ކްރިޕްޓޯކަރަންސީގެ މުއާމަލާތްތައް ކުރާ މަޝްހޫރު ޕްލެޓްފޯމެއް ކަމަށްވާ ޕޮލީމާކެޓްގެ ވެބްސައިޓަށް ދިން ސައިބާ ހަމަލާއެއްގައި 2.9 މިލިއަން އެމެރިކާ ޑޮލަރު (ގާތްގަނޑަކަށް 45 މިލިއަން ދިވެހި ރުފިޔާ)ގެ ވައްކަން ކޮށްފިއެވެ.
މި ހަމަލާ ދީފައި ވަނީ ވެބްސައިޓަށް ދޫކޮށްލި ނުރައްކާތެރި ސްކްރިޕްޓެއް ބޭނުންކޮށްގެން، ޔޫޒަރުންނަށް އޮޅުވާލައިގެން މައުލޫމާތު ހޯދުމުގެ (ފިޝިން) ހަމަލާއެއްގެ ތެރެއިންނެވެ.
މި ހަމަލާގައި މަދުވެގެން 11 ޔޫޒަރެއްގެ ކްރިޕްޓޯ ވޮލެޓުން ފައިސާ ދަވާލާފައިވާ ކަމަށް ބްލޮކްޗެއިން އެނަލިސްޓުން ބުނެއެވެ.
ޕޮލީމާކެޓުން ހާމަކުރި ގޮތުގައި މި މައްސަލަ ދިމާވީ އެމީހުން ބޭނުންކުރާ ތިންވަނަ ފަރާތެއްގެ ސޮފްޓްވެއާ ޑިޕެންޑެންސީއެއްގެ ސަލާމަތީ ކަންކަން ބަލިކަށިވުމުގެ ސަބަބުންނެވެ. ނަމަވެސް މިހާރު އެ ނުރައްކާ ހައްލުކުރެވިފައިވާ ކަމަށާއި، ގެއްލުންވި ހުރިހާ ޔޫޒަރުންނަށް އެ ފައިސާ އެއްކޮށް އަނބުރާ ރައްދުކޮށްދޭނެ ކަމަށް އެ ކުންފުނިން ވަނީ ވައުދުވެފައެވެ.
މިއީ ފާއިތުވި މަސްދުވަހުގެ ތެރޭގައި ޕޮލީމާކެޓަށް މިފަދަ ހަމަލާއެއް އަމާޒުވި ދެވަނަ ފަހަރެވެ. މީގެ މަހެއްހާ ދުވަސް ކުރިންވެސް ބޭނުންނުކުރާ ޕްރައިވެޓް ކީއެއްގެ ސަބަބުން 600,000 ޑޮލަރުގެ ބްރީޗެއް ހިނގި ނަމަވެސް، އެ ފަހަރު ޔޫޒަރުންގެ ފައިސާއަށް އެއްވެސް ގެއްލުމެއް ވެފައެއް ނުވެއެވެ.
މި ހިނގާ ޖޫން މަހަކީ ކްރިޕްޓޯ ދާއިރާއަށް ސައިބާ ހަމަލާތަކުގެ ބޮޑު ލޮޅުމެއް އައި މަހެކެވެ. ތަފާސްހިސާބުތައް ދައްކާ ގޮތުން މި މަހުގެ ތެރޭގައި އެކަނިވެސް 29 ހާދިސާއެއްގައި 74.9 މިލިއަން ޑޮލަރުގެ ގެއްލުން ކްރިޕްޓޯ ދާއިރާއަށް ވެފައިވެއެވެ. އަދި 2026 ގެ ދެވަނަ ކުއާޓަރަކީ ކްރިޕްޓޯ ތާރީޚުގައި ވެސް އެންމެ ގިނައިން ހެކިން ހާދިސާތައް ހިނގި ކުއާޓަރުގެ ގޮތުގައި ވަނީ ރެކޯޑު ކުރެވިފައެވެ.
މީގެ އިތުރުން އެތޭރިއަމް ލޭޔާ-2 ބްލޮކްޗެއިން އެއް ކަމަށްވާ ޓައިކޯގެ ބްރިޖް ޕްރޮޓޮކޯލްތައް ފޭލްކޮށްލައިގެން 1.7 މިލިއަން ޑޮލަރު ހެކަރުން ވަނީ ހޯދާފައެވެ. އަދި ސީކްރެޓް ނެޓްވޯކް ބްރިޖަށް ދިން ހަމަލާއެއްގައި 4.7 މިލިއަން ޑޮލަރު ގެއްލިފައިވާއިރު، ތޯރޗެއިން އަށް ދިން 10 މިލިއަން ޑޮލަރުގެ ހަމަލާއަކާ ގުޅިގެން އެ ނެޓްވޯކްގެ މުއާމަލާތްތައް ވަގުތީގޮތުން މެދުކަނޑާލަންވެސް ޖެހުނެވެ.