ބޯކޮށް ވާރޭ ވެހޭނެ ކަމަށް ލަފާކޮށް، އައްޑޫއާއި ފުވައްމުލަށް ސިޓީއަށް އޮރެންޖު އެލާޓު ނެރެފިއެވެ.
މޫސުމާ ބެހޭ ގައުމީ އިދާރާއިން މި އެލާޓު ނެރެފައި ވަނީ، އެ ސަރަހައްދުތަކަށް ބޯކޮށް ވާރޭ ވެހި، ފެންބޮޑުވާނެ ކަމަށް ލަފާކޮށްފައެވެ.
މިއަދު 11:45އިން ފެށިގެން މި އެލާޓު ނެރެފައި ވަނީ، 13:00އާ ހަމައަށެވެ.
https://x.com/MetMaldives/status/2098299528906711359
މީގެއިތުރުން، ގަޑިއަކު 19 މޭލާއި 24 މޭލާ ދެމެދުގެ ބާރުމިނުގައި ވައިޖެހި ކަނޑުތައް ގަދަވާނެ ކަމަށް ލަފާކޮށް، ބ. އަތޮޅުން ފެށިގެން ތ. އަތޮޅާ ހަމައަށް މެޓުން ވަނީ ހުދު ސަމާލު ނެރެފައެވެ.
ދެކުނުގެ ދެ އަތޮޅަކަށް އޮރެންޖު އެލާޓު ނެރުނުއިރު، މި ހަފުތާ ބަންދުގައި ވިއްސާރަކުރާނެ ކަމަށް މެޓުން ވަނީ ލަފާކޮށްފައެވެ.
މިއަދު ވެސް ރާއްޖޭގެ އެކި ހިސާބުތަކަށް ވިއްސާރަކޮށް، ކަނޑުތައް ގަދަވާނެ ކަމަށް އެ އިދާރާއިން ވަނީ ބުނެފައެވެ.
އެހެންވެ، އެމްއެންޑީއެފުން ވަނީ ކަނޑުދަތުރުކުރާ ފަރާތްތަކުން މޫސުމަށް ސަމާލުވާން އިލްތިމާސްކޮށްފައެވެ.
އެގޮތުން، ކަނޑުތައް ގަދަވާނެ ކަމަށް ލަފާކޮށްފައިވާތީ، ލައިފް ޖެކެޓު އަޅައިގެން ކަނޑު ދަތުރު ކުރުމަށް އެމްއެންޑީއެފުން ވަނީ އަންގާފައެވެ.
މޫސުން ގޯސް ދުވަސްވަރަށް، ރައްކާތެރިކަމުގެ ފިޔަވަޅުތައް އެޅުމަށް އިދާރާތަކުން އަބަދުވެސް ހަނދާންކޮށްދެއެވެ.