ދިރާގު ފިންޓެކްއިން ދިރާގުޕޭ ކަސްޓަމަރުންނަށް އެންމެ ރުފިޔާއަކަށް ޕިއްޒާ ލިބޭ ޕްރޮމޯޝަނެއް އިއުލާނުކޮށްފިއެވެ.
ދިރާގުން ބުނި ގޮތުގައި، އެ ޚާއްސަ ޕްރޮމޯޝަންގެ ދަށުން މި ފަހަރު ޕިއްޒާ ލިބޭނީ މާފަންނާއި ހުޅުމާލޭ ފުރަތަމަ ފިޔަވަހީގެ ޕިއްޒާ ބޯނާއިންނެވެ.
އެ ޕްރޮމޯޝަން ކުރިއަށް ގެންދިއުމަށް ހަމަޖެހިފައިވަނީ އަންނަ ބުރާސްފަތި ދުވަހުގެ ހެނދުނު 10:00 އިން ފެށިގެންނެވެ. އަދި ކޮންމެ އައުޓްލެޓަކުން ވެސް އޯޑާ ކުރާ ފުރަތަމަ 500 ކަސްޓަމަރުންނަށް އެންމެ ރުފިޔާއަކަށް ޕިއްޒާ ލިބޭނެއެވެ.
ހަމައެކަނި ޓޭކް-އަވޭ ޚިދުމަތަށް ޚާއްސަކޮށްފައިވާ މި ޕްރޮމޯޝަންގައި، ދިރާގުޕޭގެ މިހާރުގެ ކަސްޓަމަރުންނާއި އަލަށް ގުޅޭ ކަސްޓަމަރުންނަށް ވެސް، އެޕްލިކޭޝަން ޑައުންލޯޑްކޮށް ރަޖިސްޓްރީވުމަށްފަހު ބައިވެރިވެވޭނެ ކަމަށް ދިރާގުން ބުންޏެވެ.
އެ ކުންފުނިން ބުނީ، މި ފުޓުބޯޅަ މޫސުމާ ގުޅުވައިގެން ދިރާގު ފިންޓެކްއިން ތައާރަފުކުރި މި ޕްރޮމޯޝަނަކީ، ފުޓްބޯޅައިގެ މި ފޯރިގަދަ ދުވަސްވަރު އާއިލާ އާއި ރައްޓެހިންނާއެކު އުފާވެރި ވަގުތުތަކެއް ހޭދަކުރުމަށް ކަސްޓަމަރުންނަށް ފަހިކޮށްދީފައިވާ ރަނުގެ ފުރުސަތެއް ކަމަށެވެ.
މީގެ ކުރިންވެސް ކުރިއަށް ގެންދިޔަ މިފަދަ ޕްރޮމޯޝަންތަކަށް އާންމުންގެ ފަރާތުން ވަރަށް ބޮޑު ތަރުހީބެއް ލިބި ވަރަށް ގިނަ އަދަދެއްގެ މީހުން ބައިވެރިވިކަން ދިރާގުން ފާހަގަކުރިއެވެ. އަދި މިއީ، ރާއްޖޭގެ އެކި ކަންކޮޅުތަކުގައި ތިބި ދިރާގުޕޭގެ މާޗަންޓުންނާއި ގުޅިގެން ކަސްޓަމަރުންނާ ހަމައަށް ތަފާތު އޮފާތައް ގެނެސްދިނުމަށް ދިރާގުޕޭއިން ދޭ އިސްކަން ދައްކުވައިދޭ ކަމެއް ކަމަށް އެ ކުންފުނިން ބުންޏެވެ.
ދިރާގުގެ ސަބްސިޑަރީ ކުންފުންޏެއް ކަމުގައިވާ ދިރާގު ފިންޓެކްގެ މި ޚާއްސަ ޕްރޮމޯޝަނަކީ ދިރާގުޕޭގެ ކަސްޓަމަރުންގެ އަގުވަޒަންކުރުމުގެ އިތުރުން ރާއްޖޭގައި ފައިސާގެ މުއާމަލާތްތައް ކުރުމަށް ޑިޖިޓަލް ވަސީލަތްތައް ބޭނުންކުރުމަށް ޝައުގުވެރިކަން އިތުރުކުރުމުގެ މަގުސަދުގައި ކުރިއަށްގެންދާ ޕްރޮމޯޝަނެއް ކަމަށް އެ ކުންފުނިން ބުނެއެވެ. އެ ކުންފުނީގެ އަމާޒަކީ ކަސްޓަމަރުންނަށް އިތުރު ލުއި ފަސޭހަތައް ލިބޭ ފިންޓެކް ސޮލިއުޝަންތައް ފޯރުކޮށްދިނުން ކަމަށް ދިރާގުން ބުންޏެވެ.
އެ ކުންފުނިން ބުނީ މިއީ މީގެ ކުރިން ދިރާގު ފިންޓެކުން ވިޔަފާރި ބައިވެރިންނާ ގުޅިގެން ކުރިއަށް ގެންދިޔަ '1 ރުފިޔާ' ގެ ޕްރޮމޯޝަންތަކަށް ލިބުނު ބޮޑު ތަރުހީބާއި ކާމިޔާބީއަށް ބިނާކޮށް ފަރުމާކޮށްފައިވާ ހަރަކާތެއް ކަމަށެވެ. އެ ޕްރޮމޯޝަންތަކަކީ މުޅި ރާއްޖޭގައިވެސް ކަސްޓަމަރުންގެ ބޮޑު މަގުބޫލުކަމެއް ހޯދާފައިވާ ހަރަކާތްތަކެއްކަން އެ ކުންފުނިން ފާހަގަކުރިއެވެ.
އެފަދަ މަސައްކަތްތަކުގެ ޒަރީއާއިން ދިރާގު ފިންޓެކްގެ އަމާޒަކީ ކަސްޓަމަރުންނަށް ފައިދާހުރި އުފާވެރި ތަޖުރިބާތަކެއް ފޯރުކޮށްދިނުމާއެކު، ރާއްޖޭގެ ވިޔަފާރިތަކަށް އެހީތެރިކަން ފޯރުކޮށްދީ، ބަދަހި ގުޅުމެއް ދެމެހެއްޓުން ކަމަށް ދިރާގުން ބުންޏެވެ.