ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ ވައުދުފުޅާ އެއްގޮތަށް، ލ. އަތޮޅުގައި ތަރައްގީކުރާ ދެވަނަ އެއާޕޯޓު އެ އަތޮޅު އިސްދޫ ކަލައިދޫގައި އެޅުމަށް ސަރުކާރުން ނިންމައިފިއެވެ.
މިކަން ހާމަކޮށްފައިވަނީ މިނިސްޓްރީ އޮފް ހައުސިން، ލޭންޑް އެންޑް އާބަން ޑިވެލޮޕްމަންޓުން މިއަދު އާންމުކުރި ވީޑިއޯ ރިޕޯޓެއްގައެވެ.
ލ. އަތޮޅުގައި ދެވަނަ އެއާޕޯޓެއް ތަރައްގީކުރައްވާނެ ކަމަށް ރައީސް މުއިއްޒު ވައުދުވެވަޑައިގަތީ 2025 ވަނަ އަހަރުގެ އޮކްޓޫބަރު މަހު އެ އަތޮޅު މާވަށަށް ކުރެއްވި ދަތުރުފުޅުގައި އެ ރަށު ރައްޔިތުންނާ ބައްދަލުކުރައްވައެވެ.
އެމަނިކުފާނު ވިދާޅުވެފައިވަނީ މި އެއާޕޯޓު ތަރައްގީކުރާނީ ދުރުރާސްތާއަށް ވިސްނައި، އިގްތިސާދީ ގޮތުން ދެމެހެއްޓެނިވި ތަރައްގީ ހާސިލުވާނެ ގޮތަކަށް ކަމަށެވެ. އަދި ރާއްޖޭގެ ފަތުރުވެރިކަން ކުރިއެރުވުމަށްޓަކައި ގިނަ ރިސޯޓުތަކެއް ތަރައްގީކުރެވެން އޮތް ސަރަހައްދެއްގައި އެއާޕޯޓު އެޅުމަކީ އެންމެ ރަނގަޅު ގޮތް ކަމަށްވެސް ރައީސް ފާހަގަކުރެއްވިއެވެ.
އިސްދޫ ކަލައިދޫއަކީ ރާއްޖޭގެ އެންމެ ބިން ބޮޑު ރަށްތަކުގެ ތެރެއިން އެއް ރަށް ކަމަށްވާއިރު، އެ ރަށަކީ އާބާދީ އެއްފަސްކުރުމާއި ތަރައްގީގެ ފުރުސަތުތައް ފުޅާ ދާއިރާއެއްގައި އޮތް ރަށެކެވެ.
މި އެއާޕޯޓުގެ ސަބަބުން އިސްދޫ ކަލައިދޫގެ އިތުރުން ދަނބިދޫ އަދި މާބައިދޫގެ ރައްޔިތުންނަށް ދަތުރުފަތުރުގެ ބޮޑު ލުޔެއް ލިބިގެންދާނެއެވެ. މިހާރު އެ ސަރަހައްދުގެ ރައްޔިތުން ކައްދޫ އެއާޕޯޓަށް ދިއުމަށް ކުރަންޖެހޭ 45 މިނެޓުގެ ދިގު ދަތުރު މި މަޝްރޫއާއެކު ކުރުވެގެންދާނެކަމަށް ހައުސިން މިނިސްޓްރީން ބުނެއެވެ.
ސަރުކާރުން ގަބޫލުކުރާ ގޮތުގައި މި އެއާޕޯޓަކީ އެ ސަރަހައްދުގެ ކުދި ވިޔަފާރިތައް ކުރިއަރައި، އިގްތިސާދީ ގޮތުން ބޮޑެތި މަންފާތަކެއް ލިބިގެންދާނެ މަޝްރޫއެކެވެ. އަދި މިއީ އިސްދޫކަލައިދޫގެ ވަށައިގެންވާ ގުދުރަތީ ރީތި ރަށްތަކާއެކު ފަތުރުވެރިކަން ފުޅާކުރުމަށް ލިބޭނެ ރަނގަޅު ފުރުސަތެކެވެ. މި މަޝްރޫއުގެ ސަބަބުން މުޅި ލާމު އަތޮޅުގެ އިގްތިސާދަށް އިންގިލާބީ ބަދަލެއް އަންނާނެ ކަމަށް ވެސް މިނިސްޓްރީގެ ރިޕޯޓުގައި ވަނީ ފާހަގަކޮށްފައިއެވެ.
ލ. އަތޮޅަކީ ގުދުރަތީ ގޮތުން މުއްސަނދި އަދި ތާރީޚީ ގޮތުން ފާހަގަކޮށްލެވޭ އަތޮޅެކެވެ. މިހާރު އެ އަތޮޅުގައި އޮޕަރޭޓް ކުރަމުންދަނީ ލ. ކައްދޫ އެއާޕޯޓު އެކަންޏެވެ.
އިސްދޫކަލައިދޫގައި އަޅާ މި އާ އެއާޕޯޓަކީ އަތޮޅުގެ ތަރައްގީއަށް އެޅޭ މުހިންމު ފިޔަވަޅެއްގެ ގޮތުގައި ސަރުކާރުން ސިފަކުރެއެވެ.