އެމެރިކާގެ އަސްކަރިއްޔާގައި މަސައްކަތް ކުރަނިކޮށް ލިބުނު އަނިޔާއެއްގެ ސަބަބުން ލޮލުގެ ފެނުން ގެއްލިފައިވާ އެއް ލައްކައަށް ވުރެ ގިނަ މީހުންނަށް މެޓާއިން އޭއައި ސްމާޓް އައިނު ދިނުމަށް ނިންމައިފިއެވެ.
މިއީ މެޓާގެ ތާރީޚުގައިވެސް އެއްފަހަރާ އެންމެ ގިނަ އަދަދެއްގެ ޑިވައިސް ހަދިޔާކުރުމަށް ކުރިއަށްގެންދާ، އެންމެ ބޮޑު ޕްރޮގްރާމެވެ.
އެމެރިކާގެ އަސްކަރިއްޔާގައި ޚިދުމަތްކޮށްފައިވާ މީހުންނަށް ޚާއްސަ، ޑިޕާޓްމަންޓް އޮފް ވެޓެރަންސް އެފެއާޒް (ވީއޭ) އިން ލަފާކުރާ ގޮތުގައި މި ޕްރޮގްރާމްގެ ދަށުން ގާތްގަނޑަކަށް 130,000 ވެޓެރަނުންނަށް މި އެހީ ލިބޭނެއެވެ. މި އައިނުތައް ބެހުމުގެ މަސައްކަތް މި އަހަރުގެ ހޫނު މޫސުމުގައި ބްލައިންޑެޑް ވެޓެރަންސް އެސޯސިއޭޝަން (ބީވީއޭ) އާއި ވީއޭ ބްލައިންޑް ރީހެބިލިޓޭޝަން ސެންޓަރުތަކުގެ އިތުރުން އެހެނިހެން ޕާޓްނަރު ޖަމިއްޔާތައް މެދުވެރިކޮށް ކުރިއަށްދާނެއެވެ.
މި ޑިވައިސްތަކަށް އެއްވެސް އަގެއް ނުނަގަން ނިންމައިފައިވާއިރު، މައިގަނޑު އޭއައި ޚިދުމަތްތަކަށް ސަބްސްކްރިޕްޝަން ފީއެއްވެސް ނުނަގާނެއެވެ.
އާދައިގެ އަވި އައިނެއްގެ ސިފަ ހުންނަ މި ފްރޭމްތަކުގައި ކެމެރާއާއި އަޑުން ކޮންޓްރޯލްކުރެވޭ އޭއައި ހަރުކޮށްފައިވެއެވެ. "ހޭ މެޓާ" އޭ ބުނުމުން، އައިނުގައިވާ ކެމެރާ މެދުވެރިކޮށް ކުރިމަތީގައިވާ އެއްޗެއް ކިޔައި، ކަންފަތް ކައިރީގައިވާ ސްޕީކަރުން އަޑުއިވޭގޮތަށް ކިޔައިދޭނެއެވެ.
އާދައިގެ އަވި އައިނެއްގެ ސިފަ ހުންނަ މި ފްރޭމްތަކުގައި ކެމެރާއާއި އަޑުން ކޮންޓްރޯލްކުރެވޭ އޭއައި ހުންނާނެ ---
ގޭގައި ނުވަތަ މަގުމަތީގައި އުޅޭ އިރު، ސިޓީ، މެނޫ އަދި ބޭހުގެ ބޭރުގައި ލިޔެފައި ހުންނަ އިރުޝާދުތަކާއި މަގުމަތީގެ ނިޝާންތައް ފަދަ ތަކެތި ކިޔުމަށް ވެސް މި އައިނު ބޭނުންކުރެވޭނެއެވެ. އޭއައި އަށް ނުވަތަ ކަމެއް ނޭނގޭ ހާލަތްތަކުގައި "ބީ މައި އައިސް" ނަމަކަށް ކިޔާ ވޮލަންޓިއަރުންގެ ނެޓްވޯކް މެދުވެރިކޮށް މީހެއްގެ އެހީތެރިކަން ހޯދޭނެއެވެ.
މީގެ އިތުރުން އެހެން މީހަކު ދައްކާ ވާހަކަ ތަރުޖަމާކޮށްދިނުން، އަންނައުނުގެ ކުލަ ބުނެދިނުން، ކުރިން ދެކެފައިވާ މޫނުތައް ހަނދާންކޮށްދިނުން އަދި ވަކި ލޭންޑްމާކަކަށް ފިޔަވަޅު ގުނައިދިނުން ފަދަ ގިނަ ކަންތައްތަކެއްވެސް މި ގްލާސްތަކުން ކޮށްދެއެވެ.
މި ޕްރޮގްރާމަށް ޝަރުތު ހަމަވާ ފަރާތްތަކުން ބީއޭވީގެ ވެބްސައިޓް މެދުވެރިކޮށް އައިނު ހޯދަން ހުށަހެޅޭނެއެވެ. އަދި އަންނަ ހޯމަ ދުވަހު އޮންނަ އޭސީބީ ކޮންވެންޝަންގައި އައިނު ބެހުމުގެ އިތުރުން، "ޓެކްސޫޕް" މެދުވެރިކޮށް ޖަމިއްޔާތަކުން އައިނުތައް ގިނަ އަދަދަކަށް ހޯދުމުގެ ފުރުޞަތު އޮންނާނެއެވެ. މި ޕްރޮގްރާމުގެ ދަށުން އައިނަށް އެދޭއިރު، އަސްކަރިއްޔާގައި ޚިދުމަތް ކުރުމުގެ ހެއްކާއި ޤާނޫނީ ގޮތުން ލޯފަންކަމުގެ އިގުރާރު ހުށަހަޅަން ޖެހޭނެއެވެ. އަދި އެ މީހެއްގެ އަތުގައި ސްމާޓްފޯނެއް އޮތުމަކީ ވެސް ޝަރުތެކެވެ.
ހަނގުރާމައިގެ މައިދާނުގައި އަނިޔާ ލިބިފައިވާ އެމެރިކާގެ ބައެއް ސިފައިން މި އައިނަށް ތައުރީފުކޮށްފައިވެއެވެ. އެގޮތުން އެމެރިކާގެ ހަނގުރާމައެއްގެ ތެރޭގައި ގޮވާތަކެތި ހުރި ބަންކަރެއްގައި ހިނގި ގޮވުމެއްގައި ލޮލުގެ ފެނުން ގެއްލުނު ކުރީގެ ސިފައިންގެ މީހަކު ވަނީ، މި އައިނު އަޅައިލި ވަގުތު މިއީ އިންގިލާބީ ކަމެއްކަން ވަގުތުން ވަޒަންކުރެވުނު ކަމަށް ބުނެފައެވެ.
މެޓާގެ ސީއީއޯ މާކް ޒަކަބާގް ވިދާޅުވެފައިވަނީ އެމެރިކާގެ ލޯފަން ވެޓެރަނުންނަށް މީގެ އައިނެއް ހަދިޔާކުރުމަކީ އެ ކުންފުންޏަށް ލިބޭ ބޮޑު އުފަލެއް ކަމަށެވެ.