"ތިބާގެ ދަރިންނަށް އަރަބި ބަހާއި ގުރުއާން އުނގަންނައިދޭށެވެ. ގުރުއާނާއިމެދު ވިސްނާ ކިޔެވުމަކީ ސިކުނޑިއާއި ހިތަށް ލިބޭ ފަރުވާއެކެވެ. އަދި ސްކްރީންވަގުތު ތައް މަދުކުރުމުން ކުދިންގެ ސިކުނޑިތައް އިތުރަށް ތާޒާވާނެއެވެ."
***
އޭނާ އިނގިލިތައް މަޑުޖެހިލިއެވެ. އަދި ތުނޑު ކަރުދާސްމަތީގައި ޖައްސާލައިގެން އިނދެ މިގަނޑުވަރާއި މެދު ވިސްނައިލިއެވެ. ޔަގީނުންވެސް އާދަޔާޚިލާފު ކަންތައްތަކެއް ހުއްޓެވެ. ބައެއްފަހަރަށް އާދަޔާ ޚިލާފަށް އުޅޭ ޚާދިމާއިންނެވެ. ކާބަފައިންގެ ޒަމާނުގެ ގޮތްގޮތެވެ. މިލްހާ ކުޑަކޮށް ހިނިތުންވެލިއެވެ. އޭނާގެ މައިންބަފައިންނަށް ސިފްރާން ސިފަކޮށްދޭނެ ގޮތެއް އޭނާއަކަށް ނޭނގުނެވެ. "މަންމަމެންގެ ދަނބިދަރިފުޅަކީ ވަރަށް އުނދަގޫ މީހެކެވެ." އޭނާ ލިޔަން ބޭނުންވިއެވެ. އެއާ ޚިލާފަށް އޭނާ ހިނިތުންވެލާފައި ވިސްނީ ރަގަޅުގޮތަކަށް ކުރިއަށް ގެންދިޔުމަށެވެ.
"އެންމެންވެސް އަހަންނަށް ވަރަށް ހެޔޮ"
އެއީ ތެދެކެވެ. ހަގީގަތުގައިވެސް އެއާއިލާގެ މެމްބަރުން އޭނައަށް ކަމޭހިތާ ގަދަރުކުރެއެވެ. ވާހަކަދައްކަނީ އޯގާތެރިކަމުން ފުރިފައިވާ ގޮތަކަށެވެ. މައިދައިތަ ނަސްރީންވެސް އަމިއްލަ ދަރިއެކޭ ތަފާތެއް ނުކުރެއެވެ. ކުރިން އޭނަ ދެކުނު ގޮތުން މުއްސަދިންގެ ތެރޭގައި އުޅެނީ މުޅިންވެސް ބޮޑާ ކިބުރުވެއިންނެވެ. އެފަދަ ގިނަ މީހުން ނިކަމެތިންނަށް އެހީތެރިކަން ފޯރުކޮށްދެނީވެސް ކަންދެއްކުމަށް ކަމުގައި އޭނަ ހީކުރިއެވެ. ނަމަވެސް ހަދީދުގެ އާއިލާއިން މިވީހާތަނަށް ސާބިތުކޮށްދިނީ އެންމެން އެއްގޮތް ނުވާނެކަމެވެ. މުއްސަދިންގެ ތެރޭގައި ހިތްތރި މީހުން އުޅޭކަމެވެ. އާދައިގެ އާއިލާއެއްގެ އަންހެންކުއްޖަކު ޅީދަރިއެއްގެ ގޮތުގައި ބަލައިގަތުމަކީ ސާފު ހެއްކެކެވެ. މި އާއިލާއިން ތަފާތު މިޒާޖެއްގެ ވެރިއަކީ ސިފްރާންއެވެ. ބީރައްޓެހިކަމާއި ސީރިޔަސްކަމުގެ އިންތިހާއެވެ. އެކަމުގެ ސަބަބުން ހައްތާ އެދޭތެރޭގައިވާ ގުޅުން ކިލަބުވަނީއެވެ. މަޑުމަޑުން ނަމަވެސް ސިފްރާންގެ އެ ހިލޭކަން އިހުސާސްވެއްޖެއެވެ. ނަމަވެސް އޭނަގެ މަންމަމެން ގާތުގައި އެވާހަކަދައްކައިގެން މަންމަމެންގެ ހިތުގެ ހަމަޖެހުން ނަގައިލާކަށް ނުވާނެއެވެ. ޝަކުވާކުރުމުން ސިފްރާން ބަދަލުވާނީހެއްޔެވެ؟
***
ހަފްތާތަކެއް ފާއިތުވެގެންދިޔައިރު މިލްހާ އާ ދިރިއުޅުމަށް ހޭނިއްޖެއެވެ. އޭނަގެ އެ ގަނޑުވަރާއި، ކޮޓަރިއާއި އަދި ހެދުންތައްވެސް ބަލައިގަތެވެ. ރީތި ހެދުންތައް އަޅައިގެން ހިނިތުންވުމާއި އުފާވެރިކަމާއެކު އޭނަގެ ދުވަސްތަކާއި ކުރިމަތިލައެވެ. ސިފްރާންއާއިހެދި މޫޑު ޚަރާބުކުރުމަކީ ބޭކާރުކަމެކެވެ. އެފިރިހެނާގެ ފަރާތުން އެކުވެރިކަމަށް އުއްމީދުކުރުން ހުއްޓާލައިފިއެވެ. ހުންނަންޖެހޭނީ އެމީހަކު ބެހެއްޓި ދުރުމިނެއްގައެވެ. ސިފްރާން ގެއިން ފެންނަނީވެސް މަދު ފަހަރެއްގައެވެ. ހީވާގި ޒިންމާދާރު ޒުވާނެއްކަމުން ވިޔަފާރީގެ ކަންކަމުގައި ބުރަކޮށް އުޅެނީކަމަށް ކިޔާ އަޑުއިވެއެވެ. އޭނާ އެނބުރި ގެއަށް އައުމުގެ އިންތިޒާރު މާނައެއް ނެތް އެއްޗަކަށް ވެއްޖެއެވެ. ބައެއް ދުވަހު ސިފްރާން ފެންނަނީ ހަމައެކަނި ރޭގަނޑުގެ ކެއުމުގެ ވަގުތުގައެވެ. މަދު ފަހަރެއްގައި ގޭގެ ކޮންމެވެސް ދިމާލަކުން އޭނާގެ ފިޔަވަޅުތަކުގެ އަޑުއިވެއެވެ. ނަމަވެސް އަސްލު ސޫރަ ފެންނަ ކަމަކަށް ނުވެއެވެ.
ސިފްރާންގެ އެ ބީރައްޓެހިކަމާއިމެދު ޚިޔާލު ކުރުމަށް ފުރުސަތު ނުދެނީ ނާއިލާގެ ކުދިންކޮޅެވެ.
މިލްހާއަކީ އެކުދިންގެ އަމިއްލަ މީހެއް ކަމަށް އެކުދިން ނިންމައިގެން ތިބިފަދައެވެ. އޭނާ ސިޓިންގ ރޫމުގައި އިށީދެލިޔަސް އެ ދެކުދިންކުރެ ކުއްޖަކު އަންނާނެއެވެ. ބަގީޗާއަށް ނުކުތިއްޔާ ދެކުދިންވެސް ފަހަތުން ދާނެއެވެ. ފޮތެއް ކިޔަން އުޅުނަސް ރާހާ ހިޔަނިފަދައިން ގާތުގައި އިނދެ ސުވާލުކުރާނެއެވެ. ސާރާ ތަންކޮޅެއް މަޑުން ހުއްޓަސް އެކުއްޖާވެސް އޭނައަށް އެހާވަރު ހުރެއެވެ. މިލްހާ އެކުދިންނާއި އަނގަ ތަޅަން އުޅުމުގެ ތެރޭގައި އެކުދިންނަށް އެއްވެސް ވަރަކަށް ގުރުއާން ކިޔަވަން ނޭގޭކަން އެނގުނެވެ. ދިވެހިން ބޭރު ތަންތަނަށް ދިރިއުޅުން ބަދަލުކުރުމުން އޭގެ ނޭދެވޭ އަސަރު ކުދިންނަށް ކުރާކަމަށް މަންމަމެންވެސް ކިޔައެވެ. މިއީ އޭގެ މިސާލެކެވެ. އޭނަ ގަސްތުކުރީ އެކުދިންނަށް އަރަބި އުނގަންނައިދިނުމަށެވެ.
މިލްހާ ސިޓިން ރޫމަށް ނުކުތްއިރު ކުދިން ތިބީ ބުދުތަކާއި ކުޅޭށެވެ. އެކި ސައިޒްގެ ބުދުތަކާއި ސެޓްތަކެވެ. އޭނަ ފެނުމާއެކު ކުޅޭ އެއްޗެހިި އުކާލާފައި ގާތަށް އައެވެ. މިލްހާ އެކުދިން ގޮވައިގެން އެހެން ކޮޓަރިއަކަށްގޮސް މޭޒުމަތީގައި ކުޑަ ދެ ކަރުދާސްގަނޑު ބޭއްވިއެވެ.
"މިއީ ކޮން އެއްޗެއް؟"ރާހާ ލޯ ކުޑަކޮށް ލާފައި ބަލައިލިއެވެ.
"ޢަރަބި އަކުރުތައް......." މިލްހާ ހިނިތުންވެލިއެވެ.
"އަހަރެމެންނަށް ކުރިންވެސް ބައެއް އަކުރުތައް އެނގޭ....."ސާރާ ކައިރިއަށް ޖެހިލިއެވެ.
"ރިއަލީ؟ އެކަމަކު ސްވީޓްހާޓްއަށް އެނގޭތަ؟ ބައެއް އަކުރުތައް އެނގުމަކުން ނުފުދޭ..." އޭނަ ބޯ ހޫރައިލިއެވެ. "އަހަރެމެން ފަށާނީ ފުރަތަމަ ބައިން...."
މިލްހާ އަބަދުވެސް ގުރުއާން ކިޔެވުމަށް ލޯބިކުރެއެވެ. އަދި ކުދިންނަށް ކިޔަވައިދިނުމަކީ އާދަޔާޚިލާފަށް ފަސޭހަ ކަމެއްކަން ތަޖުރިބާކުރެވިފައިވިއެވެ. އޭނާ ފެށީ އަރަބި އަކުރުތަކުންނެވެ. އަކުރުތަކުގެ މަޚުރަޖު ރަނގަޅުވަންދެން އޭނާގެ ފަހަތުން ކިޔަން ކުދިންނަށް މަޖުބޫރުކުރަމުން ދިޔައެވެ. ދެން ފެށީ ތަޖުވީދެވެ. ރާހާ ރަނގަޅަށް ކިޔަވާ ދުވަހު ވަރަށް އުފާވެ ނޭގޭ ދުވަހު ވަރަށް ބޮޑަށް ހިތްހަމަނުޖެހޭކަން ދައްކައެވެ. ސާރާ މާ ހިމޭންވެފައި ފަރުވާތެރިއެވެ. އަމިއްލައަށް ކިޔުމުގެ ކުރިން ގިނަ ފަހަރަށް އޭނާ ރާހާއަށް ބަލައެވެ.
"އަދި އެއްފަހަރު ކިޔާބަލަ....." މިލްހާ މަޑުމަޑުން ބުންޏެވެ.
"ސާރާ ރަގަޅަށް ކިޔެވީ...."ސާރާ ނުރުހުމުގެ އަޑެއް ލައްވައިލިއެވެ.
"ނޫނޭ .. ރަނގަޅެއް ނޫން." ރާހާ ހީނގަތެވެ.
"ރާހާ ނުހީބަލަ...ދެން އޮތީ ރާހާގެ ބުރު......"މިލްހާ ބުނެލިއެވެ.
ރާހާ ވަގުތުން ސީދާވެލިގޮތުން މިލްހާ ހިނިގަނޑު ހިފަހައްޓަން މަސައްކަތްކުރިއެވެ.
އޭނަ ކުދިންނަށް އަރަބި ކިޔަވައިދިނުމުގެ ކްލާސްތައް ކޮންމެ ދުވަހެއްގެ ތާވަލުގެ ބަޔަކަށް ވިއެވެ.
މިލްހާ އެއްވެސް އިރެއްގައި އެކުދިންނަށް އަވަސްއަރުވާލައިގެން ކިޔަވައިދޭކަށް ނުއުޅެއެވެ. އަކުރެއް ކިޔަން އުނދަގޫވެއްޖެނަމަ ތަފާތު ވިސްނެންދެން އޭނާ އެ އަކުރެއް ތަކުރާރުކޮށްދެއެވެ. ކުއްޖެއްގެ ސަމާލުކަން ގެއްލިއްޖެނަމަ އަދަބު ނުދީ އަލުން ސަމާލުކަން ގެންނާނެ ގޮތެއް އޭނާ ހޯދައެވެ.
ކުދިން އަކުރުތައް ކިޔަން އުނދަގޫވެފައި ފަހުން މަޑުމަޑުން ރަނގަޅުވަމުންދާތަން ފެނުން މިލްހާ އުފާވިއެވެ. ފުރަތަމަ އަކުރަށް މިލްހާ އިޝާރާތްކޮށްލިއެވެ.
"އަލިފް."
"އަލިފް....." ކުދިން ތަކުރާރުކުރިއެވެ. "ޤުރްއާނުން ކިޔަވާ ކޮންމެ އަކުރަކަށް ލިބޭނެ މަތިވެރިކަމާއި ސަވާބު އެނގޭތަ؟"
ރާހާ ބޯ ހޫރައިލިއެވެ.
މިލްހާ ހިނިތުންވެލިއެވެ. "ރަސޫލާ ސައްލަﷲ އަލައިހި ވަސައްލަމް ޙަދީސްކުރައްވާފައިވާގޮތުގައި ﷲގެ ކަލާމްފުޅުން އަކުރެއް ކިޔަވާ މީހަކަށް އެއް ހެޔޮކަން ލިބޭ.. އަދި ކޮންމެ ހެޔޮކަމަކަށް ދިހަ ގުނަ އިތުރުކުރައްވާ....."
އެ ކުދިންގެ ޝައުގުވެރިކަން އިތުރުވިއެވެ.
"ކޮން އިރަކުން ސަވާބު ލިބޭނީ..."
"އެންމެ ބޮޑު ސަވާބަކީ ޖަންނަތު...ޕެރެޑައިސްއަށް ދާން ބޭނުންވާ ކުދިން ﷲގެ ކަލާމްފުޅު ކިޔަވަން ދަސްކުރާނެ..މާނަވެސް އެނގެންވާނެ...މިވަގުތަށް އެޓްލީސްޓް އަރަބިއަކުރު ކިޔަން ދަސްކުރީމަ ރަގަޅުވާނެ..."
ބާކީ ވަގުތުތައް ދިޔައީ އަރަބިބަސް ކިޔަވާދިނުމުގައެވެ.
***
މިލްހާ ގޭތެރޭގެ ކުދިކުދި ކަންކަމުގައި ޚާދިމާއިންނަށް އެހީތެރިވެދެއެވެ. އަދި ވީރާނާވެފައިވާ ބަގީޗާ އަލުން ދިރުވަން އޭނަ މަސައްކަތްފެށިއެވެ. ފުރަތަމަކޮޅު އެއްވެސް ކަމެއް ރަނގަޅަކަށް ނުވިއެވެ. މެންދުރު ކައިގެން އޭނަ މަސައްކަތަށް ބޭނުންވާ ސާމާނު ހިފައިގެން ނުކުތެވެ. ހިކިފައިވާ ބިންގަނޑެއް ކޮންނަން އޭނާ އެއް ގަޑިއިރު ހޭދަކުރިއެވެ. ފަހުން އެނގުނީ އޭނާ އެ އިންދަން އުޅުނީ ކުރިން އެތާ ހުރި ގަހެއްގެ މުލެއްގެ މަތީގައި ކަމެވެ. އޭނާ އެއްފަރާތުގައި ހުރި ފަތް ފުންޏެއްގެ މަތީގައި އިށީންގޮތަށް ބޯ ހޫރައިލިއެވެ. "މި ބަގީޗާ އަހަރެން ދެކެ ރުޅިއާދޭ........."
ރާހާ ހިޔަންޏެއްހެން ފަހަތުގައި ހުއްޓުނެވެ. "ތިބުނީ ހަމަ ރަގަޅަށް....."
ސާރާ ބޫޓަށް ކިލާ ނުވަންނާނެހެން ބަލައިގެން ހިނގަމުން އައެވެ.
"މިލްހާ ހީވަނީ ޗަކަ ތެރޭގައި ފެންވަރާފައި ހުރިހެން...އާންޓް ރުޅިއަންނާނެ މިލްހާ މިކަހަލަ މަސައްކަތް ކުރީމަ....."ސާރާ ބުނެލިއެވެ.
"މިލްހާ ކޮންކަހަލަ މަސައްކަތެއް ކުރީމަ އުފާވާނީ؟"
"ބިޒިނަސް....ސިފްރާން ހެން....." ރާހާ ވިސްނާލާފައި ބުނެލިއެވެ.
ސްވެޓަރަކާއިއެކު ދިގު ޖެކެޓެއްލައިގެން ހުއްޓަސް މިލްހާގެ އަތަށް ފިނިވާން ފެށިއެވެ. ސިފްރާންގެ ނަން އިވުމުން ވީ ގޮތެއްހެއްޔެވެ؟
"ސިފްރާންއަށް ދޮންބެ ނުކިޔަނީ ކީއްވެ؟"
ރާހާ ހިނިގަނޑެއް ޖަހައިލިއެވެ.
"މިލްހާ ހަނދާން ހުންނާނެ.....ކުރީ ދުވަހު ބުނީމެއްނު....."ރާހާގެ ޖުމްލަ މެދުކަނޑުވައިލީ ސާރާއެވެ.
"މިލްހާ...ވަރަށް ބަޑުހައިވެއްޖެ....ހިނގާ ޕިއްޒާ ކާން..." ސާރާ މިލްހާގެެ އަތުގައި ހިފާ ދަމަންފެށިއެވެ. ސާރާ އެ ވާހަކަ ކުރިއަށް ގެންދިޔަނުދޭން ބޭނުންވިކަން އޭނަ ދަނެގަތެވެ.
***
ދުވަސްތައް ފާއިތުވަމުން ދިޔައީ އާދައިގެ ގޮތަކަށެވެ. އަދިވެސް ކޮންމެވެސް ވަރަކަށް އެގެއިން އަދަޔާ ޚިލާފު އަޑުތައް އިވެއެވެ. ދަންވަރު ހޭލެވެނީ ތަނަކުން ދޮރެއް ކިރިލާ އަޑަށެވެ. މަޑުމަޑުން ކޮޓަރިތަކުގައި ޓަކިދޭ އަޑުތަކެވެ. ގުންފައި ޖަހާފައި މީހަކު ހިނގާ އަޑުވެސް އިވެއެވެ. މިފަދަ އާސާރީ ބޮޑު ގެތަކުން އާދަޔާޚިލާފު އަޑުއިވޭނެކަން ހަނދާންކޮށްދިނެވެ. ލަކުޑި ބޮޑުވެއެވެ. ހޮޅިތައް އަޑުލައްވައެވެ. ވައިގެ ސަބަބުން ކުޑަދޮރުތައް ހަރަކާތްކުރެއެވެ. ކޮންމެ ކަމަކަށްވެސް ސަބަބެއް ވާނެ ނޫންހެއްޔެވެ؟ ނަމަވެސް މިލްހާގެ ހިތުގައި ބިރުވެރިކަމާއި ނުތަނަވަސްކަން ކޮންމެވެސް ވަރަކަށް އުފެދުުނެވެ.
މިލްހާގެ ކޮޓަރިއާއި ދިމާ މަތިން ކޮންމެވެސް އެއްޗެއް ބިންމަތީގައި ދަމާފައިދާ ކަހަލަ އަޑެއް އިވުނެވެ. އޭނައަށް ބިރުން ނިދަންވެސް ނުކެރުނެވެ.
"ސުބުހާނަﷲ...އެއީ ކާކު؟ ނުރައްކާތެރި މީހެއް މިގޭގައި އުޅެނީތަ؟"އޭނަ ތެދުވެ އިށީނެވެ.
ﷲ އިރާދަކުރެއްވިއްޔާ ޒިކުރުގެ ސަބަބުން ނުރައްކަލެއްނުވާނެ...އެއީ ކޮން އަޑެއްތޯ ބަލައިލަންވާނެ...." އޭނަ މަޑު ފައިވާނަށް އަރައިގެން ގޮސް ދޮރު ހުޅުވައިލީ ނިކަން މަޑުންނެވެ. ސިފްރާން ކޮޓަރިއަކަށް ވަންނަތަން ފެނުނެވެ. ނިދާ ހެދުމުގައި ހުރިއިރު އިސްތަށިގަނޑު ކޮންމެވެސް ވަރަކަށް ހޭވިފައެވެ. ފަނޑު އަލިކަމުގެ ތެރެއިން ފާހަގަވީ އެވަރަށެވެ.
"ސިފްރާން..ސިފްރާން..ދެންމެ އިވުނީ މީހަކު....."އޭނަ ހުއްޓުން އެރީ ސިފްރާންގެ އަތުގައި ވިދާ އެއްޗެއް އޮތްތަން ފެނިފައެވެ. ވަޅިއެއް ހެއްޔެވެ؟ ސިފްރާންއަށް އޭނަގެ އަޑު ނީވުނީކަމެއް ނޫނީ އެނގުނުކަމަށް ނެހެދީއެވެ. ބަލާވެސް ނުލާ އެތެރެއަށް ވަނުމުން އޭނަވެސް ކޮޓަރީގެ ދޮރު ލައްޕައިލިއިރު ހިމޭންކަމުގެ ތެރެއިން ހިތުގެ ތެޅުން ބާރަށް އިވެއެވެ.
"ސިފްރާން ކީއްވެތަ؟ މިއީ ކޮންކަމެއް؟"
އޭނަ ވުޟޫކޮށްލައިގެން އައިސް ގުރުއާން ކިޔަވަން އިރުކޮޅަކު އިންއިރު އިތުރު އަޑެއް ނީވެއެވެ. ގެ ނިދީ ކަހަލައެވެ. އޭނަވެސް ރަޖާގަނޑު ތެރޭ ފޮރުވިގެން ނިދަން މަސައްކަތްކުރިއެވެ.
***
ސިފްރާންގެ މަސައްކަތް އިންތިހާއަށް ބުރަވުމުގެ ސަބަބުން ގެއަށް ވަންނާނެ ވަގުތެއްނުވެއެވެ. އެއް މަހެއްގެ ތެރޭގައި އައްސޭރިފަހުގެ ބިންތަކެއް ވިއްކަން ޖެހުނެވެ. އަދި މުސްތަގުބަލުގައި އެއިން ދެ ބިން ގަތުމަށްފަހު ތަރައްގީކުރުމާއި މެދު އޭނާގެ ކުންފުނިން ދިޔައީ ވިސްނަމުންނެވެ. ކުރަންޖެހޭ ސާވޭތަކާއި މިލްކުވެރިކަމުގެ ރެކޯޑްތައް ޗެކްކުރުމާއި މަޝްވަރާކުރުމާއި ރޭވުންތަކެވެ. ފައިލެއް ހުޅުވާ ކޮންމެ ފަހަރަކު ނަގަން ޖެހޭ ހުއްދަތަކާއި ސޮއިތައް އިތުރުވާފަދައެވެ. ސިފްރާން އޭނާގެ ގިނަ ވަގުތު ހޭދަކުރަމުންދިޔައީ ބައްދަލުވުންތަކުގައެވެ.
ހަވީރު ފަހުގެ ވަގުތެއްގައިވެސް އޭނާ ހުރީ އޮފީހުގައެވެ.
ކޮންފަރެންސް ރޫމުން ފައިލެއް ހިފައިގެން ނުކުތީ އައްސޭރިފަށުގެ ބިންތަކާ ބެހޭގޮތުން އައިޒެކްއާ ވާހަކަ ދައްކާ ނިންމާލުމަށްފަހުގައެވެ.
ސިފްރާން ކޮރިޑޯގެ ނިމޭ ހިސާބަށް ދިއުމުގެ ކުރިން މީހުން ވާހަކަ ދައްކާ އަޑު އޭނާއަށް އިވުނެވެ. ދެ މުވައްޒަފަކު ފުރަގަސްދީގެން ތިބިއިރު އެމީހުންނަށް އޭނާ ނުފެނެއެވެ.
"އަހަރެން މި ބުނީނު މިއަދު އައިޒެކްއަކަށް އޭނާ އެއްބަސްކުރުވުމަކީ ކުރެވޭނެކަމެއްނޫން..."
"އޭނާ ދުވަހަކުވެސް ފުރަތަމަ ފަހަރަކު އެއްބަހެއް ނުވާނެ......" އަނެއް މުވައްޒަފު ހީނގަތެވެ.
"އެއީ ސިފްރާން އެއްވެސް މީހަކަށް އިތުބާރުނުކުރާތީ."
"ކަންތައް ހިނގާފައިވާގޮތުން ކަލެއަށް އޭނަ ކުށްވެރިކުރެވޭނެތަ؟"
އަނެއް މީހާ ކަންބޮޑުވިއެވެ. "މިތާގައި ތި ވާހަކަ ނުދައްކާ"
"އެންމެންނަށް ކުރިންވެސް އެނގޭ ކަމެއް ނޫންތަ އަހަރެން މި ބުނަނީ."
ސިފްރާން ހުރީ އެންމެ މީޓަރެއްހާ ކައިރީގައިކަން ނޭނގި އެ ދެ މީހުން ވާހަކަދައްކަމުންދިޔައެވެ.
"އެ ޢާއިލާއިން އެކަން ހިނގި ގޮތް ސާފުކޮށް ބުނެދީފައި ނުވަނީ ކީއްވެކަން އަދިވެސް އަހަރެންނަށް ނުވިސްނޭ."
"ސިފްރާންގެ ޢާއިލާ ކަހަލަ ނުފޫޒުގަދަ މީހުންނަށް އަހަރެމެން ކަހަލަ މީހުންނަށް އެމީހުންގެ ކަންކަން ސާފުކޮށްދޭކަށް ބޭނުމެއް ނުވާނެ."
"އެ ގެއިން ތިން މީހުން މަރުވި....އެވެސް ޝައްކުކުރެވޭގޮތަކަށް......ގޭތެރެއިން އެކަމެއް ހިނގިހެން ހީވަނީ...ނޫންތަ؟." މުވައްޒަފު ކޮނޑު އަރުވައިލިއެވެ.
އަނެއް މީހާ އެއްޗެއް ނުބުނެ ހިމޭންވިއެވެ.
ސިފްރާންގެ މޫނުމަތީގެ ކުލަވަރު ބަދަލުވިއެވެ.
އަނެއް މުވައްޒަފު އަޑުމަޑުކޮށްލިއެވެ. "އަހަރެންގެ ބޭބެ ކުރިން މަސައްކަތްކުރީ އެމީހުންގެ ކޮންޓްރެކްޓަރެއްގެ ގާތުގައި. އޭނާ ބުނިގޮތުގައި ދުވަސްތަކެއް ވަންދެން ފުލުހުން ގޭ ކައިރީގައި އުޅުނު."
"މުއްސަނދި އާއިލާތަކަށް މައްސަލަތައް ޖެހުނީމަ ފުލުހުން އަބަދުވެސް ސަމާލުކަންދޭނެ."
ސިފްރާން ކުރިއަށް ފިޔަވަޅެއް އެޅިއެވެ. އޭނާގެ ބޫޓު ޕޮލިޝްކޮށްފައިވާ ބިންމަތީގައި ޖެހޭ އަޑު ބަރެވެ.
ދެ މީހުންވެސް އެނބުރުނެވެ. އެއާއެކު ދެކެވެމުންދިޔަ ވާހަކަ ވަގުތުން ހުއްޓުނެވެ. ކުޑަވަގުތުކޮޅަކަށް އެކަކުވެސް ހަރަކާތެއް ނުކުރިއެވެ.
ސިފްރާން ހުރީ އެއް އަތުން އަތްދަށުގައި އޮތް ފައިލުގައި ހިފަހައްޓާފައިވާއިރު އަނެއް އަތް ފަޓުލޫނުގެ ޖީބަށް ޖަހާލައިގެންނެވެ.
އޭނާގެ މޫނުމަތިން ރުޅިވެރިކަމުގެ ކުލަވަރެއް ނުފެނެއެވެ. ރުޅިއޔަސް އެކަމެއް މޫނުމަތިން ނުފެނެއެވެ. އަޑުގަދައެއްވެސް ނުކުރެއެވެ. ބުމަ ގާތްކޮށްފައެއްވެސް ނުވެއެވެ. އޭނާ ހަމައެކަނި ބަލަން ހުރީއެވެ.
"ނިމުނީ؟" ސިފްރާން ބުމަ އަރުވައިލިއެވެ.
އެކަކުވެސް ޖަވާބެއް ނުދިނެވެ.
ސިފްރާން އެމީހުންނާ ދިމާލަށް ހިނގައިގަތެވެ.
ފުރަތަމަ މީހާ ހިން ދިރުވައިލިއެވެ. "ސަރ, އަޅުގަނޑުމެން...."
"ކަލޭމެން ތިޔަ ވާހަކަދައްކަނީ އަހަރެންގެ ޢާއިލާއާ ބެހޭގޮތުން..." ސިފްރާން މަޑުމަޑުން ބުންޏެވެ.
"ސާރ, އެއީ..." އެ މީހާ ހުއްޓުނެވެ.
ސިފްރާން އެމީހުންގެ ކުރިމައްޗަށް ހުއްޓުނެވެ. "ކަން ހިނގިގޮތް އެނގެން ކަލޭމެންކުރެ މީހަކު އަހަރެންގެ ގެއަށް ވަނީތަ؟"
"ނޫން ސަރ."
"އަހަރެންގެ ޢާއިލާއަކީ ވާހަކަދައްކަން ރަނގަޅު މައުޟޫޢެއް ކަމަށް ކަލޭމެން ނިންމީ؟" ސިފްރާން ކުރިއަށް ހިނގައިގަތެވެ.
"ނޫން، ސަރ. އަޅުގަނޑުމެން ގަސްތުގައެއްނޫން...."
"ކަލޭމެންގެ ނިޔަތާއިމެދު އަހަރެންގެ ފަރުވާލެއްނެތް....." ސިފްރާންގެ އަޑު ހުރީ މަޑުމަޑުންނެވެ.
އެ ރޭ ސިފްރާން ގެއަށް އެނބުރި އައިއިރު އެ މައްސަލަ ވަނީ ހައްލުކޮށްފައެވެ. ދުވަސް ނިމުމުގެ ކުރިން އެ ދެ މުވައްޒަފުން ވަނީ ވަޒީފާއިން ވަކިކޮށްފައެވެ.
***
ހޯލްގެ މެދާ ހިސާބަށް ދެވުނުއިރު ސިފްރާންގެ ކަންފަތުގައި ޖެހުނީ އޭނާ ދެނެ ފަރިތަ އަޑެކެވެ.
މިލްހާގެ ތަފާތު އަޑެވެ. އޭނާ ގެ ފިޔަވަޅުތައް ހުއްޓުނެވެ.
އޭނާ ރާހާއަށާއި ސާރާއަށް ގުރްއާން ކިޔަވައިދެނީއެވެ.
އޭނާގެ އަޑު ސިޓިންގ ރޫމާއި ހަމަޔަަށް މަޑުމަޑުން އިވެމުންދިޔައެވެ.
"ނޫން، ރާހާ. މަޑުމަޑުން. އަވަސްއަރުވާލައިގެން އުޅެންނުވާނެ..."
ރާހާ އަނެއްކާވެސް ކިޔަން ފެށިއެވެ.
މިލްހާ އޯގާތެރިކަމާއެކު ރަނގަޅުކޮށްދިނުމަށްފަހު އަމިއްލައަށް އެ ބައި ކިޔައިދިނެވެ.
ސިފްރާން ހުރި ތަނުގައި ހުއްޓިލައިގެން އަޑުއަހަން ހުރީއެވެ. ގުރުއާންގެ އަޑު އިވުމުން ދުވަހުގެ ބުރަކަމާއި ވަރުބަލިކަން ފިލައިގެންދާހެން ހީވިއެވެ. އޮފީހުން އިވުނު އަޑުތައް ފަނޑުވިއެވެ. ތުހުމަތުތަކެވެ. ވާހަކަތަކެވެ. ކުރީގެ ސުވާލުތަކެވެ. އެ އެއްޗެހި މިލްހާގެ މަޑުމައިތިރި ކިޔެވުމުގެ ތެރެއަށް އޮބިގެންދިޔައެވެ. އެއީ އަޖައިބެއްފަދަ ހިތްހަމަޖެހުން ގެނުވި ކަމެކެވެ. ހީނުކުރާހާ ބޮޑަށެވެ. އޭނާ ބޭނުންވިވަރަށްވުރެ ގިނައިރު އެތާ ހުރެވުނެވެ. ދެން އޭނާގެ މޫނުމަައްޗަށް ހަރުކަށިކަމެއް ވެރިވިއެވެ.
މި ކުދިންކޮޅު މިލްހާދެކެ ލޯބިވެއެވެ. ޚާދިމާއިން އޭނާއަށް އާދަވެއްޖެއެވެ. ނާއިލާ އޭނާއާއި މިނިވަންކޮށް ވާހަކަދައްކައެވެ. އަހަރުތަކެއް ވަންދެން އަތްނުލާ ހުރި ތަންތަން ނަގަމުން ވީރާނާވެފައިވާ ބަގީޗާ ކޮންނަން އޭނާ ފަށައިފިއެވެ. ކުރިން ހިމޭންކޮށް އޮތް ކޮޓރިތަކުގައި އޭނާ ހުރެއެވެ. އޭނާ ސުވާލުކުރެއެވެ. އޭނާ އަމިއްލައަށް ހަމަޖެހިލައިގެންނެވެ. އަދި ކޮންމެވެސް ގޮތަކަށް އެއްވެސް މަސައްކަތަކާ ނުލައި އޭނާ އެގޭގެ މީހަކަށް ވެއްޖެއެވެ.
ސިފްރާން އެކަމާއި ރުޅިއާދެއެވެ. އެންމެން އެހާ އަވަހަށް އޭނާ ބަލައިގަތްކަމާ މެދު ކަންބޮޑުވެއެވެ. އެ ގެއަށް އޭނާ އެހާ ފަސޭހައިން ވަދެ ހަމަޖެހިލައިގެން އުޅޭތީ އޭނާ ހިތްހަމަނުޖެހެއެވެ.
ނަމަވެސް އެއަށްވުރެ ބޮޑަށް އޭނާގެ ހިތަށް އުނދަގޫކުރާ އެހެން ކަމެއްވެސް ވިއެވެ.
މިލްހާއަށް އޭނާ މި ވަނީ ކޮން ފަދަ ތަނަކަށް ކަމެއް ޚިޔާލެއް ނުކުރެވޭނެއެވެ. ފާރުތަކަށް ފެނުނީ ކޮންކަމެއްކަން އޭނާއަކަށް ނޭނގެއެވެ. މީހުން އެކަކު އަނެކަކަށް ކިޔަނީ ކޮން އެއްޗެއްކަން އެ ފަކީރަކަށް ނޭނގެއެވެ.
މިލްހާއަށް ނޭގުމަކީ އޭނާއަށް އެންމެ ބޮޑަށް އުނދަގޫކުރާ ކަންތައް ކަމަށްވެދާނެއެވެ. މިލްހާ ހީކުރަނީ މިއީ ހިމާޔަތް ލިބޭ އުފާވެރި މަންޒިލެއްކަމުގައެވެ. އޭނަ ހުންނަނީ އުފަލުންނެވެ. ބިރުގަންނަންޖެހޭ ސަބަބެއް ނެތެވެ.ހަގީގަތް އެނގިއްޖެއްޔާ ވާނީ ކިހިނެއްހެއްޔެވެ؟
ސިފްރާން ދުރަށް ހިނގައިގަތެވެ. އޭނާ މަޑުކޮށްގެން ހުރެ އަޑުއެހިކަން މިލްހާއަށް އެންގުމުގެ އެއްވެސް ޚިޔާލެއް އޭނާގެ ނެތެވެ.
ނުނިމޭ