އެމެރިކާ އާއި އީރާނާ ދެމެދު ހިނގަމުންދާ ހަނގުރާމަ ނިމުމަކަށް ގެނައުމަށް އެއްބަސްވުމަކަށް އައުމާއެކު، އޭޝިއާގެ ބާޒާރުގައި މިއަދު ތެލުގެ އަގު ދަށަށް ހިނގައްޖެއެވެ.
ދުނިޔޭގެ ބާޒާރުގައި ތެލުގެ އަގު ކަނޑައަޅާ މައިގަނޑު މިންގަނޑު ކަމަށްވާ ބްރެންޓް ކްރޫޑްގެ އަގު ވަނީ 4.8 އިންސައްތަ ދަށަށް ގޮސް، ފީފާއެއް 83.18 އެމެރިކާ ޑޮލަރަށް ވެއްޓިފައެވެ. އަދި އެމެރިކާގައި ވިޔަފާރިކުރާ ތެލުގެ އަގު ވަނީ 5.6 އިންސައްތަ ދަށަށް ގޮސް، ފީފާއެއް 80.13 ޑޮލަރަށް ވެއްޓިފައެވެ.
އެމެރިކާގެ ރައީސް ޑޮނަލްޑް ޓްރަމްޕް ވިދާޅުވި ގޮތުގައި، މި އެއްބަސްވުމުގެ ދަށުން ދުނިޔޭގެ ބާޒާރަށް ތެޔޮ އުފުލާ މުހިންމު ކަނޑުއޮޅިއެއް ކަމަށްވާ ހޮރުމުޒް ކަނޑުއޮޅި އަލުން ހުޅުވިގެންދާނެއެވެ.
ޕާކިސްތާނުގެ ބޮޑުވަޒީރު ޝެހްބާޒް ޝަރީފް ވިދާޅުވި ގޮތުގައި، މި އެއްބަސްވުމުގައި ރަސްމީކޮށް ސޮއިކުރުމުގެ ރަސްމިއްޔާތު އޮންނާނީ ޖޫން 19 ވާ ހުކުރު ދުވަހު ސްވިޓްޒަލޭންޑުގައެވެ. އީރާނުގެ ދައުލަތުގެ ޓީވީއާ ވާހަކަދައްކަވަމުން އީރާނުގެ ޚާރިޖީ ވުޒާރާގެ ނާއިބު ކާޒިމް ޣަރީބްއާބާދީ ވަނީ އެމެރިކާއާއެކު އެއްބަސްވުމަކަށް އާދެވިފައިވާކަން ކަށަވަރުކޮށްދެއްވާފައެވެ. ހަމައެއާއެކު، ޓްރަމްޕް ވަނީ ސޯޝަލް މީޑިއާގައި "ތެޔޮ ދައުރުވިޔަދީ" މިފަދައިން ލިޔުއްވާފައެވެ.
ފެބްރުއަރީ 28 ވަނަ ދުވަހު އެމެރިކާ އާއި އިސްރާއީލުން އީރާނަށް ދިން ވައިގެ ހަމަލާތަކަށްފަހު، ހޮރުމުޒް ކަނޑުއޮޅި އޮތީ ބަންދުކޮށްފައެވެ. ދުނިޔޭގެ ތެލާއި ލިކުއިފައިޑް ނެޗުރަލް ގޭސް (އެލްއެންޖީ) ގެ 20 އިންސައްތަ އާންމުކޮށް އުފުލާ މި މުހިންމު ކަނޑުއޮޅި ބޭނުންކުރާ އުޅަނދުތަކަށް ހަމަލާދޭނެ ކަމުގެ އިންޒާރު އީރާނުން އޮތީ ދީފައެވެ. ހަނގުރާމަ ފެށުމުގެ ކުރިން ފީފާއެއް 70 ޑޮލަރުގައި ހުރި ބްރެންޓް ކްރޫޑްގެ އަގު، ހަނގުރާމައިގެ ދުވަސްވަރު ވަނީ 120 ޑޮލަރަށް އުފުލިފައެވެ.
އެއްބަސްވުމަކަށް އާދެވުނު ނަމަވެސް، އެނާޖީ މާކެޓް އެނަލިސިސް ކުންފުނި ވެންޑާ އިންސައިޓްސްގެ ވެންޑާނާ ހަރީ ބުނި ގޮތުގައި، އެއްބަސްވެފައިވާ ކަންކަމުގެ ތަފްސީލުތައް ނޭނގުމުގެ ސަބަބުން ބާޒާރަށް ނުތަނަވަސްކަމާއި ޔަގީންކަން ކުޑަވުމުގެ މައްސަލަތައް ކުރިމަތިވުން އެކަށީގެންވެއެވެ. އަދި މީގެ ސަބަބުން ކުރިއަށް އޮތް ހަފުތާގައި ތެލުގެ ބާޒާރަށް ބޮޑެތި ބަދަލުތަކެއް އައުން އެކަށީގެންވާ ކަމަށް އޭނާ ފާހަގަކުރިއެވެ.
ކޮންސަލްޓިން ކުންފުނި ލިޕޯ އޮއިލް އެސޯސިއޭޓްސްގެ އެންޑްރޫ ލިޕޯ ބުނި ގޮތުގައި، ކަނޑުއޮޅިން މައިންތައް ސާފުކުރުމަށް ހަ މަސް ދުވަހުގެ މުއްދަތެއް ނަގާނެއެވެ. އަދި ކަނޑުއޮޅި ބޭނުންކުރުމަށް މަޑުކޮށްގެން ތިބި ގިނަ އަދަދެއްގެ ޓޭންކަރުތައް އެބަހުރި ކަމަށާއި، ތެޔޮ އުފެއްދުމާއި އުޅަނދުތަކަށް ބަރުކުރުމުގެ ކަންކަން އާންމު ހާލަތަކަށް ގެނައުމަށް ހަފުތާތަކެއް ނަގާނެ ކަމަށް އޭނާ ބުންޏެވެ.
އޭޝިއާ ސަރަހައްދަކީ ތެލާއި އެލްއެންޖީ ހޯދުމަށް މެދުއިރުމައްޗަށް ވަރަށް ބޮޑަށް ބަރޯސާވާ ސަރަހައްދަކަށް ވުމާއެކު، ހަކަތައިގެ އަގުތައް އުފުލުމުގެ ސަބަބުން އެކަމުގެ އަސަރު އެ ސަރަހައްދަށް ވަރަށް ބޮޑަށް ވަނީ ކޮށްފައެވެ.