ކުލަބް މޯލްޑިވްސް އެއިޓީން ތާޓީ 2026 ގެ ފައިނަލް މެޗުގައި، މުބާރާތުގެ އެންމެ ކާމިޔާބު އެއް ޓީމު ކަމަށްވާ ދިވެހި ސިފައިންގެ ކުލަބު (ޑީއެސްސީ) ބަލިކޮށް، ކުލަބު ވެމްކޯއިން ފުރަތަމަ ފަހަރަށް މުބާރާތުގެ ޗެމްޕިއަންކަން ހޯދައިފިއެވެ.
ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން އެންޑޯސްކޮށްގެން، އަންހެން ކުޅުންތެރިންގެ ހުނަރު އިތުރުކުރުމުގެ މަގުސަދުގައި ކުރިއަށްގެންދިޔަ މިއަހަރުގެ މުބާރާތުގައި ވެމްކޯއާއި ސިފައިންގެ ކުލަބުގެ އިތުރުން ދެން ވާދަކުރީ ބިސް ބުރު ސްޕޯޓްސް ކުލަބެވެ.
ސަރުކާރުގެ މުއައްސަސާތަކާއި ކުންފުނިތަކަށް ހުޅުވާލައިގެން ބާއްވާ ރާއްޖޭގެ އެންމެ ޝަރަފުވެރި މުބާރާތުގެ އެއިޓީން ތާޓީގެ ޗެމްޕިއަންކަން ވެމްކޯއިން ހޯދީ ހުޅުމާލެ ރެހެންދި ފުޓްސަލް ދަނޑުގައި ބުރާސްފަތި ދުވަހުގެ ރޭ ކުޅުނު ފޯރިގަދަ ފައިނަލް މެޗު ކާމިޔާބުކޮށްގެންނެވެ.
ކުރިން މި މުބާރާތް ހަތަރު ފަހަރު ކާމިޔާބުކޮށްފައިވާ ސިފައިންގެ ކުލަބު އަތުން ވެމްކޯއިން ތަށި އުފުލާލީ 3-1 ގެ ނަތީޖާއަކުން ފަހަތުން އަރައި މެޗު ކާމިޔާބުކޮށްގެންނެވެ.
މެޗު ފަށައިގެން އެންމެ ފުރަތަމަ ލަނޑު ޖަހައި ސިފައިންގެ ކުލަބަށް ލީޑު ނަގައިދިނީ އެ ޓީމުގެ ބަންގްލަދޭޝް ކުޅުންތެރިޔާ ސުމައްޔާ މަތުސުޝިމާއެވެ. ނަމަވެސް، ލިބުނު އަނިޔާއަކާ ގުޅިގެން ސުމައްޔާއަށް މެޗުގެ ބޮޑު ބައެއް ގެއްލުމާއެކު، ވެމްކޯއިން ވަނީ ކުޅުން ވަރުގަދަކޮށް މެޗުގެ ކޮންޓްރޯލް އަތުލާފައެވެ.
އެއާއެކު އާމިނަތު ފަޒްލާ ޖެހި ލަނޑުން ވެމްކޯއިން ނަތީޖާ އެއްވަރުކުރިއިރު، ފުރަތަމަ ހާފު ނިމުމުގެ ކުރިން މާޔާ ކަސިއާ ބަލްޑާސޯ ވަނީ ލަނޑެއް ޖަހައި ވެމްކޯއަށް ފުރަތަމަ ފަހަރަށް ލީޑު ނަގައިދީފައެވެ. މެޗުގެ ދެވަނަ ހާފުގައި ވެމްކޯގެ ތާރީޚީ ކާމިޔާބީ ކަށަވަރުކޮށްދިން ލަނޑު ޖަހައިދިނީ ފުރަތަމަ ލަނޑުވެސް ކާމިޔާބުކޮށްދިން ފަޒްލާއެވެ.
މުބާރާތުގެ ނިންމުމުގެ ރަސްމިއްޔާތުގައި ވަކިވަކި ކުޅުންތެރިންނާއި ޓީމުތަކަށް ވަނީ ހާއްސަ އެވޯޑުތަކެއް އަރުވާފައެވެ.
މުޅި މުބާރާތުގައި އެންމެ ގިނަ ލަނޑު ޖެހި ކުޅުންތެރިޔާގެ މަގާމު 11 ލަނޑާއެކު ސިފައިންގެ ކުލަބުގެ ސުމައްޔާ ހޯދިއިރު، ފެއާޕްލޭ ކުޅުންތެރިޔާއަކަށް ހޮވުނީ ސިފައިންގެ ކުލަބުގެ މައީޝާ އަބުދުލް ހަންނާންއެވެ. އަދި ފެއާޕްލޭ ޓީމުގެ މަގާމު ބިސް ބުރު ސްޕޯޓްސް ކުލަބު ހޯދިއިރު، މުބާރާތުގެ އެންމެ މޮޅު ކޯޗުގެ މަގާމު ހޯދީ ޗެމްޕިއަން ވެމްކޯގެ ކޯޗު އަލީ ނަދީމެވެ.
މުބާރާތުގެ އެންމެ މޮޅު ފަސް ކުޅުންތެރިންގެ ތެރޭގައި ސިފައިންގެ ކުލަބުގެ ސުމައްޔާ އަދި ސަބީނާ ކަތުންގެ އިތުރުން ވެމްކޯގެ ފާތިމަތު ސައުސަން، އަޝްލޭ ލަރިއްސާ އޮލިވެއިރާ ޑަ ސިލްވާ އަދި މަރިޔަމް ނޫރާ ވަނީ ހިމެނިފައެވެ.
މީގެ ތެރެއިން މުޅި މުބާރާތުގެ އެންމެ މޮޅު ކުޅުންތެރިޔާ ނުވަތަ "ކުއީން އޮފް ދަ ޓޯނަމަންޓް" ގެ މަގާމު ހޯދައި، ވެމްކޯއަށް ތަށި ހޯދައިދިނުމުގައި އެންމެ އިސްދައުރެއް އަދާކުރީ އެ ޓީމުގެ އަޝްލޭއެވެ.