ސްޓޮކް މާކެޓް ދިރާސާކުރާ ފަރާތްތަކަށާއި އިންވެސްޓަރުންނަށް ޚާއްސަކޮށްގެން ގޫގުލް އިން އާޓިފިޝަލް އިންޓެލިޖެންސް (އޭއައި) އެކުލެވޭ ރީސާޗް ޓޫލްތަކާއި ރިއަލް-ޓައިމް މާކެޓް އަޕްޑޭޓްތައް ހިމެނޭ "ގޫގުލް ފައިނޭންސް" އެޕްލިކޭޝަން އެންޑްރޮއިޑް ފޯނުތަކަށް ތައާރަފުކޮށްފިއެވެ.
ގޫގުލް އިން ހާމަކުރި ގޮތުގައި މި އެޕްލިކޭޝަނަކީ އިންވެސްޓްމަންޓްތައް ބަލަހައްޓާ އަދި މާކެޓުގެ ޚަބަރުތައް ގާތުން ބަލަން ބޭނުންވާ ފަރާތްތަކަށް ވަރަށް ބޮޑު ފަސޭހައަކަށް ވެގެންދާނެއެވެ.
މި އެޕްލިކޭޝަނުގައި ހިމެނޭ އެންމެ ފާހަގަކޮށްލެވޭ އެއް ސިފަޔަކީ އޭއައި ބޭނުންކޮށްގެން ހިއްސާގެ އަގަށް އަންނަ ބޮޑެތި ބަދަލުތަކުގެ ސަބަބުތައް އޮޅުންފިލުވައިދޭ "ކީ މޫމެންޓްސް" އެވެ. މީގެ އިތުރުން ކަސްޓަމައިޒްޑް ވޮޗްލިސްޓްތަކާއި، މާކެޓުގެ އަގުތައް ވަގުތުން ފެންނާނެ ނިޒާމެއްގެ އިތުރުން، ކުންފުނިތަކާއި މާކެޓް ޓްރެންޑްތައް ދިރާސާކުރުމަށް އެހީތެރިވެދޭ އޭއައި ރީސާޗް އެސިސްޓެންޓެއް ވެސް މި އެޕްގައި ހިމެނެއެވެ.
އެންޑްރޮއިޑް އެޕްލިކޭޝަނުގެ އިތުރުން، ގޫގުލް ފައިނޭންސްގެ ވެބްސައިޓް ވެސް މިހާރު ވަނީ ބީޓާ މަރުހަލާއިން ނިމި، އާ ޕޯޓްފޯލިއޯ މެނޭޖްމަންޓް ޓޫލްތަކާއެކު އަޕްގްރޭޑްކޮށްފައެވެ. މީގެ ސަބަބުން ޔޫޒަރުންނަށް އެމީހުންގެ ހުރިހާ އިންވެސްޓްމަންޓްތަކެއް އެއް ޑޭޝްބޯޑަކުން ބަލައިލެވޭއިރު، ހަމައެކަނި ސްކްރީންޝޮޓެއް ނުވަތަ ސީއެސްވީ އަދި ޕީޑީއެފް ފައިލެއް އަޕްލޯޑްކޮށްލައިގެން ވެސް އާ ޕޯޓްފޯލިއޯއެއް އުފެއްދުމުގެ ފުރުސަތު ލިބިގެންދެއެވެ.
މި އެޕް ބޭނުންކޮށްގެން ޚުލާޞާ ރިޕޯޓްތައްވެސް ހަދާލެވޭނެ ---
މި ބަދަލުތަކާއެކު ޔޫޒަރުން ބޭނުންވާ ގަޑިއަކަށް އޭއައި މެދުވެރިކޮށް މާކެޓް ބްރީފިންގްސް ނުވަތަ ޚުލާސާ ރިޕޯޓްތައް ތައްޔާރުކޮށްދޭ ފީޗަރެއްވެސް ވަނީ ތައާރަފުކޮށްފައެވެ.
ގޫގުލް އިން ބުނި ގޮތުގައި މިހާރު އެންޑްރޮއިޑް ކޮމިއުނިޓީއަށް މި އެޕްލިކޭޝަން ދޫކޮށްލާފައިވީ ނަމަވެސް، އައިއޯއެސް (އައިފޯން) ޔޫޒަރުންނަށް ޚާއްސަ އެޕްލިކޭޝަން މި އަހަރުގެ ފަހުކޮޅު ނެރުމަށް ވަނީ ނިންމާފައެވެ.
ގޫގުލްއިން ފައިނޭންސް ދާއިރާއަށް އޭއައިގެ ޚިދުމަތްތައް ފުޅާކުރަން ފަށާފައި މިވަނީ، މާލީ ބާޒާރުގެ ތަފާސްހިސާބުތަކާއި ކުންފުނިތަކުގެ މައުލޫމާތު އަވަސް އަދި ފަސޭހަ ގޮތެއްގައި އާންމުންނަށް ފޯރުކޮށްދިނުމަށް ޓެކްނޮލޮޖީ ކުންފުނިތަކުގެ މެދުގައި ވާދަވެރިކަން ބޮޑުވެފައިވާ ދަނޑިވަޅެއްގައެވެ. މިގޮތުން މީގެ ކުރިން ގޫގުލް ފައިނޭންސްގެ ޚިދުމަތްތައް މައިގަނޑު ގޮތެއްގައި ވެބް ބްރައުޒާ މެދުވެރިކޮށް ލިބުނު ނަމަވެސް، މޯބައިލް ފޯނުތަކުން މާކެޓް ޓްރެންޑްތައް ބަލާ މީހުންގެ އަދަދު އިތުރުވުމާ ގުޅިގެން ގޫގުލްއިން އަންނަނީ އެ ކުންފުނީގެ "ޖެމިނައި" އޭއައި މޮޑެލްތަކުގެ އެހީގައި ފައިނޭންޝަލް ޓޫލްތައް އިތުރަށް ތަރައްގީކުރަމުންނެވެ.
މި ބަދަލަކީ ބްލޫމްބާގް އަދި ޔާހޫ ފައިނޭންސް ފަދަ ޕްލެޓްފޯމްތަކާ ވާދަކުރުމަށާއި، އާންމު އިންވެސްޓަރުންނަށް މާލީ ނިންމުންތައް ނިންމުމުގައި އޭއައިގެ އެހީތެރިކަން ސީދާ ފޯނުން ފޯރުކޮށްދިނުމަށް ގޫގުލް އިން އެޅި މުހިންމު ފިޔަވަޅެކެވެ.