ދުނިޔޭގެ އެންމެ މަޝްހޫރު އެއް ފާސްޓްފުޑް ޗެއިން ކަމަށްވާ ޕިއްޒާ ހަޓް، 2.7 ބިލިއަން ޑޮލަރަށް ވިއްކާލަން އެ ކުންފުނީގެ މައި ކުންފުނި ކަމަށްވާ ޔަމް ބްރޭންޑްސްއިން ނިންމައިފިއެވެ.
މި ނިންމުން ނިންމާފައިވަނީ، ފަހަކަށް އައިސް ޕިއްޒާ ހަޓްގެ ވިޔަފާރި ވަރަށް ބޮޑަށް ދަށްވެ، މާކެޓުގައި ވާދަވެރިކަން ބޮޑުވުމާ ގުޅިގެންނެވެ. ޔަމް ބްރޭންޑްސްއިން ނެރުނު ބަޔާނެއްގައި ބުނެފައިވާ ގޮތުގައި، މި މުއާމަލާތް ކުރިއަށް ގެންދާނީ މައިގަނޑު ދެ ބަޔަކަށް ބަހާލައިގެންނެވެ. އެގޮތުން ޗައިނާ ފިޔަވައި ދުނިޔޭގެ އެހެން ގައުމުތަކުގައި ހިންގާ ޕިއްޒާ ހަޓްގެ ވިޔަފާރިތައް ވިއްކާލާނީ އެމެރިކާގެ ޕްރައިވެޓް އިކުއިޓީ ފާމެއް ކަމަށްވާ ލޯންގްރޭންޖް ކެޕިޓަލްއަށެވެ. އަދި ޗައިނާގައި ހިންގާ ވިޔަފާރިތައް ގަންނާނީ ޔަމް ޗައިނާ ހޯލްޑިންގްސްއިންނެވެ.
މީގެ ކުރިން މި ފްރެންޗައިޗްގެ ރެސްޓޯރެންޓެއް މާލޭގައި ވެސް ހިންގިއެވެ. ނަމަވެސް ފަހުން ވަނީ ބަންދުކޮށްފައެވެ.
މި އެއްބަސްވުމުގެ ދަށުން، ލޯންގްރޭންޖް ކެޕިޓަލްއިން ޕިއްޒާ ހަޓްގެ ގްލޯބަލް އޮޕަރޭޝަންސް ގަންނާނީ 1.5 ބިލިއަން ޑޮލަރަށެވެ. އަދި ޗައިނާގެ މާކެޓުގައި ހިންގާ ވިޔަފާރިތައް ޔަމް ޗައިނާ ހޯލްޑިންގްސްއިން ގަންނާނީ 1.2 ބިލިއަން ޑޮލަރަށެވެ. ޔަމް ޗައިނާ ހޯލްޑިންގްސްއަކީ 2016 ވަނަ އަހަރު ޔަމް ބްރޭންޑްސްއިން ވަކިވެ، އަމިއްލަ ކުންފުންޏެއްގެ ގޮތުގައި ހިންގަމުން އަންނަ ކުންފުންޏެކެވެ. ޗައިނާއަކީ އެމެރިކާ ފިޔަވައި ޕިއްޒާ ހަޓްގެ އެންމެ ބޮޑު މާކެޓެވެ. އެގޮތުން އެ ކުންފުނީގެ ޖުމްލަ އާމްދަނީގެ 19 އިންސައްތަ ހިއްސާކުރަނީ ޗައިނާގެ މާކެޓުންނެވެ.
ޔަމް ބްރޭންޑްސްގެ ސީއީއޯ ކްރިސް ޓާނާ ވިދާޅުވި ގޮތުގައި، މި ބަދަލާއެކު ލޯންގްރޭންޖް އަދި ޔަމް ޗައިނާގެ ބެލުމުގެ ދަށުން ޕިއްޒާ ހަޓްގެ ވިޔަފާރި އިތުރަށް ފުޅާވެގެންދާނެއެވެ. އަދި މި ވިއްކާލުމުގެ ސަބަބުން ޔަމް ބްރޭންޑްސްއަށް އެ ކުންފުނީގެ އެހެން ބްރޭންޑްތައް ކަމަށްވާ ކޭއެފްސީ އަދި ޓާކޯ ބެލްގެ ވިޔަފާރި ކުރިއެރުވުމަށް އިތުރު ސަމާލުކަމެއް ދެވޭނެ ކަމަށްވެސް އޭނާ ފާހަގަކުރެއްވިއެވެ.
ލޯންގްރޭންޖް ކެޕިޓަލްއަކީ 2019 ވަނަ އަހަރު އުފެއްދި ކުންފުންޏެކެވެ. އެ ކުންފުނީގެ ބާނީ ބޮބް ބާލިން ބުނި ގޮތުގައި، ޕިއްޒާ ހަޓްގެ އިސްވެރިންނާ ގުޅިގެން އެ ބްރޭންޑް އިތުރު ހަރުފަތަކަށް ގެންދިއުމަށް އޭނާ ހުރީ ތައްޔާރަށެވެ.
ޕިއްޒާ ހަޓް ވިއްކާލަން ނިންމާފައިވާއިރު، ފާއިތުވި އަހަރުތަކުގައި އެ ކުންފުންޏަށް ވަނީ މާލީ ގޮތުން ބޮޑެތި ގޮންޖެހުންތަކަކާ ކުރިމަތިލާން ޖެހިފައެވެ. ރެސްޓޯރަންޓް ކޮންސަލްޓިން ކުންފުންޏެއް ކަމަށްވާ ޓެކްނޯމިކްގެ ތަފާސްހިސާބުތަކުން ދައްކާ ގޮތުގައި، މިދިޔަ އަހަރު ޕިއްޒާ ހަޓްގެ ގްލޯބަލް ސޭލްސް ވަނީ ދެ އިންސައްތަ ދަށްވެފައެވެ. އަދި އެމެރިކާގެ މާކެޓުގައި އެ ކުންފުނީގެ ވިޔަފާރި ވަނީ 8.2 އިންސައްތަ ދަށްވެފައެވެ. މީގެ މައިގަނޑު ސަބަބެއް ކަމަށް ތަޖުރިބާކާރުން ފާހަގަކުރަނީ، ޑޯޑޭޝް އަދި އޫބާ އީޓްސް ފަދަ ޑެލިވަރީ އެޕްލިކޭޝަންތަކުގެ މަގުބޫލުކަން އިތުރުވުމާއި، ޑޮމިނޯސް ފަދަ ވާދަވެރި ކުންފުނިތަކުން ޑެލިވަރީގެ ހިދުމަތް ހަލުވިކުރުމެވެ.
ގްލޯބަލްޑޭޓާގެ މެނޭޖިން ޑިރެކްޓާ ނީލް ސޯންޑާސް ފާހަގަކުރެއްވި ގޮތުގައި، ޑޮމިނޯސްއިން ވަނީ އޯޑަރު ކުރުމާއި، ޑެލިވަރީ ކުރުމާއި، މެނޫއަށް އާ ބަދަލުތައް ގެނައުމުގެ އިތުރުން މާކެޓިންގައިވެސް ޕިއްޒާ ހަޓް ފަހަތަށް ޖައްސާލާފައެވެ. މީގެ އިތުރުން، ކަސްޓަމަރުންގެ އާދަތަކަށް އައިސްފައިވާ ބަދަލުތަކާއި، ތަކެތީގެ އަގު ބޮޑުވުމުގެ ސަބަބުން އާންމުން ހަރަދުކުރާ މިންވަރު މަދުވުމަކީވެސް ޕިއްޒާ ހަޓްގެ ވިޔަފާރިއަށް ނޭދެވޭ އަސަރުކުރި ކަމެކެވެ. ސޯންޑާސް އިތުރަށް ވިދާޅުވި ގޮތުގައި، ޕިއްޒާ ހަޓްގެ ވިޔަފާރި އަލުން ކޮޅަށްޖެހުމަށް ބޮޑެތި އިންވެސްޓްމަންޓްތަކެއް ބޭނުންވާއިރު، ޔަމް ބްރޭންޑްސްއިން އެކަމަށް ތައްޔާރެއް ނޫނެވެ. މި މައްސަލަތަކާ ގުޅިގެން، މިއަހަރުގެ ފެބްރުއަރީ މަހު ޔަމް ބްރޭންޑްސްއިން ވަނީ އެމެރިކާގައި ހިންގާ ޕިއްޒާ ހަޓްގެ 250 އައުޓްލެޓެއް ބަންދުކުރަން ނިންމާފައެވެ.
ޕިއްޒާ ހަޓަކީ 1958 ވަނަ އަހަރު އެމެރިކާގެ ކެންސަސް ސްޓޭޓްގެ ވިޗިޓާގައި ދެބެން ވެގެން ފެށި ވިޔަފާރިއެކެވެ. އެމީހުން މި ވިޔަފާރި ފެށީ މަންމަގެ އަތުން 600 ޑޮލަރު ދަރަންޏަށް ނަގައިގެންނެވެ. އޭގެ ފަހުން މި ވިޔަފާރި ފުޅާވެ، ދުނިޔޭގެ އެކި ކަންކޮޅުތަކުގައި ގާތްގަނޑަކަށް 20،000 އަށްވުރެ ގިނަ ރެސްޓޯރަންޓް ވަނީ ހުޅުވާފައެވެ. 1977 ވަނަ އަހަރު ޕެޕްސީކޯއިން ޕިއްޒާ ހަޓް ގަތުމަށްފަހު، 1997 ވަނަ އަހަރު އެ ކުންފުނީގެ ރެސްޓޯރަންޓް ވިޔަފާރިތައް ވަކިކޮށް، ޔަމް ބްރޭންޑްސްގެ ނަމުގައި އާ ކުންފުންޏެއް އުފެއްދިއެވެ. ނަމަވެސް، ޒަމާނާއެކު އައި ބަދަލުތަކަށް އެކަށީގެންވާ ގޮތެއްގައި ތައްޔާރުނުވެވުމުގެ ނަތީޖާއަކަށްވީ، ވާދަވެރިންގެ ކުރިމަތީގައި ޕިއްޒާ ހަޓްގެ މަގުބޫލުކަން ކުޑަވުމެވެ.
މި ވިއްކާލުމުގެ މުއާމަލާތްތައް މިއަހަރުގެ ތިންވަނަ ކުއާޓަރުގެ ތެރޭގައި މުޅިން ނިންމާލެވޭނެ ކަމަށް ޔަމް ބްރޭންޑްސްއިން ލަފާކުރެއެވެ. ނަމަވެސް، މިކަން ފުރިހަމަވާނީ ކަމާބެހޭ އިދާރާތަކުން ހޯދަންޖެހޭ ހުއްދަތައް ލިބުމުންނެވެ. މި މުއާމަލާތްތައް ނިމުމުން، ޔަމް ބްރޭންޑްސްގެ މާލީ ރިޕޯޓުތަކުގައި ޕިއްޒާ ހަޓްގެ ހިސާބުތައް ވަކިން ނުހިމަނާނެއެވެ. އަދި އެ ކުންފުނިން ލަފާކުރާ ގޮތުގައި، ޓެކްސްއާއި އެހެނިހެން ހަރަދުތައް ކެނޑުމަށްފަހު، މި ވިއްކާލުމުން ގާތްގަނޑަކަށް 2.3 ބިލިއަން ޑޮލަރުގެ ސާފު އާމްދަނީއެއް ލިބޭނެއެވެ.
މީގެ އިތުރުން، މި ބަދަލުތައް ގެނައުމަށްޓަކައި މިއަހަރުގެ ބާކީ އޮތް ދުވަސްތަކުގައި ގާތްގަނޑަކަށް 85 މިލިއަން ޑޮލަރުގެ ހަރަދެއް ހިނގާނެ ކަމަށްވެސް އެ ކުންފުނިން ވަނީ ހާމަކޮށްފައެވެ. މީގެ އިތުރުން، ލޯންގްރޭންޖް ކެޕިޓަލްއާއެކު ވެފައިވާ އެއްބަސްވުމުގެ ދަށުން، 2030 ވަނަ އަހަރާ ހަމައަށް ޕިއްޒާ ހަޓްގެ ވިޔަފާރިއަށް ލިބޭ ކުރިއެރުމަށް ބަލައި، އިތުރު 75 މިލިއަން ޑޮލަރު ޔަމް ބްރޭންޑްސްއަށް ލިބުމުގެ ފުރުސަތު އޮންނާނެއެވެ.