ޕެޑު ތެރޭގައި ފޮރުވައިގެން ރާއްޖެއަށް މަސްތުވާތަކެތި އެތެރެކުރުމުގެ ތުހުމަތުގައި ހައްޔަރުކޮށްފައިވާ ދިވެހި އަންހެން މީހާ ބަންދުން ދޫކޮށްދިނުމަށް ކޯޓުގައި އޭނާގެ ފަރާތުން އެދިއްޖެއެވެ.
ކުރިމަތި ފަރާތުގައި ފޮރުވައިގެން ރާއްޖެއަށް މަސްތުވާތާކެތި އެތެރެކުރިކަމުގެ ތުހުމަތުގައި ހައްޔަރުކޮށްފައިވަނީ، މާލެއަށް ނިސްބަތްވާ 32 އަހަރުގެ އަންހެނެކެވެ. އޭނާ މިދިޔަ މެއި މަހުން ފެށިގެން ހުރީ ހައްޔަރުކޮށްފައެވެ.
އޭނާގެ ބަންދު މުއްދަތު އިތުރު ކުރުމަށް ކޯޓަށް ހާޒިރު ކުރުމުން އޭނާގެ ބަންދަށް ލުއެއް ދީ، ޝަރުތުތަކަކާއެކު ދޫކޮށްލުމަށް އޭނާގެ ފަރާތުން މިއަދު ކޯޓުގައި އެދުނެވެ. އެހެންނަމަވެސް ދައުލަތުން އެކަމަށް އިންކާރު ކުރިއެވެ. މިއަދުވަނީ އޭނާގެ ބަންދަށް އަނެއްކާވެސް އިތުރު 15 ދުވަސް ޖަހައިފައެވެ.
އޭނާގެ ބަންދު އަމުރުން އެނގޭ ގޮތުގައި އޭނާގެ ކުރިމަތިފަރާތުގައި އެއްޗެއް ފޮރުވައިގެން އުޅޭ ކަމަށް އެކްސްރޭއިން ދައްކާތީ، އެއީ ކޯޗެއްތޯ ސުވާލުކުރުމުން އެއީ ކޮކެއިން ކަމަށް އޭނާ ވަނީ އެއްބަސްވެފައެވެ. އަދި، އޭގެ އިތުރުން އޭނާގެ ހަށިގަނޑާއި ޖިންސާ ދޭތެރޭގައި ވެސް ފޮރުވާފައި މަސްތުވާތަކެތި ހުއްޓައިވަނީ ފެނިފައެވެ. އޭނާ މަސައްކަތް ކުރީ ޕެޑުގެ ތެރޭގައި މަސްތުވާތަކެތި އެތެރެކުރަން ކަމަށްވަނީ އެނގިފައެވެ.
ދިވެހިރާއްޖެއަށް 31 ގްރާމްގެ ކޮކެއިން އެތެރެކުރުމަކީ މަސްތުވާތަކެއްޗާ ބެހޭ ގާނޫނުގެ ދަށުން ވަރަށް ސީރިއަސް ކުށެކެވެ. މަސްތުވާތަކެއްޗާ ބެހޭ ގާނޫނުގެ 104 ވަނަ މާއްދާގެ ދަށުން، ޖަދުވަލު އެކެއްގައިވާ މަސްތުވާތަކެއްޗެއް ރާއްޖެއަށް އެތެރެކުރުމަކީ "މަސްތުވާތަކެތި ރާއްޖެއަށް އެތެރެކުރުމުގެ ކުށް" ކަމުގައި ބެލެވޭނެއެވެ.
ކޮކެއިންއަކީ މަސްތުވާތަކެއްޗާ ބެހޭ ގާނޫނުގެ ޖަދުވަލު އެކެއްގައި ހިމެނޭ ބާވަތެކެވެ. މިފަދަ އެއްޗެއްގެ ޖުމުލަ ބަރުދަނުގައި ފަސް ގްރާމު ނުވަތަ އެއަށްވުރެ ގިނަ ބަރުދަން ހުރިނަމަ، އެއީ "މަސްތުވާތަކެތި ވިޔަފާރިކުރުމަށްޓަކައި ރާއްޖެއަށް އެތެރެކުރުން" ކަމަށް ގާނޫނުލްއުގޫބާތުގެ ދަށުން ބެލެވޭނެއެވެ. އެގޮތުން، 31 ގްރާމަކީ މި މިންގަނޑަށްވުރެ މާ ގިނަ އަދަދެކެވެ.
އެހެންވެ، މި މައްސަލަ ސާބިތުވެއްޖެ ނަމަ އުމުރަށް ޖަލަށްލުމާ އެކު 100,000 ރުފިޔާއާއި 10,000,000 ރުފިޔާއާ ދެމެދުގެ އަދަދަކުން ޖޫރިމަނާކުރާނެއެވެ. މި ފަދަ މައްސަލަތަކަކީ މުޖުތަމައުގެ ސަލާމަތަށް ނުރައްކާ ހުރި މައްސަލަތަކެއް ކަމަށް ބެލެވޭތީ، ޝަރީއަތް ނިމެންދެން ބަންދުގައި ބެހެއްޓުމުގެ ފުރުސަތު ވެސް އޮވެއެވެ.
މީހެއްގެ އަތުން ނުވަތަ އެ މީހެއްގެ ބާރުގެ ދަށުގައިވާ ތަނަކުން މިފަދަ ތަކެތި ފެނިއްޖެނަމަ، އެއީ އެ މީހަކު އެތެރެކުރި އެއްޗެއް ކަމަށް ގާނޫނީ ގޮތުން ގަރީނާ ކުރެވެއެވެ. މީގެން ބަރީއަވެވޭނީ އެއީ އެ މީހާގެ އެނގުމަކާ ނުލައި ހިނގާފައިވާ ކަމެއްކަން ކޯޓުގައި ސާބިތުކޮށްދެވިގެންނެވެ.