އިނގިރޭސިވިލާތުގެ ބޮޑުވަޒީރު ކިއާ ސްޓާމާ މަގާމުން އިސްތިއުފާ ދެއްވުމާ މެދު ވިސްނަވަމުން ގެންދަވާ ކަމަށާއި، މަގާމުން ދުރުވާނެ ތާރީޚެއް ކުރިއަށް އޮތް ހަފުތާގެ ތެރޭގައި އިއުލާނުކުރެއްވުން އެކަށީގެންވާ ކަމަށް ރިޕޯޓުތައް ބުނެފިއެވެ.
އިނގިރޭސިވިލާތުގެ 'ދަ އޮބްޒާވާ' ނޫހުން ރިޕޯޓުކޮށްފައިވާ ގޮތުގައި، ސްޓާމާ ގެންދަވަނީ އެ މަނިކުފާނުގެ އަނބިކަނބަލުންނާއެކު ޗެކާސްގައި ހުންނަ ރިޔާސީ ގެކޮޅުގައި މިކަމާ ގުޅޭގޮތުން މަޝްވަރާކުރައްވަމުންނެވެ. މީގެ އިތުރުން، ކެބިނެޓުގެ އިސް ވަޒީރުންނާއި، ސިޔާސީ ލަފާދޭ ފަރާތްތަކާއި، ޕާޓީއަށް ފަންޑުކުރާ ފަރާތްތަކުގެ އިތުރުން ޓްރޭޑް ޔޫނިއަންތަކުގެ ލީޑަރުންނާ ވެސް އޭނާ ވަނީ މަޝްވަރާކުރައްވައިފައެވެ. މި މަޝްވަރާތަކަށްފަހު، މަގާމުގައި ދެމިހުންނެވުމަކީ ދެން ކުރެއްވޭނެ ކަމެއް ނޫންކަމަށް ސްޓާމާއަށް ގަބޫލުކުރެއްވިފައިވާ ކަމަށް އެ ނޫހުން ރިޕޯޓުކޮށްފައިވެއެވެ.
ވެރިކަންކުރާ ލޭބާ ޕާޓީގެ އިސް ފަރާތްތަކުން ލަފާކުރާ ގޮތުގައި، ހޯމަ ދުވަހުގެ ވަގުތެއްގައި ސްޓާމާގެ މުސްތަގުބަލާ ގުޅޭގޮތުން ރަސްމީ ބަޔާނެއް ނެރުއްވާނެއެވެ. ނަމަވެސް، ސަރުކާރުގެ އިސް އޮފިޝަލަކާ ހަވާލާދީ ރޮއިޓާސްއިން ބުނެފައިވަނީ، ބޮޑުވަޒީރު އަދިވެސް ހުންނެވީ ގައުމު ހިންގުމުގެ މަސްއޫލިއްޔަތުތަކަށް ސަމާލުކަން ދެއްވައިގެން ކަމަށެވެ.
ސްޓާމާއަށް ސިޔާސީ ގޮތުން ކުރިމަތިވެފައިވާ ފިއްތުންތައް އިތުރަށް ގޯސްވެފައިވަނީ، ހުކުރު ދުވަހު މޭކާފީލްޑް ދާއިރާގައި ބޭއްވި ބައި-އިލެކްޝަން ކާމިޔާބުކުރައްވައި، އެންޑީ ބާންހަމް ގާނޫނުހަދާ މަޖިލީހުގެ ގޮނޑިއެއް ކަށަވަރުކުރެއްވުމާ ގުޅިގެންނެވެ. މި އިންތިޚާބަކީ ލޭބާ ޕާޓީގެ ލީޑާޝިޕާ ވާދަކުރެއްވުމުގެ ފުރުސަތު ބާންހަމްއަށް ހޯދައިދިނުމަށްޓަކައި، އެ ދާއިރާގެ ކުރީގެ މެންބަރު ޖޯޝް ސައިމަންސް އިސްތިއުފާ ދެއްވުމުން ބޭއްވި އިންތިޚާބެކެވެ.
ލަންޑަންގެ ޑައުންނިން ސްޓްރީޓް ކައިރީގައި ހުންނަ ބެޓިން ބޯޑުގައި އިނގިރޭސިވިލާތުގެ ދެން އަންނަ ބޮޑުވަޒީރަކަށް ވޯޓު ދެނީ. ފޮޓޯ/އޭޕީ
މި އިންތިޚާބުގައި ބާންހަމް ވަނީ 24،927 ވޯޓު (54.8 އިންސައްތަ) ހޯއްދަވައިފައެވެ. މިއީ އޭނާއާ އެންމެ ގާތުން ވާދަކުރެއްވި ރިފޯމް ޔޫކޭ ޕާޓީގެ ކެންޑިޑޭޓަށް ވުރެ 9،231 ވޯޓުގެ ބޮޑު ތަފާތެކެވެ. މި ކާމިޔާބީއާއެކު، ލޭބާ ޕާޓީގެ ލީޑަރޝިޕާ ހަވާލުވެވަޑައިގަތުމަށް ގްރޭޓާ މެންޗެސްޓާގެ މޭޔަރުކަން ވެސް ކުރައްވާ ބާންހަމްއަށް ވަނީ މަގުފަހިވެފައެވެ. މީގެ އިތުރުން، ލޭބާ ޕާޓީގެ 100 އަށް ވުރެ ގިނަ މެންބަރުން ވަނީ ސްޓާމާ އިސްތިއުފާ ދެއްވުމަށް ނުވަތަ މަގާމުން ދުރުވާނެ ދުވަހެއް ކަނޑައެޅުމަށް ގޮވާލައްވައިފައެވެ. މިއީ ގާނޫނުހަދާ މަޖިލީހުގައި ތިއްބަވާ ލޭބާ ޕާޓީގެ މެންބަރުންގެ ގާތްގަނޑަކަށް ހަތަރުބައިކުޅަ އެއްބައެވެ. އަދި މިދިޔަ މަހު ބޭއްވި ލޯކަލް ކައުންސިލް އިންތިޚާބުތަކުގައި ލޭބާ ޕާޓީއަށް ބޮޑެތި ނާކާމިޔާބީތަކަކާ ކުރިމަތިލާން ޖެހުމާ ގުޅިގެން، ޕާޓީގެ އެތެރޭގެ ނުތަނަވަސްކަން ވަނީ އިންތިހާއަށް ބޮޑުވެފައެވެ.
ސިޔާސީ މައްސަލަތަކުގެ އިތުރުން، އިނގިރޭސިވިލާތުގެ އިގުތިސާދީ ހާލަތު ދަށްވުމަކީ ވެސް ސްޓާމާއަށް އޮތް ބޮޑު ގޮންޖެހުމެކެވެ. މިއަހަރުގެ ތެރޭގައި އިނގިރޭސިވިލާތުގެ އިގުތިސާދީ ކުރިއެރުން 0.8 އިންސައްތައަށް ދަށަށް ދާނެކަމަށް ލަފާކޮށްފައިވާއިރު، މެދުއިރުމަތީގެ ހަމަނުޖެހުންތަކާ ގުޅިގެން ހަކަތައިގެ އަގުތައް އުފުލި، އިންފްލޭޝަން ރޭޓު 3.5 އިންސައްތައަށް އަރާނެކަމަށް ވަނީ އަންދާޒާކޮށްފައެވެ. މީގެ ސަބަބުން އާންމު ރައްޔިތުންގެ ދިރިއުޅުމުގެ ޚަރަދުތައް އިންތިހާއަށް ބޮޑުވެ، ވަޒީފާނެތް މީހުންގެ ނިސްބަތް 5.3 އިންސައްތައަށް އިތުރުވާނެ ކަމަށް ބެލެވެއެވެ.
ސްޓާމާ އިސްތިއުފާ ދެއްވައިފިނަމަ އިނގިރޭސި ބޮޑުވަޒީރު ކަމާ ހަވާލުވެވަޑައިގަންނަވާނެ ކަމަށް އެންމެ ބޮޑަށް ބެލެވޭ އެންޑީ ބާންހަމް. ފޮޓޯ/އޭޕީ
ހަމައެއާއެކު، ގަވާއިދާ ޚިލާފަށް އެތެރެވާ މީހުންގެ މައްސަލަތައް ހައްލުކުރުމަށް ސަރުކާރުން ގެންގުޅޭ ސިޔާސަތުތަކާމެދު ވެސް ގިނަ ބަޔަކު ދަނީ ހިތްހަމަނުޖެހުން ފާޅުކުރަމުންނެވެ. މީގެ އިތުރުން، މުއްސަނދި ވިޔަފާރިވެރިންގެ އަތުން ހަދިޔާ ގަބޫލުކުރެއްވި ކަމަށް ބުނާ މައްސަލަތަކެއް ފެންމަތިވުމުން ސްޓާމާގެ މަގުބޫލުކަން ވަނީ ވަރަށް ބޮޑަށް ދަށަށް ގޮސްފައެވެ. އަދި ކުޑަކުދިންނަށް ޖިންސީ ގޯނާކުރާ މީހުންގެ މައްސަލަތަކެއްގައި ކުރިން އޭނާ އަދާކުރެއްވި ދައުރާ ގުޅޭގޮތުން ވެސް ފާޑުކިޔުންތައް އަމާޒުވެފައިވާއިރު، މަހުޖަނު އީލޮން މަސްކް ވެސް ވަނީ ސްޓާމާއަށް ބޮޑެތި ތުހުމަތުތަކެއް ކުރައްވައިފައެވެ.
މި ހުރިހާ ފިއްތުންތަކަކާ އެކުވެސް، ސްޓާމާ ގެންދަވަނީ މަގާމުން އިސްތިއުފާ ދެއްވަން ދެކޮޅު ހައްދަވަމުންނެވެ. ބާންހަމްގެ ކާމިޔާބީއަށް މަރުހަބާ ވިދާޅުވެ އެކްސްގައި ކުރެއްވި ޕޯސްޓެއްގައި ސްޓާމާ ވިދާޅުވީ، ރައްޔިތުން ޚިޔާރުކުރީ ނަފުރަތާއި ބައިބައިވުމުގެ ބަދަލުގައި ލޭބާ ޕާޓީގެ އުންމީދީ ކެމްޕޭން ކަމަށެވެ. ލީޑަރޝިޕް ބަދަލުކުރުމުގެ ވާދަވެރިކަމެއް އުފެދިއްޖެނަމަ އަމަލުކުރައްވާނެ ގޮތަކާ ގުޅޭގޮތުން ނޫސްވެރިން ސުވާލުކުރުމުން ސްޓާމާ ވިދާޅުވި ގޮތުގައި، އެފަދަ ހާލަތެއް މެދުވެރިވެއްޖެނަމަ އޭނާ ވެސް ވާދަކުރައްވާނެއެވެ.
"އަޅުގަނޑު ތަކުރާރުކޮށް މި ދަންނަވަނީ، އެކަމުން އަޅުގަނޑު ފަހަތަކަށް ނުޖެހޭނަން،" ސްޓާމާ ވިދާޅުވިއެވެ. ދެހާސް ވިހި ވަނަ އަހަރުން ފެށިގެން ލޭބާ ޕާޓީގެ ލީޑަރުކަން ކުރައްވަމުން ގެންދަވާ ސްޓާމާ ބޮޑުވަޒީރުކަމާ ހަވާލުވެވަޑައިގަތީ 2024 ވަނަ އަހަރުއެވެ. ސްޓާމާގެ މުސްތަގުބަލާ މެދު ގޮތެއް ނިންމުމަށް ޕާޓީގެ އެތެރޭގެ ޕްރެޝަރު ބޮޑުވަމުންދާއިރު، ލޭބާ ޕާޓީގެ އިސް ފަރާތްތަކުން މިހާރު އިންތިޒާރުކުރަމުން ދަނީ ހޯމަ ދުވަހު އޭނާ ނެރުއްވާނެ ކަމަށް ބެލެވޭ ރަސްމީ ބަޔާނަށެވެ.