ފައިމައްޗަށް ފައި އަރުވާލައިގެން އިނުމާއި، ސައިބުއިމާއި ނުވަތަ ކަސްރަތުކޮށްލުމަށްފަހު އަވަސްއަރުވާލައިގެން ލޭގެ ޕްރެޝަރު ބެލުމަކީ އޭގެ ނަތީޖާއަށް ބޮޑެތި ބަދަލުތަކެއް އަތުވެދާނެ ކަންކަން ކަމަށް ސިއްހީ މާހިރުން ވިދާޅުވެއެވެ.
ދުނިޔޭގެ ސިއްހަތު ޖަމްއިއްޔާ (ޑަބްލިއުއެޗްއޯ)އިން ދާދިފަހުން ވަނީ ލޭގެ ޕްރެޝަރު ސައްހަގޮތުގައި ބެލުމަށްޓަކައި ސަމާލުކަން ދޭންޖެހޭ ކަންތައްތަކުގެ ލިސްޓެއް އާންމުކޮށްފައެވެ. މި ލިސްޓުގައި ދުވަހުން ދުވަހަށް ގެންގުޅެންޖެހޭ އާދަތަކާއި ހަށިގަނޑު ބަހައްޓާ ގޮތުގެ ސަބަބުން ޕްރެޝަރުގެ ނަތީޖާއަށް ނުފޫޒު ފޯރުވާ މިންވަރު ބަޔާންކޮށްފައިވެއެވެ.
އޭގެތެރޭގައި، ލެނގޭގޮތަށް ބުރަކަށި ސަޕޯޓްވާނޭހެން އިށީނުން، ފައިމައްޗަށް ފައި ނޭރުވުމާއި، ދެފައި ބިންމަތީގައި ހަމައަށް ބެހެއްޓުން، ޕްރެޝަރު ބަލާ ކަފް (އަތުގައި އޮޅާ އެތި) ހިތާ އެއްވަރެއްގައި ބޭއްވުން، އަތާ އެކަށީގެންވާ ސައިޒުގެ ކަފްއެއް ބޭނުންކުރުން، ޕްރެޝަރު ބެލުމުގެ ކުރިން މަދުވެގެން ފަސް މިނެޓު އަރާމުކޮށްލުން، ޕްރެޝަރު ބަލާ ވަގުތު ވާހަކަ ނުދެއްކުން އަދި ޕްރެޝަރު ބެލުމުގެ 30 މިނެޓު ކުރިން ކަސްރަތު ކުރުމާއި، ސައި ނުވަތަ ކޮފީ ބުއިމާއި، ދުންފަތުގެ އިސްތިއުމާލު ކުރުމުން ދުރުހެލިވުން ހިމެނެއެވެ.
ޖިސްމާނީ ހަރަކާތްތަކާއި، ސްޓްރެސްއާއި، ކެފެއިން އަދި ދުންފަތުގެ އިސްތިއުމާލު ކުރުމުގެ ސަބަބުން ލޭގެ ޕްރެޝަރު ވަގުތީ ގޮތުން މަތިވާ ކަމަށް ސިއްހީ މާހިރުން ވިދާޅުވޭ--ފޮޓޯ/އިންޑިއަންއެކްސްޕްރެސް
މި އިރުޝާދުތަކުގެ މުހިންމުކަމާ ގުޅޭގޮތުން މުމްބާއީގެ ވޮކްހާޑް ހޮސްޕިޓަލުގެ ކާޑިއޮލޮޖިސްޓް ޑރ. ޕަރިން ސަންގޯއީ ވިދާޅުވީ، ލޭގެ ޕްރެޝަރު މަތިވުން ދެނެނުގަނެވި ނުވަތަ ކޮންޓްރޯލް ނުކުރެވި ގިނަ ދުވަސްވުމަކީ އެއްވެސް އަލާމާތެއް ނުފެނި ހަށިގަނޑުގެ ގުނަވަންތަކަށް ބޮޑެތި ގެއްލުންތަކެއް ލިބިދާނެ ކަމެއް ކަމަށެވެ.
"ލޭގެ ޕްރެޝަރު މަތިވުމަކީ ހަގީގަތުގައި 'ސައިލެންޓް ކިލައެއް'. ސަބަބަކީ ގިނަ މީހުންނަށް އޭގެ އަލާމާތްތައް ފެންނަން ފަށަނީ ހަށިގަނޑަށް ބޮޑެތި ގެއްލުންތަކެއް ލިބޭ ފަހުން. ނުބައި ނަތީޖާތަކަށް ބަރޯސާވެގެން ނުވަތަ ގަވާއިދުން ޕްރެޝަރު ނުބަލާ ނަމަ، ހިތާއި، ސިކުނޑިއާއި، ކިޑްނީއާއި، ލޮލާއި އަދި ލޭހޮޅިތަކަށް އަހަރުތަކެއް ވަންދެން ގެއްލުން ލިބެމުންދާނެ" ޑރ. ޕަރިން ސަންގޯއީ ވިދާޅުވެފައިވެއެވެ.
ޑރ. ޕަރިން ސަންގޯއީ އިތުރަށް ވިދާޅުވީ، ގިނަ ބަޔަކަށް ލޭގެ ޕްރެޝަރު މަތިކަން އެނގެނީ ހާޓް އެޓޭކެއް ނުވަތަ ސްޓްރޯކެއް ފަދަ ނުރައްކާތެރި ހާލަތެއް މެދުވެރިވުމުން ކަމަށެވެ.
ކެފެއިންގެ ސަބަބުން އެޑްރެނަލިން ފަދަ ސްޓްރެސް ހޯމޯންތައް އުފައްދާ ކަމަށާއި، މީގެ ސަބަބުން ފުރަމޭއިން ލޭގެ ތެރެއަށް އިތުރަށް ގްލޫކޯޒް ދޫކުރުމަށް ބާރުއަޅާ ކަމަށް ޑރ. ޕަރިން ސަންގޯއީ ވިދާޅުވެފައިވެއެވެ. މިއީ ހަކުރު ބަލި ހުންނަ މީހުންނަށް ވަގުތީ ގޮތުން ލޭގެ ހަކުރު މަތިވުމަށް މެދުވެރިވާ ސަބަބެކެވެ.
ޒުވާން އުމުރުގައި ވެސް ގަވާއިދުން ލޭގެ ޕްރެޝަރު ބެލުމަކީ ދުޅަހެޔޮ ސިއްހަތެއްގައި ހުރުމަށް ކުރަންޖެހޭ މުހިއްމު ކަމެއް ކަމަށް ޑޮކްޓަރުން ވިދާޅުވޭ--ފޮޓޯ/އިންޑިއަންއެކްސްޕްރެސް
ޑރ. ސަންގޯއީ ވިދާޅުވި ގޮތުގައި، ފައިމައްޗަށް ފައި އެރުވުމާއި، ވާހަކަ ދެއްކުމާއި، ބުރަކަށި ޖައްސައިގެން ނީނުމަކީ ޕްރެޝަރުގެ ނަތީޖާ އޮޅިގެންދާ ކަންކަމެވެ.
މިފަދަ ކުދިކުދި ކަންތައްތަކުގެ ސަބަބުން ބައެއް ފަހަރު ޕްރެޝަރު ނެތް މީހަކު ޕްރެޝަރު ހުރި މީހެއްގެ ގޮތުގައި ނުވަތަ ޕްރެޝަރު ހުރި މީހަކު އެއީ އާދައިގެ މީހެއްގެ ގޮތުގައި ނިންމިދާނެއެވެ. ބަލިމީހުންނަށް ފަރުވާ ދިނުމުގައި ބަލަނީ މި ނަތީޖާތަކަށް ކަމަށްވާތީ، ޕްރެޝަރު ބެލުމުގައި ރަނގަޅު ގޮތްތައް ބޭނުންކުރުމަކީ ވަރަށް މުހިންމު ކަމެކެވެ.
ޖިސްމާނީ ހަރަކާތްތަކާއި، ސްޓްރެސްއާއި، ކެފެއިން އަދި ދުންފަތުގެ އިސްތިއުމާލު ކުރުމުގެ ސަބަބުން ލޭގެ ޕްރެޝަރު ވަގުތީ ގޮތުން މަތިވެއެވެ. ސިޑިން އެރުމަށްފަހު ނުވަތަ ސައި ބުއިމަށްފަހު ވަގުތުން ޕްރެޝަރު ބަލައިފިނަމަ، ފެންނަ ނަތީޖާ އަކީ އެ މީހެއްގެ އަސްލު ޕްރެޝަރެއް ނޫނެވެ.
އެހެންކަމުން، ޕްރެޝަރު ބެލުމުގެ ކުރިން ފަސް މިނެޓު މަޑުން އިނުމަށާއި، 30 މިނެޓު ކުރިން ސައި ނުވަތަ ކަސްރަތުން ދުރުހެލިވުމަށް ޑޮކްޓަރުން ލަފާދެއްވައެވެ. ޒުވާން އުމުރުގައި ވެސް ގަވާއިދުން ލޭގެ ޕްރެޝަރު ބެލުމަކީ ދުޅަހެޔޮ ސިއްހަތެއްގައި ހުރުމަށްޓަކައި ކުރަންޖެހޭ ވަރަށް މުހިންމު ކަމެއް ކަމަށް ޑރ. ސަންގޯއީ ވަނީ ފާހަގަކުރައްވާފައެވެ.