުވާކުރަމުން ގެންދަނީ..."
"ތިއީ ކާކު؟"
"ރޮޑްރިގޯގެ ދަރިފުޅު އޮލީވިއާ......"
"މިއީ ކޮން ކުޅިވަރެއް؟ އަހަރެންގެ ސިފައިން ކޮބާ؟ އަދި އަހަރެން މިފަދަ ޝާހީ ކޮޓަރިއެއްގައި ބަހައްޓާފައި މިވަނީ ކީއްވެ؟ އަހަރެން މަރާލަން ބޭނުންނަމަ، ހަނގުރާމައިގެ މައިދާނުގައި މަރާލިނަމަ......."
އޮލިވިއާ ކުރިއަށް ފިޔަވަޅެއް އެޅުއްވިއެވެ.
"ޒާއިމް....އަޅުގަނޑު މަނިކުފާނު މަރައިލަން ކީއްކުރަން އެއްވެސް އަނިޔާއެއްދޭން ބޭނުމެއްނޫން........"
"ކީއްވެތަ؟" ޒާއިމް ސުވާލުކުުރެއްވިއެވެ.
"މަނިކުފާނު އަޅުގަނޑު ސަލާމަތްކޮށްދިން ދުވަހުން ފެށިގެން ހިތާއި ފުރާނައިން ގުރުބާން ވާން މިހިރީ.. އަޅުގަނޑުގެ ވަނީ ޝުކުރުވެރިކަމަށްވުރެ ބޮޑު އިޙްސާސެއް..."
ޒާއިމް އޮލިވިއާގެ ދެލޯފުޅަށް ސީދާ ބައްލަވާލެއްވިއެވެ. އެމަނިކުފާނަށް އޮލިވިއާގެ ދެލޯފުޅުން ފެނިވަޑައިގަތީ ލޯތްބާއި އޯގާތެރިކަމެވެ. ނަމަވެސް، ޒާއިމްގެ ހިތްޕުޅުގައިވަނީ ހަމައެކަނި އިސްލާމްދީނާއި އެމަނިކުފާނުގެ ލޯބިވާ އަނބިކަނބަލުންނެވެ.
"އެދުވަހުން ފެށިގެން ތި ސޫރަ ހިތުން ނުފިލާ..މަނިކުފާނު ބޭނުންފުޅުނަމަ މި ހަނގުރާމަ ނިންމައިލެވިދާނެ..."
"ތި ބުނި އެއްޗެއް ނޭގުނު..."
"މި ދެންނެވީ މަނިކުފާނު އަޅުގަނޑާއި ކައިވެނި ބައްލަވައިގަނެގެން މި ތަޚުތު މިލްކުކުރެވިދާނެއޭ......"
ޒާއިމް އިސްދަށަށް ޖައްސަވާލެއްވިއެވެ.
"ކަމަނާގެ ހިތުގައިވާ އިޙްސާސްތަކަށް އިޙްތިރާމްކުރަން. ނަމަވެސް، އަހަރެމެންނަކީ ދެ ދުނިޔެއެއްގެ ދެމީހުން. އަހަންނަކީ މީހެއްގެ ފިރިއެއް.....އަދި ހިތުގައިވަނީ ﷲ އަށް އޮތް އީމާންތެރިކަމާއި، އަހަރެންގެ އަނބިމީހާ ހާލާގެ ލޯބި....."
"މަނިކުފާނު މިތަނުން ސަލާމަތްވާން އޮތް ޝަރުތަކީ އަޅުގަނޑާއި ކައިވެނި ކުރުން..."އޮލީވިއާގެ ހިތްޕުޅު ހަލާކުވާވަރުވިއެވެ.
" އަހަރެން މިތަނުގައި ބެހެއްޓިޔަސް، އަހަރެންގެ އީމާންކަމެއް އަދި ޤައުމަކަށް އޮތް ވަފާތެރިކަމެއް ގުޑުވައެއް ނުލެވޭނެ.....ތި ޚިޔާލު ދޫކޮށްލާ.. އެންމެ ފަހު ނޭވާއާއި ހަމަޔަށްވެސް ހާލާއަށް ބޭވަފާތެރިއެއްނުވެވޭނެ....."
އޮލިވިއާގެ ދެލޯފުޅުން ކަރުނަ ފާއްދާލިއެވެ. ޒާއިމް ހާލާގެ ނަންފުޅު ވިދާޅުވުމުން އޮލިވިއާގެ ހިތްޕުޅުގައި އަނެއްކާވެސް ހަސަދަވެރިކަމުގެ އަލިފާންގަނޑު ރޯވެގެން ދިޔައެވެ. ޒާއިމްގެ ކުރިމަތީގައި ކީރިތި ނުކުރައްވަންވެގެން އެތަނުން ނުކުމެވަޑައިގެންނެވީ ޒާއިމްގެ ޚިޔާލުފުޅު ބަދަލުކުރައްވަން މަޖުބޫރުވާނެ އެހެން ގޮތެއް ހޯދަން ޚިޔާލުކުރައްވަމުންނެވެ.
***
ހަނގުރާމައިގެ މައިދާނުގައި ދުންތަކާއި ކަންތައްގަނޑު ހަމައަކަށް އެޅުނުއިރު، މުސްލިމުންގެ ކޭމްޕުގައި ވަނީ ހިމޭންކަމެކެވެ. ހާލާ ފޭލިގޭގައި ހުންނެވީ ޒާއިމްގެ އިންތިޒާރުގައެވެ. ޚާދިމާ ފަރިއްކޮޅު ގެނެސްދިނުމުން ފަރިއްކުޅުއްވާހިތެއްނުވިއެވެ. ޒާއިމްއާއި މުޖާހިދުންނަށް ރައްކާތެރިކަން ދެއްވުމަށް އެދި ދުޢާކުރައްވަމުން ގެންދެވިއެވެ. އެކަމަނާއަށް ތެދުވެ ވަޑައިގެންނެވޭނެ ނަމަ މިހާރު ހުންނަވާނީ ޒާއިމްއާއި އެކީގައެވެ.
އެވަގުތު އާލަމް ފޭލިގެއަށް ވަޑައިގެންނެވިއިރު ހަނގުރާމައިގެ ހެދުންކޮޅު ތެމި މުޅިން ލެއެވެ. މޫނުފުޅުމަތިން ފެނުނީ އިންތިހާއަށް ދެރަވެ މާޔޫސްވެފައިވާ ކުލަވަރެކެވެ.
"ހާލާ..." އާލަމް ހާލަގެ ކޮނޑުފުޅުގައި އަތްޖައްސަވާލެއްވިއެވެ.
"ކިހިނެއްވީތޯ؟" ހާލާގެ ހިތްޕުޅަށް ބިރުވެރިކަން ވަނެވެ.
"ހަނގުރާމަ ގޯހުން ގޯހަށް ދިޔައީ......."
"ޒާއިމް ކޮބާ....."
އާލަމްގެ ލޯފުޅުން މަކަރުވެރިކަމުގެ ކަރުނަ ފޮދު އައެވެ. "އަހަންނަށް މާފުކުރޭ ކޮއްކޯ ހާލާ... ރޮޑްރިގޯގެ ސިފައިންގެ ބޮޑު ލަޝްކަރަކުން އަހަރެމެން ވަށާލީ. ޒާއިމް... ޒާއިމް މުޖާހިދެއްގެ ގޮތުގައި ހަނގުރާމަކުރަމުން ގޮސް... އެމީހުންގެ ތީރުތަކާއި ކަނޑިތަކުގެ ހަމަލާތަކުގައި... ޝަހީދުވެއްޖެ...."
"ނޫން...ނޫން....." ހާލާ ވިދާޅުވިއެވެ. "ނޫން...ޒާއިމް އަޅުގަނޑު ދޫކޮށްފައެއް ނުދާނެ......"
"އަމިއްލަ ދެލޮލުން ދެކުނިން ޒާއިމް ބިމަށް ވެއްޓުނު ތަން..އަހަރެންވެސް ސަލާމަތްވީ ހަމަ ކިރިޔާ ހާލާ....ދެމީހުން އެކީ ހަގުރާމަކުރަމުން ދިޔައީ....ހާލާ.އެމީހުންގެ ލަޝްކަރު ބިޔަ..ހަމަ ހިފަހައްޓާލެވޭވަރު ނުވީ އެހެންވެ......" އާލަމް ވިދާޅުވިއެވެ. "އެމީހުން ޒާއިމްގެ ހަށިކޮޅުވެސް ގެންގޮސްފި..އަހަރެމެންނަށް އެކަންވެސް މަނާކުރެވޭނެގޮތެއްނުވި...ޒާއިމް....އަބަދަށްޓަކާ ވަކިވީ........"
ހާލާގެ ދުނިޔެ އެނބުރިގަތެވެ. ހިތްޕުޅަށް ބަރުދާސްތު ނުކުރެވޭ ފުން އަސަރާއި ކެކުޅުމަށް ކެތްނުކުރެވިގެން އެކަމަނާގެ ދެލޯފުޅަށް ފުސްވެ ޚަބަރު ހުސްވެގެން ވެއްޓިވަޑައިގެންނެވީ އާލަމްގެ އަތްދަނޑި މައްޗަށެވެ.
ނުނިމޭ