ކްލަބް މޯލްޑިވްސް ކަޕްގައި ރޭ އެންމެ ފަހުގެ ޗެމްޕިއަން ރޯޑް ރިކްރިއޭޝަން ކްލަބް (އާރްއާރްސީ) އިން ކްލަބް ވެމްކޯ ބަލިކޮށް މުހިއްމު މޮޅެއް ހޯދިއިރު، އެސްޓީއޯ އާއި އެމްޓީސީސީ ބައްދަލުކުރީ މެޗު އެއްވަރުވެގެން ނިމިއްޖެއެވެ.
މުބާރާތުގައި ރޭ ކުޅުނު ފުރަތަމަ މެޗުގައި އާރްއާރްސީ އިން ވެމްކޯގެ މައްޗަށް ކުރިހޯދީ 1-2 ގެ ނަތީޖާއަކުންނެވެ.
މި މެޗުގައި އާރްއާރްސީގެ ގޯލުތައް ކާމިޔާބުކޮށްދިނީ ރާއްޖޭގެ ފުޓްސަލްގެ ދެ ތަރިން ކަމަށްވާ އަލީ ހާފިޒް (ހާއްޕެ) އާއި އިބްރާހީމް އަސްވަދު (ގަބޭ) އެވެ. ވެމްކޯއިން ޖެހި ހަމައެކަނި ލަނޑު އެޓީމަށް ކާމިޔާބުކޮށްދިނީ މުހައްމަދު ފާސިރު (ފާއްޓެ) އެވެ.
ރޭގެ އަނެއް ފޯރިގަދަ މެޗުގައި، މިދިޔަ އަހަރުގެ ފައިނަލުން ބަލިވި އެސްޓީއޯ ރިކްރިއޭޝަން ކްލަބާއި އެމްޓީސީސީ ވާދަކުރި މެޗު ނިމުނީ 1-1 އިން އެއްވަރުވެގެންނެވެ.
ކްލަބް މޯލްޑިވްސް ކަޕް 2026 ގައި ރޭ ވެމްކޯއާއި އެމްޓީސީސީ ކުޅުނު މެޗުގެ ތެރެއިން-- ފޮޓޯ: ފޮޓޯ މާސްޓާ
އެސްޓީއޯއަށް އަހުމަދު ރާހިލް ރަޝީދު (ރާއްކޮ) ލަނޑު ޖަހައިދީފައި ވަނިކޮށް، އެމްޓީސީސީއަށް ނަތީޖާ ހަމަހަމަކޮށްދިނީ ޖުމައިލް ޖަމީލް (ޖުމްބެ) އެވެ.
ގްރޫޕް ސްޓޭޖުގެ އެހެން މެޗުތަކަށް ބަލާއިރު، ރޭ އެންމެ ތަފާތު ބޮޑު މޮޅެއް ހޯދީ ފެން ކްލަބް އަތުން 2-9 އިން މޮޅުވި ކްލަބް އިމިގްރޭޝަނެވެ. އިމިގްރޭޝަނުން ޖެހި 9 ގޯލުގެ ތެރެއިން ގައުމީ ފުޓްބޯޅަ ޓީމުގެ މިޑްފީލްޑަރު އަހުމަދު އައިހަމް ވަނީ ފަސް ގޯލު ޖަހައި ހެޓްރިކެއް ހަދާފައެވެ.
އެޓީމުގެ ހައިސަމް ރަޝީދު ދެ ގޯލު ޖެހިއިރު، ބިކްރާންތު ނާސިން ރަނާ އަދި ހުސައިން ނިޔާޒް ކޮންމެ ކުޅުންތެރިއަކު ގޯލެއް ކާމިޔާބުކުރިއެވެ. ފެން ކްލަބުގެ ގޯލު ސަނާއު ރަޝީދު ޖެހިއިރު، އަނެއް ގޯލަކީ އިމިގްރޭޝަނުގެ ވިސާމް އަތުން ބައިކޮޅަށް ވަން ގޯލެކެވެ.
މީގެ އިތުރުން އެފްއެސްއެމް އިން ވަނީ ދިވެހި ސިފައިންގެ ކްލަބާ ވާދަކޮށް 1-5 ގެ ބޮޑު ނަތީޖާއަކުން މެޗު ކާމިޔާބުކޮށްފައެވެ.
އެފްއެސްއެމްގެ ގޯލުތައް ޖަހައިދިނީ އިޒާން ޝާހިދު، ހަލީލް ގަމާލް، މުހައްމަދު ޖުމާން އަދި ދެ ގޯލު ޖެހި ހުޒޭފާ އިބްނު ހުސައިނެވެ. ހުޒޭފާގެ އެއް ލަނޑަކީ ޕެނަލްޓީއަކުން ކާމިޔާބުކުރި ލަނޑެކެވެ.
މިފަހަރުގެ ކްލަބް މޯލްޑިވްސް ކަޕްގައި ޖުމްލަ 17 ޓީމެއް ވާދަކުރެއެވެ. މުބާރާތް ކުރިއަށްދަނީ ހަތަރު ގްރޫޕަކަށް ބަހާލައިގެންނެވެ. ގްރޫޕް ސްޓޭޖަށްފަހު ދެން ކުޅޭނީ ކުއާޓާ ފައިނަލްގެ މެޗުތަކެވެ.
ކްލަބް މޯލްޑިވްސް ސީޒަނުގައި ޖުމްލަ ހަތް މުބާރާތެއް ރާވާފައިވާއިރު، މިއަދު ހަވީރު ކުރިއަށްދާނީ ކިޑްސަލް މުބާރާތުގެ ކުއާޓާ ފައިނަލްގެ ފޯރިގަދަ މެޗުތަކެވެ.