ދޮށީ އުމުރުގައި ހަރަކާތްތެރި ދިރިއުޅުމެއް އުޅުމަކީ އިންސާނާގެ އާންމު ސިއްހަތާއި ދުޅަހެޔޮކަމަށް ނުހަނު މުހިންމު ކަމެކެވެ. އާންމު ގޮތެއްގައި ހަރަކާތްތެރިވެ އުޅުމާއި ކަސްރަތުކުރުމަކީ ދެ ކަމެއްގެ ގޮތުގައި މާހިރުން ސިފަކުރެއެވެ. ޖިސްމާނީ ހަރަކާތްތެރިކަމަކީ ހަކަތަ ބޭނުންކޮށްގެން ކައްޓާއި މަސްތަކުން އުފައްދާ ކޮންމެ ހަރަކާތެކެވެ. ނަމަވެސް ކަސްރަތަކީ ސިއްހަތު ރަނގަޅުކުރުމުގެ މަގުސަދުގައި ރާވައިގެން، ވަކި ތަރުތީބަކުން ތަކުރާރުކޮށް ކުރާ ޖިސްމާނީ ހަރަކާތްތަކެކެވެ. މި ދެ ކަމަކީވެސް އުމުރުން ދުވަސްވީ މީހުންގެ ހަށިގަނޑު ވަރުގަދަކޮށް، ބެލެންސް ރަނގަޅުކޮށް، އަމިއްލަ މިނިވަންކަންމަތީ ގިނަ ދުވަހު ދެމިތިބުމަށް އެހީތެރިވެދޭނެ ކަންކަމެވެ.
އެމެރިކާގެ ސެންޓާސް ފޯ ޑިޒީޒް ކޮންޓްރޯލް އެންޑް ޕްރިވެންޝަން (ސީޑީސީ) އިން ބުނާ ގޮތުގައި، މެދުމިނުން ފެށިގެން ބާރުމިނެއްގައި ކުރާ އެންމެ ކަސްރަތު ސެޝަނަކުންވެސް ސިއްހަތަށް ވަގުތީ ގޮތުން ގިނަ ފައިދާތަކެއް ލިބިގެންދެއެވެ.
ހަރަކާތްތެރިކަން ކުޑަވުމަކީ ސިއްހީ ގިނަ މައްސަލަތަކަކަށް މަގުފަހިކުރުވާ ކަމެކެވެ. އޭގެ ތެރޭގައި ބަރުދަން އިތުރުވުމާއި، ފަލަވުމާއި، ގައިންގަޔަށް ނާރާ ބަލިތައް ކަމަށްވާ ހިތުގެ ބަލި، ސްޓްރޯކް އަދި ހަކުރުބަލި ފަދަ ދިގުމުއްދަތަކަށް ފަރުވާކުރަންޖެހޭ ބަލިތައް ހިމެނެއެވެ.
ސީޑީސީން ފާހަގަކުރާ ގޮތުގައި ގަވާއިދުން ކަސްރަތުކުރުމުން ބަރުދަން އެއްވަރެއްގައި ހިފެހެއްޓުމަށާއި، ބައެއް ބާވަތުގެ ކެންސަރު ޖެހުމުގެ ނުރައްކާ ކުޑަކުރުމަށާއި، ކަށިތަކާއި މަސްތައް ވަރުގަދަކުރުމަށް އެހީތެރިވެދެއެވެ. މީގެ އިތުރުން، ވެއްޓުމުގެ ނުރައްކާ ކުޑަކޮށްދީ، ހަށިގަނޑުގައި އަޅާ ވޭން ކުޑަކޮށްދީ، މީހާގެ އަމިއްލަވަންތަކަން ދެމެހެއްޓުމަށްވެސް މިއީ މުހިންމު ކަމެކެވެ.
ޖިސްމާނީ ފައިދާތަކުގެ އިތުރުން، ނަފްސާނީ ގޮތުންވެސް ކަސްރަތުގެ ސަބަބުން ގިނަ ފައިދާތަކެއް ލިބެއެވެ. އޭގެ ތެރޭގައި ޑިމެންޝިއާ ޖެހުމުގެ ނުރައްކާ ކުޑަކޮށްދިނުން ނުވަތަ އެ ބަލި ޖެހުން ލަސްކޮށްދިނުން ހިމެނެއެވެ.
އިނގިރޭސިވިލާތުގެ ނޭޝަނަލް ހެލްތު ސާވިސް (އެންއެޗްއެސް) އިން ބުނާ ގޮތުގައި ގަވާއިދުން ހަރަކާތްތެރިވެ އުޅުމަކީ އަމިއްލަ ނަފްސަށް އޮންނަ އިތުބާރު ބޮޑުކޮށްދޭ ކަމެކެވެ. އަދި ހާސްކަމާއި، ސްޓްރެސް އަދި ސިކުނޑީގެ ވަރުބަލިކަން ކުޑަކޮށްދީ، ރުޅިގަދަވުމާއި މާޔޫސްވުން ފަދަ އިހުސާސްތައް ކޮންޓްރޯލްކުރުމަށް ސިކުނޑިއަށް ހަމަޖެހުން ގެނެސްދެއެވެ. މީގެ އިތުރުން، އާއިލާއާއި ރައްޓެހިންނާއެކު ނުވަތަ އާ މީހުންނާއެކު ވަގުތު ހޭދަކުރުމަށް ފުރުސަތު ލިބި، އެކަނިވެރިކަން ފިލުވައިދީ، ނިދީގެ ފެންވަރު ރަނގަޅުކޮށްދެއެވެ.
އުމުރުން 65 އަހަރުން މަތީގެ މީހުންނަށް ސީޑީސީން ލަފާދެނީ ހަފްތާއަކު މަދުވެގެން 150 މިނެޓު ވަންދެން މެދުމިނުގެ ބާރުމިނެއްގައި ކަސްރަތު ކުރުމަށެވެ. ނުވަތަ 75 މިނެޓު ވަންދެން ބާރުމިނެއްގައި ކަސްރަތު ކުރުމަށެވެ. މީގެ އިތުރުން، ހަފްތާއަކު މަދުވެގެން ދެ ދުވަހު މަސްތައް ވަރުގަދަކުރާ ކަސްރަތުތަކާއި ބެލެންސް ރަނގަޅުކުރާ ކަސްރަތުތައް ކުރުމަށްވެސް އެ އިދާރާއިން އިރުޝާދުދެއެވެ. މި 150 މިނެޓުގެ ކަސްރަތު، ހަފްތާގެ ފަސް ދުވަހަށް ބަހާލައިގެން ދުވާލަކު 30 މިނެޓު، ނުވަތަ ކޮންމެ ދުވަހަކު 22 މިނެޓު ކުރުމަށްވެސް ރޭވިދާނެއެވެ.
މެދުމިނުގެ ކަސްރަތާއި ބާރުމިނުގެ ކަސްރަތު ތަފާތުކުރާނެ ގޮތްތަކެއްވެސް ކަނޑައަޅާފައިވެއެވެ. މެދުމިނުގެ ކަސްރަތެއް ކުރާއިރު ނޭވާލާން އުނދަގޫވެ ހިތުގެ ވިންދު އަވަސްވާނެއެވެ. ނަމަވެސް އެހެން މީހުންނާ ވާހަކަދެއްކޭނެއެވެ. އެކަމަކު ލަވައެއް ނުކިޔޭނެއެވެ. ބާރުމިނުގެ ކަސްރަތެއް ކުރާއިރު ނޭވާލާން ވަރަށް ބޮޑަށް އުނދަގޫވެ، ހިތުގެ ވިންދު ވަރަށް ބޮޑަށް އަވަސްވެ، ނޭވާ ކުރުނުވެ މަދު ބަސްކޮޅަކަށްވުރެ ގިނައިން ވާހަކައެއް ނުދެއްކޭނެއެވެ. އެރޯބިކް ނުވަތަ ކާޑިއޯ ކަސްރަތުތަކުގެ ތެރޭގައި ނެށުމާއި، ގޯތިތެރެ ސާފުކުރުމާއި، ފިހާރައަށް ހިނގާފައި ދިއުމާއި، ޔޯގާ ހެދުމާއި، ބައިސްކަލު ދުއްވުމާއި، ހިނގާލަން ދިއުމުގެ އިތުރުން މޫދުގައި ކުރާ ކަސްރަތުތައް ހިމެނެއެވެ. މަސްތައް ވަރުގަދަކުރުމަށް ކުރެވިދާނެ ކަންކަމުގެ ތެރޭގައި ޔޯގާ ހެދުމާއި، ބަގީޗާގައި މަސައްކަތްކުރުމާއި، ރެސިސްޓެންސް ބޭންޑް ބޭނުންކުރުމާއި، ބަރު އުފުލުމާއި، ޕުޝްއަޕް ނުވަތަ ސިޓްއަޕް ފަދަ ހަށިގަނޑުގެ ބަރުދަން ބޭނުންކޮށްގެން ކުރާ ކަސްރަތުތައް ހިމެނެއެވެ.
ދުނިޔޭގެ އާބާދީގެ ގާތްގަނޑަކަށް 31 އިންސައްތަ މީހުންނަކީ ލަފާދީފައިވާ މިންވަރަށް ޖިސްމާނީ ހަރަކާތްތެރިކަން ނުބަހައްޓާ މީހުންނެވެ. ދިރިއުޅުމުގައި ހަރަކާތްތެރިކަން އިތުރުކުރުމަށްޓަކައި ލަސްލަހުން ފަށައި، މަޑުމަޑުން ކަސްރަތުކުރާ މިންވަރު އިތުރުކުރެވިދާނެއެވެ. އަނިޔާވުމުގެ ނުރައްކާ ކުޑަކުރުމަށްޓަކައި ތަފާތު ބާވަތްތަކުގެ ކަސްރަތުތައް ކުރުން މުހިންމެވެ. އަދި ސިޑިން އެރުން ފަދަ ކަންކަމަކީ އުނދަގޫ ކަމަކަށް ވާނަމަ، ތިމާއާ ގުޅޭ ފަސޭހަ އެހެން ހަރަކާތްތައް ހޯދިދާނެއެވެ. ގޭތެރޭގެ މަސައްކަތްތަކާއި، ވިނަ ކޮށުމާއި، ބާޒާރުކޮށްގެން ތަކެތި އުފުލުން ފަދަ ކަންކަމަކީވެސް ޖިސްމާނީ ހަރަކާތްތަކެވެ. މޫސުން ގޯސްވެ، މާ ހޫނުގަދަ ނުވަތަ ފިނިގަދަ ދުވަސްދުވަހު ބޭރަށް ނުދެވޭނަމަ، ގޭގައި ތިބެގެން އޮންލައިން ޕްރޮގްރާމްތަކުގެ އެހީގައި ކަސްރަތު ކުރެވިދާނެއެވެ. ބަލިވެ އުޅުމުގެ ސަބަބުން ނުވަތަ ދަތުރެއްގައި އުޅުމުގެ ސަބަބުން ކަސްރަތުކުރުން މެދުކަނޑާލަން ޖެހުނު ނަމަވެސް، އަލުން ފަށާއިރު މަޑުމަޑުން ފަށައިގެން ކުރީގެ ހާލަތަށް ގެންދިއުމަށް ސަމާލުކަން ދޭންވާނެއެވެ.
މިފަދަ ކަސްރަތު ޕްރޮގްރާމްތަކަށް އެހީތެރިވުމުގެ ގޮތުން ބައެއް ގައުމުތަކުގައި ޚާއްސަ އިންތިޒާމުތައް ހަމަޖައްސާފައިވެއެވެ. މިގޮތުން އެމެރިކާގެ މެޑިކެއާ އެޑްވާންޓޭޖް ޕްލޭންތަކުން 'ސިލްވާސްނީކާސް' ޕްރޮގްރާމްގެ ނަމުގައި ޖިމް މެމްބަާޝިޕާއި ކަސްރަތު ޕްރޮގްރާމްތައް އިތުރު އިނާޔަތެއްގެ ގޮތުގައި ފޯރުކޮށްދެއެވެ. ހަމައެއާއެކު، ސިއްހަތު ރަނގަޅުކުރުމަށްޓަކައި ޑޭޝް ޑައިޓް ފަދަ ކެއުމުގެ އާދަތަކަށް ބަދަލުކުރާއިރު، ކާންވީ ކޮން ބާވަތްތަކެއްކަން ހަނދާން ބެހެއްޓުމާއި، މަދުކުރަންވީ ނުވަތަ ދުރުހެލިވާންވީ ބާވަތްތައް ދެނެގަތުމާއި، ބޭރުން ކާއިރު ޑައިޓާ ގުޅޭ ކާނާ އިޚުތިޔާރުކުރުމުގެ އިތުރުން، ސަގާފީ ކެއުންތަކާ ޑައިޓް ގުޅުވާލުމަކީ ގިނަ ބަޔަކަށް ދިމާވާ ގޮންޖެހުންތަކެކެވެ.
ކޮންމެއަކަސް، އާ ކަސްރަތު ޕްރޮގްރާމެއް ފެށުމުގެ ކުރިން ސިއްހީ ދާއިރާގެ ތަޖުރިބާކާރެއްގެ ލަފާ ހޯދުމަކީ ކޮންމެހެން ކުރަންޖެހޭނެ ކަމެކެވެ. ޚާއްސަކޮށް ދިގުމުއްދަތަކަށް ފަރުވާކުރަންޖެހޭ ބައްޔެއް ހުންނަ ނަމަ ނުވަތަ ޖިސްމާނީ ނުކުޅެދުންތެރިކަމެއް ހުންނަ ނަމަ، ރައްކާތެރިކަމާއެކު ކަސްރަތުކުރާނެ ގޮތުގެ އިރުޝާދު ޑޮކްޓަރުންގެ ކިބައިން ހޯދަންވާނެއެވެ.