އެމެރިކާގައި ރަޖިސްޓަރީކޮށްފައިވާ 453 ބޯއިން 737 މެކްސް މަތިންދާބޯޓްތަކުގެ ގޮނޑިތައް ހަރުކޮށްފައިވާ ގޮތް ބަލައި ފާސްކުރުމަށް އެމެރިކާގެ ފެޑެރަލް އޭވިއޭޝަން އެޑްމިނިސްޓްރޭޝަން (އެފްއޭއޭ) އިން އަންގައިފިއެވެ.
އެފްއޭއޭއިން ބުނި ގޮތުގައި، މި އަމުރު ނެރުނީ ބައެއް ބޯޓުތަކުގެ ގޮނޑިތައް ރަނގަޅަށް ހަރުކޮށްފައި ނުހުރެދާނެ ކަމުގެ މައްސަލަތަކެއް ފާހަގަކުރެވިގެންނެވެ. ގޮނޑިތައް ރަނގަޅަށް ހަރުކޮށްފައި ނުވާ ނަމަ، ކުއްލި ހާލަތެއްގައި ބޯޓު ޖައްސާއިރު ގޮނޑިތައް ނެއްޓި، ފަސިންޖަރުންނާއި ފަޅުވެރިންނަށް އަނިޔާވުމުގެ ނުރައްކާ އޮންނާނެ ކަމަށް އެ އިދާރާއިން ފާހަގަކުރިއެވެ. އަދި އޭގެ ސަބަބުން ބޯޓުން މީހުން ހުސްކުރުމަށް ހުރަސްއެޅިދާނެ ކަމަށް ވެސް ބުނެފައިވެއެވެ.
މި އަމުރު ހިނގާނީ ހަމައެކަނި އެމެރިކާގައި ރަޖިސްޓަރީކޮށްފައިވާ ބޯޓުތަކަށެވެ. ނަމަވެސް، އެހެން ގައުމުތަކުގެ އޭވިއޭޝަން އިދާރާތަކުން ވެސް އާންމު ގޮތެއްގައި އެފްއޭއޭގެ ނިންމުންތަކަށް އަމަލުކުރެއެވެ.
މިކަމާ ގުޅިގެން ބޯއިން ކުންފުނީގެ ތަރުޖަމާނަކު ރޮއިޓާސްއަށް ވިދާޅުވި ގޮތުގައި، މި މައްސަލައާ ގުޅޭ އިރުޝާދުތައް 2025 ވަނަ އަހަރުގެ ޑިސެންބަރު މަހު އެ ކުންފުނިން ވާނީ އޮޕަރޭޓަރުންނަށް ދީފައެވެ. އަދި އެފްއޭއޭގެ ނިންމުމަށް އެ ކުންފުނިން ތާއީދުކުރާ ކަމަށް ވެސް އޭނާ ވިދާޅުވިއެވެ.
ބޯއިންގެ މަތިންދާބޯޓުތަކުގެ ސަލާމަތީ މިންގަނޑުތަކާ މެދު ކަންބޮޑުވުން އުފެދިފައިވަނީ، 2024 ވަނަ އަހަރުގެ ޖެނުއަރީ މަހު އަލަސްކާ އެއާލައިންސްގެ ބޯއިން 737 މެކްސް ނުވައެއް މަރުކާގެ ބޯޓެއްގެ ދޮރެއް ނެއްޓުނު ހާދިސާއާ ގުޅިގެންނެވެ. އެ ހާދިސާއަށް ފަހު އެފްއޭއޭއިން ވަނީ 171 ބޯޓެއްގެ ދަތުރުތައް ވަގުތީ ގޮތުން މެދުކަނޑާލާފައެވެ. އޭގެ ފަހުން އެމެރިކާގެ ނޭޝަނަލް ޓްރާންސްޕޯޓޭޝަން ސޭފްޓީ ބޯޑުން 2025 ވަނަ އަހަރުގެ ޖޫން މަހު ނެރުނު ރިޕޯޓެއްގައި ބުނެފައިވަނީ، އެ ހާދިސާ ހިނގަން މެދުވެރިވީ ބޯއިންއިން އެކަށީގެންވާ ތަމްރީނާއި އިރުޝާދު ދީފައި ނުވުމުން ކަމަށެވެ.
އޭވިއޭޝަން ދާއިރާގެ މައުލޫމާތު އެއްކުރާ ކުންފުންޏެއް ކަމަށްވާ އައިބީއޭގެ ތަފާސްހިސާބުތައް ދައްކާ ގޮތުން، ދުނިޔޭގެ އެކި ކަންކޮޅުތަކުގައި 2،300 އެއްހާ ބޯއިން 737 މެކްސް ބޯޓު އޮޕަރޭޓުކުރަމުންދާއިރު، އޭގެ ތެރެއިން 823 ބޯޓު ބޭނުންކުރަނީ އެމެރިކާގައެވެ.