ނޭޝަނަލް އެލިޖިބިލިޓީ ކަމް އެންޓްރަންސް ޓެސްޓް (ނީޓް) އިމްތިހާނުގެ ކަރުދާސްތައް ލީކުވި މައްސަލައިގައި އިންޑިއާގައި ދަރިވަރުން ކުރަމުން އަންނަ އިހުތިޖާޖުތަކާ ގުޅިގެން އެ ޤައުމުގެ ބޮޑު ވަޒީރު ނަރެންދްރަ މޯދީ ދާދިފަހުން ދެއްވި މެސެޖަށް އިންޑިއާގެ ބަތަލާ ދިޔާ މިރުޒާ ވަރަށް ބޮޑަށް ފާޑުކިޔައިފިއެވެ.
ދިޔާ ބުނި ގޮތުގައި ބޮޑުވަޒީރުގެ ވާހަކަފުޅުތައް އައީ މާ ލަހުން ކަމަށާއި، އެ ވާހަކަފުޅުތަކުގައި މި މައްސަލައިގެ ސަބަބުން އަސަރުކޮށްފައިވާ ދަރިވަރުންނާއި އާއިލާތަކުގެ ކަންބޮޑުވުންތަކަށް ހައްލެއް ލިބިފައި ނުވާ ކަމަށެވެ.
ބޮޑުވަޒީރު މޯދީ މިދިޔަ ބުރާސްފަތި ދުވަހުގެ ހެނދުނު އެކްސް މެދުވެރިކޮށް އިއުލާނު ކުރެއްވި ގޮތުގައި، ކަރުދާސް ލީކުކުރުމުގައި ބައިވެރިވި ފަރާތްތަކަށް އަވަސް އަދި ހަރުކަށި އަދަބު ދިނުމަށްޓަކައި, އަވަހަށް މައްސަލަތައް ބަލާނެ ފާސްޓް ޓްރެކް ކޯޓުތަކެއް އުފައްދާނެއެވެ. އަދި އެރޭގެ ވަގުތެއްގައި އެމަނިކުފާނު ވަނީ މުޒާހަރާކުރާ ދަރިވަރުންނަށް ޔަގީންކަން ދެއްވައި ވީޑިއޯ މެސެޖެއްވެސް އާންމުކުރައްވާފައެވެ.
'ނީޓް' އިމްތިހާނުގެ ކަރުދާސްތައް ލީކުވި މައްސަލައިގައި އިންޑިއާގައި ދަރިވަރުން އިހުތިޖާޖުކުރަނީ--ފޮޓޯ/އިންޑިއަންއެކްސްޕްރެސް
"ދަރިން ގެއްލިފައިވާ މައިންބަފައިންނަށް ނުވަތަ މަރުވި ކުދިންނަށް، ނުވަތަ އަމިއްލަ ހައްގުތަކަށް ވަކާލާތުކުރާ ދަރިވަރުންގެ ހިތްވަރަށް، އަދި ހަފުތާތަކެއް ވަންދެން ބަނޑުހައިހޫނުކަމުގެ ހަޅުތާލުގައި ތިބި ސޯނަމް ޖީ އާއި ދަރިވަރުންނަށް ހަމްދަރުދީގެ އެންމެ ބަހެއްވެސް ވިދާޅެއް ނުވި" ދިޔާ މިރުޒާ އިންސްޓަގްރާމްގައި ހިއްސާކުރި ލިޔުމެއްގައި ބޮޑުވަޒީރުގެ ވާހަކަފުޅުތަކާ މެދު މާޔޫސްކަން ފާޅުކުރަމުން ލިޔެފައިވެއެވެ.
"މަނިކުފާނަށް މިއީ ކިހާ އުނދަގޫ ކަމެއްތޯއެވެ؟ އެއްޗެއް ވިދާޅުވާން 47 ދުވަސް ނެގި. އަދި މިހާރު ތިޔަ ވިދާޅުވި އެއްޗަކުން ލިބުނު ހިތްހަމަޖެހުމެއް ނެތް. ބިއްލޫރިކޮޅެއް ފަދައިން ކުދިކުދިވެފައިވާ މިލިއަނުން ދަރިވަރުންގެ ހިތްތަކަށް ތިޔަ ވާހަކަފުޅުން ލިބޭނެ އެއްވެސް ޝިފާއެއް ނެތް."
މީގެ ކުރިންވެސް ދިޔާ މިރުޒާ ވަނީ މުޒާހަރާކުރާ ދަރިވަރުންނަށް ތާއީދުކޮށް ސޯޝަލް މީޑިއާގައި ޕޯސްޓެއް ކޮށްފައެވެ. އޭނާ ބުނެފައިވަނީ އޭނާ ހުރީ މި ގައުމުގެ ދަރިވަރުންނާ އެކުގައި ކަމަށާއި، އަމާންކަމާ އެކު މުޒާހަރާކުރުމުގެ ހައްގަށް ތާއީދުކުރާ ކަމަށެވެ. އަދި ތައުލީމީ ނިޒާމުގެ ދެފުށް ފެންނަ ގޮތަށް ކަންކަން ކުރުމަށާއި، ޒިންމާދާރުވުމަށާއި، އިސްލާހީ ބަދަލުތަކަށް އޭނާ ގޮވާލާފައިވެއެވެ.
ތަޖުރިބާކާރު އެކްޓަރު އަމޯލް ޕަލޭކަރް 'މިޑް-ޑޭ' ނޫހުގައި ޝާއިއުކުރި ހުޅުވާލެވިފައިވާ ސިޓީއެއްގައި ބުނެފައިވަނީ، މުޖުތަމައެއް އަމިއްލަ ނަފުސާ ސުވާލުކުރަން ދަސްކުރަނީ ޔުނިވާސިޓީތަކުން ކަމަށެވެ. މުސްތަގުބަލުގެ ބާރުތައް އަތުގައި އޮތް ފަރާތްތަކާ ސުވާލު ކުރުމަކީ ހޯދަން އުޅޭ އިމްތިޔާޒެއް ނޫން ކަމަށާއި، އެއީ އަދާކުރަންޖެހޭ ޑިމޮކްރެޓިކް ޒިންމާއެއް ކަމަށް އޭނާ ލިޔެފައިވެއެވެ.
އިންޑިއާގައި މެޑިކަލް އިމްތިހާނުގެ ޕޭޕަރުތައް ލީކުވި މައްސަލައާ ގުޅިގެން ކިޔަވާ ކުދިން ކުރަމުންދާ މުޒާހަރާތަކަށް ބޮލީވުޑްގެ އެންމެ ނުފޫޒުގަދަ ތަރިންގެ ތާއީދު ލިބެން ފަށާފައިވާއިރު ގިނަ ތަރިން އެކަމަށް ތާއީދުކޮށް ވާހަކަދައްކަން ފެށީ މާ ލަހުން ކަމަށްބުނެ ވަރަށް ގިނަ ބަޔަކު ވަނީ ފިލްމު އިންޑަސްޓްރީގެ ތަރިންނަށް ފާޑުކިޔާފައެވެ.