ދުނިޔޭގެ އެންމެ މަގުބޫލު އެއް މެސެޖިން އެޕްލިކޭޝަން ކަމަށްވާ ވަޓްސްއެޕްއިން، އެ އެޕް ބޭނުންކުރާ މީހުންގެ ފޯނުގައި ސޭވްކޮށްފައި ތިބޭ ކޮންޓެކްޓްތަކުގެ އުފަންދުވަސްތައް ހަނދާންކޮށްދޭ އައު ފީޗާއެއް ތައާރަފުކުރުމުގެ މަސައްކަތް ފަށައިފިއެވެ.
ވަޓްސްއެޕްގެ ޚަބަރުތައް ގެނެސްދޭ "ވާބީޓާއިންފޯ" އިން ހާމަކޮށްފައިވާ ގޮތުގައި، އެންޑްރޮއިޑް ބީޓާ ވާޝަންއިން ފެނިފައިވާ މި ފީޗާގެ ސަބަބުން ކޮންޓެކްޓެއްގެ އުފަންދުވަސް އައުމުން އެޕްލިކޭޝަންގެ ތެރެއިން ނޮޓިފިކޭޝަނެއް ލިބިގެންދާނެއެވެ. މީގެ އިތުރުން، ކުރިއަށް ހުރި އުފަންދުވަސްތައް އެއްތަނަކުން ބަލައިލެވޭނެ ޚާއްސަ ސެކްޝަނެއް ވެސް އެޕްގައި ހިމެނުމަށް ވަނީ ރޭވިފައެވެ.
މި ފީޗާ ފުރިހަމައަށް މަސައްކަތް ކުރާނީ އެޕްލިކޭޝަން ބޭނުންކުރާ މީހުން އެމީހުންގެ އުފަންދުވަސް ވަޓްސްއެޕްއާ ހިއްސާކޮށްފައިވާ ނަމައެވެ. ރިޕޯޓްތައް ބުނާ ގޮތުގައި ވަޓްސްއެޕްއިން މި ފީޗާގައި ބޭނުން ކުރާނީ، ބައެއް ގައުމުތަކުގެ ގާނޫނީ މާއްދާތަކަށް ފެތުމުގެ ގޮތުން ކުޑަކުދިން ބެލުމަށާއި އުމުރު ކަށަވަރުކުރުމަށް މީގެ ކުރިން އެއްކޮށްފައިވާ އުފަންދުވަހުގެ މައުލޫމާތުތަކެވެ. ޚާއްސަކޮށް އެމެރިކާގެ ބައެއް ސްޓޭޓްތަކުގައި އުމުރު ކަށަވަރުކުރުމުގެ މި ގަވާއިދު ހިނގި ނަމަވެސް، އެހެން ގައުމުތަކުގައި މި މައުލޫމާތު އޮޓޮމެޓިކުން ނުލިބޭނެތީ، ގިނަ ބަޔަކު އަމިއްލައަށް އުފަންދުވަސް ހިއްސާކުރަން ޖެހޭނެއެވެ.
އާންމުކޮށް މިފަދަ ފީޗާތައް ތައާރަފުކުރާއިރު ސިއްރު ހިފެހެއްޓުމުގެ ނުވަތަ ޕްރައިވެސީ ސެޓިންސްތަކެއް ހުއްޓަސް، މިހާރު ޓެސްޓުކުރަމުންދާ ބީޓާ ވާޝަންގައި އަމިއްލަ އުފަންދުވަސް އެހެން މީހުންނަށް ފޮރުވޭނެ އެއްވެސް ގާޑްރެއިލެއް ނުވަތަ ސެޓިންއެއް އަދި ހިމަނާފައެއް ނުވެއެވެ.
ވަޓްސްއެޕްއިން މި ފީޗާ ރަސްމީކޮށް އާންމުންނަށް ދޫކޮށްލާނެ ވަކި ތާރީޚެއް އަދި އިޢުލާނެއް ނުކުރެއެވެ.
ވަޓްސްއެޕްއިން އުފަންދުވަސް ހަނދާންކޮށްދޭ ފީޗާއެއް އުފެއްދުމުގެ މަސައްކަތް ފަށާފައި މިވަނީ، މެޓާގެ ދަށުން ހިންގާ އެހެން މީޑިއާތައް ކަމަށްވާ ފޭސްބުކް އަދި އިންސްޓަގްރާމްގައި މިފަދަ ފީޗާތައް ކުރިއްސުރެ ބޭނުންކުރަމުން އަންނަ ދަނޑިވަޅެއްގައެވެ.
ވަޓްސްއެޕްއަކީ އާންމުކޮށް ފޯނު ނަންބަރު އެކަނި ބޭނުންކޮށްގެން، ޕްރައިވެސީއަށް އިސްކަންދީގެން ހިންގާ އެޕްލިކޭޝަނަކަށް ވުމުން، މީގެ ކުރިން މިއީ ޔޫޒަރުންގެ އަމިއްލަ މައުލޫމާތުތައް މިފަދަ ގޮތްގޮތަށް އެއްކުރި އެޕެއް ނޫނެވެ. ނަމަވެސް، ފަހަކަށް އައިސް ވަޓްސްއެޕްއިން ދަނީ ސޯޝަލް މީޑިއާ އެޕްތަކުން ފެންނަ ފަދަ "ސްޓޭޓަސް" އަދި "ޗެނަލް" ފަދަ ގިނަ ފީޗާތަކެއް ތައާރަފުކޮށް، މީހުން ގުޅުވައިދޭ މައިގަނޑު މަންސައަކަށް އެޕްލިކޭޝަން ބަދަލުކުރުމަށް ގިނަ މަސައްކަތްތަކެއް ކުރަމުންނެވެ.