މަޝްހޫރު އެމެރިކަން ފެންޓަސީ ޑްރާމާ ޓެލެވިޒަން ސީރީސް "ގޭމް އޮފް ތްރޯންސް"ގެ ކުރީގެ ވާހަކަތަކުގެ މައްޗަށް ބިނާކޮށް އުފައްދާފައިވާ "ހައުސް އޮފް ދަ ޑްރެގަން"ގެ ތިން ވަނަ ސީޒަން ޖިއޯހޮޓްސްޓާ މެދުވެރިކޮށް ދައްކަން ފަށައިފިއެވެ.
މި ސިލްސިލާގެ ތިން ވަނަ ސީޒަން ޕްރީމިއާކުރަން ފަށާފައި ވަނީ، ދެ އަހަރުގެ ދިގު އިންތިޒާރަކަށްފަހުއެވެ. ފުރަތަމަ އެޕިސޯޑުން ވެސް އެނގިގެންދަނީ 'ޑާންސް އޮފް ދަ ޑްރެގަންސް' ނުވަތަ ޑްރެގަންތަކުގެ ހަނގުރާމައަކީ ވެސްޓަރޯސްގެ ތާރީހުގައި ހިނގި އެންމެ ލޭއޮހޮރުވުން ބޮޑު އެއް ސޮފްހާކަމެވެ.
ސީޒަން ތިނެއް ފެށިގެން އައީ ރަސްކަމުގެ ތަހުތަށްޓަކައި ކުރާ ހަނގުރާމަ އިންތިހާއަށް ގޮސްފައިވާ މަންޒަރުތަކާއެކުގައެވެ. ދެވަނަ ސީޒަނަކީ ހަނގުރާމައަކަށް ތައްޔާރުވުމުގެ ސީޒަނެއްގެ ގޮތުގައި ފެނުނު ނަމަވެސް، މި ސީޒަންގެ ފެށުމުން ބެލުންތެރިން އިންތިޒާރު ކުރަމުންދިޔަ ކުރިމަތިލުންތައް ފެންނަން ފަށައިފިކަމަށް ރެޑިފްގައި މި އެޕިސޯޑު ރިވިއުކުރި ގިނަ ބަޔަކު ވަނީ ބުނެފައެވެ.
މި އެޕިސޯޑުގެ އެންމެ ފާހަގަކޮށްލެވޭ ކަމަކީ އޭގެ އަވަސް މިނެވެ. ވާހަކަ ކުރިއަށްދަނީ ކުރީ ސީޒަން ނިމުނު ހިސާބުންނެވެ. ސުލްހައިގެ އުންމީދުތައް ފަނޑުވެ، އިއްތިހާދުތައް ބަދަލުވަމުންދާއިރު، ކޮންމެ ޝަހުސިއްޔަތެއް ވެސް ތިބީ އެމީހުން ނިންމާފައިވާ ނިންމުންތަކުގެ މަޅީގައި ބެދިފައެވެ.
"ހައުސް އޮފް ދަ ޑްރެގަން 3"ގެ ފުރަތަމަ އެޕިސޯޑުގެ މަންޒަރެއް--އެންޑީޓީވީ
އެމާ ޑާސީ ކުޅޭ ރެނީރާ ޓާގޭރިއަންގެ ރޯލަކީ މުޅި ސިލްސިލާގެ ރޫހެވެ. ރެނީރާ އަކީ ވެރިއަކަށް ވީނަމަވެސް، އޭނާގެ ވަށައިގެން ތިބި ފިރިހެނުން އޭނާގެ ބާރު ކަނޑުވާލަން މަސައްކަތްކުރާ މަންޒަރު މި އެޕިސޯޑުންވެސް ދައްކުވައިދެއެވެ.
އަމިއްލައަށް ހަނގުރާމައަށް ނުކުމެ 'ސައިރެކްސް'ގައި އިސްވެ ހަރަކާތްތެރިވާން އޭނާ ބޭނުންވި ނަމަވެސް، އޭނާގެ ރައްކާތެރިކަމުގެ ނަމުގައި އެހެން މީހުން އޭނާ އެކަމުން ދުރުކުރެއެވެ.
މިއީ ހަމައެކަނި ރެނީރާގެ އެޕިސޯޑެއް ނޫނެވެ. މި އެޕިސޯޑުގެ އެންމެ މުހިންމު ބަޔަކީ ގިނަ ދުވަސްތަކެއް ވަންދެން އިންތިޒާރު ކުރެވުނު 'ބެޓްލް އޮފް ދަ ގަލެޓް' ނުވަތަ ކަނޑުމަތީގެ ބޮޑު ހަނގުރާމައެވެ.
ކޯލިސް ވެލޭރިއަން ނުވަތަ 'ސީ ސްނޭކް'ގެ ހިތްވަރުގަދަކަން މި ހަނގުރާމައިން ވަރަށް ފުރިހަމައަށް ދައްކުވައިދީފައިވެއެވެ. ސްޓީވް ޓޫސަންޓްގެ ކުޅަދާނަ އެކްޓިންއާ އެކު، ކޯލިސްއަށް އެ ނަން ދެވުނު ސަބަބުވެސް ފުރަތަމަ އެޕިސޯޑުން ބެލުންތެރިންނަށް ހާމަކޮށްދެއެވެ.
ވިޝުއަލް އިފެކްޓްސްތަކުގެ ފެންވަރު މަތިކަމާއި، ޑްރެގަންތަކުގެ މަންޒަރުތަކަކީ މި ސިލްސިލާގައި މިހާތަނަށް ފެނުނު އެންމެ ހާއްސަ އަދި ފުރިހަމަ މަންޒަރުތައް ކަމަށް ބެލުންތެރިން ވަނީ ބުނެފައެވެ.
އަދި މިއުޒިކް ކޮމްޕޯޒަ ރާމިން ޖަވާދީގެ ހިތްގައިމު މިއުޒިކުން، ވާހަކައިގެ ނުރައްކާތެރިކަމާއި ހިތާމަވެރިކަން އިތުރަށް އިހުސާސްކޮށްދެއެވެ. މި އެޕިސޯޑަކީ ކުރިއަށް އޮތް ބޮޑެތި ކާރިސާތަކުގެ ފެށުންކަން މިއުޒިކުންވެސް ސާފުކޮށްދެއެވެ.
ކޮންމެ ހަފްތާއަކު އެއްފަހަރު މި ސީޒަންގެ އާ އެޕިސޯޑެއް ގެނެސްދޭނެއިރު ފިނާލޭ އެޕިސޯޑު ގެނެސްދޭނީ މި އަހަރުގެ އޯގަސްޓް މަހުގެ 10 ވަނަ ދުވަހުއެވެ.