ބޮލީވުޑްގެ މަޝްހޫރު ފިލްމު 'ދިލް ޗާހްތާ ހޭ' ނުކުތްތާ 25 އަހަރު ފުރުމާ ދިމާކޮށް، އެ ފިލްމުގެ ތަރި އާމިރު ޚާނާއެކު އަލުން ފިލްމެއްގައި މަސައްކަތްކުރަން ބޭނުންވާ ކަމަށް ބަތަލާ ޕްރިތީ ޒިންތާ ބުނެފިއެވެ.
އަށް އަހަރުގެ މެދުކެނޑުމަކަށް ފަހު ޕްރިތީ އެނބުރި އަންނަ ފިލްމު 'ބަޓްވާރާ 1947' ޕްރޮމޯޓްކުރުމުގެ މަސައްކަތުގައި އުޅެން ޖެހުމުން، ދިލް ޗާހްތާ ހޭގެ 25 ވަނަ އަހަރީ ދުވަސް ފާހަގަކުރުމުގެ ހަރަކާތްތަކުގައި އޭނާއަށް ބައިވެރިވެވިފައެއް ނުވެއެވެ.
މީޑިއާތަކާ ވާހަކަދައްކަމުން ޕްރިތީ ބުނި ގޮތުގައި، އޭނާ ބޭނުންވީ އެ ފިލްމުގެ ގިނަ ހަނދާންތަކެއް ހިއްސާކުރާށެވެ. ނަމަވެސް އާމިރު ޚާން ފިލްމުގެ އަހަރީ ދުވަހުގެ ހަރަކާތްތަކަށް ދިޔައިރު، އޭނާއަށް ޖެހުނީ އާ ފިލްމުގެ ޕްރޮމޯޝަނަށް ދާށެވެ.
އާމިރާއެކު އަލުން މަސައްކަތްކުރަން އުންމީދުކުރާކަން ފާހަގަކުރަމުން ޕްރިތީ ބުނީ، ދެން ކުޅޭ ފިލްމަކީ ވެސް ދިލް ޗާހްތާ ހޭ ފަދަ ހަނދާނުން ފޮހެލަން ދަތި ފިލްމަކަށް ވާނެ ކަމަށް އުންމީދުކުރާ ކަމަށެވެ.
"އޭނާއާއެކު އަލުން މަސައްކަތްކުރަން އަހަރެން ވަރަށް ބޮޑަށް އުންމީދުކުރަން. ދިލް ޗާހްތާ ހޭ އަކީ ހަގީގަތުގައި ވެސް ހަނދާނުން ފޮހެލަން ދަތި ފިލްމެއް. އަހަންނަށް ގަބޫލުކުރެވޭ ގޮތުގައި ބަޓްވާރާ 1947 އަކީ ވެސް އެފަދަ ފިލްމަކަށް ވާނެ،" ޕްރިތީ ބުންޏެވެ.
ފަރްހާން އަޚްތަރު ޑައިރެކްޓުކޮށް 2001 ވަނަ އަހަރު ނެރުނު 'ދިލް ޗާހްތާ ހޭ' ގައި އާމިރާއި ޕްރިތީގެ އިތުރުން ސައިފް އަލީ ޚާން، އަކްޝޭ ކަންނާ، ސޮނާލީ ކުލްކަރްނީ އަދި ޑިމްޕަލް ކަޕާޑިއާ މުހިންމު ރޯލުތަކެއް ކުޅެފައިވެއެވެ.
ޕްރިތީ އެންމެ ފަހުން ފެނިފައިވަނީ 2018 ވަނަ އަހަރު ނުކުތް ފިލްމު 'ބެއްޔާޖީ ސުޕަހިޓް' އިންނެވެ.